(1)

Il-marda tal-ilsien u d-dwiefer hija marda virali infettiva li taffettwa lill-mammiferi tal-ordni artjodattili u li jista’ jkollha impatt serju fuq il-popolazzjoni tal-annimali kkonċernata u fuq il-profittabbiltà tat-trobbija tal-annimali, u tikkawża tfixkil għall-movimenti tal-kunsinni ta’ dawk l-annimali u tal-prodotti tagħhom fl-Unjoni u għall-esportazzjonijiet lejn pajjiżi terzi.

(2)

F’każ ta’ tifqigħa tal-marda tal-ilsien u d-dwiefer f’annimali tal-ispeċijiet elenkati, hemm riskju serju li dik il-marda tinfirex lejn stabbilimenti oħra li jżommu annimali tal-ispeċijiet elenkati.

(3)

Ir-Regolament Delegat tal-Kummissjoni (UE) 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c), tar-Regolament (UE) 2016/429, u definit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta f’każ ta’ tifqigħa ta’ marda tal-kategorija A, inkluż il-marda tal-ilsien u d-dwiefer, kif ukoll ċerti miżuri li jridu jiġu applikati fiha. L-Artikolu 21(1) ta’ dak ir-Regolament Delegat jipprevedi li ż-żona ristretta trid tkun tinkludi żona ta’ protezzjoni, żona ta’ sorveljanza, u jekk ikun meħtieġ, żoni ristretti ulterjuri madwar iż-żoni ta’ protezzjoni u ta’ sorveljanza jew maġenbhom.

(4)

Id-Deċiżjoni ta’ Implimentazzjoni tal-Kummissjoni (UE) 2025/186 (4) ġiet adottata abbażi tar-Regolament (UE) 2016/429, u tistabbilixxi ċerti miżuri ta’ emerġenza marbuta mal-infezzjoni bil-virus tal-marda tal-ilsien u d-dwiefer fil-Ġermanja b’reazzjoni għat-tifqigħa kkonfermata fl-10 ta’ Jannar 2025 fl-istat federali ta’ Brandenburg, qrib il-fruntiera ta’ dak l-istat mal-istat federali ta’ Berlin. Aktar speċifikament, id-Deċiżjoni ta’ Implimentazzjoni (UE) 2025/186 tipprevedi li ż-żoni ta’ protezzjoni u ta’ sorveljanza li jridu jiġu stabbiliti mill-Ġermanja fl-istat federali ta’ Brandenburg, f’konformità mar-Regolament Delegat (UE) 2020/687, wara dik it-tifqigħa, għandhom jinkludu mill-inqas iż-żoni elenkati fl-Anness ta’ dik id-Deċiżjoni ta’ Implimentazzjoni.

(5)

Mill-adozzjoni tad-Deċiżjoni ta’ Implimentazzjoni (UE) 2025/186, il-miżuri ta’ emerġenza li għandhom jiġu applikati fiż-żoni ristretti, u l-iskeda ta’ żmien għall-implimentazzjoni tagħhom, ġew rieżaminati. B’konsegwenza ta’ dan, it-tul ta’ żmien ta’ dawk il-miżuri hemm bżonn li jiġi estiż. Għalhekk, iż-żoni elenkati bħala żoni ta’ protezzjoni u ta’ sorveljanza għall-Ġermanja, jenħtieġ li jiġu ddefiniti kemm mil-lat ta’ spazju u kif ukoll mil-at ta’ żmien fl-Anness I ta’ din id-Deċiżjoni ta’ Implimentazzjoni, sabiex jiġi evitat it-tixrid tal-marda fil-Ġermanja u fil-bqija tal-Unjoni, kif ukoll lejn pajjiżi terzi. Huwa meħtieġ ukoll li tiġi pprovduta ċarezza dwar l-ambitu eżatt ta’ dawn iż-żoni, kif ukoll dwar il-miżuri li għandhom jiġu applikati fihom, billi jiġu stabbiliti f’att legali tal-Unjoni sabiex jiġi evitat tfixkil mhux ġustifikat fil-movimenti tal-annimali u tal-prodotti fl-Unjoni, kif ukoll lejn pajjiżi terzi.

(6)

Barra minn hekk, meta jitqies li l-investigazzjoni epidemjoloġika li għaddejja għadha qed titwettaq mill-awtorità kompetenti tal-Ġermanja, u sakemm tiġi konkluża, u sabiex jiġi evitat kwalunkwe tfixkil mhux ġustifikat fir-rigward tal-movimenti tal-annimali u tal-prodotti fl-Unjoni, kif ukoll lejn pajjiżi terzi, jixraq li jiġu applikati aktar miżuri, jiġifieri dawk li huma applikabbli għal żoni ristretti ulterjuri, kif previst fir-Regolament Delegat (UE) 2020/687, wara l-iskadenza tal-miżuri ta’ emerġenza fiż-żona ta’ sorveljanza (il-miżuri ulterjuri). Jenħtieġ li l-miżuri ulterjuri jiġu applikati f’żona definita kemm mil-lat ta’ spazju u kif ukoll mil-at ta’ żmien fir-rigward taż-żoni ta’ protezzjoni u sorveljanza previsti qabel.

(7)

Bl-istess mod, biex jiġi evitat kull xkiel bla bżonn għall-kummerċ fl-Unjoni u sabiex jiġi evitat kwalunkwe ostaklu mhux ġustifikat għall-kummerċ mill-pajjiżi terzi, hemm bżonn li, fil-livell tal-Unjoni, jiġu rieżaminati malajr il-miżuri applikabbli fiż-żoni ristretti għall-marda tal-ilsien u d-dwiefer, li jinkludu ż-żoni ta’ protezzjoni u ta’ sorveljanza, kif ukoll li jiġu previsti miżuri ulterjuri li għandhom jiġu applikati, fl-istati federali ta’ Berlin u ta’ Bradenburg fil-Ġermanja b’kollaborazzjoni ma’ dak l-Istat Membru.

(8)

Għalhekk, jenħtieġ li d-Deċiżjoni ta’ Implimentazzjoni (UE) 2025/186 titħassar u tiġi sostitwita b’din id-Deċiżjoni.

(9)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(a)

jiġu stabbiliti immedjatament mill-awtorità kompetenti ta’ dak l-Istat Membru żoni ristretti li jinkludu żoni ta’ protezzjoni u ta’ sorveljanza f’konformità mal-Artikolu 21 tar-Regolament Delegat (UE) 2020/687 u bil-kundizzjonijiet stabbiliti f’dak l-Artikolu;

(b)

iż-żoni ta’ protezzjoni u ta’ sorveljanza msemmija fil-punt (a) jinkludu mill-inqas iż-żoni elenkati fl-Anness I ta’ din id-Deċiżjoni;

(c)

il-miżuri meħtieġa li għandhom jiġu applikati fiż-żoni ta’ protezzjoni u ta’ sorveljanza, jiġu applikati mill-inqas sad-dati elenkati fl-Anness I ta’ din id-Deċiżjoni.