(1)

Il-Konvenzjoni ta’ Stokkolma dwar Materjal Organiku Persistenti li Jniġġes (1) (il-“Konvenzjoni”) daħlet fis-seħħ fis-17 ta’ Mejju 2004 u ġiet konkluża mill-Unjoni permezz tad-Deċiżjoni tal-Kunsill 2006/507/KE (2).

(2)

Skont l-Artikolu 8 tal-Konvenzjoni, il-Konferenza tal-Partijiet għall-Konvenzjoni (il-“Konferenza tal-Partijiet”) għandha s-setgħa telenka sustanzi kimiċi fl-Annessi A, B u/jew C tal-Konvenzjoni u tispeċifika l-miżuri tal-kontroll relatati ma’ tali sustanzi kimiċi.

(3)

Fit-12-il laqgħa tagħha, il-Konferenza tal-Partijiet hija mistennija tadotta deċiżjonijiet biex telenka aktar sustanzi kimiċi fl-Anness A tal-Konvenzjoni.

(4)

Sabiex saħħet il-bniedem u l-ambjent jitħarsu minn aktar rilaxxi ta’ paraffini klorurati b’tulijiet tal-katina tal-karbonju fil-medda C14–17 u b’livelli ta’ klorinazzjoni ta’ 45 fil-mija jew aktar ta’ kloru skont il-piż, ta’ klorpirifos u ta’ aċidi perfluworokarbossiliċi b’katina twila, tal-imlieħ tagħhom u tal-komposti relatati, huwa neċessarju li jitnaqqsu jew jiġu eliminati l-produzzjoni u l-użu ta’ dawk is-sustanzi kimiċi fil-livell globali u li jiġi appoġġat l-elenkar tagħhom fl-annessi rilevanti tal-Konvenzjoni.

(5)

Peress li l-Kumitat ta’ Rieżami tal-Materjal Organiku Persistenti li Jniġġes (Persistent Organic Pollutants Review Committee, POPRC) identifika l-ħtieġa ta’ ċerti eżenzjonijiet speċifiċi għal kull waħda mit-tliet sustanzi kimiċi biex jingħata daqsxejn taż-żmien għat-tneħħija gradwali tal-użu tagħhom, fosthom billi jiġu identifikati xi alternattivi, jenħtieġ li jingħataw ċerti eżenzjonijiet speċifiċi bi żmien limitat, li wħud minnhom huma meħtieġa mill-Unjoni.

(6)

Il-kamp ta’ applikazzjoni tal-eżenzjonijiet speċifiċi għall-paraffini klorurati b’tulijiet tal-katina tal-karbonju fil-medda C14–17 u b’livelli ta’ klorinazzjoni ta’ 45 fil-mija jew aktar ta’ kloru skont il-piż irrakkomandati mill-POPRC ma jkoprix l-użi kollha li huma meħtieġa mill-Unjoni qabel ma titlesta t-tranżizzjoni lejn alternattivi oħra, u għalhekk l-Unjoni jenħtieġ li titlob iż-żieda ta’ eżenzjonijiet speċifiċi għall-użu f’ċerti applikazzjonijiet tad-difiża u ajruspazjali, bħal kisi, lubrikanti, u munizzjon u l-imballaġġ tiegħu u, fejn meħtieġ, dati tal-iskadenza itwal għall-identifikazzjoni ta’ alternattivi u s-sostituzzjoni f’dawk is-setturi ferm regolati.

(7)

Sabiex jitħalla żmien raġonevoli biex jiġu identifikati alternattivi u jintużaw ċerti spare parts fis-settur tal-avjazzjoni, jista’ jkun hemm il-bżonn li l-UV-328 jibqa’ jkun permess jintuża f’inġenji tal-ajru ċivili u militari inkluż fi spare parts rilevanti. Għalhekk, jenħtieġ li l-Unjoni tappoġġa l-proposta mir-Repubblika Demokratika Federali tal-Etjopja li tiżdied l-eżenzjoni speċifika rispettiva mill-entrata dwar l-UV-328 fl-Anness A tal-Konvenzjoni, li jenħtieġ li tkun qasira kemm jista’ jkun biex tiġi żgurata t-tneħħija gradwali rapida tal-użu tal-UV-328.

(8)

Ir-Repubblika tal-Korea infurmat lill-Partijiet (3) li wara l-projbizzjoni fuq il-manifattura, l-importazzjoni u l-introduzzjoni fis-suq tal-aċidu perfluworoottanojku (PFOA), l-imlieħ tiegħu u l-komposti relatati mal-PFOA, l-aċidu perfluworoottansulfoniku (PFOS), l-imlieħ tiegħu u l-fluworur tas-sulfuril tal-perfluworoottan għall-użu fil-fowms għat-tifi tan-nar fil-Korea, għad għandha ħażniet ta’ dawk il-fowms u li jista’ jkollha bżonn aktar żmien biex timmaniġġa dawk il-ħażniet b’mod li jirrispetta l-ambjent. Dawk il-ħażniet jistgħu jintużaw matul dak il-perjodu f’impjanti petrokimiċi, ajruporti, jew siti oħra, fil-każ ta’ nirien kbar u l-alternattivi disponibbli ma jkunux effettivi biżżejjed. Sabiex ir-Repubblika tal-Korea tingħata aktar żmien biex gradwalment tintroduċi alternattivi u meta jitqies li t-talba mir-Repubblika tal-Korea biex testendi d-data ta’ skadenza ta’ dawk l-eżenzjonijiet speċifiċi, li ser japplikaw biss għar-Repubblika tal-Korea bħala l-Parti rikjedenti, tikkonforma mal-proċess ta’ rieżami adottat fid-Deċiżjoni SC 4/3 u SC 7/1, jenħtieġ li l-Unjoni tappoġġa dik it-talba.

(9)

Huwa xieraq li tiġi stabbilita l-pożizzjoni li għandha tittieħed f’isem l-Unjoni fit-tnax-il laqgħa tal-Konferenza tal-Partijiet, billi d-deċiżjonijiet ser ikunu vinkolanti fuq l-Unjoni jew kapaċi jinfluwenzaw b’mod deċiżiv il-kontenut tal-liġi tal-Unjoni, jiġifieri r-Regolament (UE) 2019/1021 tal-Parlament Ewropew u tal-Kunsill (4),

(a)

li jiġi appoġġat l-elenkar tal-paraffini klorurati b’tulijiet tal-katina tal-karbonju fil-medda C14–17 u b’livelli ta’ klorinazzjoni ta’ 45 fil-mija jew aktar ta’ kloru skont il-piż fl-Anness A, bl-eżenzjonijiet speċifiċi rrakkomandati mill-POPRC (5), u li jintalbu eżenzjonijiet speċifiċi addizzjonali għall-użu f’ċerti applikazzjonijiet tad-difiża u ajruspazjali, bħal kisi, lubrikanti, u munizzjon u l-imballaġġ tiegħu, u estensjoni tad-dati tal-iskadenza għal xi eżenzjonijiet għall-applikazzjonijiet ajruspazjali u tad-difiża sal-2041, b’estensjoni possibbli ta’ din id-data tal-iskadenza sa tmiem il-ħajja tat-tagħmir u tal-ispare parts jekk dawk is-sustanzi jintużaw f’tali applikazzjonijiet;

(b)

li jiġi appoġġat l-elenkar tal-klorpirifos fl-Anness A, bl-eżenzjonijiet speċifiċi rrakkomandati mill-POPRC (6);

(c)

li jiġi appoġġat l-elenkar tal-aċidi perfluworokarbossiliċi b’katina twila, tal-imlieħ tagħhom u tal-komposti relatati fl-Anness A, bl-eżenzjonijiet speċifiċi rrakkomandati mill-POPRC (7).