(1)

Il-marda tal-ilsien u d-dwiefer hija marda virali infettiva li taffettwa lill-mammiferi tal-ordni Artiodactyla u li jista’ jkollha impatt serju fuq il-popolazzjoni tal-annimali kkonċernata u fuq il-profittabbiltà tat-trobbija tal-annimali, u tikkawża tfixkil għall-movimenti tal-kunsinni ta’ dawk l-annimali u tal-prodotti tagħhom fl-Unjoni u għall-esportazzjonijiet lejn il-pajjiżi terzi.

(2)

F’każ ta’ tifqigħa tal-marda tal-ilsien u d-dwiefer fl-annimali tal-ispeċijiet elenkati, hemm riskju serju li dik il-marda tinfirex lejn stabbilimenti oħra li jżommu l-annimali tal-ispeċijiet elenkati.

(3)

Ir-Regolament Delegat tal-Kummissjoni (UE) 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c), tar-Regolament (UE) 2016/429, u definit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta f’każ ta’ tifqigħa ta’ marda tal-kategorija A, inkluż il-marda tal-ilsien u d-dwiefer, kif ukoll ċerti miżuri li jridu jiġu applikati fiha. L-Artikolu 21(1) ta’ dak ir-Regolament Delegat jipprevedi li ż-żona ristretta trid tkun tinkludi żona ta’ protezzjoni, żona ta’ sorveljanza, u jekk ikun meħtieġ, żoni ristretti oħra madwar jew li jmissu ż-żoni ta’ protezzjoni u ta’ sorveljanza.

(4)

Id-Deċiżjoni ta’ Implimentazzjoni tal-Kummissjoni (UE) 2025/496 (4) ġiet adottata abbażi tar-Regolament (UE) 2016/429, u tistabbilixxi ċerti miżuri ta’ emerġenza interim relatati mat-tifqigħa tal-marda tal-ilsien u d-dwiefer fi stabbiliment li jżomm l-annimali bovini fil-Kontea ta’ Győr-Moson-Sopron fl-Ungerija, li ġie kkonfermat fis-6 ta’ Marzu 2025, qrib ħafna tal-fruntiera mas-Slovakkja. B’mod partikolari, id-Deċiżjoni ta’ Implimentazzjoni (UE) 2025/496 tipprevedi li wara dik it-tifqigħa, iż-żoni ta’ protezzjoni u ta’ sorveljanza stabbiliti fl-Ungerija u ż-żona ta’ sorveljanza stabbilita fis-Slovakkja, f’konformità mar-Regolament Delegat (UE) 2020/687 għandhom jinkludu mill-inqas iż-żoni elenkati fl-Anness ta’ dik id-Deċiżjoni ta’ Implimentazzjoni. Barra minn hekk, id-Deċiżjoni ta’ Implimentazzjoni (UE) 2025/496 tipprevedi li l-miżuri meħtieġa li jridu jiġu applikati f’dawk iż-żoni jridu jiġu applikati mill-inqas sad-dati elenkati f’dak l-Anness.

(5)

Mill-adozzjoni tad-Deċiżjoni ta’ Implimentazzjoni (UE) 2025/496 ’l hawn, il-miżuri ta’ emerġenza li jeħtieġ li jiġu applikati fiż-żoni ta’ protezzjoni u ta’ sorveljanza elenkati fl-Anness tagħha, u l-iskeda ta’ żmien għall-applikazzjoni tagħhom, ġew rieżaminati, b’mod partikolari fir-rigward tat-tindif u tad-diżinfezzjoni preliminari tal-istabbiliment affettwat. Għaldaqstant, id-durata ta’ dawk il-miżuri trid tiġi estiża. Għalhekk, jenħtieġ li ż-żoni elenkati bħala żoni ta’ protezzjoni u ta’ sorveljanza għall-Ungerija, u bħala żona ta’ sorveljanza għas-Slovakkja jiġu ddefiniti kemm mil-lat ta’ spazju kif ukoll temporanjament, filwaqt li titqies l-iskeda ta’ żmien rieżaminata għal dawk il-miżuri, fl-Anness ta’ din id-Deċiżjoni ta’ Implimentazzjoni, sabiex jiġi evitat it-tixrid tal-marda mill-istabbiliment affettwat fl-Ungerija lejn partijiet oħra ta’ dak l-Istat Membru, lejn Stati Membri oħra jew lejn il-pajjiżi terzi. Jeħtieġ ukoll li tiġi pprovduta ċarezza fil-livell tal-Unjoni, billi jiġi adottat att legali tal-Unjoni, li jistabbilixxi l-kamp ta’ applikazzjoni eżatt ta’ dawk l-oqsma, kif ukoll dwar il-miżuri li għandhom jiġu applikati fihom, sabiex jiġi evitat kwalunkwe tfixkil mhux ġustifikat tal-movimenti tal-annimali u tal-prodotti tagħhom fl-Unjoni, kif ukoll tal-esportazzjonijiet lejn il-pajjiżi terzi.

(6)

Għaldaqstant, jeħtieġ li fil-livell tal-Unjoni jiġu rieżaminati malajr il-miżuri applikabbli fiż-żona ristretta għall-marda tal-ilsien u d-dwiefer, li tinkludi ż-żoni ta’ protezzjoni u ta’ sorveljanza fl-Ungerija, u ż-żona ta’ sorveljanza fis-Slovakkja, f’kollaborazzjoni ma’ dawk l-Istati Membri.

(7)

Għalhekk, jenħtieġ li d-Deċiżjoni ta’ Implimentazzjoni (UE) 2025/496 titħassar u tiġi sostitwita b’din id-Deċiżjoni.

(8)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,