Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32025D0410

Deċiżjoni ta’ Implimentazzjoni tal-Kummissjoni (UE) 2025/410 tas-26 ta’ Frar 2025 li temenda d-Deċiżjoni 2013/713/UE li tistabbilixxi l-ECRIN-ERIC (notifikata bid-dokument C(2025)1189)

C/2025/1189

ĠU L, 2025/410, 28.2.2025, ELI: http://data.europa.eu/eli/dec_impl/2025/410/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/dec_impl/2025/410/oj

European flag

Il-Ġurnal Uffiċjali
ta'l-Unjoni Ewropea

MT

Is-serje L

2025/410

28.2.2025

DEĊIŻJONI TA’ IMPLIMENTAZZJONI TAL-KUMMISSJONI (UE) 2025/410

tas-26 ta’ Frar 2025

li temenda d-Deċiżjoni 2013/713/UE li tistabbilixxi l-ECRIN-ERIC

(notifikata bid-dokument C(2025)1189)

(It-testi biċ-Ċek, bl-Ingliż, bil-Franċiż, bil-Ġermaniż, bil-Grieg, bl-Ungeriż, bl-Irlandiż, bit-Taljan, bil-Pollakk, bil-Portugiż, bis-Slovakk u bl-Ispanjol biss huma awtentiċi)

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament tal-Kunsill (KE) Nru 723/2009 tal-25 ta’ Ġunju 2009 dwar il-qafas ġuridiku Komunitarju applikabbli għal Konsorzju għal Infrastruttura Ewropea ta’ Riċerka (ERIC) (1), u b’mod partikolari l-Artikolu 11(1) tiegħu,

Billi:

(1)

Ir-Regolament (KE) Nru 723/2009 ġie inkorporat fil-Ftehim dwar iż-Żona Ekonomika Ewropea (ŻEE) permezz tad-Deċiżjoni tal-Kumitat Konġunt taż-ŻEE Nru 72/2015 (2).

(2)

In-Network ta’ Infrastruttura Ewropea ta’ Riċerka Klinika ġie stabbilit bħala Konsorzju għal Infrastruttura Ewropea ta’ Riċerka (ECRIN-ERIC, European Clinical Research Infrastructure Network - European Research Infrastructure Consortium) bid-Deċiżjoni tal-Kummissjoni 2013/713/UE (3).

(3)

Fil-25 ta’ Settembru 2023, fit-23 ta’ Novembru 2023 u fis-17 ta’ Mejju 2024, l-ECRIN-ERIC ressaq proposta lill-Kummissjoni biex jemenda l-Istatuti tiegħu f’konformità mal-Artikolu 11(1) tar-Regolament (KE) Nru 723/2009.

(4)

Xi emendi li jikkonċernaw bidliet minuri fid-drittijiet tal-membri u tal-osservaturi, fil-governanza, fil-politika tad-data, fil-proċedura tal-emenda, fid-definizzjoni tas-sħab xjentifiċi, fil-lista aġġornata tal-membri u tal-osservaturi u fil-lista aġġornata tal-kontribuzzjonijiet finanzjarji (lista bil-kontribuzzjonijiet finanzjarji ta’ kull membru u osservatur), daħlu fis-seħħ f’konformità mal-Artikolu 11(4) tar-Regolament (KE) Nru 723/2009.

(5)

Xi emendi oħra, li jintroduċu bidliet minuri fid-deskrizzjoni tal-kompiti u l-attivitajiet, fil-governanza li taffettwa l-politika ta’ evalwazzjoni xjentifika, fid-deskrizzjoni tal-proċedura ta’ stralċ u fil-politika dwar it-tixrid, jeħtieġu l-approvazzjoni tal-Kummissjoni.

(6)

Il-Kummissjoni vvalutat l-applikazzjoni skont l-Artikolu 5(2) tar-Regolament (KE) Nru 723/2009, u kkonkludiet li din tissodisfa r-rekwiżiti stabbiliti f’dak ir-Regolament.

(7)

Il-miżuri previsti f’din id-Deċiżjoni huma f’konformità mal-opinjoni tal-Kumitat stabbilit bl-Artikolu 20 tar-Regolament (KE) Nru 723/2009,

ADOTTAT DIN ID-DEĊIŻJONI:

Artikolu 1

L-Istatuti tal-ECRIN-ERIC annessi mad-Deċiżjoni 2013/713/UE huma emendati f’konformità mal-Anness ta’ din id-Deċiżjoni.

Artikolu 2

Din id-Deċiżjoni hija indirizzata lir-Repubblika Ċeka, lir-Repubblika Franċiża, lir-Repubblika Federali tal-Ġermanja, lir-Repubblika Ellenika, lill-Ungerija, lill-Irlanda, lir-Repubblika Taljana, lir-Renju tan-Norveġja, lir-Repubblika tal-Polonja, lir-Repubblika Portugiża, lir-Repubblika Slovakka, lir-Renju ta’ Spanja u lill-Konfederazzjoni Żvizzera.

Magħmul fi Brussell, is-26 ta’ Frar 2025.

Għall-Kummissjoni

Ekaterina ZAHARIEVA

Membru tal-Kummissjoni

(1)   ĠU L 206, 8.8.2009, p. 1, ELI: http://data.europa.eu/eli/reg/2009/723/oj.

(2)  Id-Deċiżjoni tal-Kumitat Konġunt taż-ŻEE Nru 72/2015 tal-20 ta’ Marzu 2015 li temenda l-Protokoll 31 tal-Ftehim ŻEE, dwar il-kooperazzjoni f’oqsma speċifiċi li ma jagħmlux parti mill-erba’ libertajiet [2016/755] (ĠU L 129, 19.5.2016, p. 85, ELI: http://data.europa.eu/eli/dec/2016/755/oj).

(3)  Id-Deċiżjoni ta’ Implimentazzjoni tal-Kummissjoni 2013/713/UE tad-29 ta’ Novembru 2013 dwar it-twaqqif tan-Network ta’ Infrastruttura Ewropea ta’ Riċerka Klinika (ECRIN) bħala Konsorzju għal Infrastruttura Ewropea ta’ Riċerka (ECRIN-ERIC) (ĠU L 324, 5.12.2013, p. 8, http://data.europa.eu/eli/dec_impl/2013/713/oj).

ANNESS

L-Istatuti tal-ECRIN-ERIC annessi mad-Deċiżjoni 2013/713/UE huma emendati kif ġej:

(1)

L-Artikolu 3 huwa emendat kif ġej:

(a)

il-paragrafu 1 huwa sostitwit b’dan li ġej:

“1.   Il-kompitu prinċipali tal-ECRIN-ERIC għandu jkun li jistabbilixxi u jopera infrastruttura ta’ riċerka li tappoġġa l-kollaborazzjoni multinazzjonali fir-riċerka klinika, biex l-Ewropa ssir żona unika għall-istudji kliniċi.”

;

(b)

il-paragrafu 3 huwa sostitwit b’dan li ġej:

“3.   L-informazzjoni, il-pariri u s-servizzi proposti mill-ECRIN-ERIC għandhom ikopru b’mod partikolari l-appoġġ għall-ġestjoni tal-istudji kliniċi, filwaqt li jnaqqsu l-frammentazzjoni tas-sistemi tas-saħħa u dawk leġiżlattivi fl-Ewropa: is-sottomissjonijiet lill-kumitati tal-etika u lill-awtoritajiet kompetenti, ir-rapportar ta’ eventi avversi, il-monitoraġġ tal-istudji, il-ġestjoni tad-data, l-appoġġ għall-ikkuntrattar tal-assigurazzjoni.”

;

(2)

l-Artikolu 9(2) huwa emendat kif ġej:

(a)

il-punt (b) huwa sostitwit b’dan li ġej:

“(b)

ikun kompost minn Delegat għoli wieħed ta’ kull Sieħeb Xjentifiku mill-pajjiżi Membri u Osservaturi. Id-Direttur Ġenerali tal-ECRIN-ERIC għandu jattendi għal-laqgħat tal-Kumitat tan-Netwerks. L-Uffiċċju tal-Ġestjoni tal-ECRIN-ERIC għandu jaġixxi bħala s-Segretarjat tal-Kumitat tan-Netwerks;”;

(b)

il-punt (e) huwa sostitwit b’dan li ġej:

“(e)

jappoġġa l-implimentazzjoni kkoordinata, fil-livell nazzjonali, tad-deċiżjonijiet, l-istrateġiji, ir-regoli u l-proċeduri stipulati mid-Direttur Ġenerali tal-ECRIN-ERIC u mill-Assemblea tal-Membri fil-pjan ta’ ħidma pluriennali;”;

(3)

l-Artikolu 20 huwa emendat kif ġej:

(a)

il-paragrafu 3 huwa sostitwit b’dan li ġej:

“3.   L-assi intanġibbli tal-ECRIN-ERIC (assi u xjentifiċi) għandhom jiġu trasferiti wara l-istralċ tiegħu lil entità li għandu jkun hemm qbil dwarha minn maġġoranza b’aktar minn żewġ terzi tal-Membri li jirrappreżentaw maġġoranza b’aktar minn żewġ terzi tal-kontribuzzjonijiet obbligatorji.”

;

(b)

jiżdied il-paragrafu 4 li ġej:

“4.   L-assi tanġibbli tal-ECRIN-ERIC (flus kontanti u ekwivalenti ta’ flus kontanti, proprjetà immobbli, tagħmir, oħrajn) għandhom jiġu distribwiti mill-ġdid lill-Membri attwali tal-ECRIN-ERIC fiż-żmien tal-istralċ b’mod proporzjonat mas-sehem tagħhom fl-assi tal-ECRIN-ERIC. Ir-regoli ddettaljati dwar il-proċeduri tal-akkwist huma ddefiniti fir-Regoli ta’ Proċedura Interni.”

;

(4)

l-Artikolu li ġej jiddaħħal wara l-Artikolu 20:

“Artikolu 20a

Politika dwar it-tixrid

1.   L-ECRIN-ERIC għandu jieħu l-azzjonijiet kollha xierqa biex jippromwovi l-infrastruttura u l-użu tagħha fir-riċerka u fl-edukazzjoni.

2.   L-ECRIN-ERIC għandu jippromwovi t-tixrid u l-kondiviżjoni tar-riżultati miksuba minn studji kliniċi multinazzjonali appoġġati mill-ECRIN-ERIC, u ta’ kwalunkwe għodda, proċedura jew metodoloġija żviluppata b’kontribut tal-ECRIN-ERIC.

3.   Mingħajr preġudizzju għal kwalunkwe drittijiet tal-proprjetà, l-ECRIN-ERIC għandu jitlob lill-utenti tiegħu jippubblikaw ir-riżultati tar-riċerka tagħhom u jagħmlu r-riżultati tagħhom disponibbli permezz tal-ECRIN-ERIC.

4.   Il-politika ta’ tixrid għandha tidentifika d-diversi gruppi ta’ mira, inkluż il-pazjenti, u l-ECRIN-ERIC għandu juża diversi mezzi biex jilħaq l-udjenzi fil-mira, bħal pereżempju portali tal-web, midja soċjali, bullettini, workshops, preżenza fil-konferenzi, artikli f’ġurnali u f’gazzetti ta’ kuljum.

5.   L-ECRIN-ERIC għandu jippromwovi politika tax-Xjenza Miftuħa, kif ukoll il-kondiviżjoni u l-użu sekondarju tad-data kollha ġġenerata bl-appoġġ tal-ECRIN-ERIC skont il-prinċipju FAIR (Traċċabbli, Aċċessibbli, Interoperabbli u Riutilizzabbli), u f’konformità mal-leġiżlazzjonijiet nazzjonali u Ewropej dwar il-protezzjoni tad-data.”

.

ELI: http://data.europa.eu/eli/dec_impl/2025/410/oj

ISSN 1977-074X (electronic edition)

Top