(1)

Il-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta’ Fuq, min-naħa l-oħra (il-“Ftehim dwar il-Kummerċ u l-Kooperazzjoni”), ġie konkluż mill-Unjoni bid-Deċiżjoni tal-Kunsill (UE) 2021/689 (1) u daħal fis-seħħ fl-1 ta’ Mejju 2021.

(2)

L-Anness 31 tal-Ftehim dwar il-Kummerċ u l-Kooperazzjoni jipprovdi diversi każijiet fejn il-Kumitat Speċjalizzat għat-Trasport bit-Triq, stabbilit skont l-Artikolu 8(1), il-punt (o), ta’ dak il-Ftehim (il-“Kumitat Speċjalizzat għat-Trasport bit-Triq”), għandu jiddeċiedi dwar il-modalitajiet tal-iskambju ta’ informazzjoni bejn l-awtoritajiet kompetenti ta’ kull Parti fir-rigward tat-trasport ta’ merkanzija bit-triq skont il-Ftehim dwar il-Kummerċ u l-Kooperazzjoni.

(3)

It-Taqsima 2, il-Parti A tal-Anness 31 tal-Ftehim dwar il-Kummerċ u l-Kooperazzjoni tipprevedi sistema ta’ skambju ta’ informazzjoni dwar l-istazzjonar ta’ sewwieqa fit-trasport bit-triq, permezz tas-Sistema ta’ Informazzjoni tas-Suq Intern (IMI, Internal Market Information) tal-Unjoni. L-IMI hija ġestita mill-Kummissjoni, u l-modalitajiet tekniċi ta’ dak l-iskambju ta’ informazzjoni huma stabbiliti fid-Deċiżjoni Nru 1/2022 tal-Kumitat Speċjalizzat għat-Trasport bit-Triq (2). Il-kontribuzzjoni tar-Renju Unit għall-kostijiet tal-iżvilupp tal-modulu tad-dikjarazzjoni dwar l-istazzjonar tat-trasport bit-triq tal-IMI tħallset fl-2022, f’konformità mal-Artikolu 5(2) tad-Deċiżjoni Nru 1/2022 tal-Kumitat Speċjalizzat għat-Trasport bit-Triq.

(4)

L-Artikolu 14, it-Taqsima 1, il-Parti A tal-Anness 31 tal-Ftehim dwar l-Kummerċ u l-Kooperazzjoni jipprovdi li kull Parti għandha tiskambja informazzjoni, fost l-oħrajn, dwar ksur serju mwettaq mill-operaturi fil-Parti l-oħra. Ir-Reġistri Ewropej tal-Impriżi tat-Trasport bit-Triq (ERRU, European Registers of Road Transport Undertakings), ġestiti mill-Kummissjoni, jintużaw għal dak l-iskambju ta’ informazzjoni u.l-modalitajiet tagħhom huma soġġetti għal pożizzjoni separata tal-Unjoni stabbilita fid-Deċiżjoni tal-Kunsill (UE) 2025/2417 (3). Ir-Renju Unit ikkontribwixxa għall-kostijiet tal-iżvilupp tal-ERRU bħala Stat Membru tal-Unjoni.

(5)

L-Artikolu 714 tal-Ftehim dwar il-Kummerċ u l-Kooperazzjoni jipprovdi li l-parteċipazzjoni tar-Renju Unit fil-programmi, fl-attivitajiet tal-Unjoni jew f’partijiet minnhom għandha tkun soġġetta għal kontribuzzjoni finanzjarja annwali.

(6)

Filwaqt li l-modalitajiet tekniċi tal-iskambju ta’ informazzjoni huma speċifiċi għal kull sistema ta’ informazzjoni u għalhekk huma stabbiliti f’deċiżjonijiet distinti tal-Kumitat Speċjalizzat għat-Trasport bit-Triq, huwa xieraq, minħabba l-ammonti limitati kkonċernati u l-proċeduri amministrattivi meħtieġa għall-ipproċessar tal-pagamenti, li jiġi stabbilit kontribut finanzjarju annwali uniku tar-Renju Unit għall-parteċipazzjoni tiegħu f’ċerti sistemi ta’ informazzjoni dwar it-trasport bit-triq ġestiti mill-Kummissjoni skont il-qafas tal-Ftehim dwar il-Kummerċ u l-Kooperazzjoni.

(7)

Id-Deċiżjoni Nru 1/2022 tal-Kumitat Speċjalizzat għat-Trasport bit-Triq tipprevedi l-kontribuzzjoni speċifika tar-Renju Unit għall-IMI, għalhekk huwa meħtieġ li tiġi emendata.

(8)

Sabiex jiġi żgurat il-funzjonament xieraq tat-Titolu I ta’ Intestatura Tlieta tal-Parti Tnejn tal-Ftehim dwar il-Kummerċ u l-Kooperazzjoni, il-Kumitat Speċjalizzat għat-Trasport bit-Triq jenħtieġ għalhekk li jistabbilixxi l-kontribuzzjoni annwali li għandha titħallas mir-Renju Unit għal ċerti sistemi ta’ informazzjoni dwar it-trasport bit-triq ġestiti mill-Unjoni.

(9)

Jixraq li tiġi stabbilita l-pożizzjoni li għandha tittieħed f’isem l-Unjoni fil-Kumitat Speċjalizzat għat-Trasport bit-Triq, billi l-att previst se jkun vinkolanti għall-Unjoni.

(10)

Għalhekk jenħtieġ li l-pożizzjoni tal-Unjoni fi ħdan il-Kumitat Speċjalizzat għat-Trasport bit-Triq tkun ibbażata fuq l-abbozz ta’ Deċiżjoni ta’ dik il-Kumitat mehmuż ma’ din id-Deċiżjoni,