(1)

Ir-Regolament (UE) 2019/1009 jistabbilixxi regoli dwar it-tqegħid fis-suq ta’ prodotti fertilizzanti tal-UE. Skont ir-rekwiżiti relatati mal-kategoriji tal-materjali komponenti (component material categories, “CMCs”) 8 u 9 stabbiliti fil-Parti II tal-Anness II ta’ dan ir-Regolament, il-prodotti fertilizzanti tal-UE jista’ jkun fihom ċerti polimeri.

(2)

Il-preżenza kullimkien ta’ frammenti żgħar ta’ polimeri naturali sintetiċi jew modifikati kimikament, li huma insolubbli fl-ilma, jiddegradaw bil-mod ħafna u jistgħu jiġu inġestiti faċilment minn organiżmi ħajjin, tqajjem tħassib dwar l-impatt ġenerali tagħhom fuq l-ambjent u, potenzjalment, fuq is-saħħa tal-bniedem. Dan huwa partikolarment validu għall-polimeri miżjuda intenzjonalment mal-prodotti fertilizzanti tal-UE li sussegwentement jiġu rilaxxati fl-ambjent.

(3)

Għalhekk, ir-Regolament (UE) 2019/1009 stabbilixxa obbligu għall-Kummissjoni li sas-16 ta’ Lulju 2024 tivvaluta l-kriterji tal-bijodegradabbiltà ta’ żewġ kategoriji ta’ polimeri li jappartjenu għas-CMC 9: polimeri li jikkontrollaw il-penetrazzjoni tal-ilma fil-partikoli tan-nutrijenti u għalhekk ir-rilaxx ta’ nutrijenti (“aġenti tal-kisi”) u polimeri li jżidu l-kapaċità taż-żamma tal-ilma jew il-propensità għat-tixrib tal-prodott (“polimeri għaż-żamma tal-ilma”).

(4)

Fit-23 ta’ Ġunju 2021, il-Kummissjoni adottat ir-Regolament Delegat (UE) 2021/1768 (2) li jżid kategoriji ġodda ta’ polimeri fil-Kategoriji tal-Materjali Komponenti 1 u 11. Dawn il-polimeri normalment jintużaw bħala addittivi tekniċi, biex tiżdied l-effiċjenza agronomika jew is-sikurezza tal-prodotti. Sabiex jiġi identifikat liema polimeri ma jikkawżaw l-ebda tħassib ambjentali u għalhekk jenħtieġ li jiġu inklużi fis-CMCs 1 u 11, il-Kummissjoni kkunsidrat l-opinjonijiet xjentifiċi maħruġa mill-Kumitat dwar il-Valutazzjoni tar-Riskji (3) u mill-Kumitat għall-Analiżi Soċjoekonomika tal-Aġenzija Ewropea għas-Sustanzi Kimiċi f’konformità mar-Regolament (KE) Nru 1907/2006 tal-Parlament Ewropew u tal-Kunsill (4), dwar partikoli ta’ mikroplastiks miżjuda intenzjonalment ma’ prodotti għall-użu mill-konsumatur jew dak professjonali ta’ kwalunkwe tip. Għalhekk, il-polimeri naturali biss, li ma ġewx modifikati kimikament, il-polimeri bijodegradabbli jew il-polimeri solubbli jistgħu jintużaw bħala materjali li jappartjenu għas-CMCs 1 jew 11.

(5)

Sussegwentement, il-Kummissjoni adottat ir-Regolament (UE) 2023/2055 (5) li jintroduċi restrizzjoni ġenerali fir-Regolament (KE) Nru 1907/2006 għall-introduzzjoni fis-suq ta’ mikropartikoli ta’ polimeri sintetiċi (“ir-restrizzjoni ġenerali”). Ċerti kategoriji ta’ polimeri u l-polimeri li jissodisfaw il-kriterji tal-bijodegradabbiltà jew tas-solubbiltà stabbiliti fir-Regolament (KE) Nru 1907/2006 huma esklużi mir-restrizzjoni ġenerali.

(6)

Il-prodott fertilizzanti tal-UE huma esklużi mill-kamp ta’ applikazzjoni tar-restrizzjoni ġenerali, sakemm joħroġ l-eżitu tal-valutazzjoni dwar il-kriterji tal-bijodegradabbiltà għall-aġenti tal-kisi u għall-polimeri għaż-żamma tal-ilma. Madankollu, ir-rekwiżiti għall-polimeri li jappartjenu għas-CMC 1 li tipikament jintużaw bħala addittivi tekniċi jenħtieġ li jiġu allinjati mar-rekwiżiti għall-polimeri eżentati mir-restrizzjoni ġenerali. L-ewwel nett, il-materjali li jappartjenu għas-CMC 1 diġà huma soġġetti għal xi dispożizzjonijiet tar-Regolament (KE) Nru 1907/2006, adattati speċifikament għall-użu tagħhom bħala materjali komponenti fil-prodotti fertilizzanti tal-UE. It-tieni, il-polimeri li jistgħu jintużaw bħala materjali li jappartjenu għas-CMC 1, tipikament addittivi tekniċi, bħall-aġenti kontra t-trab jew l-aġenti antiagglomeranti, mhumiex qed jissodisfawx funzjoni speċifika matul ċertu perjodu wara l-applikazzjoni tagħhom fil-ħamrija, bħall-aġenti tal-kisi u l-polimeri għaż-żamma tal-ilma, ma għandhomx għalfejn jiddegradaw bil-mod u ma hemm l-ebda ġustifikazzjoni biex jiġu introdotti jew jinżammu regoli speċifiċi ta’ bijodegradazzjoni għalihom. It-tielet, ir-restrizzjoni ġenerali fir-Regolament (KE) Nru 1907/2006 tapplika għal polimeri simili fil-prodotti fertilizzanti nazzjonali, ħlief għall-aġent tal-kisi jew għall-polimeri għaż-żamma tal-ilma li għandhom jissodisfaw l-istess kriterji bħal dawk li għandhom jiġu stabbililit f’konformità mar-Regolament (UE) 2019/1009. Għalhekk, l-allinjament tar-rekwiżiti għall-materjali li jappartjenu għas-CMC 1 ma’ dawk fir-Regolament (KE) Nru 1907/2006 huwa meħtieġ kemm biex tiġi żgurata l-koerenza bl-applikazzjoni tal-istess regoli għal materjali simili li jinsabu fil-prodotti armonizzati jew fil-prodotti mhux armonizzati, kif ukoll biex jinkisbu l-objettivi segwiti bl-introduzzjoni tar-restrizzjoni ġenerali fir-Regolament (KE) Nru 1907/2006, li jistgħu jiġu pperikolati jekk jinżammu regoli aktar laxki fir-Regolament (UE) 2019/1009.

(7)

Għalhekk ir-Regolament (UE) 2019/1009 jenħtieġ li jiġi emendat skont dan.

(8)

Ir-Regolament (UE) 2023/2055 għandu jibda japplika għall-prodotti fertilizzanti nazzjonali mis-17 ta’ Ottubru 2028. Għal raġunijiet ta’ koerenza u sabiex ikun hemm biżżejjed żmien biex wieħed jadatta għar-rekwiżiti introdotti b’dan ir-Regolament, jenħtieġ li japplika l-istess perjodu tranżitorju,

(1)

il-punt (f) huwa sostitwit b’dan li ġej:

(2)

jiddaħħal il-punt (fa) li ġej: