(1)

Il-Kummissjoni u r-Rappreżentant Għoli adottaw Komunikazzjoni Konġunta dwar l-Istrateġija Ewropea ta’ Sigurtà Ekonomika (1) (“l-Istrateġija”) biex jiġi stabbilit approċċ strateġiku komprensiv għas-sigurtà ekonomika.

(2)

L-Unjoni tibqa’ waħda mill-aktar destinazzjonijiet u sħab attraenti għall-kumpaniji globali (2) u sors ewlieni ta’ investiment ’il barra. L-Unjoni tibqa’ impenjata għal ambjent ta’ investiment miftuħ. Madankollu, l-Istrateġija rrikonoxxiet li b’“tensjonijiet ġeopolitiċi u integrazzjoni ekonomika globali dejjem akbar minn qatt qabel, ċerti flussi u attivitajiet ekonomiċi jistgħu jippreżentaw riskju għas-sigurtà tagħna” filwaqt li “bidliet teknoloġiċi profondi qed iżidu l-intensità ta’ din il-kompetizzjoni u jagħmlu l-isfidi ekonomiċi u ta’ sigurtà aktar kumplessi”.

(3)

L-Istrateġija tidentifika firxa ta’ sfidi kumplessi għas-sigurtà ekonomika tal-Unjoni u tal-Istati Membri tagħha, li jirriflettu l-fatt li dawn l-isfidi jolqtu l-objettivi tal-kummerċ, tat-teknoloġija u tas-sigurtà li jeħtieġu rispons politiku integrat. L-indirizzar tar-riskji għas-sigurtà ekonomika se jgħin biex jiġi żgurat li l-Unjoni żżomm ir-rwol tagħha bħala mexxejja tat-teknoloġija, tkun kapaċi tippromwovi u tiddefendi l-interessi tagħha, tirrispondi għall-pressjonijiet ġeopolitiċi u tiflaħ għax-xokkijiet ekonomiċi. L-Istrateġija tiffoka fuq l-identifikazzjoni, il-valutazzjoni u l-ġestjoni tar-riskji f’erba’ kategoriji: ir-reżiljenza tal-ktajjen tal-provvista, ir-riskji għas-sigurtà fiżika u ċ-ċibersigurtà tal-infrastruttura kritika, ir-riskji għas-sigurtà tat-teknoloġija u r-riskji ta’ ħrib tat-teknoloġija u tal-użu tad-dipendenzi ekonomiċi jew il-koerċizzjoni ekonomika bħala arma.

(4)

Ir-riskji kkawżati mill-ħrib tat-teknoloġija x’aktarx li jkunu partikolarment akuti għal sett ristrett ta’ avvanzi teknoloġiċi li jistgħu jtejbu l-kapaċitajiet militari u ta’ intelligence ta’ atturi li jistgħu jużawhom biex jimminaw il-paċi u s-sigurtà internazzjonali. Tali ħrib jenħtieġ li ma jiġix xprunat mill-kapital, l-għarfien espert u l-għarfien tal-Unjoni: inkluż fil-kuntest ta’ investiment ’il barra mill-Unjoni.

(5)

Biex tassisti l-valutazzjonijiet tagħha tar-riskji ta’ ħrib tat-teknoloġija marbuta mal-investiment ’il barra, f’Lulju 2023 il-Kummissjoni stabbiliet Grupp ta’ Esperti ddedikat dwar l-Investimenti ‘l Barra magħmul minn esperti tal-Kummissjoni u tal-Istati Membri (“il-Grupp ta’ Esperti”) (3) li qed jeżamina l-kwistjonijiet relatati mar-riskju ta’ ħrib ta’ teknoloġija kritika u għarfien espert mill-Unjoni lejn pajjiżi terzi intenzjonalment jew mhux intenzjonalment fil-kuntest ta’ investimenti ’l barra.

(6)

B’mod parallel, fir-Rakkomandazzjoni tal-Kummissjoni dwar oqsma kritiċi tat-teknoloġija (UE) 2023/2113, il-Kummissjoni identifikat għaxar oqsma teknoloġiċi għal valutazzjoni tar-riskju ulterjuri mal-Istati Membri (4). Wara dik ir-Rakkomandazzjoni, il-Kummissjoni nediet valutazzjonijiet tar-riskju kollettivi fil-fond mal-Istati Membri ta’ xi wħud mill-oqsma tat-teknoloġija identifikati fiha. Ir-riżultati ta’ dawk il-valutazzjonijiet se jinfurmaw l-approċċ tal-Unjoni lejn l-investiment ’il barra, li jista’ jevolvi aktar flimkien mal-fehim aktar profond tar-riskji.

(7)

Il-ħidma tal-Grupp ta’ Esperti kkonfermat li bħalissa l-Istati Membri ma jiġbrux sistematikament data dwar tranżazzjonijiet individwali ta’ investiment ’il barra u ma jirrieżaminawx tali investimenti b’mod li jista’ jippermetti l-identifikazzjoni jew il-valutazzjoni tar-riskji għas-sigurtà. Konsegwentement, l-għeluq tad-distakk eżistenti fl-għarfien b’rieżami sistematiku tal-investimenti ’l barra tal-Unjoni mill-Istati Membri jenħtieġ li jingħata prijorità sabiex ikun hemm diskussjoni ta’ politika infurmata u bbażata fuq il-fatti.

(8)

Id-determinazzjoni tal-ambitu tat-tħassib potenzjali dwar l-investiment ’il barra tippreżenta diversi sfidi. L-isfidi inizjali jinkludu l-fehim tal-firxa u n-natura tal-investimenti ’l barra tal-Unjoni, il-ġbir ta’ data u evidenza rilevanti, u l-valutazzjoni ta’ jekk dawn joħolqux jew jaggravawx riskji kollettivi identifikabbli b’mod ċar għas-sigurtà ekonomika. Sabiex jiġu indirizzati dawk l-isfidi, huwa meħtieġ li jinkiseb għarfien dwar it-tranżazzjonijiet individwali rilevanti, it-teknoloġija u l-għarfien espert relatati magħhom, u, fejn rilevanti, l-analiżi tad-data settorjali u x-xejriet tal-investiment. Ir-rieżami ta’ tranżazzjonijiet individwali jenħtieġ li jipprovdi lill-Istati Membri u lill-Kummissjoni bl-informazzjoni meħtieġa dwar l-investimenti ’l barra fis-sett ristrett ta’ oqsma teknoloġiċi.

(9)

Abbażi tal-informazzjoni miġbura, l-Unjoni u l-Istati Membri tagħha jenħtieġ li jivvalutaw jekk hemmx xi riskji għas-sigurtà ekonomika relatati mal-investimenti ’l barra u jidentifikaw kwalunkwe lakuna fil-politiki eżistenti tal-UE, inkluż fir-rigward tal-kontrolli tal-kummerċ u tal-investiment rigward l-identifikazzjoni u l-mitigazzjoni ta’ tali riskji għas-sigurtà. Dan jenħtieġ li jgħin biex jiġi ddeterminat jekk huwiex meħtieġ għarfien aktar profond f’ċerti oqsma tat-teknoloġija, u biex jitfasslu risponsi proporzjonati u mmirati biex jittaffew ir-riskji identifikati jew permezz ta’ għodod eżistenti jew permezz ta’ strumenti ġodda fil-livell nazzjonali jew fil-livell tal-Unjoni.

(10)

Biex tniedi dan il-proċess deskritt hawn fuq, il-Kummissjoni ppubblikat White Paper dwar l-investiment ’il barra (5) aktar kmieni din is-sena li tiddeskrivi l-ħidma inizjali tal-Unjoni dwar is-suġġett. L-għan tal-White Paper kien li tistieden kummenti mill-partijiet interessati sabiex tgħin lill-Kummissjoni tiddefinixxi l-ambitu ta’ Rakkomandazzjoni potenzjali tal-Kummissjoni dwar l-investiment ’il barra f’kooperazzjoni mill-qrib mal-Istati Membri.

(11)

Il-White Paper kienet appoġġata minn konsultazzjoni pubblika biex tirċievi kontribut u reazzjonijiet strutturati għall-approċċ tagħha. (6) Ir-rispondenti għal din il-konsultazzjoni qablu li hemm bżonn li jiġu vvalutati r-riskji potenzjali relatati mal-investimenti ’l barra. Għalhekk, il-Kummissjoni tkompli bl-approċċ gradwali tagħha b’din ir-Rakkomandazzjoni u tistabbilixxi kamp ta’ applikazzjoni komuni biex tistruttura r-rieżami u l-valutazzjoni tar-riskju, filwaqt li l-Istati Membri se jiddeċiedu individwalment dwar id-dettalji tal-implimentazzjoni tagħha skont iċ-ċirkostanzi speċifiċi tagħhom.

(12)

Fir-rigward tal-oqsma tat-teknoloġija identifikati fir-Rakkomandazzjoni tal-Kummissjoni (UE) 2023/2113, u filwaqt li jibnu fuq il-ħidma mal-Grupp ta’ Esperti, it-tweġibiet għall-konsultazzjoni pubblika u l-piż amministrattiv involut għall-Istati Membri u għan-negozji, ir-rieżami u l-valutazzjoni tar-riskju mill-Istati Membri jenħtieġ li jiffokaw fuq semikondutturi avvanzati, intelliġenza artifiċjali u teknoloġiji tal-kwantum li ġew identifikati bħala dawk li x’aktarx joħolqu l-aktar riskji sinifikanti ta’ rilokazzjoni tat-teknoloġija permezz ta’ investiment ’il barra.

(13)

Fir-rigward tat-tip ta’ tranżazzjonijiet ta’ investiment ’il barra, ir-rieżami jenħtieġ li jkopri firxa wiesgħa ta’ tranżazzjonijiet, filwaqt li jeskludi tranżazzjonijiet li x’aktarx ma jippermettux jew jiffaċilitaw l-iżvilupp jew it-trasferiment ta’ teknoloġiji kritiċi jew għarfien espert.

(14)

Fir-rigward tal-kopertura ġeografika, ir-rieżami jenħtieġ li jkun “newtrali għall-pajjiż” u ma jeskludix, a priori, destinazzjonijiet speċifiċi. Madankollu, l-Istati Membri jistgħu jipprijoritizzaw l-attivitajiet ta’ rieżami tagħhom abbażi tal-profili tar-riskju ta’ pajjiżi individwali. Il-profili tar-riskju jenħtieġ li jiġu kkoordinati ma’ Stati Membri oħra u mal-Kummissjoni u jinkludu, meta rilevanti, l-imġiba tal-passat tal-pajjiż ikkonċernat, inkluż il-ksur tal-Karta tan-NU.

(15)

Ir-rieżami mwettaq wara din ir-Rakkomandazzjoni jenħtieġ li jistabbilixxi wkoll jekk l-investimenti ’l barra mill-Unjoni lejn pajjiżi terzi jaċċellerawx jew iżidux l-iżvilupp b’suċċess ta’ teknoloġiji kritiċi f’pajjiżi li jistgħu jużaw tali teknoloġiji biex jiġġieldu jew jaqbżu l-kapaċitajiet relatati mas-sigurtà tal-Unjoni, tal-Istati Membri tagħha, u ta’ pajjiżi oħra, jew biex jimminaw il-paċi u s-sigurtà internazzjonali.

(16)

L-eżitu tal-valutazzjoni tar-riskju li għandha titwettaq mill-Istati Membri, bl-appoġġ tal-Kummissjoni, jenħtieġ li jippermetti fehim kondiviż tar-riskji, fil-qafas tal-Grupp ta’ Esperti. Id-diskussjonijiet fi ħdan il-Grupp tal-Esperti se jkunu punt ta’ referenza utli għal kwalunkwe għażla ta’ politika ulterjuri u se jgħinu biex tiġi ddeterminata l-ħtieġa possibbli għal miżuri ta’ mitigazzjoni. Il-Kummissjoni u l-Istati Membri se jiżguraw li l-informazzjoni sensittiva tiġi kondiviża, issejvjata u, fejn meħtieġ, klassifikata b’mod sigur biex jiġi żgurat il-livell meħtieġ ta’ protezzjoni.

(17)

Din ir-Rakkomandazzjoni ma tippreġudikax l-eżitu ta’ dawn il-valutazzjonijiet tar-riskju, u lanqas il-ħtieġa li jittieħdu miżuri mmirati lejn il-mitigazzjoni tar-riskji potenzjali. Kwalunkwe proposta sussegwenti potenzjali għal azzjonijiet ta’ mitigazzjoni biex tiġi protetta s-sigurtà ekonomika se tibni fuq valutazzjonijiet bħal dawn. Kwalunkwe rispons ta’ politika jenħtieġ li jkun proporzjonat u mmirat b’mod preċiż biex jindirizza r-riskji identifikati għal kull tip ta’ investiment ’il barra jew attività u qasam kritiku tat-teknoloġija.

(18)

Il-Kummissjoni tħeġġeġ lill-Istati Membri jikkonsultaw lill-partijiet ikkonċernati rilevanti, inklużi n-negozji, l-akkademja u s-soċjetà ċivili bħala parti mill-attività ta’ rieżami tagħhom, biex jiksbu stampa sħiħa tal-ambjent tal-investiment u r-riskji potenzjali u biex ikunu jistgħu jaġixxu fl-interess taċ-ċittadini u tan-negozji tal-Unjoni.

(19)

Ir-rieżami u l-valutazzjonijiet tar-riskju previsti f’din ir-Rakkomandazzjoni huma eżerċizzji limitati biż-żmien biex jgħinu fit-tfassil ta’ risponsi ta’ politika xierqa,