This document is an excerpt from the EUR-Lex website
Document 32025D1255
Council Decision (CFSP) 2025/1255 of 23 June 2025 amending Decision (CFSP) 2020/1999 concerning restrictive measures against serious human rights violations and abuses
Deċiżjoni tal-Kunsill (PESK) 2025/1255 tat-23 ta’ Ġunju 2025 li temenda d-Deċiżjoni (PESK) 2020/1999 li tikkonċerna miżuri restrittivi kontra l-ksur u l-abbużi serji tad-drittijiet tal-bniedem
Deċiżjoni tal-Kunsill (PESK) 2025/1255 tat-23 ta’ Ġunju 2025 li temenda d-Deċiżjoni (PESK) 2020/1999 li tikkonċerna miżuri restrittivi kontra l-ksur u l-abbużi serji tad-drittijiet tal-bniedem
ST/9911/2025/INIT
ĠU L, 2025/1255, 23.6.2025, ELI: http://data.europa.eu/eli/dec/2025/1255/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
|
Il-Ġurnal Uffiċjali |
MT Is-serje L |
|
2025/1255 |
23.6.2025 |
DEĊIŻJONI TAL-KUNSILL (PESK) 2025/1255
tat-23 ta’ Ġunju 2025
li temenda d-Deċiżjoni (PESK) 2020/1999 li tikkonċerna miżuri restrittivi kontra l-ksur u l-abbużi serji tad-drittijiet tal-bniedem
IL-KUNSILL TAL-UNJONI EWROPEA,
Wara li kkunsidra t-Trattat dwar l-Unjoni Ewropea, u b'mod partikolari l-Artikolu 29 tiegħu,
Wara li kkunsidra l-proposta tar-Rappreżentant Għoli tal-Unjoni għall-Affarijiet Barranin u l-Politika ta' Sigurtà,
Billi:
|
(1) |
Fis-7 ta' Diċembru 2020, il-Kunsill adotta d-Deċiżjoni (PESK) 2020/1999 (1). |
|
(2) |
Fit-8 ta' Diċembru 2020, permezz tad-Dikjarazzjoni tar-Rappreżentant Għoli tal-Unjoni għall-Affarijiet Barranin u l-Politika ta' Sigurtà (ir-“Rappreżentant Għoli”), f'isem l-Unjoni Ewropea, dwar ir-Reġim Globali ta' Sanzjonijiet tal-UE b'rabta mad-Drittijiet tal-Bniedem, l-Unjoni u l-Istati Membri tagħha affermaw mill-ġdid l-impenn qawwi tagħhom lejn il-promozzjoni u l-ħarsien tad-drittijiet tal-bniedem madwar id-dinja. Ir-Reġim Globali ta' Sanzjonijiet tal-UE b'rabta mad-Drittijiet tal-Bniedem jenfasizza d-determinazzjoni tal-Unjoni li ssaħħaħ ir-rwol tagħha fl-indirizzar ta' ksur u abbużi serji tad-drittijiet tal-bniedem madwar id-dinja. Ir-realizzazzjoni tat-tgawdija effettiva tad-drittijiet tal-bniedem għal kull persuna hija għan strateġiku tal-Unjoni. Ir-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt u d-drittijiet tal-bniedem huwa valur fundamentali tal-Unjoni u tal-politika estera u ta' sigurtà komuni tagħha. |
|
(3) |
F'Marzu 2025, mewġa ta' vjolenza fir-reġjun kostali tas-Sirja ħolqot għadd kbir ta' vittmi, inkluż bosta persuni ċivili. Fil-11 ta' Marzu 2025, ir-Rappreżentant Għoli ħarġet dikjarazzjoni f'isem l-Unjoni li fiha l-Unjoni kkundannat id-delitti orribbli mwettqa kontra persuni ċivili, inkluż qtil arbitrarju. Barra minn hekk, l-atturi relatati mar-reġim preċedenti ta' al-Assad għad għandhom rwol destabbilizzanti u huma responsabbli għal jew jipprovdu appoġġ għal ksur jew abbużi serji tad-drittijiet tal-bniedem fis-Sirja. |
|
(4) |
F'dak il-kuntest, jenħtieġ li ħames persuni jiżdiedu mal-lista ta' persuni fiżiċi u ġuridiċi, entitajiet u korpi li tinsab fl-Anness tad-Deċiżjoni (PESK) 2020/1999. |
|
(5) |
Għalhekk, jenħtieġ li d-Deċiżjoni (PESK) 2020/1999 tiġi emendata skont dan, |
ADOTTA DIN ID-DEĊIŻJONI:
Artikolu 1
L-Anness tad-Deċiżjoni (PESK) 2020/1999 huwa emendat f'konformità mal-Anness ta' din id-Deċiżjoni.
Artikolu 2
Din id-Deċiżjoni għandha tidħol fis-seħħ fid-data tal-pubblikazzjoni tagħha f'Il-Ġurnal Uffiċjali tal-Unjoni Ewropea.
Magħmul fi Brussell, it-23 ta’ Ġunju 2025.
Għall-Kunsill
Il-President
K. KALLAS
(1) Id-Deċiżjoni tal-Kunsill (PESK) 2020/1999 tas-7 ta' Diċembru 2020 li tikkonċerna miżuri restrittivi kontra l-ksur u l-abbużi serji tad-drittijiet tal-bniedem (ĠU L 410 I, 7.12.2020, p. 13, ELI: http://data.europa.eu/eli/dec/2020/1999/oj).
ANNESS
Fl-Anness tad-Deċiżjoni (PESK) 2020/1999, l-entrati li ġejjin jiżdiedu mal-lista ta' persuni fiżiċi u ġuridiċi, entitajiet u korpi taħt l-intestatura “A. Persuni fiżiċi”:
|
|
Ismijiet (Trażlitterazzjoni bl-alfabett Latin) |
Ismijiet |
Informazzjoni ta' identifikazzjoni |
Raġunijiet għall-elenkar |
Data tal-elenkar |
|
“121. |
Miqdad Lu'ay FATIHA magħruf ukoll bħala Miqdad FATIHA, Miqdad FUTAIHA, Abu Jafar, Abu Jaafar, Abu Ja' afar |
مقداد لؤيّ فتيحة مقداد فتيحة (Ortografija Għarbija) |
Data tat-twelid: 19.6.1989 Post tat-twelid: Jableh, Latakia, Syria Nazzjonalità: Sirjana Sess: raġel Indirizz: Syria/Lebanon |
Miqdad Fatiha huwa eks membru tal-Gwardja Repubblikana Sirjana, li minn dak iż-żmien 'l hawn ġiet xolta. F'dan ir-rwol kien responsabbli għal ħafna ksur jew abbużi serji tad-drittijiet tal-bniedem, inkluż tortura u trattament krudili ieħor tal-priġunieri. Wara l-waqgħa tar-reġim ta' al-Assad f'Diċembru 2024, Miqdad Fatiha fforma milizzji fir-reġjuni kostali tas-Sirja, li kebbsu tensjonijiet settarji u inċitament għall-vjolenza. L-unitajiet taħt il-kmand tiegħu kienu involuti fil-vjolenza settarja ta' Marzu 2025 fir-reġjun kostali tas-Sirja li rriżultat fit-telf ta' mijiet ta' ħajjiet ta' ċivili. Bħala l-mexxej tal-milizzji, Miqdad Fatiha huwa għalhekk responsabbli għal ksur jew abbużi serji tad-drittijiet tal-bniedem, inkluż tortura u trattament krudili, inuman u degradanti ieħor. |
23.6.2025 |
|
122. |
Ghaith DALLA magħruf ukoll bħala Ghiath Suleiman DALLA, Ghyath DALLA, Ghayth DALLA |
غياث سليمان دلا غياث سليمان دلّا (Ortografija Għarbija) |
Data tat-twelid: 31.7.1971 Post tat-twelid: Beit Yashout, Syria Nazzjonalità: Sirjana Sess: raġel Individwi assoċjati: Maher Al-Assad Entitajiet assoċjati: Fourth Division of the Syrian Army, Military Council for the Liberation of Syria |
Ghaith Dalla huwa eks Brigadier Ġeneral mal-magħrufa Fourth Army Division tas-Sirja waqt ir-reġim ta’ al-Assad. F'dan ir-rwol, kien responsabbli għal ħafna ksur jew abbużi serji tad-drittijiet tal-bniedem dokumentati sewwa, inkluż qtil ekstraġudizzjarju u pieni krudili bl-użu tal-ġuħ. Wara l-waqgħa tar-reġim ta' al-Assad, Ghaith Dalla stabbilixxa u mexxa l-‘Military Council for the Liberation of Syria’ f'Marzu 2025. Il-milizzja tiegħu minn dak iż-żmien 'l hawn kebbset tensjonijiet settarji u inċitat il-vjolenza fir-reġjun kostali tas-Sirja. L-unitajiet ta' Ghaith Dalla kienu involuti fil-vjolenza settarja ta' Marzu 2025 fir-reġjun kostali tas-Sirja li rriżultat fit-telf ta' mijiet ta' ħajjiet ta' ċivili. Għalhekk, Ghaith Dalla huwa responsabbli għal ksur jew abbużi serji tad-drittijiet tal-bniedem. |
23.6.2025 |
|
123. |
Suhayl AL-HASAN magħruf ukoll bħala Suhail Salman AL-HASAN, Suhail AL-HASSAN |
سهيل سلمان الحسن (Ortografija Għarbija) |
Data tat-twelid: 10.6.1970 Post tat-twelid: Jableh, Latakia, Syria Nazzjonalità: Sirjana Sess: raġel Indirizz: Tartus, Syria |
Suhayl al-Hasan huwa Eks Kmandant tad-Division 25 Special Mission Forces tal-forzi armati Sirjani taħt ir-reġim ta’ al-Assad. F'dan ir-rwol, kif ukoll fil-bosta karigi oħra li kellu fil-Forzi Armati Sirjani, wettaq u ssorvelja għadd kbir ta' ksur jew abbużi serji tad-drittijiet tal-bniedem li jinkludu tortura, qtil extraġudizzjarju u arresti arbitrarji. Irrappurtat ukoll li ssorvelja l-użu ta' armi kimiċi. Wara l-waqgħa tar-reġim ta' al-Assad, Suhayl al-Hasan stabbilixxa l-‘Coastal Shield Brigade’ f'Marzu 2025. Il-milizzja tiegħu minn dak iż-żmien 'l hawn kebbset tensjonijiet settarji u inċitat il-vjolenza fir-reġjun kostali tas-Sirja. L-unitajiet ta' Suhayl al-Hasan kienu involuti fil-vjolenza settarja ta' Marzu 2025 fir-reġjun kostali tas-Sirja li rriżultat fit-telf ta' mijiet ta' ħajjiet ta' ċivili. Għalhekk, Suhayl al-Hasan huwa responsabbli għal ksur jew abbużi serji tad-drittijiet tal-bniedem. |
23.6.2025 |
|
124. |
Mudalal KHOURY magħruf ukoll bħala Madalal (Mtanyus) KHURI, Mudallal KHOURY, Mudallal KHOURI |
مدلل خوري (Ortografija Għarbija) |
Data tat-twelid: 18.6.1957 Post tat-twelid: Homs, Syria Nazzjonalità: Sirjana, Russa Sess: raġel Indirizz: Moscow Individwu assoċjat: Imad Khoury |
Mudalal Khoury huwa negozjant Sirjan-Russu li jopera mir-Russja. Huwa wieħed mill-aktar negozjanti Sirjani prominenti li appoġġaw ir-reġim ta' al-Assad. F'kuntest fejn ir-reġim ta' al-Assad uża ‘barrel bombs’ u armi kimiċi kontra l-popolazzjoni ċivili tas-Sirja, Mudalal Khoury rrappreżenta l-interessi kummerċjali u finanzjarji tar-reġim fir-Russja. Fost affarijiet oħra, ipprovda kumpaniji fittizji biex jintużaw għall-programmi ta' armi kimiċi u ballistiċi tar-reġim ta’ al-Assad. Għalhekk, Mudalal Khoury ipprovda appoġġ finanzjarju, tekniku u materjali għal ksur jew abbużi serji tad-drittijiet tal-bniedem, b'mod partikolari delitti kontra l-umanità. |
23.6.2025 |
|
125. |
Imad KHOURY magħruf ukoll bħala Emad KHOURY, Mtanyus KHURY, KHURI, KHOURI |
عماد خوري (Ortografija Għarbija) |
Data tat-twelid: 3.10.1964 Nazzjonalità: Sirjana, Russa Sess: raġel Individwu assoċjat: Mudalal Khoury |
Imad Khoury huwa wieħed mill-aktar negozjanti Sirjani prominenti li appoġġaw ir-reġim ta' al-Assad. F'kuntest fejn ir-reġim ta' al-Assad uża ‘barrel bombs’ u armi kimiċi kontra l-popolazzjoni ċivili tas-Sirja, Imad Khoury rrappreżenta l-interessi kummerċjali u finanzjarji tar-reġim. Fost affarijiet oħra, waqqaf kumpanija li kienet parti minn skema ta' ħasil tal-flus li kienet tappoġġa lir-reġim ta’ al-Assad. B'dan il-mod, flimkien ma' ħuh Mudalal Khoury, għen fil-finanzjament tad-delitti gravi kontra l-umanità mwettqa taħt ir-reġim ta' al-Assad. Għalhekk, Imad Khoury ipprovda appoġġ finanzjarju, tekniku u materjali għal ksur jew abbużi serji tad-drittijiet tal-bniedem, b'mod partikolari delitti kontra l-umanità. |
23.6.2025”. |
ELI: http://data.europa.eu/eli/dec/2025/1255/oj
ISSN 1977-074X (electronic edition)