This document is an excerpt from the EUR-Lex website
Document 32024R2040
Commission Implementing Regulation (EU) 2024/2040 of 29 July 2024 amending Implementing Regulation (EU) 2024/1070 as regards the establishment of transitional measures for the renewal of the authorisation of a preparation of 25-hydroxycholecalciferol produced by Saccharomyces cerevisiae CBS 146008
Regolament ta’ Implimentazzjoni tal-Kummissjoni (UE) 2024/2040 tad-29 ta’ Lulju 2024 li jemenda r-Regolament ta’ Implimentazzjoni (UE) 2024/1070 fir-rigward tal-istabbiliment ta’ miżuri tranżizzjonali għat-tiġdid tal-awtorizzazzjoni ta’ preparat ta’ 25-idrossikolekalċiferol prodott minn Saccharomyces cerevisiae CBS 146008
Regolament ta’ Implimentazzjoni tal-Kummissjoni (UE) 2024/2040 tad-29 ta’ Lulju 2024 li jemenda r-Regolament ta’ Implimentazzjoni (UE) 2024/1070 fir-rigward tal-istabbiliment ta’ miżuri tranżizzjonali għat-tiġdid tal-awtorizzazzjoni ta’ preparat ta’ 25-idrossikolekalċiferol prodott minn Saccharomyces cerevisiae CBS 146008
C/2024/5348
ĠU L, 2024/2040, 30.7.2024, ELI: http://data.europa.eu/eli/reg_impl/2024/2040/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
Il-Ġurnal Uffiċjali |
MT Is-serje L |
2024/2040 |
30.7.2024 |
REGOLAMENT TA’ IMPLIMENTAZZJONI TAL-KUMMISSJONI (UE) 2024/2040
tad-29 ta’ Lulju 2024
li jemenda r-Regolament ta’ Implimentazzjoni (UE) 2024/1070 fir-rigward tal-istabbiliment ta’ miżuri tranżizzjonali għat-tiġdid tal-awtorizzazzjoni ta’ preparat ta’ 25-idrossikolekalċiferol prodott minn Saccharomyces cerevisiae CBS 146008
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (KE) Nru 1831/2003 tal-Parlament Ewropew u l-Kunsill tat-22 ta’ Settembru 2003 fuq l-addittivi għall-użu fl-għalf tal-annimali (1), u b’mod partikolari l-Artikolu 9(2) tiegħu,
Billi:
(1) |
L-awtorizzazzjoni tal-preparat ta’ 25-idrossikolekalċiferol prodott minn Saccharomyces cerevisiae CBS 146008 ġiet imġedda għal perjodu ta’ 10 snin bħala addittiv fl-għalf tal-kategorija tal-addittivi “addittivi nutrittivi” u tal-grupp funzjonali “vitamini, provitamini u sustanzi definiti tajjeb kimikament li għandhom effett simili” għat-tiġieġ tas-simna, għad-dundjani tas-simna, għal pollam ieħor u għall-ħnieżer bir-Regolament ta’ Implimentazzjoni tal-Kummissjoni (UE) 2024/1070 (2). |
(2) |
Il-karatterizzazzjoni tas-sustanza attiva 25-idrossikolekalċiferol stabbilita fl-Anness tar-Regolament ta’ Implimentazzjoni (UE) 2024/1070 tispeċifika li l-kompost prekursur tagħha, 5,7,24-kolestatrienol, huwa prodott minn Saccharomyces cerevisiae CBS 146008. Dik l-ispeċifikazzjoni ma kinitx inkluża fl-awtorizzazzjoni preċedenti tal-preparat ta’ 25-idrossikolekalċiferol, li ngħatat bir-Regolament tal-Kummissjoni (KE) Nru 887/2009 (3). Għalhekk, ir-Regolament ta’ Implimentazzjoni (UE) 2024/1070 jipprevedi termini aktar stretti tal-awtorizzazzjoni għall-addittiv tal-għalf. Madankollu, ir-Regolament ta’ Implimentazzjoni (UE) 2024/1070 ma stabbilixxiex miżuri tranżizzjonali li jippermettu lill-partijiet interessati jadattaw għat-termini aktar stretti tal-awtorizzazzjoni. |
(3) |
Billi r-raġunijiet tas-sikurezza ma jeħtiġux l-applikazzjoni immedjata tal-modifika tal-kundizzjonijiet tal-awtorizzazzjoni tal-addittiv li tirriżulta mit-tiġdid tiegħu għat-tiġieġ tas-simna, għad-dundjani tas-simna, għal pollam ieħor u għall-ħnieżer bir-Regolament ta’ Implimentazzjoni (UE) 2024/1070, jixraq li jiġi previst perjodu tranżizzjonali għall-partijiet interessati biex iħejju ruħhom biex jissodisfaw ir-rekwiżiti l-ġodda li jirriżultaw minn dak it-tiġdid tal-awtorizzazzjoni. |
(4) |
Għalhekk, ir-Regolament ta’ Implimentazzjoni (UE) 2024/1070 jenħtieġ li jiġi emendat skont dan. |
(5) |
Sabiex jiġi evitat it-tfixkil tas-suq u l-konsegwenzi detrimentali għall-operaturi kkonċernati kkawżati minn projbizzjoni, fid-data tad-dħul fis-seħħ tar-Regolament ta’ Implimentazzjoni (UE) 2024/1070, ta’ 25-idrossikolekalċiferol prodott minn razez għajr Saccharomyces cerevisiae CBS 146008, minħabba n-nuqqas ta’ miżuri tranżizzjonali mogħtija minn dak ir-Regolament ta’ Implimentazzjoni, jenħtieġ li dan ir-Regolament jidħol fis-seħħ b’urġenza u japplika b’mod retroattiv mid-data tad-dħul fis-seħħ tar-Regolament ta’ Implimentazzjoni (UE) 2024/1070. |
(6) |
Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf, |
ADOTTAT DAN IR-REGOLAMENT:
Artikolu 1
Emenda għar-Regolament ta’ Implimentazzjoni (UE) 2024/1070
Fir-Regolament ta’ Implimentazzjoni (UE) 2024/1070 jiddaħħal l-Artikolu 3a li ġej:
“Artikolu 3a
Miżuri tranżizzjonali
1. L-addittiv tal-għalf 25-idrossikolekalċiferol, kif awtorizzat bir-Regolament (KE) Nru 887/2009, u l-premixxeli li fihom dak l-addittiv, li jkunu prodotti u ttikkettati qabel il-5 ta’ Novembru 2024 f’konformità mar-regoli applikabbli qabel il-5 ta’ Mejju 2024, jistgħu jibqgħu jitqiegħdu fis-suq u jintużaw sakemm jispiċċaw l-istokkijiet ikkonċernati jekk ikunu maħsuba għat-tiġieġ tas-simna, għad-dundjani tas-simna, għal pollam ieħor u għall-ħnieżer.
2. L-għalf kompost u l-materjali tal-għalf li fihom l-addittiv tal-għalf imsemmi fil-paragrafu 1, li jkunu prodotti u ttikkettati qabel il-5 ta’ Mejju 2025 f’konformità mar-regoli applikabbli qabel il-5 ta’ Mejju 2024, jistgħu jibqgħu jitqiegħdu fis-suq u jintużaw sakemm jispiċċaw l-istokkijiet ikkonċernati jekk ikunu maħsuba għat-tiġieġ tas-simna, għad-dundjani tas-simna, għal pollam ieħor u għall-ħnieżer.”
Artikolu 2
Id-dħul fis-seħħ
Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu japplika mill-5 ta’ Mejju 2024.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, id-29 ta’ Lulju 2024.
Għall-Kummissjoni
Il-President
Ursula VON DER LEYEN
(1) ĠU L 268, 18.10.2003, p. 29, ELI: http://data.europa.eu/eli/reg/2003/1831/oj.
(2) Ir-Regolament ta’ Implimentazzjoni tal-Kummissjoni (UE) 2024/1070 tat-12 ta’ April 2024 dwar it-tiġdid tal-awtorizzazzjoni ta’ preparat ta’ 25-idrossikolekalċiferol prodott mis-Saccharomyces cerevisiae CBS 146008 għat-tiġieġ tas-simna, għad-dundjani tas-simna, għall-pollam ieħor u għall-ħnieżer u l-awtorizzazzjoni ta’ dak il-preparat għar-ruminanti u li jħassar ir-Regolament (KE) Nru 887/2009 (ĠU L 2024/1070, ELI: http://data.europa.eu/eli/reg_impl/2024/1070/oj).
(3) Ir-Regolament tal-Kummissjoni (KE) Nru 887/2009 tal-25 ta’ Settembru 2009 dwar l-awtorizzazzjoni ta’ forma stabilizzata tal-25-idrossikolekalċiferol bħala addittiv tal-għalf għat-tiġieġ għat-tismin, dundjani għat-tismin, tjur ieħor u ħnieżer (ĠU L 254, 26.9.2009, p. 68, ELI: http://data.europa.eu/eli/reg/2009/887/oj).
ELI: http://data.europa.eu/eli/reg_impl/2024/2040/oj
ISSN 1977-074X (electronic edition)