(1)

Wara l-aggressjoni militari Russa kontra l-Ukrajna u fid-dawl tal-possibbiltà ta’ interruzzjoni fit-tul jew saħansitra waqfien tal-provvisti tal-gass mir-Russja, l-Unjoni Ewropea ħadet inizjattivi biex iżżid it-tħejjija tagħha kontra tali interruzzjonijiet sabiex tipproteġi liċ-ċittadini u lill-ekonomija tagħha.

(2)

F’dan il-kuntest, ir-Regolament (UE) 2022/1032 tal-Parlament Ewropew u tal-Kunsill (2) ġie adottat bil-ħsieb li jiġi żgurat il-mili tal-faċilitajiet tal-ħżin tal-gass taħt l-art tal-Istati Membri għall-perjodu tax-xitwa tal-2022-2023 u lil hinn, bl-emendar tar-Regolament (UE) 2017/1938.

(3)

Għall-2023 u s-snin segwenti, is-subparagrafu 1 tal-Artikolu 6a(7) tar-Regolament (UE) 2017/1938 jipprevedi li kull Stat Membru b’faċilitajiet tal-ħżin tal-gass taħt l-art irid jibgħat lill-Kummissjoni, sal-15 ta’ Settembru tas-sena ta’ qabel, abbozz ta’ trajettorja għall-mili b’miri intermedjarji għal Frar, Mejju, Lulju u Settembru, inkluż informazzjoni teknika, għal tali faċilitajiet fit-territorju tiegħu u interkonnessi direttament maż-żona tas-suq tiegħu f’forma aggregata. It-trajettorja għall-mili u l-miri intermedji għandhom ikunu bbażati fuq ir-rata medja tal-mili matul il-ħames snin preċedenti.

(4)

Is-subparagrafu 3 tal-Artikolu 6a(7) tar-Regolament (UE) 2017/1938 jistipula li, abbażi tal-informazzjoni teknika pprovduta minn kull Stat Membru u filwaqt li titqies il-valutazzjoni tal-Grupp ta’ Koordinazzjoni dwar il-Gass (il-“GCG, Gas Coordination Group”), il-Kummissjoni trid tadotta atti ta’ implimentazzjoni li jistabbilixxu t-trajettorja għall-mili għal kull Stat Membru sal-15 ta’ Novembru tas-sena ta’ qabel f’konformità mal-proċedura ta’ eżami msemmija fl-Artikolu 18a(2) tar-Regolament imsemmi hawn fuq. Il-Kummissjoni hija assistita minn kumitat tal-komitoloġija msemmi fl-Artikolu 18a(1) tar-Regolament (UE) 2017/1938, il-“Kumitat għall-Ħżin tal-Gass”.

(5)

Skont dan, sal-15 ta’ Novembru 2024 il-Kummissjoni trid tadotta atti ta’ implimentazzjoni li jistabbilixxu t-trajettorji għall-mili għal kull Stat Membru b’faċilitajiet tal-ħżin tal-gass taħt l-art għall-2025. Minħabba l-limiti ta’ żmien għall-adozzjoni ta’ dawk l-atti ta’ implimentazzjoni, jenħtieġ li jiġi adottat att ta’ implimentazzjoni uniku għall-Istati Membri kollha kkonċernati.

(6)

Fid-dawl tal-inċertezza kbira fir-rigward tas-sitwazzjoni ġenerali tas-sigurtà tal-provvista tal-gass u l-iżvilupp tad-domanda u tal-provvista tal-gass fl-Unjoni u fl-Istati Membri individwali, ix-xenarji ta’ konsum differenti skont it-temperaturi tax-xitwa, u l-livell ta’ miżuri volontarji għal tnaqqis fid-domanda implimentati mill-Istati Membri f’konformità mar-Rakkomandazzjoni tal-Kunsill (C/2024/2476) dwar it-tkomplija tal-miżuri kkoordinati għal tnaqqis fid-domanda għall-gass (3), it-trajettorji għall-mili stabbiliti f’dan ir-Regolament ta’ Implimentazzjoni jinkludu miri intermedji minimi teknikament fattibbli li jippermettu li l-Istati Membri jilħqu l-mira għall-mili ta’ 90 % sal-1 ta’ Novembru 2025.

(7)

It-trajettorji għall-mili jenħtieġ li jqisu, sa fejn ikun possibbli, dawk ippreżentati mill-Istati Membri u jenħtieġ li jqisu r-rata medja tal-mili tal-Istati Membri matul il-ħames snin ta’ qabel. Il-fattibbiltà teknika tal-miri intermedjarji stabbiliti f’dan ir-Regolament ta’ Implimentazzjoni jenħtieġ li tqis ukoll il-kurva tal-kapaċità ta’ injezzjoni aggregata tas-siti tal-ħżin ta’ kull Stat Membru. Dawk il-miri jenħtieġ li jiġu stabbiliti b’mod li jissalvagwardja s-sigurtà tal-provvista tal-gass fil-livell tal-Unjoni, filwaqt li jiġu evitati piżijiet bla bżonn fuq l-Istati Membri, il-parteċipanti fis-suq tal-gass, l-operaturi jew il-klijenti tas-sistema tal-ħżin, u mingħajr distorsjoni bla bżonn tal-kompetizzjoni bejn il-faċilitajiet tal-ħżin li jinsabu fl-Istati Membri ġirien. Il-miri tal-mili jenħtieġ li jiġu stabbiliti wkoll b’mod li jiżgura li l-implimentazzjoni tagħhom ma jkollha l-ebda impatt distorsiv fuq il-funzjonament xieraq tas-suq intern tal-gass, inkluż fis-swieq tad-derivattivi tal-gass.

(8)

Il-miri intermedjarji tal-1 ta’ Frar u tal-1 ta’ Mejju 2025 huma miri importanti għas-sigurtà tal-provvista fl-2025, anke fid-dawl tat-tmiem tal-ftehim dwar it-tranżitu tal-gass mill-Ukrajna sal-1 ta’ Jannar 2025. L-iffissar tal-mira ta’ Frar biex il-medja minima tal-Unjoni tkun madwar 50 % huwa maħsub biex isaħħaħ is-sigurtà tal-provvista tal-gass billi jiżgura disponibbiltà għolja mill-ħażniet f’Diċembru 2024 u f’Jannar 2025 meta d-domanda għall-gass tkun għolja. Dan se jkun partikolarment importanti f’każ li x-xitwa 2024–2025 tkun aktar kiesħa mill-medja. Madankollu, meta titqies il-Prospettiva tal-Provvista tax-Xitwa tal-ENTSOG, jenħtieġ li l-Istati Membri jistinkaw biex kollettivament jilħqu 55 % tal-mili tal-ħżin tal-kapaċità tal-faċilitajiet tal-ħżin tal-gass ta’ taħt l-art tal-Unjoni biex jipprevjenu deterjorament tas-sigurtà tal-provvista tal-gass fl-Unjoni. Mira intermedjarja minima fil-livell tal-UE ta’ madwar 30 % fl-1 ta’ Mejju 2025 titqies suffiċjenti biex tintlaħaq il-mira ta’ Novembru ta’ 90 % filwaqt li tingħata flessibbiltà tas-suq għas-siti tal-ħżin. Madankollu, fil-każ ta’ domanda ogħla u/jew provvista mnaqqsa matul is-sajf tal-2025, l-Istati Membri jeħtieġ li jistinkaw biex kollettivament jilħqu l-mili ta’ 45 %, biex isaħħu s-sigurtà tal-provvista billi jiffaċilitaw il-mili mill-ġdid tal-ħżin fl-1 ta’ Novembru 2025. F’konformità mar-Regolament (UE) 2017/1938, il-livelli tal-mili li jibqgħu sa ħames punti perċentwali taħt il-mira, jitqiesu bħala konformi mal-miri tar-Regolament (UE) 2017/1938. Meta l-livell tal-mili ta’ Stat Membru jkun aktar minn ħames punti perċentwali taħt il-livell tat-trajettorja għall-mili tiegħu, jenħtieġ li l-awtorità kompetenti tieħu miżuri effettivi minnufih biex iżżidu. Jenħtieġ li l-Istati Membri jinfurmaw lill-Kummissjoni u lill-GCG b’tali miżuri.

(9)

It-trajettorji għall-mili ppreżentati mill-Istati Membri jistgħu jvarjaw minn xulxin peress li dawn jirriflettu sitwazzjonijiet speċifiċi għall-pajjiż. Barra minn hekk, il-miri tal-ħżin għall-1 ta’ Mejju huma ġeneralment aktar baxxi mill-miri tal-1 ta’ Frar peress li l-irtirar tal-ħażna huwa marbut mad-domanda għat-tisħin u l-ħażniet jilħqu l-minimu tagħhom fil-livell tal-UE madwar April ta’ kull sena.

(10)

Għall-Istati Membri li jaqgħu taħt l-Artikolu 6a(3) tar-Regolament (UE) 2017/1938, jenħtieġ li l-mira għall-mili titnaqqas bil-volum li ġie pprovdut lil pajjiżi terzi matul il-perjodu ta’ referenza mill-2016 sal-2021 jekk il-volum medju ipprovdut kien iktar minn 15 TWh fis-sena matul il-perjodu tal-irtirar mill-ħażna tal-gass (Ottubru – April).

(11)

L-Istati Membri jeħtieġ li jilħqu l-mira għall-mili ta’ 90 % tal-faċilitajiet tal-ħżin tagħhom imsemmija fil-paragrafu 1 tal-Artikolu 6a tar-Regolament (UE) 2017/1938. Fil-mili tal-ħżin, u fid-dawl tal-isfidi għall-istaġun tal-mili fl-2025, jenħtieġ li l-Istati Membri jagħmlu l-aqwa użu mill-għodod ta’ koordinazzjoni kollha disponibbli fil-livell tal-UE. L-użu tal-mekkaniżmu tal-aggregazzjoni tad-domanda u tax-xiri konġunt għall-gass naturali jista’ jikkontribwixxi għal koordinazzjoni aħjar tal-mili tal-ħżin.

(12)

It-trajettorji għall-mili jqisu wkoll il-valutazzjoni tal-GCG, li ġie kkonsultat matul il-laqgħa tiegħu tat-3 ta’ Ottubru 2024.

(13)

Dan ir-Regolament qed jirrifletti t-trajettorji tal-ħżin tal-Istati Membri b’faċilitajiet tal-ħżin taħt l-art, filwaqt li l-Artikolu 6c tar-Regolament (UE) 2017/1938 jipprevedi obbligi oħra għall-Istati Membri li ma għandhomx faċilitajiet tal-ħżin tal-gass taħt l-art.

(14)

Meta titqies il-ħtieġa li jiġu stabbiliti t-trajettorji għall-mili għall-2025 sal-15 ta’ Novembru 2024, jenħtieġ li dan ir-Regolament jidħol fis-seħħ l-għada tal-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(15)

Il-miżuri previsti f’dan ir-Regolament huma f’konformità mal-opinjoni tal-Kumitat għall-Ħżin tal-Gass.