(1)

Skont id-Deċiżjoni (UE) 2022/1982 tal-Bank Ċentrali Ewropew (BĊE/2022/34) (2), l-awtoritajiet kompetenti jistgħu jużaw is-servizzi tas-Sistema Ewropea ta’ Banek Ċentrali (SEBĊ) għall-fini ta’ kooperazzjoni mas-SEBĊ u ma’ xulxin sabiex iwettqu l-kompiti tagħhom fi ħdan il-Mekkaniżmu Superviżorju Uniku (MSU), stabbilit skont ir-Regolament (UE) Nru 1024/2013.

(2)

Skont id-Deċiżjoni (UE) 2022/1981 tal-Bank Ċentrali Ewropew (BĊE/2022/33) (3), l-awtoritajiet kompetenti għandhom jużaw ċerti servizzi tas-SEBĊ, u jistgħu jużaw servizzi oħra tas-SEBĊ, skont it-termini pprovduti f’dik id-Deċiżjoni.

(3)

Id-Deċiżjoni (UE) 2022/1981 (BĊE/2022/33) tapplika għas-servizzi tas-SEBĊ li huma speċifikati fil-listi eżawrjenti stabbiliti fl-Anness I u l-Anness II ta’ dik id-Deċiżjoni. B’mod partikolari, l-Anness I jispeċifika s-servizzi tas-SEBĊ li l-awtoritajiet kompetenti kollha huma meħtieġa jużaw fit-twettiq tal-kompiti tagħhom fi ħdan l-MSU, filwaqt li l-Anness II jispeċifika s-servizzi tas-SEBĊ li l-awtoriitajiet kompetenti jistgħu, fuq bażi volontarja, jiddeċiedu li jużaw fit-twettiq tal-kompiti tagħhom fi ħdan l-MSU.

(4)

Is-servizzi tas-SEBĊ huma pprovduti lill-banek ċentrali tas-SEBĊ biex jappoġġaw it-twettiq tal-kompiti tagħhom. Is-servizzi tal-istatistika tas-SEBĊ huma żviluppati, immexxija u miżmuma minn bank ċentrali wieħed jew aktar tas-SEBĊ u mmexxija mill-Kumitat tal-Istatistika tas-SEBĊ.

(5)

Il-Proġett dwar Kompiti Operativi tad-Dizzjunarju tar-Rappurtar Integrat tal-Bank (BIRD OT) huwa servizz ta’ statistika tas-SEBĊ li jinkludi mudell ta’ data u dizzjunarju tar-rappurtar integrati u armonizzati u, għalhekk, huwa intiż sabiex itejjeb b’mod sinifikanti l-kwalità, il-konsistenza u l-preċiżjoni tad-data rrappurtata lill-banek ċentrali permezz tar-rappurtar tal-istatistika. L-użu ta’ BIRD OT iħaddan kooperazjoni fil-qasam tar-rappurtar regolatorju, peress illi l-aġenti tar-rappurtar u l-aġenti taħt superviżjoni kollha li jużaw BIRD OT se japplikaw mudell ta’ data uniformi u dizzjunarju tar-rappurtar. Għaldaqstant BIRD OT ikun ukoll ta’ benefiċċju għall-awtoritajiet kompetenti kollha li lilhom meħtieġ li jiġu sottomessi rapporti ta’ data superviżorji.

(6)

Sabiex jiġi żgurat il-funzjonament bla xkiel, effettiv u konsistenti tal-MSU, l-arranġamenti prattiċi għall-kooperazzjoni bejn il-Bank Ċentrali Ewropew u l-awtoritajiet nazzjonali kompetenti (ANK) fi ħdan l-MSU jenħtieġ li jinkludu arranġamenti għall-użu minn dawk l-ANK tal-BIRD OT sabiex iwettqu l-kompiti tagħhom skont ir-Regolament (UE) Nru 1024/2013.

(7)

Għalhekk, id-Deċiżjoni (UE) 2022/1981 (BĊE/2022/33) għandha tiġi emendata kif meħtieġ,