(1)

F’konformità mad-Deċiżjoni tal-Kunsill (UE) 2021/2123 (1), il-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Repubblika Iżlamika tal-Mauritania (2) (il-“Ftehim”) u l-Protokoll ta’ Implimentazzjoni (il-“Protokoll”) tiegħu ġew iffirmati fil-15 ta’ Novembru 2021 u applikati b’mod proviżorju minn dak iż-żmien.

(2)

Fit-18 ta’ Lulju 2022, il-Kunsill adotta d-Deċiżjoni (UE) 2022/1448 (3) dwar il-konklużjoni tal-Ftehim u tal-Protokoll. L-Artikolu 3 tad-Deċiżjoni jawtorizza lill-Kummissjoni tapprova l-emendi għall-Protokoll f’isem l-Unjoni.

(3)

Fir-rigward tal-kategorija tas-sajd 1 (Bastimenti li jistadu għall-krustaċji għajr l-awwista), il-punt 5 tal-iskeda tad-data tal-kategorija tas-sajd 1 fl-Appendiċi 2 tal-Protokoll (l-“iskeda tad-data”) jipprevedi li l-għadd ta’ bastimenti awtorizzati fl-istess ħin ma jridx jaqbeż il-15.

(4)

Fl-11 ta’ Novembru 2021, il-Kunsill adotta r-Regolament (UE) 2021/2061 dwar l-allokazzjoni tal-opportunitajiet tas-sajd skont il-Protokoll (4).

(5)

F’konformità mal-punt 5 tal-iskeda tad-data l-Artikolu 1, il-punt (1), it-tieni subparagrafu tar-Regolament (UE) 2021/2061 jipprevedi li mhux aktar minn 15-il bastiment jistgħu joperaw fl-ilmijiet tal-Mauritania fil-kategorija tas-sajd 1 fl-istess ħin.

(6)

Permezz ta’ deċiżjoni tat-8 ta’ Diċembru 2023, il-Kumitat Konġunt li jopera skont il-Ftehim u l-Protokoll emenda l-punt 5 tal-iskeda tad-data, u żied l-għadd ta’ bastimenti awtorizzati li joperaw fl-istess ħin għal 18 għall-kategorija tas-sajd 1, mingħajr modifika tal-qabdiet totali permissibbli (TAC) attwali għal dik il-kategorija tas-sajd. Dik id-deċiżjoni kienet ibbażata fuq evalwazzjoni mwettqa mill-Kumitat Xjentifiku Konġunt Indipendenti dwar l-effetti potenzjali ta’ żieda fl-għadd ta’ bastimenti fuq l-istokk tal-krustaċji. B’riżultat ta’ dik l-evalwazzjoni, il-Kumitat Xjentifiku Konġunt Indipendenti wasal għall-konklużjoni li żieda fl-isforz tas-sajd tkun possibbli fi ħdan it-TAC attwali.

(7)

Għalhekk, jenħtieġ li l-Artikolu 1, il-punt (1), tar-Regolament (UE) 2021/2061 jiġi emendat biex jirrifletti ż-żieda fl-għadd ta’ bastimenti li jitħallew joperaw fl-istess ħin fil-kategorija tas-sajd 1 skont il-Protokoll.

(8)

Iż-żieda fl-għadd ta’ awtorizzazzjonijiet għall-bastimenti biex joperaw fl-istess ħin fil-kategorija tas-sajd 1 jenħtieġ li tapplika mid-data tad-deċiżjoni tal-Kumitat Konġunt li jemenda l-Protokoll, jiġifieri t-8 ta’ Diċembru 2023. L-applikazzjoni retroattiva tagħha se tgħin biex jiġi ottimizzat l-użu tal-opportunità tas-sajd taħt il-kategorija 1. Għalhekk, jenħtieġ li dan ir-Regolament ukoll jibda japplika mit-8 ta’ Diċembru 2023. Tali applikazzjoni retroattiva ma taffettwax il-prinċipji taċ-ċertezza legali u l-protezzjoni tal-aspettattivi leġittimi, peress li l-għadd ta’ bastimenti awtorizzati li joperaw fil-kategorija tas-sajd 1 qed jiżdied. Għaldaqstant, jenħtieġ li dan ir-Regolament jidħol fis-seħħ b’urġenza fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea,

“(1)

Kategorija 1 — Bastimenti tas-sajd li jistadu għall-krustaċji għajr l-awwista:

F’din il-kategorija, ma jistax ikun hemm iktar minn 18-il bastiment li joperaw fl-ilmijiet tal-Mauritania fl-istess ħin.”.