(1)

L-iżgurar ta’ tassazzjoni ġusta fis-suq intern u l-funzjonament tajjeb tal-unjoni tas-swieq kapitali (CMU - capital markets union) huma fost il-prijoritajiet politiċi ewlenin għall-Unjoni. F’dak il-kuntest, huwa kritiku li waqt li jiġu miġġielda l-frodi tat-taxxa u l-abbuż tat-taxxa jitneħħew l-ostakli għall-investiment transfruntier. Dawn l-ostakli jeżistu, pereżempju, f’każijiet fejn jeżistu proċeduri ineffiċjenti u ta’ piż sproporzjonat sabiex jinħelsu t-taxxi f’ras il-għajn eċċessivi fuq l-introjtu minn dividendi jew imgħax imħallas fuq ishma jew bonds innegozjati pubblikament lil investituri mhux residenti. Barra minn hekk, f’xi każijiet, is-sitwazzjoni attwali rriżultat inadegwata biex tipprevjeni riskji rikorrenti ta’ frodi tat-taxxa, evażjoni tat-taxxa u evitar tat-taxxa, kif muri minn bosta każijiet ta’ skemi ta’ talbiet għall-irkupru multiplu tal-istess taxxa u frodi li jinvolvu l-użu ta’ arbitraġġ tad-dividendi jew tneħħija (“strippaġġ”) tad-dividendi (Cum/Ex u Cum/Cum). Din id-Direttiva għalhekk għandha l-għan li tagħmel il-proċeduri tat-taxxa f’ras il-għajn aktar effiċjenti, filwaqt li ssaħħaħhom kontra r-riskju ta’ frodi u abbuż tat-taxxa.

(2)

Sabiex tissaħħaħ il-kapaċità tal-Istati Membri li jipprevjenu u jiġġieldu l-frodi tat-taxxa u l-abbuż tat-taxxa, li bħalissa hija mfixkla minn nuqqas ġenerali ta’ informazzjoni affidabbli u f’waqtha dwar l-investituri, jeħtieġ li tiġi prevista l-possibbiltà ta’ qafas komuni għall-ħelsien mit-taxxi f’ras il-għajn eċċessivi fuq investimenti transfruntieri f’titoli reżiljenti għar-riskju ta’ frodi tat-taxxa u ta’ abbuż tat-taxxa. Dak il-qafas iwassal għal konverġenza fost id-diversi proċeduri tal-ħelsien applikati fl-Istati Membri filwaqt li jiżgura t-trasparenza u ċ-ċertezza fir-rigward tal-identità tal-investituri għall-emittenti tat-titoli, għall-aġenti tat-taxxa f’ras il-għajn, għall-intermedjarji finanzjarji u għall-Istati Membri, skont il-każ. F’dak is-sens, jenħtieġ li l-qafas iserraħ fuq proċeduri awtomatizzati, bħad-diġitalizzazzjoni taċ-ċertifikat ta’ residenza tat-taxxa f’termini kemm ta’ proċedura kif ukoll ta’ forma. Jenħtieġ li l-qafas ikun ukoll flessibbli biżżejjed biex iqis kif xieraq id-diversi sistemi applikabbli fi Stati Membri differenti filwaqt li jipprovdi għodod adatti kontra l-abbuż sabiex jittaffa r-riskju ta’ frodi tat-taxxa, evażjoni tat-taxxa u evitar tat-taxxa. F’dak ir-rigward, jeħtieġ li jiġu meqjusa approċċi differenti tal-awtoritajiet tat-taxxa, skont is-sistema tal-ħelsien fis-seħħ. Taħt is-sistema tal-ħelsien mit-taxxa f’ras il-għajn, l-awtoritajiet tat-taxxa jistgħu jiksbu biss informazzjoni rilevanti dwar l-investituri u l-katina tal-pagamenti wara li jiġi applikat il-ħelsien. B’kuntrast, meta tiġi applikata sistema ta’ rifużjoni, huwa kruċjali li l-awtoritajiet tat-taxxa jiksbu informazzjoni adegwata qabel ma jiġi applikat il-ħelsien sabiex jivvalutaw jekk il-ħelsien għandux jingħata. Fiż-żewġ sistemi tal-ħelsien hemm stabbiliti regoli dwar ir-responsabbiltà tal-intermedjarju finanzjarju f’każ ta’ ħelsien mhux dovut. Din id-Direttiva ma tirrestrinġix il-kapaċità tal-Istati Membri li jirregolaw il-mezzi li bihom l-intermedjarji finanzjarji ċċertifikati jirkupraw kwalunkwe nefqa li jġarrbu biex jadattaw għall-obbligi li tistabbilixxi d-Direttiva jew biex jikkonformaw magħha.

(3)

Meta jitqiesu dawk id-differenzi kif ukoll il-prinċipju tal-proporzjonalità, jenħtieġ li d-dispożizzjonijiet ta’ din id-Direttiva dwar ir-reġistri nazzjonali ta’ intermedjarji finanzjarji ċċertifikati u l-obbligi li tiġi rrapportata l-informazzjoni ma jkunux vinkolanti għal dawk l-Istati Membri li għandhom fis-seħħ sistema komprensiva tal-ħelsien mit-taxxa f’ras il-għajn u proporzjon ta’ kapitalizzazzjoni tas-suq taħt ċertu livell limitu, kif definit f’din id-Direttiva. Jenħtieġ li l-objettiv li jiġu promossi sistemi effiċjenti u robusti għall-ħelsien mit-taxxa f’ras il-għajn eċċessiva fis-suq intern kollu jitqies li ntlaħaq fejn l-Istati Membri li jkomplu japplikaw is-sistema nazzjonali tagħhom tal-ħelsien mit-taxxa f’ras il-għajn jissodisfaw dawk iż-żewġ kriterji kif stipulatf’din id-Direttiva. L-ewwel nett, il-kriterju tal-kapitalizzazzjoni tas-suq jikkorrelata mad-daqs tal-ekonomija u l-iskala possibbli ta’ pagamenti ta’ dividendi. Kapitalizzazzjoni baxxa tas-suq timplika volumi baxxi ta’ distribuzzjonijiet tad-dividendi u għalhekk riskju aktar baxx ta’ abbuż tat-taxxa. Meta Stat Membru jilħaq jew jaqbeż il-livell limitu tal-proporzjon tal-kapitalizzazzjoni tas-suq għal ċertu perjodu ta’ żmien, jenħtieġ li japplikaw ir-regoli komuni ta’ din id-Direttiva u jenħtieġ li dawn jibqgħu applikabbli irrispettivament minn jekk fi kwalunkwe ħin aktar tard il-proporzjon tal-kapitalizzazzjoni tas-suq tiegħu jaqax jew le taħt dak il-livell limitu. It-tieni, jenħtieġ li s-sistemi komprensivi tal-ħelsien mit-taxxa f’ras il-għajn li jippermettu l-applikazzjoni tar-rata tat-taxxa xierqa fil-mument tal-pagament b’mod sempliċi u effiċjenti jitqiesu li huma ekwivalenti għas-sistema tal-ħelsien mit-taxxa f’ras il-għajn stipulata f’din id-Direttiva. Dawk iż-żewġ kriterji flimkien jistgħu jiżguraw li l-investituri fis-suq intern kollu jkollhom aċċess effettiv għal proċeduri effiċjenti tal-ħelsien mit-taxxa f’ras l-għajn fl-Istati Membri kollha. Għall-Istati Membri li għandhom suq tal-istokks relattivament żgħir u sistema nazzjonali ta’ ħelsien mit-taxxa f’ras il-għajn hija effiċjenti biżżejjed, rekwiżit biex jinbiddlu dawk is-sistemi ma jitqiesx li huwa proporzjonat. Barra minn hekk, peress li r-regoli komuni ta’ din id-Direttiva jkopru kważi s-suq intern kollu, jinkiseb livell ta’ konverġenza xieraq.

(4)

Din id-Direttiva tarmonizza l-aċċess għal sistemi tal-ħelsien għall-investituri fl-Istati Membri kollha billi tipprevedi sistema komuni tal-ħelsien mit-taxxa f’ras il-għajn u sistema komuni ta’ rifużjoni rapida, filwaqt li tħalli lill-Istati Membri l-possibbiltà li jżommu s-sistemi nazzjonali tagħhom tal-ħelsien mit-taxxa f’ras il-għajn, taħt ċerti kundizzjonijiet u b’kunsiderazzjoni għad-differenzi fl-iżvilupp tal-ekonomiji tal-Istati Membri, u filwaqt li tiżgura l-aċċess għas-sistemi tal-ħelsien fl-Istati Membri. Fi kwalunkwe każ, skont il-kriterji tal-valutazzjoni tar-riskju, l-Istati Membri kkonċernati li jqisu li jkun xieraq li, pereżempju, jsaħħu l-istrumenti tagħhom għall-ġlieda kontra l-frodi tat-taxxa u l-abbuż tat-taxxa, jistgħu japplikaw l-għodod previsti f’din id-Direttiva.

(5)

Sabiex titqies bħala komprensiva, jenħtieġ li sistema nazzjonali tal-ħelsien mit-taxxa f’ras il-għajn ikun fiha għadd ta’ karatteristiċi ewlenin speċifiċi kif stipulat f’din id-Direttiva. Jenħtieġ li tipprovdi aċċess wiesa’ lill-persuni fiżiċi jew lill-entitajiet li jkunu intitolati għal tali ħelsien u tipprovdi ħelsien jekk il-kontribwent ikun intitolat għaliha, ħlief fil-każ ta’ nuqqas ta’ rapportar tal-informazzjoni li hija meħtieġa mill-Istat Membru. Fil-prinċipju, jenħtieġ li l-informazzjoni meħtieġa ma tmurx lil hinn mid-data msemmija fl-Artikoli 12, 13 jew 15. Jenħtieġ li s-sistema nazzjonali ta’ ħelsien mit-taxxa f’ras il-għajn tipprovdi aċċess kemm għall-investimenti diretti kif ukoll għal dawk indiretti u jenħtieġ li ma jkollhiex ostakli addizzjonali għad-dħul għajr dawk previsti fl-Artikolu 11(2). Għalhekk, jenħtieġ li s-sistema nazzjonali ta’ ħelsien mit-taxxa f’ras il-għajn ma tagħtix biss il-possibbiltà legali tal-ħelsien, iżda jenħtieġ li l-ħelsien jingħata wkoll de facto, meta l-kontribwent ikun intitolat għalih. Jenħtieġ li s-sistema nazzjonali ta’ ħelsien mit-taxxa f’ras il-għajn ma timponix obbligu addizzjonali bħal pereżempju sistema parallela ta’ rapportar. Jenħtieġ li l-Istat Membru jistabbilixxi regoli dwar ir-responsabbiltà għat-telf fid-dħul mit-taxxa f’ras il-għajn u penali applikabbli għall-ksur tad-dispożizzjonijiet nazzjonali dwar dik is-sistema tal-ħelsien mit-taxxa f’ras il-għajn. Fir-rigward tal-kundizzjoni tal-proporzjon tal-kapitalizzazzjoni tas-suq, jenħtieġ li l-Awtorità Ewropea tat-Titoli u s-Swieq (ESMA) tipprovdi d-data meħtieġa skont l-istandards tekniċi regolatorji. Meta Stat Membru ma jissodisfax jew ma jibqax jissodisfa mill-inqas waħda miż-żewġ kundizzjonijiet dwar is-sistema komprensiva tal-ħelsien mit-taxxa f’ras il-għajn u l-livell limitu tal-proporzjon tal-kapitalizzazzjoni tas-suq, jenħtieġ li jittrasponi fil-leġiżlazzjoni nazzjonali d-dispożizzjonijiet kollha ta’ din id-Direttiva.

(6)

Sabiex jiġi żgurat approċċ proporzjonat, jenħtieġ li din id-Direttiva tkopri proċeduri tal-ħelsien mit-taxxi f’ras il-għajn eċċessivi biss f’dawk l-Istati Membri li jimponu taxxa f’ras il-għajn fuq id-dividendi fi flus kontanti jew fi stokks b’rati differenti skont ir-residenza tat-taxxa tal-investitur speċifiku. F’każijiet tali, hemm bżonn li l-Istati Membri jipprovdu ħelsien fejn tkun ġiet applikata rata ogħla ta’ taxxa f’sitwazzjoni li għaliha tkun applikabbli rata aktar baxxa. Jenħtieġ li l-Istati Membri jkollhom ukoll l-opportunità li jimplimentaw proċeduri simili fir-rigward tal-pagamenti ta’ mgħax lil persuni mhux residenti fuq bonds innegozjati pubblikament, biex itejbu l-effiċjenza tal-proċedura tal-ħelsien rilevanti u biex jiżguraw livell ogħla ta’ konformità tal-kontribwenti. L-Istati Membri li ma għandhomx bżonn proċeduri tal-ħelsien fir-rigward ta’ taxxi f’ras il-għajn eċċessivi fuq id-dividendi u l-imgħax, skont il-każ, ma humiex ikkonċernati mill-proċeduri msemmija f’din id-Direttiva. Meta jkun meħtieġ ħelsien mit-taxxi f’ras il-għajn eċċessivi u biex jiġi żgurat aċċess komuni għall-ħelsien mit-taxxi f’ras il-għajn eċċessivi, jenħtieġ li din id-Direttiva tipprevedi sistema komuni tal-ħelsien mit-taxxa f’ras il-għajn u sistema ta’ rifużjoni rapida li għandhom jiġu implimentati mill-Istati Membri.

(7)

Minħabba li l-investituri jistgħu jkunu jinsabu fi kwalunkwe Stat Membru, jenħtieġ li r-regoli għal ċertifikat diġitali ta’ residenza tat-taxxa (eTRC) komuni japplikaw fl-Istati Membri kollha. Sabiex jiġi żgurat li l-kontribwenti kollha tal-Unjoni jkollhom aċċess għal prova komuni, xierqa u effettiva tar-residenza tat-taxxa tagħhom, jenħtieġ li l-Istati Membri jużaw proċeduri awtomatizzati għall-ħruġ ta’ ċertifikati ta’ residenza tat-taxxa għall-finijiet tal-applikazzjoni ta’ sistema tal-ħelsien mit-taxxa f’ras il-għajn, sistema komprensiva tal-ħelsien mit-taxxa f’ras il-għajn, sistema ta’ rifużjoni rapida jew sistema ta’ rifużjoni standard sabiex jiksbu ħelsien mit-taxxa f’ras il-għajn eċċessiva fuq dividendi mħallsa għal ishma nnegozjati pubblikament jew fuq imgħax imħallas għal bonds innegozjati pubblikament, jekk applikabbli. Barra minn hekk, jenħtieġ li l-eTRCs jinħarġu fl-istess forma diġitali rikonoxxibbli u aċċettabbli u bl-istess kontenut.

(8)

Sabiex ikun hemm effiċjenza akbar, jenħtieġ li l-eTRC ikopri perjodu massimu tas-sena kalendarja jew tas-sena fiskali, bħal sena fiskali straddle jew sena fiskali itwal minn sena kalendarja waħda, li jinħareġ għaliha u jenħtieġ li jibqa’ validu għaċ-ċertifikazzjoni tar-residenza għall-perjodu kopert. Jenħtieġ li l-Istati Membri emittenti jkunu jistgħu jinvalidaw kompletament jew parzjalment eTRC jekk l-awtoritajiet tat-taxxa jkollhom provi li l-kontribwent mhux resident tal-Istat Membru emittenti għall-perjodu kopert kollu jew għal parti minnu. Sabiex l-entitajiet tal-Unjoni ikunu jistgħu jiġu identifikati b’mod effiċjenti, jenħtieġ li l-eTRC jinkludi n-numru ta’ identifikazzjoni tat-taxxa jew, fin-nuqqas tiegħu, jiġifieri meta l-Istat Membru kkonċernat ma joħroġx tali numri għall-kontribwenti tiegħu, ekwivalenti funzjonali għal finijiet ta’ taxxa. Barra minn hekk, meta l-awtorità emittenti tal-eTRC ikollha din id-data, jenħtieġ li l-eTRC jinkludi l-identifikatur uniku Ewropew (EUID) jew l-identifikatur ta’ entità ġuridika (LEI) jew kwalunkwe numru ta’ reġistrazzjoni ta’ entità ġuridika li jkun validu għall-perjodu kopert kollu. Barra minn hekk, fil-każ li ma jkun jeżisti l-ebda numru ta’ identifikazzjoni tat-taxxa għal persuna fiżika, minħabba li l-Istat Membru ta’ residenza ma joħroġx tali numri għall-kontribwenti tiegħu, jenħtieġ li jkun possibbli wkoll l-użu ta’ ekwivalenti funzjonali għal finijiet ta’ taxxa. Jenħtieġ li l-identifikaturi użati jkunu validi għall-perjodu kopert kollu.

(9)

L-eTRC għandu jkun fih referenza għat-trattat kontra t-taxxa doppja, li fir-rigward tiegħu kontribwent jitlob li jitqies bħala resident għal finijiet ta’ taxxa, fejn applikabbli. Sabiex l-eTRC jiġi rikonoxxut mill-Istat Membru tas-sors bħala prova valida ta’ residenza tat-taxxa,, meta l-ħelsien mit-taxxa f’ras il-għajn eċċessiva jintalab skont id-dispożizzjonijiet ta’ trattat kontra t-taxxa doppja, huwa essenzjali li l-eTRC jinkludi referenza għat-trattat kontra t-taxxa doppja applikabbli. Jenħtieġ li jkun possibbli għall-awtorità emittenti li tirreferi għal aktar minn trattat kontra t-taxxa doppja applikabbli wieħed fuq eTRC partikolari. Filwaqt li primarjament huwa maħsub għall-implimentazzjoni tal-proċeduri tat-taxxa f’ras il-għajn, l-eTRC jista’ jkollu wkoll kamp ta’ applikazzjoni usa’ u jservi bħala prova ta’ residenza għal finijiet ta’ taxxa lil hinn mill-proċeduri tat-taxxa f’ras il-għajn. Għall-finijiet tal-proċeduri tal-ħelsien mit-taxxa f’ras il-għajn, jenħtieġ li l-eTRC ma jinkludi l-ebda informazzjoni addizzjonali. L-eTRC huwa maħsub li jinħareġ biss darba matul is-sena kalendarja jew darba matul is-sena fiskali, anki meta l-istess kontribwent jinvesti f’bosta okkażjonijiet fl-istess Stati Membri tas-sors, sakemm ir-residenza tal-kontribwent għal finijiet ta’ taxxa tibqa’ l-istess.

(10)

Sabiex jiġi ssodisfat l-objettiv ta’ ħelsien aktar effiċjenti mit-taxxa f’ras il-għajn eċċessiva, jenħtieġ li jiġu implimentati proċeduri komuni fl-Unjoni kollha, li jippermettu li tinkiseb malajr informazzjoni ċara u sigura dwar l-identità tal-investitur, speċjalment fil-każ li jkun hemm bażijiet kbar tal-investituri, jiġifieri, fir-rigward tal-investiment f’titoli nnegozjati pubblikament, fejn l-identifikazzjoni ta’ investituri individwali tkun diffiċli. Jenħtieġ li tali proċeduri jippermettu wkoll l-applikazzjoni tar-rata tat-taxxa xierqa fil-ħin tal-pagament (ħelsien mit-taxxa f’ras il-għajn) jew għar- rifużjoni rapida ta’ kwalunkwe ammont eċċessiv ta’ taxxa mħallas. Minħabba li l-investimenti transfruntieri normalment jinvolvu katina tal-pagamenti ta’ intermedjarji finanzjarji, jenħtieġ li l-proċeduri rilevanti jippermettu wkoll it-traċċar u l-identifikazzjoni tal-katina ta’ intermedjarji u, konsegwentement, tal-fluss tal-introjtu mill-emittent tat-titolu lis-sid irreġistrat u l-informazzjoni dwar l-investitur sottostanti. L-aktar tipi komuni ta’ arranġamenti ta’ investiment normalment jinvolvu bank depożitarju jew entità ta’ investiment oħra, bħal sensar, li jkollha t-titoli fuq isimha f’isem l-investitur sottostanti. F’arranġamenti tali, huwa l-investitur sottostanti li jitqies bħala s-sid irreġistrat tat-titoli. Għaldaqstant jenħtieġ li l-Istati Membri li japplikaw taxxa f’ras il-għajn fuq l-introjtu minn titoli u li jipprovdu ħelsien mit-taxxa f’ras il-għajn eċċessiva u li ma għandhomx fis-seħħ sistema komprensiva tal-ħelsien mit-taxxa f’ras il-għajn, jew li għandhom proporzjon ta’ kapitalizzazzjoni tas-suq daqs jew ogħla mil-livell limitu stipulat f’din id-Direttiva, jistabbilixxu u jiġġestixxu reġistru nazzjonali ta’ dawk l-intermedjarji finanzjarji li għandhom rwol sinifikanti fil-katina tal-pagamenti. Ladarba jiġu rreġistrati, jenħtieġ li tali intermedjarji finanzjarji jkunu meħtieġa jirrapportaw l-informazzjoni għad-dispożizzjoni tagħhom dwar il-pagamenti ta’ dividendi jew imgħax, jekk applikabbli, li jittrattaw. Jenħtieġ li l-informazzjoni meħtieġa tkun limitata għal informazzjoni li hija kruċjali għar-rikostruzzjoni tal-katina tal-pagamenti u għalhekk utli għall-prevenzjoni tar-riskju ta’ frodi tat-taxxa jew ta’ abbuż tat-taxxa, sa fejn tali informazzjoni tkun disponibbli għall-intermedjarju tar-rapportar. L-Istati Membri li japplikaw taxxa f’ras il-għajn fuq l-imgħax b’rati li jvarjaw u li għandhom bżonn ikunu involuti fi proċeduri simili tal-ħelsien mit-taxxa, jew li jkollhom fis-seħħ sistema komprensiva tal-ħelsien mit-taxxa f’ras il-għajn għall-pagamenti ta’ dividendi u li jkollhom proporzjon ta’ kapitalizzazzjoni tas-suq taħt il-livell limitu stipulat f’din id-Direttiva, jistgħu jikkunsidraw ukoll li jużaw ir-reġistru nazzjonali stabbilit, skont il-każ.

(11)

Peress li l-intermedjarji finanzjarji li huma l-aktar ta’ spiss involuti fil-ktajjen tal-pagament tat-titoli huma istituzzjonijiet kbar kif definit fir-Regolament (UE) Nru 575/2013 tal-Parlament Ewropew u tal-Kunsill (3) kif ukoll depożitorji ċentrali tat-titoli li jipprovdu servizzi ta’ aġenti tat-taxxa f’ras il-għajn, jenħtieġ li dawk l-entitajiet ikunu obbligati jitolbu li jiġu rreġistrati fir-reġistri nazzjonali tal-Istati Membri. Meta tali entitajiet joperaw permezz ta’ fergħa jew fergħat jew permezz ta’ sussidjarja waħda jew aktar fi kwalunkwe Stat Membru, jenħtieġ li jitħallew jissodisfaw l-obbligu ta’ reġistrazzjoni f’kull Stat Membru tas-sors jew bħala intermedjarju finanzjarju ċċertifikat wieħed fil-livell tal-grupp jew fil-livell ta’ fergħa jew sussidjarja individwali jew taħlita tagħhom. Jenħtieġ li intermedjarji finanzjarji oħra jitħallew ukoll jitolbu li jiġu rreġistrati fir-reġistri nazzjonali tal-Istati Membri għad-diskrezzjoni tagħhom. Fiż-żewġ sitwazzjonijiet, jew b’reġistrazzjoni obbligatorja jew volontarja, jenħtieġ li l-intermedjarji finanzjarji jkollhom il-flessibbiltà li jagħmlu t-talba huma stess jew li jkunu rappreżentati minn intermedjarju finanzjarju ieħor li huwa parti mill-istess grupp u li jaġixxi f’isimhom sabiex jimminimizzaw il-piż amministrattiv u l-impatt fuq kif jixtiequ jkunu organizzati. Jenħtieġ li l-intermedjarji finanzjarji jitolbu li jiġu rreġistrati billi jressqu talba permezz tal-Portal Ewropew tal-Intermedjarji Finanzjarji Ċċertifikati (il-“Portal”), li jenħtieġ li jservi bħala punt tad-dħul uniku. Tali talbiet jenħtieġ li jintbagħtu permezz tal-Portal lill-Istati Membri rilevanti. Sussegwentement, jenħtieġ li l-Istati Membri jiddeċiedu dwar it-talba għar-reġistrazzjoni. Għalhekk jenħtieġ li l-Portal iservi bħala għodda li tirrifletti d-deċiżjonijiet tal-Istati Membri fir-rigward tar-reġistrazzjoni tal-intermedjarji finanzjarji.

(12)

Jenħtieġ li din id-Direttiva tipprevedi wkoll regoli dwar ir-rekwiżiti għar-reġistrazzjoni fir-reġistri nazzjonali kif ukoll regoli dwar ir-rifjut tagħha. Meta talba għal reġistrazzjoni tiġi rifjutata, jenħtieġ li l-intermedjarji finanzjarji xorta jitħallew iressqu talba oħra għar-reġistrazzjoni fi stadju aktar tard, jekk jiġu rrimedjati r-raġunijiet għar-rifjut. Ladarba jkunu rreġistrati, jenħtieġ li l-intermedjarji finanzjarji jitqiesu bħala “intermedjarji finanzjarji ċċertifikati” fl-Istat Membru rispettiv u jenħtieġ li jkunu soġġetti għall-obbligi għall-intermedjarji finanzjarji ċċertifikati skont din id-Direttiva. Jenħtieġ li l-Istati Membri jaġġornaw il-Portal fir-rigward tar-reġistrazzjoni ta’ intermedjarju finanzjarju ċċertifikat. Jenħtieġ li din id-Direttiva tipprevedi wkoll regoli dwar it-tneħħija ta’ intermedjarji finanzjarji ċċertifikati mir-reġistru nazzjonali jew dwar li ġew miċħuda l-possibbiltà li jitolbu ħelsien. Meta Stat Membru jiddeċiedi li jneħħi intermedjarju finanzjarju ċċertifikat mir-reġistru, jiċħad lil intermedjarju finanzjarju ċċertifikat il-possibbiltà li jitlob ħelsien jew jirrifjuta talba għar-reġistrazzjoni, jenħtieġ li dak l-Istat Membru jaġġorna l-Portal kif xieraq. L-għan ta’ dawn l-aġġornamenti huwa li l-Istati Membri jkunu jistgħu jevalwaw il-miżuri meħuda, bħat-tneħħija jew ir-rifjut, u li jieħdu kont ta’ dawk il-miżuri fil-kuntest ta’ kwalunkwe talba ta’ reġistrazzjoni futura mill-istess intermedjarju finanzjarju fir-reġistru nazzjonali tagħhom stess. Ir-regoli nazzjonali tal-Istati Membri kkonċernati japplikaw għad-drittijiet u l-obbligi tal-partijiet ikkonċernati, inkluż id-dritt għal appell, fir-rigward ta’ kwalunkwe deċiżjoni meħuda minn Stat Membru b’rabta mar-reġistrazzjoni u t-tneħħija mir-reġistru nazzjonali tiegħu.

(13)

Sabiex tiġi żgurata aktar trasparenza dwar l-identità u ċ-ċirkostanzi tal-investitur li jirċievi pagament ta’ dividendi jew imgħax u dwar il-fluss tal-pagamenti mill-emittent, jenħtieġ li l-intermedjarji finanzjarji ċċertifikati jirrapportaw l-informazzjoni rilevanti fi skedi ta’ żmien speċifiċi. Jenħtieġ li f’din id-Direttiva jiġu previsti żewġ opzjonijiet ta’ rapportar: rapportar dirett u indirett. Meta r-rapportar ikun dirett, jenħtieġ li intermedjarju finanzjarju ċċertifikat jirrapporta direttament lill-awtorità kompetenti tal-Istat Membru tas-sors. Meta r-rapportar ikun indirett, jenħtieġ li l-intermedjarji finanzjarji ċċertifikati jipprovdu l-informazzjoni tul il-katina tal-pagamenti tat-titoli f’ordni sekwenzjali u fir-rigward tal-pożizzjoni ta’ dawk l-intermedjarji finanzjarji ċċertifikati fil-katina tal-pagamenti tat-titoli li huma parti minnha. Jenħtieġ li l-eżitu jkun li dik l-informazzjoni tasal għand l-aġent tat-taxxa f’ras il-għajn jew intermedjarju finanzjarju ċċertifikat deżinjat, li jirrapporta l-informazzjoni lill-awtorità kompetenti tal-Istat Membru tas-sors. Jenħtieġ li d-data rapportata tinkludi informazzjoni dwar l-eliġibbiltà tal-investitur ikkonċernat, iżda jenħtieġ li tkun limitata għall-informazzjoni li hija disponibbli għall-intermedjarju finanzjarju ċċertifikat li jirrapporta. Jenħtieġ li l-intermedjarji finanzjarji li ma humiex obbligati jirreġistraw bħala intermedjarji finanzjarji ċċertifikati u li ma għażlux li jirreġistraw bħala tali, ma jkollhomx obbligi ta’ rapportar fl-ambitu ta’ din id-Direttiva. Minkejja dan, l-informazzjoni dwar il-pagamenti ttrattati minn tali intermedjarji li mhumiex intermedjarji finanzjarji ċċertifikati tibqa’ rilevanti għar-rikostruzzjoni xierqa tal-katina tal-pagamenti qabel ma jiġu applikati s-sistemi tal-ħelsien stipulati f’din id-Direttiva.

(14)

Sabiex jiġi żgurat li ma jkun hemm l-ebda lakuna ta’ informazzjoni fil-katina tal-pagamenti u biex l-investituri jkunu jistgħu jaċċessaw il-proċeduri tal-ħelsien, jenħtieġ li din id-Direttiva tippermetti lil intermedjarju finanzjarju ċċertifikat, kemm jekk dak l-intermedjarju finanzjarju ċċertifikat ikun direttament involut f’katina tal-pagamenti speċifika kif ukoll jekk le, jieħu r-rwol ta’ intermedjarju finanzjarju f’dik il-katina. Dan jimplika li l-intermedjarju finanzjarju ċċertifikat jġorr ir-responsabbiltajiet u l-obbligazzjonijiet relatati mar-rapportar tal-informazzjoni u mas-sistema tal-ħelsien li intermedjarju finanzjarju jkollu jġorr kieku kien intermedjarju finanzjarju ċċertifikat. Permezz ta’ dak l-arranġament bejn l-intermedjarji finanzjarji, l-awtoritajiet tat-taxxa jkunu jistgħu jiksbu l-informazzjoni rilevanti kollha u jirrikonċiljaw l-informazzjoni tul il-katina kollha tal-pagament b’mod effettiv, u l-investituri jkunu jistgħu jaċċessaw is-sistema tal-ħelsien, anki f’każijiet li jinvolvu intermedjarju finanzjarju li la jkun irreġistrat fi Stat Membru u lanqas ma jkun marbut bl-obbligi skont din id-Direttiva.

(15)

Jenħtieġ li din id-Direttiva ma tipprekludix lill-intermedjarji finanzjarji ċċertifikati milli jesternalizzaw il-kompiti relatati mat-twettiq tal-obbligi tagħhom fl-ambitu ta’ din id-Direttiva. Għalhekk, jenħtieġ li intermedjarju finanzjarju ċċertifikat jitħalla jserraħ fuq parti terza biex jissodisfa l-obbligi rilevanti dwar il-proċeduri tat-taxxa f’ras il-għajn. Fi kwalunkwe każ, jenħtieġ li dawk l-obbligi jibqgħu r-responsabbiltà tal-intermedjarju finanzjarju ċċertifikat li jkun esternalizza r-responsabbiltajiet tiegħu.

(16)

Sabiex is-CMU ssir aktar effettiva u kompetittiva, fejn tkun ġiet ipprovduta informazzjoni adegwata mill-intermedjarji finanzjarji ċċertifikati rilevanti, inkluż dwar l-identità tal-investitur, jenħtieġ li jiġu ffaċilitati u aċċellerat proċeduri għall-ħelsien mit-taxxi f’ras il-għajn eċċessivi fuq l-introjtu minn titoli. L-intermedjarji finanzjarji ċċertifikati rilevanti huma dawk l-intermedjarji finanzjarji ċċertifikati kollha fil-katina tal-pagamenti tat-titoli li jinsabu bejn l-investitur u l-emittent tat-titoli u li jistgħu jkunu meħtieġa jipprovdu informazzjoni dwar il-pagamenti magħmula minn intermedjarji finanzjarji mhux iċċertifikati fil-katina. Filwaqt li jitqiesu l-approċċi differenti fl-Istati Membri, jenħtieġ li jiġu previsti żewġ tipi ta’ proċeduri: l-ewwel, sistema tal-ħelsien mit-taxxa f’ras il-għajn fejn ir-rata tat-taxxa adatta tiġi applikata direttament fil-mument li tiġi applikata t-taxxa f’ras il-għajn u t-tieni, sistema ta’ rifużjoni rapida fejn talba għal rifużjoni titressaq mill-intermedjarju finanzjarju ċċertifikat u tiġi proċessata mill-awtorità tat-taxxa tal-Istat Membru tas-sors sa skadenza stabbilita prevista f’din id-Direttiva. Jekk tali rifużjonijiet ma jiġux ipproċessati sa dik l-iskadenza, jenħtieġ li jiġi applikat imgħax ta’ inadempjenza fejn ir-regoli nazzjonali jipprevedu dan. Jenħtieġ li l-Istati Membri li japplikaw il-Kapitolu III ta’ din id-Direttiva jkunu jistgħu jintroduċu sistema tal-ħelsien mit-taxxa f’ras il-għajn jew sistema ta’ rifużjoni rapida jew taħlita tagħhom, filwaqt li jiżguraw li mill-inqas sistema waħda tkun disponibbli għall-investituri kollha, f’konformità mar-rekwiżiti ta’ din id-Direttiva. Stat Membru li jkun għażel tali kombinazzjoni jenħtieġ li jkun jista’ jillimita l-użu ta’ sistema waħda għal każijiet speċifiċi, bħal xenarji ta’ riskju baxx, dment li s-sistema l-oħra tibqa’ disponibbli għall-każijiet l-oħra kollha koperti minn din id-Direttiva. Dawk li jirċievu pagamenti barra mill-kamp ta’ applikazzjoni ta’ din id-Direttiva, bħal dividendi minn kumpaniji kkwotati mħallsa lil sidien irreġistrati li huma residenti għall-finijiet tat-taxxa fl-Istat Membru tas-sors, dividendi minn kumpaniji mhux ikkwotati jew imgħax f’każijiet meta Stat Membru ma jkunx għażel li japplika din id-Direttiva għall-pagamenti tal-imgħax, xorta waħda jistgħu jkunu intitolati jitolbu ħelsien mit-taxxa f’ras il-għajn eċċessiva skont sistema nazzjonali ta’ ħelsien mit-taxxa f’ras il-għajn jew ta’ rifużjoni applikabbli għall-proċeduri li jikkorrispondu għal tali pagamenti.

(17)

Fejn ir-rekwiżiti rilevanti ta’ din id-Direttiva ma jiġux issodisfati għall-pagamenti fil-kamp ta’ applikazzjoni ta’ din id-Direttiva jew fejn l-investitur ikkonċernat ikun jixtieq hekk, jenħtieġ li l-Istati Membri japplikaw proċeduri tal-ħelsien mit-taxxa f’ras il-għajn eċċessiva bbażati fuq sistema ta’ rifużjoni standard nazzjonali bħala riżerva għall-proċeduri rapidi stabbiliti f’din id-Direttiva. Jenħtieġ li l-investituri li huma intitolati għall-ħelsien jew ir-rappreżentanti awtorizzati tagħhom ikunu jistgħu jitolbu lura t-taxxa f’ras il-għajn eċċessiva mħallsa fi Stat Membru biss meta l-intermedjarju finanzjarju ċċertifikat ma jkunx għamel użu mis-sistema tal-ħelsien mit-taxxa f’ras il-għajn jew mis-sistema ta’ rifużjoni rapida.

(18)

Fejn ikun hemm riskju ta’ frodi tat-taxxa jew ta’ abbuż tat-taxxa, jenħtieġ li qabel ma jipproċessaw talba għal rifużjoni rapida l-Istati Membri jkunu jistgħu jinfurzaw miżuri kontra l-frodi u jwettqu investigazzjonijiet bir-reqqa. Sabiex jagħmlu dan, jenħtieġ li taħt ċerti kundizzjonijiet l-Istati Membri jkollhom id-dritt li jirrifjutaw talba għal rifużjoni. Jenħtieġ li dawk il-kundizzjonijiet jinkludu każijiet fejn ir-rekwiżiti għal tali talba ma jiġux issodisfati jew fejn il-katina tal-pagamenti ma tkunx tista’ tiġi rikostruwita. Jenħtieġ li jkun ukoll possibbli li talba għal rifużjoni tiġi rrifjuta meta Stat Membru jiddeċiedi li jibda kwalunkwe proċedura ta’ verifika jew awditu tat-taxxa abbażi ta’ kriterji ta’ valutazzjoni tar-riskju. Jenħtieġ li jkun possibbli li dawk il-proċeduri ta’ verifika jew l-awditi tat-taxxa jitwettqu fi kwalunkwe każ li jiġi identifikat bħala li joħloq riskju ta’ frodi tat-taxxa jew ta’ abbuż tat-taxxa.

(19)

Sabiex jiġu ssalvagwardjati s-sistemi għall-ħelsien mit-taxxi f’ras il-għajn eċċessivi, jenħtieġ li l-Istati Membri li jiġġestixxu reġistru nazzjonali jirrikjedu wkoll li l-intermedjarji finanzjarji ċċertifikati jivverifikaw l-eliġibbiltà tal-investituri li jixtiequ jitolbu ħelsien. B’mod partikolari, jenħtieġ li l-intermedjarji finanzjarji ċċertifikati jiġbru ċ-ċertifikat ta’ residenza tat-taxxa tal-investitur rilevanti u dikjarazzjoni li dak l-investitur huwa intitolat għall-ħelsien mit-taxxa f’ras il-għajn skont ir-regoli nazzjonali tal-Istat Membru tas-sors jew trattat kontra t-taxxa doppja u, jekk meħtieġ mill-Istat Membru tas-sors, dikjarazzjoni li l-investitur huwa s-sid benefiċjarju fir-rigward tad- dividend jew tal-imgħax f’konformità mar-regoli nazzjonali tal-Istat Membru tas-sors jew trattat kontra t-taxxa doppja, kif deskritt fil-Kummentarju dwar l-Artikolu 10 jew l-Artikolu 11 tal-Mudell ta’ Konvenzjoni dwar it-Taxxa fuq id-Dħul u l-Kapital tal-OECD. Għalhekk, jenħtieġ li l-Istati Membri tas-sors ikollhom il-possibbiltà li jirrikjedu dikjarazzjoni dwar is-sjieda benefiċjarja.

(20)

Jenħtieġ li l-intermedjarji finanzjarji ċċertifikati jkunu meħtieġa jivverifikaw ir-rata applikabbli tat-taxxa f’ras il-għajn abbażi taċ-ċirkostanzi speċifiċi tal-investitur u jindikaw jekk humiex konxji minn kwalunkwe arranġament finanzjarju li jinvolvi t-titoli sottostanti li ma jkunx ġie saldat, ma jkunx skada jew ġie mitmum b’xi mod ieħor qabel id-data ex-dividend. F’dak il-kuntest, jenħtieġ li l-obbligu jinftiehem fis-sens li l-eqreb intermedjarju finanzjarju ċċertifikat għall-investitur, il-klijent tiegħu, jenħtieġ li jieħu miżuri raġonevoli biex iwettaq tali kontrolli in bona fide. Pereżempju, jenħtieġ li l-intermedjarji finanzjarji ċċertifikati jikkontrollaw jekk l-informazzjoni fl-eTRC jew l-ekwivalenti tiegħu, jew l-informazzjoni fid-dikjarazzjoni tal-investitur, tikkontradixxix l-informazzjoni miġbura minn dawk l-intermedjarji finanzjarji ċċertifikati dwar il-klijenti tagħhom fil-kors normali tan-negozju tagħhom. Tali informazzjoni tinkludi informazzjoni dwar il-kontijiet tal-investitur u informazzjoni oħra li setgħu ġabru bħala riżultat tal-konformità mar-regoli “kun af lill-klijent tiegħek” applikabbli. Għalhekk, jenħtieġ li intermedjarji finanzjarji ċċertifikati ma jkunux meħtieġa jwettqu kontrolli ulterjuri jew li jitolbu u jiġbru informazzjoni ulterjuri mingħand il-klijent tagħhom. Barra minn hekk, jenħtieġ li l-investitur ikun meħtieġ jinforma lill-intermedjarju finanzjarju bi kwalunkwe bidla fiċ-ċirkostanzi rilevanti tiegħu. Jenħtieġ li l-Istati Membri jkunu jistgħu jippermettu li r-rekwiżiti ta’ diliġenza dovuta jitwettqu fuq bażi annwali sakemm l-intermedjarju finanzjarju ċċertifikat ma jkunx jaf jew suppost jaf li kien hemm bidla fiċ-ċirkostanzi jew li l-informazzjoni ma tkunx korretta jew affidabbli.

(21)

L-applikazzjoni tal-proċeduri tal-ħelsien mit-taxxa f’ras il-għajn fl-ambitu ta’ din id-Direttiva hija soġġetta għall-kundizzjoni li s-sid irreġistrat, li tkun persuna fiżika jew entità u hija eliġibbli li tirċievi d-dividend jew l-imgħax bħala d-detentur tat-titoli, huwa wkoll il-persuna li hija intitolata għall-ħelsien mit-taxxa f’ras il-għajn f’konformità mar-regoli nazzjonali tal-Istat Membru tas-sors jew trattat kontra t-taxxa doppja, skont kif applikabbli. Meta s-sid irreġistrat ikun ukoll intitolat għall-ħelsien, jenħtieġ li japplikaw biss id-dispożizzjonijiet għall-investimenti diretti. Madankollu, f’sitwazzjonijiet fejn is-sid irreġistrat u l-persuna intitolata għall-ħelsien ma jkunux l-istess persuna, jenħtieġ li japplikaw id-dispożizzjonijiet għall-investimenti indiretti. Id-dispożizzjonijiet għall-investiment indirett jipprovdu ħelsien f’każijiet fejn ċerti impriżi ta’ investiment kollettiv (CIU), jew l-investituri fihom, jistgħu jkunu intitolati għall-ħelsien iżda mhumiex is-sid irreġistrat minħabba li t-titoli huma miżmuma minn persuna ġuridika differenti jew minn CIU fiskalment trasparenti. Id-dispożizzjonijiet għall-investimenti indiretti jiżguraw li l-investituri leġittimi jkollhom aċċess għall-proċeduri fl-ambitu ta’ din id-Direttiva. Għalhekk, fl-interpretazzjoni tal-kunċett ta’ CIU, jenħtieġ li l-Istati Membri jinkludu CIUs li huma intitolati għall-ħelsien mit-taxxa f’ras il-għajn eċċessiva f’isimhom stess kif ukoll CIUs fejn l-investituri li jkollhom ekwità f’CIU huma intitolati għall-ħelsien, abbażi tar-regoli nazzjonali tal-Istat Membru tas-sors jew ta’ trattat kontra t-taxxa doppja. Meta jkun involut f’investimenti indiretti, l-intermedjarju finanzjarju ċċertifikat xorta waħda jenħtieġ li jibqa’ taħt obbligu li jissodisfa r-rekwiżiti tad-diliġenza dovuta. Barra minn hekk, jenħtieġ li jekk ikun hemm kwalunkwe telf ta’ dħul mit-taxxa jkun possibbli li l-intermedjarju finanzjarju ċċertifikat jinżamm responsabbli.

(22)

Huwa rikonoxxut li l-arranġamenti finanzjarji jistgħu jintużaw biex tinbidel is-sjieda, kompletament jew parzjalment, ta’ titolu jew ta’ riskji ta’ investiment rilevanti. Huwa l-każ ukoll li tali arranġamenti ntużaw fi skemi ta’ arbitraġġ tad-dividendi u ta’ tneħħija tad-dividendi, bħall-iskemi Cum/Ex u Cum/Cum, bl-uniku għan li jinkisbu rifużjonijiet f’każijiet fejn ma kien hemm l-ebda intitolament għalihom jew li jiżdied l-ammont ta’ rifużjoni li investitur kien intitolat għalih. Jenħtieġ li jkun possibbli li arranġamenti bħal kuntratti tal-futuri (futures contract), tranżazzjonijiet ta’ riakkwist, self ta’ titoli u teħid b’self ta’ titoli, tranżazzjonijiet ta’ akkwist bil-patt ta’ rivendita jew tranżazzjonijiet ta’ vendita bil-patt ta’ riakkwist, derivattivi, tranżazzjoni ta’ self b’marġni u kuntratti għal differenza jistgħu jitqiesu bħala arranġamenti finanzjarji f’każijiet fejn jimplikaw qasma temporanja jew permanenti bejn il-persuna fiżika jew l-entità li ġġorr ir-riskji ekonomiċi tal-investiment u s-sid legali tas-sehem jew tad-drittijiet sottostanti. Dawn l-eżempji mhumiex eżawrjenti.

(23)

Barra minn hekk, fil-każ ta’ arranġamenti finanzjarji, huwa mifhum li s-sjieda tat-titoli ma tiġix trasferita lix-xerrej jew lil min jissellef it-titoli jekk ir-riskju ekonomiku jibqa’ f’idejn il-bejjiegħ jew is-sellief tat-titoli permezz ta’ kwalunkwe tranżazzjoni legali bħal self ta’ titoli, opzjonijiet jew kuntratti tal-futuri (futures contracts). Jenħtieġ li jkun possibbli li kwalunkwe arranġament li taħtu d-dividendi jiġu kkumpensati bejn il-partijiet ikkonċernati jitqies bħala arranġament finanzjarju. Il-partijiet ikkonċernati mhux dejjem jiġu kkumpensati fi flus kontanti, iżda jistgħu jiġu kkumpensati wkoll b’modi aktar indiretti, bħal permezz ta’ differenzi fil-prezzijiet ta’ titoli jew derivattivi. L-informazzjoni dwar l-arranġamenti finanzjarji hija neċessarja sabiex l-awtoritajiet tat-taxxa jiġġieldu l-frodi tat-taxxa u l-abbuż tat-taxxa. Meta tali informazzjoni tiġi rrapportata direttament, jenħtieġ li din tkun meħtieġa biss mill-intermedjarji finanzjarji ċċertifikati li, minħabba l-pożizzjoni tagħhom fil-katina, setgħu kienu involuti direttament fl-arranġament finanzjarju rilevanti, li jkun il-każ għall-intermedjarji finanzjarji ċċertifikati li jitolbu l-ħelsien. Meta tali informazzjoni tiġi rrapportata indirettament, jenħtieġ li l-informazzjoni dwar l-arranġamenti finanzjarji tiġi rrapportata mill-intermedjarju finanzjarju ċċertifikat tas-sid irreġistrat. F’każijiet bħal dawk jenħtieġ li dik l-informazzjoni tiġi rrapportata tul il-katina tal-pagamenti tat-titoli f’ordni sekwenzjali bl-effett li fl-aħħar mill-aħħar tilħaq lill-aġent tat-taxxa f’ras il-għajn jew intermedjarju finanzjarju ċċertifikat iddeżinjat. Dak ifisser li intermedjarji finanzjarji ċċertifikati oħra li jirrapportaw jeħtieġ li jittrażmettu l-informazzjoni dwar dawk l-arranġamenti finanzjarji lill-aġent tat-taxxa f’ras il-għajn jew lil intermedjarju finanzjarju ċċertifikat iddeżinjat, anki jekk dawn l-intermedjarji finanzjarji ċċertifikati li jirrapportaw ma jkunux involuti direttament fl-arranġament finanzjarju rilevanti. Jenħtieġ li fil-każ ta’ bonds u pagamenti ta’ imgħax ir-rapportar dwar l-arranġamenti finanzjarji ma jkunx meħtieġ.

(24)

Jenħtieġ li l-Istati Membri jkunu jistgħu jirrestrinġu l-użu tas-sistema tal-ħelsien mit-taxxa f’ras il-għajn jew tas-sistema ta’ rifużjoni rapida f’każijiet li jippreżentaw riskju elevat ta’ frodi tat-taxxa jew ta’ abbuż tat-taxxa. Għalhekk huwa xieraq li tiġi stabbilita lista ta’ każijiet tali, fejn l-Istati Membri jkollhom il-possibbiltà li jeskludu talbiet għall-ħelsien u jwettqu kontrolli ulterjuri. Sabiex jittieħed kont tad-differenzi fis-sistemi legali nazzjonali u, b’mod partikolari, il-valutazzjonijiet tar-riskju tat-taxxa, jenħtieġ li l-istabbiliment ta’ tali lista ma jkunx obbligatorju u jenħtieġ li l-Istati Membri jkollhom id-diskrezzjoni li jiddeterminaw liema fost dawn il-każijiet jenħtieġ li jkunu koperti mis-sistema ta’ rifużjoni standard. Jenħtieġ li l-Istati Membri jiżguraw li r-regoli nazzjonali li jittrasponu din id-Direttiva ma jħallux li l-każijiet li l-Istati Membri jqisu li jippreżentaw riskju elevat jibbenefikaw minn ħelsien mit-taxxa f’ras il-għajn jew minn rifużjoni rapida. Tali miżura tiżgura li l-awtoritajiet tat-taxxa jkunu f’pożizzjoni aħjar biex jiġġieldu kontra skemi abbużivi, peress li jkollhom il-possibbiltà li jwettqu kontrolli ulterjuri biex jiddeterminaw jekk it-talbiet għall-ħelsien ikunux iġġustifikati u jekk għandhomx jingħataw. Waħda minn dawk il-miżuri tikkonsisti f’livell limitu li huwa relatat ma’ ammont ta’ dividend gross. Jenħtieġ li dak il-livell limitu jiġi kkalkulat għal kull sid irreġistrat, jew għal kull investitur intitolat għall-ħelsien mit-taxxa f’ras l-għajn eċċessiva jekk is-sid irreġistrat ikun impriża ta’ investiment kollettiv jew persuna ġuridika deżinjata ta’ tali impriża. Jenħtieġ li dak il-livell limitu ma japplikax f’każijiet meta impriża ta’ investiment kollettiv stabbilita u rregolata, jew li jkollha maniġer stabbilit u rregolat, fl-Unjoni, skema statutorja ta’ pensjoni ta’ Stat Membru jew istituzzjoni għall-provvista ta’ rtirar okkupazzjonali rreġistrata jew awtorizzata fi Stat Membru f’konformità mal-Artikolu 9(1) tad-Direttiva (UE) 2016/2341 tal-Parlament Ewropew u tal-Kunsill (4) tkun intitolata għall-ħelsien. Dawk l-impriżi, skemi u istituzzjonijiet huma regolati ħafna u soġġetti għal superviżjoni mill-awtoritajiet kompetenti nazzjonali u għal kontrolli interni robusti. Tali regolamentazzjoni u superviżjoni jinforzaw il-konformità mar-regolamenti rilevanti u jimminimizzaw ir-riskju ta’ frodi tat-taxxa u ta’ abbuż tat-taxxa.

(25)

Madankollu, hemm każijiet fejn il-kontribwenti jistgħu jitolbu r-rata mnaqqsa ta’ taxxa f’ras il-għajn abbażi tal-atti legali tal-Unjoni implimentati mir-regoli nazzjonali. Dan ikun tipikament il-każ fejn ir-regoli nazzjonali jiżguraw li l-libertà tal-istabbiliment jew il-moviment liberu tal-kapital jingħata bl-istess mod f’sitwazzjonijiet komparabbli domestiċi u mhux domestiċi, jew fil-każ fejn tiġi trasposta direttiva. Każijiet tali jistgħu jirrikjedu t-twettiq ta’ verifiki, speċjalment biex tiġi vvalutata l-komparabbiltà tas-sitwazzjonijiet u l-applikabbiltà tal-liġi nazzjonali għal każijiet transfruntieri. Fejn tali verifiki huma meħtieġa, jenħtieġ li jkun possibbli li l-Istati Membri jittrattaw dawk il-każijiet skont is-sistema nazzjonali eżistenti tagħhom tal-ħelsien mit-taxxa f’ras il-għajn, b’hekk iwasslu għall-ħelsien mit-taxxa f’ras il-għajn eċċessiva bl-aktar mod rapidu u sikur.

(26)

Meta jitqies ir-rwol importanti li l-intermedjarji finanzjarji ċċertifikati għandhom fir-rapportar ta’ informazzjoni kompluta u korretta, li sservi bħala l-bażi għall-ħelsien mit-taxxa f’ras il-għajn jew għal rifużjoni, huwa xieraq li r-regoli nazzjonali tal-Istati Membri jkun fihom tal-inqas ir-regoli li skonthom l-intermedjarji finanzjarji ċċertifikati jistgħu jinżammu responsabbli għat-telf kollu jew parzjali tad-dħul mit-taxxa f’ras il-għajn imġarrab minħabba n-nuqqas ta’ konformità sħiħ jew parzjali tagħhom mal-obbligi ewlenin ta’ din id-Direttiva. Jenħtieġ li jkun possibbli għall-Istati Membri li jistabbilixxu fir-regoli nazzjonali tagħhom responsabbiltà stretta u in solidum għall-intermedjarji finanzjarji ċċertifikati li jitolbu l-ħelsien. Barra minn hekk, jenħtieġ li aspetti oħra tar-responsabbiltà jkomplu jiġu rregolati bis-sħiħ mir-regoli nazzjonali tal-Istati Membri. Dawk l-aspetti oħra jinkludi aġenti tat-taxxa f’ras il-għajn li jaġixxu b’mod konġunt jew in solidum u li ma jkunux qed jaġixxu bħala intermedjarji finanzjarji ċċertifikati, u każijiet relatati jew ma’ responsabbiltà diretta jew indiretta ta’ sidien u investituri rreġistrati li jippreżentaw informazzjoni mhux kompluta jew mhux korretta lill-intermedjarji finanzjarji ċċertifikati. Din id-Direttiva ma tiddeterminax ir-regoli dwar ir-responsabbiltà fir-rigward tas-sistema ta’ rifużjoni standard.

(27)

Sabiex tiġi żgurata l-effettività tar-regoli applikabbli, jenħtieġ li l-Istati Membri jistabbilixxu regoli dwar il-penali applikabbli għall-ksur tad-dispożizzjonijiet nazzjonali adottati skont din id-Direttiva. Jenħtieġ li tali penali jkunu effettivi, proporzjonati u dissważivi.

(28)

It-traspożizzjoni xierqa ta’ din id-Direttiva f’kull Stat Membru kkonċernat hija kruċjali għall-promozzjoni tas-CMU fl-intier tagħha, kif ukoll għall-protezzjoni tad-dħul mit-taxxa tal-Istati Membri. Għalhekk, jenħtieġ li l-Istati Membri jikkomunikaw lill-Kummissjoni, fuq bażi regolari, informazzjoni statistika dwar l-implimentazzjoni u l-infurzar tal-miżuri nazzjonali adottati skont din id-Direttiva fit-territorju tagħhom. Jenħtieġ li l-Kummissjoni tħejji evalwazzjoni abbażi tal-informazzjoni pprovduta mill-Istati Membri u data disponibbli oħra biex tevalwa l-effettività tar-regoli applikabbli. F’dak il-kuntest, jenħtieġ li l-Kummissjoni tqis il-ħtieġa li jiġu aġġornati r-regoli introdotti b’din id-Direttiva.

(29)

Sabiex jiġu żgurati kundizzjonijiet uniformi għall-implimentazzjoni ta’ din id-Direttiva, b’mod partikolari għaċ-ċertifikat diġitali ta’ residenza tat-taxxa, il-Portal, ir-rapportar tal-intermedjarji finanzjarji, id-dikjarazzjoni tas-sid irreġistrat u t-talba għall-ħelsien skont din id-Direttiva, jenħtieġ li l-Kummissjoni tingħata setgħat ta’ implimentazzjoni biex tadotta formoli standard b’għadd limitat ta’ komponenti, inkluż l-arranġamenti lingwistiċi. Jenħtieġ li dawk is-setgħat jiġu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (5).

(30)

Jenħtieġ li kwalunkwe pproċessar ta’ data personali mwettaq fil-qafas ta’ din id-Direttiva jkun konformi mar-Regolament (UE) 2016/679 tal-Parlament Ewropew u tal-Kunsill (6). L-operazzjonijiet għall-ipproċessar tad-data previsti f’din id-Direttiva għandhom l-objettiv li jservu interess pubbliku ġenerali, jiġifieri l-kwistjoni tat-tassazzjoni, u l-objettivi addizzjonali tal-ġlieda kontra l-frodi tat-taxxa, l-evażjoni tat-taxxa u l-evitar tat-taxxa, is-salvagwardja tad-dħul mit-taxxa u l-promozzjoni tat-tassazzjoni ġusta, li jsaħħu l-opportunitajiet għall-inklużjoni soċjali, politika u ekonomika fl-Istati Membri. Għalhekk, għall-finijiet tal-applikazzjoni korretta ta’ din id-Direttiva, u sabiex jiġu ssalvagwardjati dawk l-objettivi ta’ interess pubbliku ġenerali, jenħtieġ li l-Istati Membri jkollhom il-possibbiltà li jirrestrinġu l-kamp ta’ applikazzjoni ta’ ċerti drittijiet tas-suġġetti tad-data stipulati fir-Regolament (UE) 2016/679. Madankollu, jenħtieġ li tali restrizzjonijiet ma jmorrux lil hinn minn dak li huwa strettament neċessarju biex jintlaħqu dawk l-objettivi. Fir-rigward tal-informazzjoni addizzjonali li tista’ tkun rikjesta skont din id-Direttiva biex tiġi ppruvata r-residenza tal-kontribwent għal finijiet ta’ taxxa, jenħtieġ li l-ġbir ta’ tali informazzjoni relatata ma’ persuna fiżika jinftiehem bħala li huwa ristrett għall-identifikazzjoni tal-persuna fiżika.

(31)

Minħabba li l-objettiv ta’ din id-Direttiva ma jistax jinkiseb b’mod suffiċjenti mill-Istati Membri, iżda pjuttost, minħabba r-raġuni tan-natura transfruntiera tat-tranżazzjonijiet ikkonċernati u l-ħtieġa li jitnaqqsu l-kostijiet ta’ konformità fis-suq intern kollu kemm hu, jista’ jintlaħaq aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, din id-Direttiva ma tmurx lil hinn minn dak li huwa meħtieġ sabiex jinkiseb dak l-objettiv.

(32)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (7) u ta opinjoni fit-8 ta’ Awwissu 2023,