(1)

B'reazzjoni għall-kriżi finanzjarja globali tal-2008-2009, l-Unjoni bdiet riforma wiesgħa tal-qafas prudenzjali għall-istituzzjonijiet, kif definit fir-Regolament (UE) Nru 575/2013 tal-Parlament Ewropew u tal-Kunsill (4) bl-għan li tiżdied ir-reżiljenza tas-settur bankarju tal-Unjoni. Wieħed mill-elementi ewlenin tar-riforma kien jikkonsisti fl-implimentazzjoni tal-standards internazzjonali miftehmin fl-2010 mill-Kumitat ta' Basel dwar is-Superviżjoni Bankarja (BCBS), speċifikament l-hekk imsejħa “riforma ta' Basel III” u l-istandards ta' Basel III li rriżultaw. Bis-saħħa ta' dik ir-riforma, is-settur bankarju tal-Unjoni daħal fil-kriżi tal-COVID-19 fuq pedament reżiljenti. Madankollu, filwaqt li l-livell ġenerali ta' kapital fl-istituzzjonijiet fl-Unjoni issa huwa ġeneralment sodisfaċenti, uħud mill-problemi li ġew identifikati wara l-kriżi finanzjarja globali għad iridu jiġu indirizzati.

(2)

Sabiex jiġu indirizzati dawk il-problemi, tiġi pprovduta ċertezza legali u jiġi indikat l-impenn tal-Unjoni lejn is-sħab internazzjonali tagħha fil-G20, huwa ta' importanza kbira li l-elementi pendenti tar-riforma ta' Basel III maqbula fl-2017 jiġu implimentati b'mod leali fil-liġi tal-Unjoni (il-“qafas finalizzat ta' Basel III”). Fl-istess ħin, jenħtieġ li l-implimentazzjoni tevita żieda sinifikanti fir-rekwiżiti ta' kapital ġenerali għas-sistema bankarja tal-Unjoni kollha kemm hi u tqis l-ispeċifiċitajiet tal-ekonomija tal-Unjoni. Meta jkun possibbli, jenħtieġ li l-aġġustamenti għall-istandards internazzjonali jiġu applikati fuq bażi tranżitorja. Jenħtieġ li l-implimentazzjoni tgħin sabiex jiġu evitati żvantaġġi kompetittivi għall-istituzzjonijiet fl-Unjoni, b'mod partikolari fil-qasam tal-attivitajiet kummerċjali, fejn dawk l-istituzzjonijiet jikkompetu direttament mal-pari internazzjonali tagħhom. Barra minn hekk, bl-implimentazzjoni tal-qafas finalizzat ta' Basel III, l-Unjoni tlesti proċess ta' riforma li ilu għaddej għaxar snin. F'dak il-kuntest, jenħtieġ li l-Unjoni twettaq valutazzjoni ġenerali tas-sistema bankarja tagħha, filwaqt li tqis id-dimensjonijiet rilevanti kollha. Jenħtieġ li l-Kummissjoni tingħata l-mandat li twettaq rieżami olistiku tal-qafas għar-rekwiżiti prudenzjali u superviżorji. Jenħtieġ li dak ir-rieżami jqis id-diversi tipi ta' forom, strutturi u mudelli ta' negozju korporattivi madwar l-Unjoni. Jenħtieġ li dak ir-rieżami jqis ukoll l-implimentazzjoni tal-minimu tal-output bħala parti mir-regoli prudenzjali dwar il-kapital u l-likwidità, kif ukoll il-livell ta' applikazzjoni tiegħu. Jenħtieġ li r-rieżami jivvaluta jekk il-minimu tal-output u l-livell ta' applikazzjoni tiegħu jiżgurawx livell adegwat ta' protezzjoni tad-depożitanti u jissalvagwardjawx l-istabbiltà finanzjarja fl-Unjoni, filwaqt li jitqiesu kemm l-iżviluppi fl-Unjoni kollha, kif ukoll l-iżviluppi fl-unjoni bankarja fid-dimensjonijiet kollha tagħha. F'dak ir-rigward, il-Kummissjoni għandha tikkunsidra kif xieraq id-dikjarazzjonijiet u l-konklużjonijiet korrispondenti dwar l-unjoni bankarja kemm tal-Parlament Ewropew kif ukoll tal-Kunsill Ewropew.

(3)

Fis-27 ta' Ġunju 2023, il-Kummissjoni impenjat ruħha li twettaq valutazzjoni olistika, ġusta u bbilanċjata tal-istat tas-sistema bankarja u tal-oqfsa regolatorji u superviżorji applikabbli fis-suq uniku. Meta tagħmel dan, ser tqis l-impatt tal-emendi introdotti fir-Regolament (UE) Nru 575/2013 minn dan ir-Regolament, kif ukoll tal-istat tal-unjoni bankarja fid-dimensjonijiet kollha tagħha. Fost il-kwistjonijiet li għandhom jiġu analizzati, il-Kummissjoni ser teżamina l-implimentazzjoni tal-minimu tal-output, inkluż il-livell ta' applikazzjoni tiegħu. Hija ser twettaq dik il-valutazzjoni abbażi tal-input mill-Awtorità Superviżorja Ewropea (Awtorità Bankarja Ewropea) (EBA) stabbilita bir-Regolament (UE) Nru 1093/2010 tal-Parlament Ewropew u tal-Kunsill (5) u mill-Bank Ċentrali Ewropew u l-mekkaniżmu superviżorju uniku, u ser tikkonsulta mal-partijiet interessati biex tiżgura li d-diversi perspettivi jiġu kkunsidrati kif xieraq. Il-Kummissjoni, fejn xieraq, ser tippreżenta proposta leġiżlattiva bbażata fuq dak ir-rapport.

(4)

Ir-Regolament (UE) Nru 575/2013 jippermetti lill-istituzzjonijiet jikkalkulaw ir-rekwiżiti tagħhom ta' fondi proprji billi jużaw approċċi standardizzati jew inkella billi jużaw approċċi bbażati fuq mudelli interni. L-approċċi standardizzati jirrikjedu li l-istituzzjonijiet jikkalkulaw ir-rekwiżiti ta' fondi proprji bl-użu ta' parametri fissi, li huma bbażati fuq suppożizzjonijiet relattivament konservattivi u stabbiliti fir-Regolament (UE) Nru 575/2013. L-approċċi ta' mudell intern, li għandhom jiġu approvati mill-awtoritajiet kompetenti, jippermettu lill-istituzzjonijiet jistmaw għalihom infushom ħafna mill-parametri jew il-parametri kollha meħtieġa għall-kalkolu tar-rekwiżiti ta' fondi proprji. F'Diċembru 2017, il-BCBS iddeċieda li jintroduċi minimu aggregat tal-output. Din id-deċiżjoni kienet ibbażata fuq analiżi mwettqa malli feġġet il-kriżi finanzjarja globali tal-2008-2009, li żvelat li l-mudelli interni għandhom it-tendenza li jissottovalutaw ir-riskji li l-istituzzjonijiet ikunu skoperti għalihom, speċjalment għal ċerti tipi ta' skoperturi u riskji, u għalhekk, għandhom it-tendenza li jirriżultaw f'rekwiżiti ta' fondi propji insuffiċjenti. Meta mqabblin mar-rekwiżiti ta' fondi propji kkalkulati bl-użu ta' approċċi standardizzati, il-mudelli interni jipproduċu, bħala medja, rekwiżiti ta' fondi propji aktar baxxi għall-istess skoperturi.

(5)

Il-minimu tal-output jirrappreżenta waħda mill-miżuri ewlenin tar-riforma ta' Basel III. Għandu l-għan li jillimita l-varjabbiltà mhux ġustifikata fir-rekwiżiti ta' fondi propji prodotti minn mudelli interni u t-tnaqqis eċċessiv fil-kapital li istituzzjoni li tuża mudelli interni tista' tikseb meta mqabbla ma' istituzzjoni li tuża l-approċċi standardizzati. Billi jistabbilixxi limitu aktar baxx għar-rekwiżiti ta' fondi propji li huma prodotti mill-mudelli interni tal-istituzzjonijiet ta' 72.5 % tar-rekwiżiti ta' fondi propji li japplikaw li kieku jintużaw approċċi standardizzati minn dawk l-istituzzjonijiet, il-minimu tal-output jillimita r-riskju ta' tnaqqis eċċessiv fil-kapital. Għal dak l-għan, l-istituzzjonijiet li jużaw mudelli interni jenħtieġ li jikkalkulaw żewġ settijiet ta’ rekwiżiti ta’ fondi proprji totali, b’kull sett jaggrega rekwiżiti ta’ fondi proprji mingħajr ebda għadd doppju. L-implimentazzjoni tal-minimu tal-output iżżid b'lealtà l-komparabbiltà tal-proporzjonijiet kapitali tal-istituzzjonijiet, tirrestawra l-kredibbiltà tal-mudelli interni u tiżgura li jkun hemm kundizzjonijiet ekwi bejn l-istituzzjonijiet li jużaw approċċi differenti għall-kalkolu tar-rekwiżiti tagħhom ta' fondi propji.

(6)

Sabiex jiġi żgurat li l-fondi proprji jkunu distribwiti b'mod xieraq u disponibbli biex jiġi protett it-tfaddil fejn meħtieġ, jenħtieġ li l-minimu tal-output japplika fil-livelli kollha ta' konsolidazzjoni, għajr jekk Stat Membru jqis li dak l-objettiv jista' jinkiseb b'mod effettiv b'mod ieħor, b'mod partikolari fir-rigward ta' gruppi, bħal gruppi kooperattivi b'korp ċentrali u istituzzjonijiet affiljati li jinsabu f'dak l-Istat Membru. F'każijiet bħal dawn, jenħtieġ li Stat Membru jkun jista' jiddeċiedi li ma japplikax il-minimu tal-output fuq bażi individwali jew subkonsolidata għall-istituzzjonijiet f'dak l-Istat Membru, dment li, fl-ogħla livell ta' konsolidazzjoni f'dak l-Istat Membru, l-istituzzjoni prinċipali ta' dawk l-istituzzjonijiet f'dak l-Istat Membru tikkonforma mal-minimu tal-output abbażi tas-sitwazzjoni konsolidata tagħha.

(7)

Il-BCBS sab li l-Approċċ Standardizzat attwali għar-riskju ta' kreditu (SA-CR) mhuwiex sensittiv biżżejjed għar-riskju f'numru ta' oqsma, li jwassal għal kejl mhux preċiż jew mhux xieraq – jew għoli wisq jew baxx wisq – tar-riskju ta' kreditu u, għalhekk, tar-rekwiżiti ta' fondi propji. Għalhekk, jenħtieġ li d-dispożizzjonijiet dwar l-SA-CR jiġu riveduti sabiex tiżdied is-sensittività għar-riskju ta' dak l-approċċ fir-rigward ta' diversi aspetti ewlenin.

(8)

Għall-iskoperturi klassifikati għal istituzzjonijiet oħrajn, jenħtieġ li wħud mill-piżijiet tar-riskju jiġu rikalibrati f'konformità mal-istandards ta' Basel III. Barra minn hekk, jenħtieġ li t-trattament tal-piż tar-riskju għal skoperturi mhux klassifikati għall-istituzzjonijiet isir aktar granulari u diżakkoppjat mill-piż tar-riskju applikabbli għall-gvern ċentrali tal-Istat Membru li fih tkun stabbilita l-istituzzjoni mutwatarja, peress li jenħtieġ li l-appoġġ impliċitu tal-gvern għal tali istituzzjonijiet ma jibqax jiġi preżunt.

(9)

Għal skoperturi ta' dejn subordinat u assimilat b'mod prudenzjali, kif ukoll għal skoperturi ta' ekwità, huwa neċessarju trattament aktar granulari u strett tal-piż tar-riskju biex jiġi rifless ir-riskju ogħla ta' telf ta' skoperturi ta' dejn subordinat u ta' ekwità meta mqabblin ma' skoperturi ta' dejn, u biex jiġi evitat arbitraġġ regolatorju bejn il-portafoll mhux tan-negozjar u l-portafoll tan-negozjar. L-istituzzjonijiet fl-Unjoni għandhom investimenti ta' ekwità strateġiċi u fit-tul f'korporattivi finanzjarji u mhux finanzjarji. Billi l-piż tar-riskju standard għall-iskoperturi ta' ekwità jiżdied fuq perjodu tranżitorju ta' ħames snin, jenħtieġ li l-holdings ta' ekwità strateġiċi eżistenti f'korporattivi u f'ċerti impriżi tal-assigurazzjoni taħt il-kontroll jew l-influwenza sinifikanti tal-istituzzjoni jiġu anterjorati biex jiġu evitati effetti ta' tfixkil u biex jiġi ppreservat ir-rwol tal-istituzzjonijiet fl-Unjoni bħala investituri ta' ekwità dejjiema u strateġiċi. Minħabba s-salvagwardji prudenzjali u s-sorveljanza superviżorja biex titrawwem l-integrazzjoni tas-settur finanzjarju, għall-holdings ta' ekwità f'istituzzjonijiet oħrajn fl-istess grupp jew koperti bl-istess skema ta' protezzjoni istituzzjonali, jenħtieġ li jinżamm ir-reġim attwali. Barra minn hekk, sabiex jissaħħu l-inizjattivi privati u pubbliċi bil-għan li tiġi pprovduta ekwità b'terminu twil lill-kumpaniji tal-Unjoni mhux elenkati, jenħtieġ li l-investimenti mwettqa direttament jew indirettament, pereżempju permezz ta' ditti ta' kapital ta' riskju ma jitqisux bħala spekulattivi meta dawk l-investimenti jsiru bl-intenzjoni soda tal-maniġment superjuri li jinżammu għal tal-inqas tliet snin.

(10)

Sabiex jiġu stimulati ċerti setturi tal-ekonomija, l-istandards ta' Basel III jipprevedu diskrezzjoni tal-awtoritajiet kompetenti fit-twettiq tal-kompiti superviżorji tagħhom li tippermetti lill-istituzzjonijiet japplikaw, f'ċerti limiti, trattament preferenzjali għal holdings ta' ekwità akkwistati skont programmi leġiżlattivi li jinvolvu sussidji sinifikanti għall-investiment u li jinvolvu sorveljanza governattiva u restrizzjonijiet fuq l-investimenti fl-ekwità. Jenħtieġ li l-implimentazzjoni ta' dik id-diskrezzjoni fil-liġi tal-Unjoni tgħin ukoll fit-trawwim ta' investimenti ta' ekwità b'terminu twil.

(11)

Is-self korporattiv fl-Unjoni huwa pprovdut b'mod predominanti minn istituzzjonijiet li jużaw l-Approċċ Ibbażat fuq Klassifikazzjonijiet Interni (l-“Approċċ IRB”) għar-riskju ta' kreditu sabiex jikkalkulaw ir-rekwiżiti tagħhom ta' fondi proprji. Bl-implimentazzjoni tal-minimu tal-output, dawk l-istituzzjonijiet ser ikollhom japplikaw ukoll l-SA-CR, li jiddependi fuq valutazzjonijiet tal-kreditu pprovduti minn istituzzjonijiet esterni tal-valutazzjoni tal-kreditu (ECAIs) nominati sabiex tiġi ddeterminata l-kwalità tal-kreditu tal-mutwatarju korporattiv. Jenħtieġ li l-immappjar bejn il-klassifikazzjonijiet esterni u l-piżijiet tar-riskju applikabbli għal korporattivi kklassifikati jkun aktar granulari biex tali mmappjar isir konformi mal-istandards internazzjonali dwar din il-kwistjoni.

(12)

Madankollu, il-biċċa l-kbira tal-korporattivi tal-Unjoni ma jfittxux klassifikazzjonijiet tal-kreditu esterni. Biex jiġi evitat impatt ta' tfixkil fuq is-self bankarju għal korporattivi mhux ikklassifikati u biex jiġi pprovdut biżżejjed żmien biex jiġu stabbiliti inizjattivi pubbliċi jew privati mmirati lejn iż-żieda fil-kopertura tal-klassifikazzjonijiet ta' kreditu esterni, huwa neċessarju li jiġi pprovdut perjodu tranżitorju. Matul dan il-perjodu tranżitorju, jenħtieġ li l-istituzzjonijiet li jużaw l-Approċċ IRB ikunu jistgħu japplikaw trattament favorevoli meta jikkalkulaw il-minimu tal-output tagħhom għal skoperturi tal-grad ta' investiment għal korporattivi mhux ikklassifikati, filwaqt li jenħtieġ li jiġu stabbiliti inizjattivi biex jitrawwem użu mifrux tal-klassifikazzjonijiet ta' kreditu. Jenħtieġ li kwalunkwe estensjoni tal-perjodu tranżitorju tkun sostanzjata u limitata għal massimu ta' erba' snin.

(13)

Wara l-perjodu tranżitorju, jenħtieġ li l-istituzzjonijiet ikunu jistgħu jirreferu għall-valutazzjonijiet tal-kreditu mill-ECAIs nominati biex jikkalkulaw ir-rekwiżiti ta' fondi proprji għal parti sinifikanti tal-iskoperturi korporattivi tagħhom. Jenħtieġ li l-EBA, l-Awtorità Superviżorja Ewropea (Awtorità Ewropea tal-Assigurazzjoni u l-Pensjonijiet tax-Xogħol) (EIOPA) stabbilita bir-Regolament (UE) Nru 1094/2010 tal-Parlament Ewropew u tal-Kunsill (6) u l-Awtorità Superviżorja Ewropea (Awtorità Ewropea tat-Titoli u s-Swieq) (ESMA) stabbilita bir-Regolament (UE) Nru 1095/2010 tal-Parlament Ewropew u tal-Kunsill (7), (kollettivament l-“Awtoritajiet Superviżorji Ewropej”) jimmonitorjaw l-użu tal-arranġament tranżitorju u jenħtieġ li jikkunsidraw l-iżviluppi u x-xejriet rilevanti fis-suq tal-ECAI, l-impedimenti għad-disponibbiltà tal-valutazzjonijiet tal-kreditu minn ECAIs nominati, b'mod partikolari għall-korporattivi, u miżuri possibbli biex jiġu indirizzati dawk l-impedimenti. Jenħtieġ li l-perjodu tranżitorju jintuża biex jespandi b'mod sinifikanti d-disponibbiltà tal-klassifikazzjonijiet għall-korporattivi tal-Unjoni. Għal dak l-għan, jenħtieġ li jiġu żviluppati soluzzjonijiet ta' klassifikazzjoni lil hinn mill-klassifikazzjoni eżistenti bħalissa biex b'mod speċjali korporattivi akbar tal-Unjoni jiġu inċentivizzati biex jiġu kklassifikati esternament. Minbarra l-esternalitajiet pożittivi ġġenerati mill-proċess ta' klassifikazzjoni, kopertura usa' tal-klassifikazzjoni ser trawwem, fost l-oħrajn, l-unjoni tas-swieq kapitali. Sabiex jintlaħaq dak l-għan, huwa meħtieġ li jiġu kkunsidrati r-rekwiżiti relatati mal-valutazzjonijiet esterni tal-kreditu, jew l-istabbiliment ta' istituzzjonijiet addizzjonali li jipprovdu tali valutazzjonijiet, li jistgħu jinvolvu sforzi sostanzjali ta' implimentazzjoni. Jenħtieġ li l-Istati Membri, f'kooperazzjoni mill-qrib mal-banek ċentrali tagħhom, jivvalutaw jekk talba għar-rikonoxximent tal-bank ċentrali tagħhom bħala ECAI f'konformità mar-Regolament (KE) Nru 1060/2009 tal-Parlament Ewropew u tal-Kunsill (8) u l-forniment ta' klassifikazzjonijiet korporattivi mill-bank ċentrali għall-finijiet tar-Regolament (UE) Nru 575/2013 tistax tkun mixtieqa sabiex tiżdied il-kopertura tal-klassifikazzjonijiet esterni.

(14)

Għal skoperturi ggarantiti permezz ta' proprjetà residenzjali u skoperturi ggarantiti permezz ta' proprjetà immobbli kummerċjali, ġew żviluppati approċċi aktar sensittivi għar-riskju mill-BCBS biex jirriflettu aħjar il-mudelli u l-istadji ta' finanzjament differenti fil-proċess ta' kostruzzjoni.

(15)

Il-kriżi finanzjarja globali tal-2008-2009 żvelat numru ta' nuqqasijiet tat-trattament attwali skont l-approċċ standardizzat ta' skoperturi ggarantiti permezz ta' proprjetà residenzjali u skoperturi ggarantiti permezz ta' proprjetà immobbli kummerċjali. Dawk in-nuqqasijiet ġew indirizzati fl-istandards ta' Basel III. L-istandards ta' Basel III jiddistingwu bejn skoperturi fejn ir-ripagament jkun materjalment dipendenti fuq flussi ta' flus iġġenerati mill-proprjetà u skoperturi fejn dak ma jkunx il-każ. Jenħtieġ li dan tal-ewwel ikun soġġett għal trattament iddedikat tal-piż tar-riskju biex jiġi rifless b'mod aktar preċiż ir-riskju assoċjat ma' dawk l-iskoperturi, iżda wkoll biex tittejjeb il-konsistenza mat-trattament ta' proprjetà immobbli li tipproduċi introjtu skont l-Approċċ IRB.

(16)

Għal skoperturi ggarantiti permezz ta' proprjetà residenzjali u skoperturi ggarantiti permezz ta' proprjetà immobbli kummerċjali, jenħtieġ li jinżamm l-approċċ tal-qsim tas-self, peress li dak l-approċċ huwa sensittiv għat-tip ta' mutwatarju u jirrifletti l-effetti ta' mitigazzjoni tar-riskju tal-kollateral tal-proprjetà immobbli fil-piż tar-riskju applikabbli, anki fil-każ ta' skoperturi li jkollhom proporzjonijiet għoljin bejn is-self u l-valur. Madankollu, jenħtieġ li l-approċċ tal-qsim tas-self jiġi aġġustat f'konformità mal-istandards ta' Basel III peress li nstab li huwa konservattiv wisq għal ċerti ipoteki bi proporzjonijiet baxxi ħafna bejn is-self u l-valur.

(17)

Sabiex jiġi żgurat li l-impatt tal-minimu tal-output fuq is-self ipotekarju residenzjali b'riskju baxx mill-istituzzjonijiet li jużaw l-Approċċ IRB jinfirex fuq perjodu twil biżżejjed, u b'hekk jiġi evitat it-tfixkil għal dan it-tip ta' self li jista' jiġi kkawżat minn żidiet f'daqqa fir-rekwiżiti ta' fondi proprji, huwa neċessarju li jiġi previst arranġament tranżitorju speċifiku. Għal kemm idum il-perjodu tranżitorju, meta jiġi kkalkulat il-minimu tal-output, jenħtieġ li l-istituzzjonijiet li jużaw l-Approċċ IRB ikunu jistgħu japplikaw piż tar-riskju aktar baxx għall-parti tal-iskoperturi tagħhom iggarantita b'ipoteka fuq proprjetà residenzjali skont l-SA-CR. Sabiex jiġi żgurat li l-arranġament tranżitorju jkun disponibbli biss għal skoperturi tal-ipoteki b'riskju baxx, jenħtieġ li jiġu stabbiliti kriterji xierqa ta' eliġibbiltà, ibbażati fuq kunċetti stabbiliti użati fl-SA-CR. Jenħtieġ li l-konformità ma' dawk il-kriterji tiġi vverifikata mill-awtoritajiet kompetenti. Minħabba li s-swieq tal-proprjetà residenzjali jistgħu jvarjaw minn Stat Membru għal ieħor, jenħtieġ li d-deċiżjoni dwar jekk għandux jiġi applikat l-arranġament tranżitorju titħalla f'idejn l-Istati Membri individwali. Jenħtieġ li l-użu tal-arranġament tranżitorju jiġi mmonitorjat mill-EBA. Jenħtieġ li kwalunkwe estensjoni tal-perjodu tranżitorju tkun sostanzjata u limitata għal massimu ta' erba' snin.

(18)

Minħabba n-nuqqas ta' ċarezza u s-sensittività għar-riskju tat-trattament attwali tal-finanzjament spekulattiv tal-proprjetà immobbli, ir-rekwiżiti ta' fondi proprji għal dawk l-iskoperturi spiss jitqiesu għoljin wisq jew baxxi wisq. Għalhekk, jenħtieġ li dak it-trattament jiġi sostitwit bi trattament iddedikat għal skoperturi għall-akkwist ta' art, għall-iżvilupp u għall-kostruzzjoni, li jinkludi self lil kumpaniji jew entitajiet bi skop speċjali li jiffinanzjaw kwalunkwe akkwist ta' art għal skopijiet ta' żvilupp u kostruzzjoni, jew żvilupp u kostruzzjoni ta' kwalunkwe proprjetà residenzjali jew proprjetà immobbli kummerċjali.

(19)

Huwa importanti li jitnaqqas l-impatt tal-effetti ċikliċi fuq il-valwazzjoni tal-proprjetà immobbli li tiggarantixxi self u li r-rekwiżiti ta' fondi propji għall-ipoteki jinżammu aktar stabbli. Fil-każ ta' rivalwazzjoni ogħla mill-valur fiż-żmien meta ngħata s-self, dment li jkun hemm biżżejjed data, jenħtieġ għaldaqstant li l-valur tal-proprjetà immobbli rikonoxxut għal finijiet prudenzjali ma jaqbiżx il-valur medju ta' proprjetà komparabbli mkejla fuq perjodu twil biżżejjed, sakemm il-modifiki għal dik il-proprjetà ma jżidux il-valur tagħha b'mod inekwivoku. Sabiex jiġu evitati konsegwenzi mhux intenzjonati għall-funzjonament tas-swieq tal-bonds koperti, jenħtieġ li l-awtoritajiet kompetenti jkunu jistgħu jippermettu lill-istituzzjonijiet jivvalutaw mill-ġdid il-proprjetà immobbli fuq bażi regolari mingħajr ma japplikaw dawk il-limiti għal żidiet fil-valur. Modifiki li jtejbu r-rendiment fl-użu tal-enerġija jew ir-reżiljenza, il-protezzjoni u l-adattament għar-riskji fiżiċi tal-bini u l-unitajiet ta' akkomodazzjoni jistgħu jitqiesu li jżidu l-valur tal-proprjetà immobbli.

(20)

In-negozju tas-self speċjalizzat jitwettaq b'entitajiet bi skop speċjali li tipikament iservu bħala entitajiet mutwatarji, li għalihom ir-redditu fuq l-investiment huwa s-sors primarju tar-ripagament tal-finanzjament miksub. L-arranġamenti kuntrattwali tal-mudell ta' self speċjalizzat jipprovdu lill-mutwanti bi grad sostanzjali ta' kontroll fuq l-assi li qed jiġu ffinanzjati, filwaqt li s-sors primarju ta' ripagament għall-obbligu huwa l-introjtu ġġenerat minn dawk l-assi. Għalhekk, sabiex jiġi rifless ir-riskju assoċjat b'mod aktar akkurat, jenħtieġ li dik il-forma ta' self tkun soġġetta għal rekwiżiti speċifiċi ta' fondi propji għar-riskju ta' kreditu. F'konformità mal-istandards ta' Basel III dwar l-assenjazzjoni tal-piżijiet tar-riskju għal skoperturi ta' self speċjalizzat, jenħtieġ li tiġi introdotta klassi ddedikata ta' skoperturi ta' self speċjalizzat taħt l-SA-CR, u b'hekk tittejjeb il-konsistenza mat-trattament speċifiku diġà eżistenti ta' skoperturi ta' self speċjalizzat skont l-Approċċ IRB. Jenħtieġ li jiġi introdott trattament speċifiku għal skoperturi ta' self speċjalizzat, li fih jenħtieġ li ssir distinzjoni bejn “finanzjament ta' proġett”, “finanzjament ta' oġġetti” u “finanzjament ta' komoditajiet” biex jiġu riflessi aħjar ir-riskji inerenti ta' dawk is-subklassijiet tal-klassi tal-iskoperturi ta' self speċjalizzat.

(21)

Filwaqt li t-trattament il-ġdid skont l-approċċ standardizzat għal skoperturi ta' self speċjalizzat mhux ikklassifikati stabbiliti fl-istandards ta' Basel III huwa aktar granulari mit-trattament standardizzat attwali tal-iskoperturi għal korporattivi, dan tal-ewwel mhuwiex sensittiv biżżejjed għar-riskju biex ikun jista' jirrifletti l-effetti ta' pakketti ta' garanzija u ipotekazzjonijiet komprensivi normalment assoċjati ma' dawk l-iskoperturi fl-Unjoni, li jippermettu lill-mutwanti jikkontrollaw il-flussi ta' flus futuri li għandhom jiġu ġġenerati matul il-ħajja tal-proġett jew tal-assi. Minħabba n-nuqqas ta' kopertura tal-klassifikazzjoni esterna ta' skoperturi ta' self speċjalizzat fl-Unjoni, dak it-trattament il-ġdid jista' joħloq ukoll inċentivi għall-istituzzjonijiet biex jieqfu milli jiffinanzjaw ċerti proġetti jew jieħdu riskji ogħla fi skoperturi li altrimenti jiġu ttrattati b'mod simili u li jkollhom profili tar-riskju differenti. Billi l-iskoperturi ta' self speċjalizzat huma ffinanzjati l-aktar minn istituzzjonijiet li jużaw l-Approċċ IRB u li għandhom mudelli interni fis-seħħ għal dawk l-iskoperturi, l-impatt jista' jkun partikolarment sinifikanti fil-każ ta' skoperturi ta' finanzjament ta' oġġetti, li jistgħu jkunu f'riskju ta' waqfien tal-attivitajiet, fil-kuntest partikolari tal-applikazzjoni tal-minimu tal-output. Biex jiġu evitati konsegwenzi mhux intenzjonati tan-nuqqas ta' sensittività għar-riskju fl-istandards ta' Basel III għal skoperturi ta' finanzjament ta' oġġetti mhux ikklassifikati, jenħtieġ li skoperturi ta' finanzjament ta' oġġetti li jikkonformaw ma' sett ta' kriterji li kapaċi jbaxxu l-profil tar-riskju tagħhom għal standards ta' kwalità għolja kompatibbli ma' ġestjoni prudenti u konservattiva tar-riskji finanzjarji, jibbenefikaw minn piż tar-riskju mnaqqas fuq bażi tranżitorja. Jenħtieġ li dak l-arranġament tranżitorju jkun ivvalutat f'rapport imħejji mill-EBA.

(22)

Jenħtieġ li l-klassifikazzjoni tal-iskoperturi fil-livell tal-konsumatur skont l-SA-CR u l-Approċċ IRB tiġi allinjata aktar biex tiġi żgurata applikazzjoni konsistenti tal-piżijiet tar-riskju korrispondenti għall-istess sett ta' skoperturi. F'konformità mal-istandards ta' Basel III, jenħtieġ li jiġu stabbiliti regoli għal trattament differenzjat ta' skoperturi rotanti fil-livell tal-konsumatur li jissodisfaw sett ta' kundizzjonijiet ta' ripagament jew ta' użu li kapaċi jbaxxu l-profil tar-riskju tagħhom. Jenħtieġ li dawk l-iskoperturi jiġu definiti bħala skoperturi ta' tranżatturi. Jenħtieġ li l-iskoperturi għal persuna fiżika waħda jew aktar li ma jissodisfawx il-kundizzjonijiet kollha sabiex jitqiesu bħala skoperturi fil-livell tal-konsumatur jiġu assenjati piż tar-riskju b'100 % taħt l-SA-CR.

(23)

L-istandards ta' Basel III jintroduċu fattur tal-konverżjoni ta' kreditu ta' 10 % għal impenji kanċellabbli mingħajr kundizzjonijiet fl-SA-CR. Dak x'aktarx li jirriżulta f'impatt sinifikanti fuq id-debituri li jiddependu min-natura flessibbli tal-impenji kanċellabbli mingħajr kundizzjonijiet biex jiffinanzjaw l-attivitajiet tagħhom meta jittrattaw il-fluttwazzjonijiet staġjonali fin-negozji tagħhom jew meta jimmaniġġaw bidliet mhux mistennijin b'terminu qasir fil-ħtiġijiet tal-kapital operatorju, speċjalment matul l-irkupru mill-pandemija tal-COVID-19. Għaldaqstant huwa xieraq li jiġi previst perjodu tranżitorju li matulu jenħtieġ li l-istituzzjonijiet ikunu jistgħu jkomplu japplikaw fattur tal-konverżjoni ta' kreditu aktar baxx għall-impenji kanċellabbli tagħhom mingħajr kundizzjonijiet, u, wara, jivvalutaw jekk żieda gradwali potenzjali tal-fatturi tal-konverżjoni ta' kreditu applikabbli tkunx iġġustifikata biex l-istituzzjonijiet ikunu jistgħu jaġġustaw il-prattiki operattivi u l-prodotti tagħhom mingħajr ma jfixklu d-disponibbiltà tal-kreditu għad-debituri tal-istituzzjonijiet.

(24)

Jenħtieġ li l-istituzzjonijiet ikollhom rwol ewlieni fil-kontribut għall-irkupru mill-pandemija tal-COVID-19 anke billi jestendu miżuri proattivi ta' ristrutturar tad-dejn lejn debituri denji li qed jiffaċċaw jew dalwaqt ser jiffaċċaw diffikultajiet biex jissodisfaw l-impenji finanzjarji tagħhom. F'dak ir-rigward, jenħtieġ li l-istituzzjonijiet ma jiġux skoraġġuti milli jestendu konċessjonijiet sinifikanti għal debituri fejn jitqies xieraq bħala riżultat ta' klassifikazzjoni potenzjali u mhux ġustifikata ta' kontropartijiet bħala inadempjenti fejn tali konċessjonijiet jistgħu jreġġgħu lura l-probabbiltà li dawk id-debituri jħallsu l-bqija tal-obbligi tad-dejn tagħhom. Meta tiżviluppa l-linji gwida fir-rigward tad-definizzjoni tal-inadempjenza ta' debitur jew ta' faċilità ta' kreditu, jenħtieġ li l-EBA tqis b'mod debitu l-ħtieġa li tingħata flessibbiltà adegwata lill-istituzzjonijiet.

(25)

Il-kriżi finanzjarja globali tal-2008-2009 żvelat li, f'xi każijiet, l-istituzzjonijiet użaw ukoll l-Approċċ IRB fuq portafolji mhux adatti għall-immudellar minħabba data mhux suffiċjenti, użu li kellu konsegwenzi detrimentali għall-affidabbiltà tar-riżultati. Għalhekk, huwa xieraq li l-istituzzjonijiet ma jiġux obbligati jużaw l-Approċċ IRB għall-iskoperturi kollha tagħhom u li japplikaw ir-rekwiżit ta' tnedija fil-livell tal-klassijiet tal-iskoperturi. Huwa xieraq ukoll li jiġi ristrett l-użu tal-Approċċ IRB għall-klassijiet tal-iskoperturi fejn l-immudellar robust huwa aktar diffiċli sabiex jiżdiedu l-komparabbiltà u r-robustezza tar-rekwiżiti ta' fondi propji għar-riskju ta' kreditu skont l-Approċċ IRB.

(26)

L-iskoperturi tal-istituzzjonijiet għal istituzzjonijiet oħrajn, għal entitajiet oħrajn tas-settur finanzjarju u għal korporattivi kbar tipikament juru livelli baxxi ta' inadempjenza. Għal portafolji b'inadempjenza baxxa bħal dawn, huwa diffiċli għall-istituzzjonijiet li jiksbu stimi affidabbli tat-telf fil-każ ta' inadempjenza (LGD), minħabba numru insuffiċjenti ta' inadempjenzi osservati f'dawk il-portafolji. Dik id-diffikultà rriżultat f'livell mhux mixtieq ta' dispersjoni fost l-istituzzjonijiet fil-livell ta' riskju stmat. Jenħtieġ għalhekk li l-istituzzjonijiet jużaw valuri regolatorji tal-LGD aktar milli stimi interni tal-LGD għal dawk il-portafolji b'inadempjenza baxxa.

(27)

L-istituzzjonijiet li jużaw mudelli interni sabiex jistmaw ir-rekwiżiti ta' fondi proprji għar-riskju ta' kreditu fir-rigward tal-iskoperturi ta' ekwità tipikament jibbażaw il-valutazzjoni tar-riskju tagħhom fuq data disponibbli pubblikament, li għaliha l-istituzzjonijiet kollha jistgħu jiġu preżunti li għandhom aċċess identiku. F'dawn iċ-ċirkostanzi, id-differenzi fir-rekwiżiti ta' fondi proprji ma jistgħux jiġu ġġustifikati. Barra minn hekk, l-iskoperturi ta' ekwità miżmumin fil-portafoll mhux tan-negozjar jifformaw komponent żgħir ħafna tal-karti tal-bilanċ tal-istituzzjonijiet. Għalhekk, biex tiżdied il-komparabbiltà tar-rekwiżiti ta' fondi proprji tal-istituzzjonijiet u biex jiġi simplifikat il-qafas regolatorju, jenħtieġ li l-istituzzjonijiet jikkalkulaw ir-rekwiżiti tagħhom ta' fondi proprji għar-riskju ta' kreditu fir-rigward tal-iskoperturi ta' ekwità bl-użu tal-SA-CR, u jenħtieġ li l-użu tal-Approċċ IRB ma jkunx permess għal dan il-għan.

(28)

Jenħtieġ li jiġi żgurat li l-istimi tal-probabbiltà ta' inadempjenza, tal-LGD u tal-fatturi tal-konverżjoni ta' kreditu ta' skoperturi individwali ta' istituzzjonijiet li jitħallew jużaw mudelli interni sabiex jikkalkulaw ir-rekwiżiti ta' fondi propji għar-riskju ta' kreditu ma jilħqux livelli baxxi mhux xierqa. Għalhekk, huwa xieraq li jiġu introdotti valuri minimi għall-istimi proprji u li l-istituzzjonijiet jiġu obbligati jużaw l-ogħla waħda mill-istimi proprji tagħhom tal-parametri tar-riskju u l-valuri minimi għal dawk l-istimi proprji. Jenħtieġ li tali valuri minimi għall-parametri tar-riskju (“minimi tal-input”) jikkostitwixxu salvagwardja biex jiġi żgurat li r-rekwiżiti ta' fondi proprji ma jaqgħux taħt livelli prudenti. Barra minn hekk, jenħtieġ li minimi tal-input bħal dawn jimmitigaw ir-riskju tal-mudell minħabba fatturi bħal speċifikazzjoni tal-mudell mhux korretta, żball fil-kejl u limitazzjonijiet tad-data. Il-minimi tal-input itejbu wkoll il-komparabbiltà tal-proporzjonijiet kapitali fl-istituzzjonijiet kollha. Sabiex jinkisbu dawk ir-riżultati, jenħtieġ li l-minimi tal-input jiġu kkalibrati b'mod konservattiv biżżejjed.

(29)

Il-minimi tal-input li huma kkalibrati b'mod konservattiv wisq jistgħu jiskoraġġixxu lill-istituzzjonijiet milli jadottaw l-Approċċ IRB u l-istandards assoċjati tal-ġestjoni tar-riskju. L-istituzzjonijiet jistgħu wkoll jingħataw inċentivi biex imexxu l-portafolji tagħhom għal skoperturi ta' riskju ogħla biex jevitaw ir-restrizzjonijiet imposti mill-minimi tal-input. Sabiex jiġu evitati konsegwenzi mhux intenzjonati bħal dawn, jenħtieġ li l-minimi tal-input jirriflettu b'mod xieraq ċerti karatteristiċi tar-riskju tal-iskoperturi sottostanti, b'mod partikolari billi jieħdu valuri differenti għal tipi differenti ta' skoperturi, fejn xieraq.

(30)

Skoperturi ta' self speċjalizzat għandhom karatteristiċi tar-riskju li jvarjaw minn dawk ta' skoperturi korporattivi ġenerali. Għalhekk, huwa xieraq li jiġi previst perjodu tranżitorju li matulu jitnaqqas il-minimu tal-input tal-LGD applikabbli għal skoperturi ta' self speċjalizzat. Jenħtieġ li kwalunkwe estensjoni tal-perjodu tranżitorju tkun sostanzjata u limitata għal massimu ta' erba' snin.

(31)

F'konformità mal-istandards tal-Basel III, jenħtieġ li l-Approċċ IRB għall-klassi tal-iskoperturi sovrani jibqa' fil-biċċa l-kbira mhux mimsus, minħabba n-natura speċjali ta’ u r-riskji relatati mad-debituri sottostanti. B'mod partikolari, jenħtieġ li l-iskoperturi sovrani ma jkunux soġġetti għall-minimi tal-input.

(32)

Sabiex jiġi żgurat approċċ konsistenti għall-iskoperturi kollha għall-gvernijiet reġjonali, l-awtoritajiet lokali u l-entitajiet tas-settur pubbliku, jenħtieġ li jinħolqu żewġ klassijiet ġodda tal-iskoperturi għall-gvernijiet reġjonali, l-awtoritajiet lokali u l-entitajiet tas-settur pubbliku, indipendentement kemm mill-klassijiet tal-iskoperturi sovrani kif ukoll dawk tal-istituzzjonijiet. Jenħtieġ li t-trattament ta' skoperturi assimilati għal gvernijiet reġjonali, awtoritajiet lokali u entitajiet tas-settur pubbliku, li skont l-SA-CR jikkwalifikaw għal trattament bħala skoperturi għal gvernijiet ċentrali u banek ċentrali, ma jiġix assenjat għal dawk il-klassijiet tal-iskoperturi ġodda skont l-Approċċ IRB u jenħtieġ li ma jkunux soġġetti għal minimi tal-input. Barra minn hekk, jenħtieġ li minimi tal-input aktar baxxi speċifiċi skont l-Approċċ IRB jiġu kkalibrati għal skoperturi għal gvernijiet reġjonali, awtoritajiet lokali u entitajiet tas-settur pubbliku, li mhumiex assimilati, sabiex jirriflettu b'mod xieraq il-profil tar-riskju tagħhom meta mqabbla mal-iskoperturi għal korporattivi.

(33)

Jenħtieġ li jiġi ċċarat kif l-effett ta' garanzija jenħtieġ li jiġi rikonoxxut għal skopertura garantita ttrattata skont l-Approċċ IRB bl-użu tal-istimi proprji tal-LGD meta l-garanti jappartjeni għal tip ta' skoperturi ttrattati skont l-Approċċ IRB iżda mingħajr ma jintużaw l-istimi proprji tal-LGD. B'mod partikolari, l-użu tal-approċċ ta' sostituzzjoni, li fih il-parametri tar-riskju relatati mal-iskopertura sottostanti jinbidlu b'dawk tal-garanti, jew ta' metodu li bih il-probabbiltà ta' inadempjenza jew l-LGD tad-debitur sottostanti jiġi aġġustat bl-użu ta' approċċ ta' mmudellar speċifiku biex jitqies l-effett tal-garanzija, jenħtieġ li ma jwassalx għal piż tar-riskju aġġustat li jkun anqas mill-piż tar-riskju applikabbli għal skopertura diretta komparabbli għall-garanti. Konsegwentement, meta l-garanti jiġi ttrattat skont l-SA-CR, jenħtieġ li r-rikonoxximent tal-garanzija skont l-Approċċ IRB ġeneralment iwassal għall-assenjazzjoni tal-piż tar-riskju tal-SA-CR tal-garanti għall-iskopertura garantita.

(34)

Il-qafas finalizzat ta' Basel III ma għadux jeħtieġ li istituzzjoni li adottat l-Approċċ IRB għal klassi tal-iskoperturi waħda tadotta dak l-approċċ għall-iskoperturi kollha fil-portafoll mhux tan-negozjar tagħha. Sabiex jiġu żgurati kundizzjonijiet ekwi bejn l-istituzzjonijiet li attwalment jittrattaw xi skoperturi skont l-Approċċ IRB u dawk li ma jagħmlux dan, jenħtieġ li arranġament tranżitorju jippermetti lill-istituzzjonijiet jerġgħu lura għal approċċi inqas sofistikati skont proċedura simplifikata. Jenħtieġ li dik il-proċedura tippermetti li l-awtoritajiet kompetenti jopponu talbiet għat-treġġigħ lura għal approċċ inqas sofistikat li jsiru bil-ħsieb ta' involviment f'arbitraġġ regolatorju. Għall-finijiet ta' dik il-proċedura, is-sempliċi fatt li t-treġġigħ lura għal approċċ inqas sofistikat jirriżulta fi tnaqqis tar-rekwiżiti ta' fondi proprji ddeterminati għall-iskoperturi rispettivi jenħtieġ li ma jitqiesx biżżejjed biex jopponi talba għal raġunijiet ta' arbitraġġ regolatorju.

(35)

Fil-kuntest tat-tneħħija tal-varjabbiltà mhux ġustifikata fir-rekwiżiti ta' fondi proprji, jenħtieġ li r-regoli eżistenti dwar l-iskontar applikati għall-flussi ta' flus artifiċjali jiġu riveduti sabiex titneħħa kwalunkwe konsegwenza mhux intenzjonata. Jenħtieġ li l-EBA tingħata l-mandat li tirrevedi l-linji gwida tagħha dwar ir-ritorn għal status mhux inadempjenti.

(36)

L-introduzzjoni tal-minimu tal-output jista' jkollha impatt sinifikanti fuq ir-rekwiżiti ta' fondi proprji għall-pożizzjonijiet ta' titolizzazzjoni miżmuma mill-istituzzjonijiet li jużaw l-Approċċ Ibbażat fuq Klassifikazzjonijiet Interni tat-Titolizzazzjoni jew l-Approċċ ta' Valutazzjoni Interna. Għalkemm pożizzjonijiet bħal dawn ikunu ġeneralment żgħar meta mqabbla ma' skoperturi oħra, l-introduzzjoni tal-minimu tal-output tista' taffettwa l-vijabbiltà ekonomika tal-operazzjoni ta' titolizzazzjoni minħabba benefiċċju prudenzjali insuffiċjenti tat-trasferiment tar-riskju. Dan jista’ jseħħ meta l-iżvilupp tas-suq tat-titolizzazzjoni jkun parti mill-pjan ta' azzjoni dwar l-unjoni tas-swieq kapitali stabbilit fil-komunikazzjoni tal-Kummissjoni tal-24 ta' Settembru 2020 intitolata “Unjoni tas-Swieq Kapitali għall-persuni u n-negozji – pjan ta' azzjoni ġdid” (il-“pjan ta’ azzjoni tal-unjoni tas-swieq kapitali”) u wkoll fejn l-istituzzjonijiet oriġinaturi jista' jkollhom bżonn jużaw it-titolizzazzjoni b'mod aktar estensiv sabiex jimmaniġġaw b'mod aktar attiv il-portafolji tagħhom jekk jintrabtu bil-minimu tal-output. Matul perjodu tranżitorju, jenħtieġ li l-istituzzjonijiet li jużaw l-Approċċ Ibbażat fuq Klassifikazzjonijiet Interni tat-Titolizzazzjoni jew l-Approċċ ta' Valutazzjoni Interna jkunu jistgħu japplikaw trattament favorevoli għall-fini tal-kalkolu tal-minimu tal-output tagħhom għall-pożizzjonijiet ta’ Titolizzazzjoni tagħhom li jkunu ponderati għar-riskju bl-użu ta’ kwalunkwe wieħed minn dawk l-Approċċi. Jenħtieġ li l-EBA tirrapporta lill-Kummissjoni dwar il-ħtieġa li possibbilment jiġi rieżaminat it-trattament prudenzjali tat-tranżazzjonijiet ta' titolizzazzjoni, bil-ħsieb li tiżdied is-sensittività għar-riskju tat-trattament prudenzjali.

(37)

Ir-Regolament (UE) 2019/876 tal-Parlament Ewropew u tal-Kunsill (9) emenda r-Regolament (UE) Nru 575/2013 biex jimplimenta l-istandards ta' Basel III dwar ir-rieżami fundamentali tal-portafoll tan-negozjar iffinalizzat mill-BCBS fl-2019 (l-“istandards finali tal-FRTB”) għal finijiet ta' rapportar biss. L-introduzzjoni ta' rekwiżiti vinkolanti ta' fondi proprji bbażati fuq dawk l-istandards tħalliet għal proposta leġiżlattiva separata, wara l-valutazzjoni tal-impatt tagħhom fuq l-istituzzjonijiet fl-Unjoni.

(38)

Jenħtieġ li l-istandards finali tal-FRTB fir-rigward tal-limitu bejn il-portafoll tan-negozjar u l-portafoll mhux tan-negozjar jiġu implimentati fil-liġi tal-Unjoni, peress li għandhom effett sinifikanti fuq il-kalkolu tar-rekwiżiti ta' fondi proprji għar-riskju tas-suq. F'konformità mal-istandards ta' Basel III, jenħtieġ li l-implimentazzjoni tar-rekwiżiti tal-limiti tinkludi l-listi ta' strumenti li għandhom jiġu assenjati lill-portafoll tan-negozjar jew lill-portafoll mhux tan-negozjar, kif ukoll id-deroga li tippermetti lill-istituzzjonijiet jassenjaw, soġġett għall-approvazzjoni tal-awtorità kompetenti, ċerti strumenti normalment miżmuma fil-portafoll tan-negozjar, inkluż l-ekwitajiet elenkati, lill-portafoll mhux tan-negozjar, fejn il-pożizzjonijiet f'dawk l-istrumenti ma jinżammux b'intenzjoni ta' negozjar jew ma jiħħeġġjawx pożizzjonijiet miżmuma b'intenzjoni ta' negozjar.

(39)

Sabiex jiġi evitat piż operazzjonali sinifikanti għall-istituzzjonijiet fl-Unjoni, jenħtieġ li r-rekwiżiti kollha li jimplimentaw l-istandards finali tal-FRTB għall-fini tal-kalkolu tar-rekwiżiti ta' fondi proprji għar-riskju tas-suq ikollhom l-istess data ta' applikazzjoni. Għalhekk, jenħtieġ li d-data tal-applikazzjoni ta' numru limitat ta' rekwiżiti tal-FRTB li diġà ġew introdotti bir-Regolament (UE) 2019/876 tiġi allinjata mad-data tal-applikazzjoni ta' dan ir-Regolament. Fis-27 ta' Frar 2023, l-EBA ħarġet opinjoni li jekk id-dispożizzjonijiet imsemmija fl-Artikolu 3(6) tar-Regolament (UE) 2019/876 ikunu daħlu fis-seħħ u l-qafas legali applikabbli jkun għadu ma jipprevedix l-applikazzjoni tal-approċċi ispirati mill-FRTB għall-finijiet tal-kalkolu tal-kapital, jenħtieġ li l-awtoritajiet kompetenti msemmija fir-Regolament (UE) Nru 1093/2010 ma jipprijoritizzaw l-ebda azzjoni superviżorja jew ta' infurzar fir-rigward ta' dawk ir-rekwiżiti, sakemm tinkiseb l-implimentazzjoni sħiħa tal-FRTB, li hija mistennija li tkun mill-1 ta' Jannar 2025.

(40)

Sabiex titlesta l-aġenda ta' riforma introdotta wara l-kriżi finanzjarja globali tal-2008-2009 u sabiex jiġu indirizzati n-nuqqasijiet fil-qafas tar-riskju tas-suq attwali, jenħtieġ li fil-liġi tal-Unjoni jiġu implimentati rekwiżiti ta' fondi propji vinkolanti għar-riskju tas-suq abbażi tal-istandards finali tal-FRTB. Stimi reċenti tal-impatt tal-istandards finali tal-FRTB fuq l-istituzzjonijiet fl-Unjoni wrew li l-implimentazzjoni ta' dawk l-istandards fl-Unjoni ser twassal għal żieda kbira fir-rekwiżiti ta' fondi proprji għar-riskju tas-suq għal ċerti attivitajiet ta' negozjar u ta' ġenerazzjoni tas-suq li huma importanti għall-ekonomija tal-Unjoni. Sabiex jittaffa dak l-impatt u jiġi ppreservat il-funzjonament tajjeb tas-swieq finanzjarji fl-Unjoni, jenħtieġ li jiġu introdotti aġġustamenti mmirati għall-implimentazzjoni tal-istandards finali tal-FRTB fil-liġi tal-Unjoni.

(41)

L-attivitajiet ta' negozjar tal-istituzzjonijiet fis-swieq tal-operaturi jistgħu jitwettqu faċilment bejn il-fruntieri, inkluż bejn l-Istati Membri u pajjiżi terzi. Għalhekk, jenħtieġ li l-implimentazzjoni tal-istandards finali tal-FRTB jikkonverġu kemm jista' jkun fil-ġuriżdizzjonijiet kollha, kemm f'termini ta' sustanza kif ukoll f'termini ta' twaqqit. Inkella, ikun impossibbli li jiġu żgurati kundizzjonijiet ekwi f'livell internazzjonali għal dawk l-attivitajiet. Għalhekk, jenħtieġ li l-Kummissjoni timmonitorja l-implimentazzjoni tal-istandards finali tal-FRTB f'ġuriżdizzjonijiet membri oħra tal-BCBS. Sabiex jiġu indirizzati, fejn meħtieġ, id-distorsjonijiet potenzjali fl-implimentazzjoni tal-istandards finali tal-FRTB, jenħtieġ li s-setgħa li jiġu adottati atti f'konformità mal-Artikolu 290 tat-Trattat dwar il-Funzjonament tal-Unjoni Ewropea (TFUE) tiġi ddelegata lill-Kummissjoni. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta' tħejjija, inkluż fil-livell ta' esperti, u li dawk il-konsultazzjonijiet jiġu mwettqa f'konformità mal-prinċipji stipulati fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet (10). B'mod partikolari, biex tiġi żgurata parteċipazzjoni ugwali fit-tħejjija ta' atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta' atti delegati. Jenħtieġ li l-miżuri introdotti permezz ta' atti delegati jibqgħu temporanji. Fejn ikun xieraq li tali miżuri japplikaw fuq bażi permanenti, jenħtieġ li l-Kummissjoni tippreżenta proposta leġiżlattiva lill-Parlament Ewropew u lill-Kunsill.

(42)

Jenħtieġ li l-Kummissjoni tqis il-prinċipju tal-proporzjonalità fil-kalkolu tar-rekwiżiti ta' fondi proprji għar-riskju tas-suq għall-istituzzjonijiet b'negozju tal-portafoll tan-negozjar ta' daqs medju, u tikkalibra dawk ir-rekwiżiti kif xieraq. Għalhekk, jenħtieġ li l-istituzzjonijiet b'b'negozju tal-portafoll tan-negozjar ta' daqs medju jitħallew jużaw approċċ standardizzat simplifikat biex jikkalkulaw ir-rekwiżiti ta' fondi proprji għar-riskju tas-suq, f'konformità mal-istandards miftehmin internazzjonalment. Barra minn hekk, jenħtieġ li l-kriterji ta' eliġibbiltà għall-identifikazzjoni ta' istituzzjonijiet b'negozju tal-portafoll tan-negozjar ta' daqs medju jibqgħu konsistenti mal-kriterji għall-eżenzjoni ta' tali istituzzjonijiet mir-rekwiżiti ta' rapportar tal-FRTB introdotti bir-Regolament (UE) 2019/876.

(43)

Fid-dawl tad-disinn aġġornat tas-suq tal-kwoti tal-emissjonijiet tal-karbonju tal-Unjoni, l-istabbiltà tiegħu f'dawn l-aħħar snin u l-volatilità limitata tal-prezzijiet għall-krediti tal-karbonju, jenħtieġ li jiġi introdott piż tar-riskju speċifiku għall-iskoperturi għan-negozjar tal-karbonju skont l-Iskema tal-UE għall-Iskambju ta' Kwoti tal-Emissjonijiet (EU ETS) skont l-approċċ standardizzat alternattiv.

(44)

Skont l-approċċ standardizzat alternattiv, l-iskoperturi għal strumenti li jġorru riskji residwi huma soġġetti għal imposta supplimentari għar-riskju residwu biex jitqiesu r-riskji li mhumiex koperti mill-metodu bbażat fuq is-sensittivitajiet. Skont l-istandards ta' Basel III, strument u l-ħeġġ tiegħu jistgħu jiġu nnettjati għall-finijiet ta' dik l-imposta biss jekk jitpaċew perfettament. Madankollu, l-istituzzjonijiet jistgħu jiħħeġġjaw fis-suq, fil-biċċa l-kbira, ir-riskju residwu ta' xi wħud mill-istrumenti fil-kamp ta' applikazzjoni tal-imposta supplimentari għar-riskju residwu u b'hekk jitnaqqas ir-riskju ġenerali tal-portafolji tagħhom, anki jekk dawk il-ħeġġijiet jistgħu ma jpaċux perfettament ir-riskju tal-pożizzjoni inizjali. Sabiex l-istituzzjonijiet ikunu jistgħu jkomplu l-iħħeġġjar mingħajr diżinċentivi bla bżonn u b'rikonoxximent tar-raġunament ekonomiku tat-tnaqqis tar-riskju ġenerali, jenħtieġ li l-implimentazzjoni tal-imposta supplimentari għar-riskju residwu tippermetti fuq bażi temporanja, taħt kundizzjonijiet stretti u approvazzjoni superviżorja, li l-ħeġġijiet ta' dawk l-istrumenti li jistgħu jiġu ħħeġġjati fis-suq jiġu esklużi mill-imposta supplimentari għar-riskju residwu.

(45)

Il-BCBS irreveda l-istandard internazzjonali dwar ir-riskju operazzjonali biex jindirizza d-dgħufijiet li feġġew mal-kriżi finanzjarja globali tal-2008-2009. Minbarra nuqqas ta' sensittività għar-riskju fl-approċċi standardizzati, ġie identifikat nuqqas ta' komparabbiltà li jirriżulta minn firxa wiesgħa ta' prattiki ta' mmudellar intern skont l-approċċ ta' kejl avvanzat. Għalhekk, u sabiex jiġi ssimplifikat il-qafas tar-riskju operazzjonali, l-approċċi eżistenti kollha għall-istima tar-rekwiżiti ta' fondi propji għar-riskju operazzjonali inbidlu b'metodu wieħed mhux ibbażat fuq mudell, jiġifieri l-approċċ standardizzat il-ġdid għar-riskju operazzjonali. Jenħtieġ li r-Regolament (UE) Nru 575/2013 jiġi allinjat mal-qafas finalizzat ta' Basel III biex jikkontribwixxi għal kundizzjonijiet ekwi fil-livell internazzjonali għall-istituzzjonijiet stabbiliti fl-Unjoni iżda li joperaw ukoll barra mill-Unjoni, u biex jiġi żgurat li l-qafas tar-riskju operazzjonali fil-livell tal-Unjoni jibqa' effettiv.

(46)

L-approċċ standardizzat il-ġdid għar-riskju operazzjonali introdott mill-BCBS jikkombina indikatur li jiddependi fuq id-daqs tan-negozju ta' istituzzjoni ma' indikatur li jqis l-istorja tat-telf ta' din l-istituzzjoni. Il-qafas finalizzat ta' Basel III jipprevedi grad ta' diskrezzjoni dwar kif l-indikatur li jqis l-istorja tat-telf ta' istituzzjoni jista' jiġi implimentat. Il-ġuriżdizzjonijiet jistgħu jinjoraw it-telf storiku għall-kalkolu tar-rekwiżiti ta' fondi proprji għar-riskju operazzjonali għall-istituzzjonijiet rilevanti kollha, jew iqisu d-data storika tat-telf anki għal istituzzjonijiet taħt ċertu daqs tan-negozju. Sabiex jiġu żgurati kundizzjonijiet ekwi fl-Unjoni u sabiex jiġi ssimplifikat il-kalkolu tar-rekwiżiti ta' fondi proprji għar-riskju operazzjonali, jenħtieġ li dik id-diskrezzjoni tiġi eżerċitata b'mod armonizzat għar-rekwiżiti minimi ta' fondi proprji billi tiġi injorata d-data storika operazzjonali tat-telf għall-istituzzjonijiet kollha.

(47)

Meta jiġu kkalkulati r-rekwiżiti ta' fondi proprji għar-riskju operazzjonali, il-poloz tal-assigurazzjoni jistgħu fil-futur jitħallew jintużaw bħala teknika effettiva ta' mitigazzjoni tar-riskju. Għal dak l-għan, jenħtieġ li l-EBA tirrapporta lill-Kummissjoni dwar jekk huwiex xieraq li l-poloz tal-assigurazzjoni jiġu rikonoxxuti bħala teknika effettiva ta' mitigazzjoni tar-riskju u dwar il-kundizzjonijiet, il-kriterji u l-formula standard li għandhom jintużaw f'każijiet bħal dawn.

(48)

Il-pass straordinarju u bla preċedent tal-issikkar tal-politika monetarja wara l-pandemija tal-COVID-19 jista' jwassal għal livelli sinifikanti ta' volatilità fis-swieq finanzjarji. Flimkien ma' żieda fl-inċertezza li twassal għal żieda fir-rendimenti għad-dejn pubbliku, dan jista', min-naħa tiegħu, iwassal għal telf mhux realizzat għal holdings ta' dejn pubbliku ta' ċerti istituzzjonijiet. Sabiex jittaffa l-impatt negattiv konsiderevoli tal-volatilità fis-swieq tad-dejn tal-gvernijiet ċentrali fuq il-fondi proprji tal-istituzzjonijiet u b'hekk fuq il-kapaċità tal-istituzzjonijiet li jsellfu, jenħtieġ li jiġi introdott mill-ġdid filtru prudenzjali temporanju li jinnewtralizza parzjalment dak l-impatt.

(49)

Il-finanzjament pubbliku permezz tal-ħruġ ta' bonds tal-gvern denominati fil-munita domestika ta' Stat Membru ieħor jista' jkompli jkun meħtieġ biex jappoġġa miżuri pubbliċi biex jiġu miġġielda l-konsegwenzi tax-xokk ekonomiku qawwi u doppju kkawżat mill-pandemija tal-COVID-19 u l-gwerra ta' aggressjoni tar-Russja kontra l-Ukrajna. Sabiex jiġu evitati restrizzjonijiet fuq istituzzjonijiet li jinvestu f'tali bonds, huwa xieraq li jiġi introdott mill-ġdid l-arranġament tranżitorju għal skoperturi għal gvernijiet ċentrali jew banek ċentrali meta dawk l-iskoperturi jkunu denominati fil-munita domestika ta' Stat Membru ieħor għall-finijiet tat-trattament ta' tali skoperturi skont il-qafas tar-riskju ta' kreditu.

(50)

Ir-Regolament (UE) 2019/630 tal-Parlament Ewropew u tal-Kunsill (11) introduċa rekwiżit għal kopertura minima għat-telf għal skoperturi improduttivi (NPEs), l-hekk imsejħa garanzija ta' kontinġenza prudenzjali. Il-miżura kellha l-għan li tevita l-bini mill-ġdid ta' skoperturi improduttivi miżmuma mill-istituzzjonijiet, filwaqt li, fl-istess ħin, tippromwovi l-ġestjoni proattiva tal-NPEs billi ttejjeb l-effiċjenza tal-proċedimenti ta' ristrutturar jew infurzar tal-istituzzjonijiet. F'dak l-isfond, jenħtieġ li jiġu applikati xi bidliet immirati għall-NPEs garantiti minn aġenziji ta' kreditu għall-esportazzjoni jew garanti pubbliċi. Barra minn hekk, jenħtieġ li ċerti istituzzjonijiet li jissodisfaw kundizzjonijiet stretti u li huma speċjalizzati fl-akkwist tal-NPEs jiġu esklużi mill-applikazzjoni tal-garanzija ta' kontinġenza prudenzjali.

(51)

Jenħtieġ li l-informazzjoni dwar l-ammont u l-kwalità tal-iskoperturi produttivi, improduttivi u mrażżna, kif ukoll analiżi tal-maturazzjoni tal-kontabilizzazzjoni tal-iskoperturi skaduti jiġu ddivulgati wkoll minn istituzzjonijiet żgħar u mhux kumplessi elenkati u minn istituzzjonijiet oħrajn. Dak l-obbligu ta' divulgazzjoni ma joħloqx piż addizzjonali fuq dawk l-istituzzjonijiet, peress li d-divulgazzjoni ta' tali sett limitat ta' informazzjoni diġà ġiet implimentata mill-EBA abbażi tal-Pjan ta' Azzjoni tal-Kunsill tal-2017 biex jiġi indirizzat is-self improduttiv fl-Ewropa, li stieden lill-EBA ttejjeb ir-rekwiżiti ta' divulgazzjoni dwar il-kwalità tal-assi u s-self improduttiv għall-istituzzjonijiet kollha. Dak l-obbligu ta' divulgazzjoni huwa wkoll għalkollox konsistenti mal-komunikazzjoni tal-Kummissjoni tas-16 ta' Diċembru 2020 intitolata “L-indirizzar ta' self improduttiv wara l-pandemija tal-COVID-19”.

(52)

Huwa neċessarju li jitnaqqas il-piż regolatorju għal skopijiet ta' divulgazzjoni u li tittejjeb il-komparabbiltà tad-divulgazzjonijiet. Għalhekk, jenħtieġ li l-EBA tistabbilixxi pjattaforma ċentralizzata bbażata fuq il-web li tippermetti d-divulgazzjoni tal-informazzjoni u d-data ppreżentati mill-istituzzjonijiet. Jenħtieġ li dik il-pjattaforma ċentralizzata fuq il-web isservi bħala punt uniku ta' aċċess għad-divulgazzjonijiet tal-istituzzjonijiet, filwaqt li jenħtieġ li s-sjieda tal-informazzjoni u tad-data u r-responsabbiltà għall-akkuratezza tagħhom jibqgħu f'idejn l-istituzzjonijiet li jipproduċuhom. Jenħtieġ li ċ-ċentralizzazzjoni tal-pubblikazzjoni tal-informazzjoni divulgata tkun għalkollox konformi mal-pjan ta' azzjoni tal-unjoni tas-swieq kapitali. Barra minn hekk, jenħtieġ li dik il-pjattaforma ċentralizzata fuq il-web tkun interoperabbli mal-punt ta' aċċess uniku Ewropew.

(53)

Sabiex tippermetti integrazzjoni akbar tar-rapportar superviżorju u tad-divulgazzjonijiet, jenħtieġ li l-EBA tippubblika d-divulgazzjonijiet tal-istituzzjonijiet b'mod ċentralizzat, filwaqt li tirrispetta d-dritt tal-istituzzjonijiet kollha li jippubblikaw id-data u l-informazzjoni huma stess. Jenħtieġ li tali divulgazzjonijiet ċentralizzati jippermettu lill-EBA tippubblika d-divulgazzjonijiet ta' istituzzjonijiet żgħar u mhux kumplessi, abbażi tal-informazzjoni rrapportata minn dawk l-istituzzjonijiet lill-awtoritajiet kompetenti u, għalhekk, jenħtieġ li jnaqqsu b'mod sinifikanti l-piż amministrattiv li għalih huma soġġetti l-istituzzjonijiet żgħar u mhux kumplessi. Fl-istess ħin, jenħtieġ li ċ-ċentralizzazzjoni tad-divulgazzjonijiet ma jkollha l-ebda impatt fuq l-ispejjeż għal istituzzjonijiet oħrajn, u żżid it-trasparenza u tnaqqas l-ispiża tal-aċċess għall-informazzjoni prudenzjali għall-parteċipanti fis-suq. Jenħtieġ li tali trasparenza miżjuda tiffaċilita l-komparabbiltà tad-data fost l-istituzzjonijiet u tippromwovi d-dixxiplina fis-suq.

(54)

Il-kisba tal-ambizzjonijiet ambjentali u klimatiċi tal-Patt Ekoloġiku Ewropew stipulati fil-komunikazzjoni tal-Kummissjoni tal-11 ta' Diċembru 2019 u l-kontribut għall-Aġenda 2030 għall-Iżvilupp Sostenibbli tan-Nazzjonijiet Uniti jirrikjedu li ammonti kbar ta' investimenti mis-settur privat jiġu diretti lejn investimenti sostenibbli fl-Unjoni. Jenħtieġ li r-Regolament (UE) Nru 575/2013 jirrifletti l-importanza tal-fatturi ambjentali, soċjali u ta' governanza (ESG) u fehim sħiħ tar-riskji tal-iskoperturi għal attivitajiet li huma marbuta mas-sostenibbiltà ġenerali jew mal-objettivi ESG. Sabiex jiġu żgurati l-konverġenza madwar l-Unjoni u fehim uniformi tal-fatturi ESG, jenħtieġ li jiġu stabbiliti definizzjonijiet ġenerali. Il-fatturi ESG jistgħu jkollhom impatt pożittiv jew negattiv fuq il-prestazzjoni finanzjarja jew is-solvenza ta' entità, kemm jekk sovrana jew inkella individwali. Eżempji komuni ta' fatturi ESG jinkludu l-emissjonijiet ta' gassijiet serra, il-bijodiversità u l-użu u l-konsum tal-ilma fil-qasam tal-ambjent; id-drittijiet tal-bniedem, u kunsiderazzjonijiet tax-xogħol u tal-forza tax-xogħol fil-qasam soċjali; u d-drittijiet u r-responsabbiltajiet tal-membri għolja tal-persunal u r-remunerazzjoni fil-qasam tal-governanza. Jenħtieġ li l-assi jew l-attivitajiet soġġetti għall-impatt ta' fatturi ambjentali jew soċjali jiġu definiti b'referenza għall-ambizzjoni tal-Unjoni li ssir newtrali għall-klima sal-2050 kif stabbilit fir-Regolament (UE) 2021/1119tal-Parlament Ewropew u tal-Kunsill (12) Regolament tal-Parlament Ewropew u tal-Kunsilldwar ir-restawr tan-natura u li jemenda r-Regolament (UE) 2022/869, u l-għanijiet ta' sostenibbiltà rilevanti tal-Unjoni. Jenħtieġ li l-kriterji tekniċi ta' skrinjar fir-rigward tal-prinċipju “la tagħmilx ħsara sinifikanti” adottat f'konformità mar-Regolament (UE) 2020/852 tal-Parlament Ewropew u tal-Kunsill (13), kif ukoll atti legali speċifiċi tal-Unjoni biex jiġi evitat it-tibdil fil-klima, id-degradazzjoni ambjentali u t-telf tal-bijodiversità jintużaw biex jiġu identifikati assi jew skoperturi għall-fini tal-valutazzjoni ta' trattamenti prudenzjali dedikati u differenzjali tar-riskju.

(55)

L-iskoperturi għar-riskji ESG mhumiex neċessarjament proporzjonali għad-daqs u l-kumplessità ta' istituzzjoni. Il-livelli ta' skoperturi għar-riskji ESG madwar l-Unjoni huma wkoll pjuttost eteroġeni, b'xi Stati Membri juru impatt tranżitorju ħafif potenzjali u oħrajn juru impatt tranżitorju għoli potenzjali fuq l-iskoperturi relatati ma' attivitajiet li għandhom impatt negattiv sinifikanti, b'mod partikolari fuq l-ambjent. Ir-rekwiżiti ta' trasparenza li l-istituzzjonijiet huma soġġetti għalihom u r-rekwiżiti ta' divulgazzjoni fir-rigward tas-sostenibbiltà stabbiliti f'atti legali eżistenti oħra tal-Unjoni ser jipprovdu data aktar granulari fi ftit snin. Madankollu, sabiex jiġu vvalutati kif xieraq ir-riskji ESG li l-istituzzjonijiet jistgħu jiffaċċaw, huwa imperattiv li s-swieq u l-awtoritajiet kompetenti jiksbu data adegwata mill-entitajiet kollha esposti għal dawk ir-riskji. Jenħtieġ li l-istituzzjonijiet ikunu f'pożizzjoni li jidentifikaw u jiżguraw b'mod sistematiku trasparenza adegwata fir-rigward tal-iskoperturi tagħhom għal attivitajiet li jitqiesu li jagħmlu ħsara sinifikanti lil wieħed mill-objettivi ambjentali skont it-tifsira tar-Regolament (UE) 2020/852. Sabiex jiġi żgurat li l-awtoritajiet kompetenti jkollhom għad-dispożizzjoni tagħhom data li tkun granulari, komprensiva u komparabbli għal finijiet ta' superviżjoni effettiva, jenħtieġ li l-informazzjoni dwar l-iskoperturi għar-riskji ESG tiġi inkluża fir-rapportar superviżorju tal-istituzzjonijiet. Sabiex tiġi garantita trasparenza komprensiva għas-swieq, jenħtieġ li d-divulgazzjonijiet tar-riskji ESG jiġu estiżi wkoll għall-istituzzjonijiet kollha. Jenħtieġ li l-granularità ta' dik l-informazzjoni tkun konsistenti mal-prinċipju tal-proporzjonalità, filwaqt li jitqiesu d-daqs u l-kumplessità tal-istituzzjoni konċernata u tal-materjalità tal-iskoperturi tagħha għar-riskji ESG. Meta tirrevedi l-istandards tekniċi ta' implimentazzjoni fir-rigward tad-divulgazzjoni tar-riskji ESG, jenħtieġ li l-EBA tivvaluta l-mezzi biex ittejjeb id-divulgazzjonijiet tar-riskji ESG tal-aggregazzjonijiet ta' kopertura ta' bonds koperti u tikkunsidra jekk l-informazzjoni dwar l-iskoperturi rilevanti tal-aggregazzjonijiet ta' self sottostanti għal bonds koperti maħruġa minn istituzzjonijiet, kemm direttament kif ukoll permezz tat-trasferiment ta' self lil entità bi skop speċjali, jenħtieġx li jew tiġi inkluża fl-istandards tekniċi ta' implimentazzjoni riveduti jew inkella fil-qafas regolatorju u ta' divulgazzjoni għall-bonds koperti.

(56)

Hekk kif it-tranżizzjoni tal-ekonomija tal-Unjoni lejn mudell ekonomiku sostenibbli żżid il-momentum, ir-riskji għas-sostenibbiltà jsiru aktar prominenti u potenzjalment jeħtieġu aktar kunsiderazzjoni. Jenħtieġ li valutazzjoni xierqa tad-disponibbiltà u l-aċċessibbiltà ta' data ESG affidabbli u konsistenti tifforma l-bażi għall-istabbiliment ta' rabta sħiħa bejn il-motivaturi tar-riskju ESG u l-kategoriji tradizzjonali ta' riskji finanzjarji u settijiet ta' skoperturi. Jenħtieġ li l-ESMA tikkontribwixxi wkoll għal dak il-ġbir ta' evidenza billi tirrapporta dwar jekk ir-riskji ESG humiex riflessi b'mod xieraq fil-klassifikazzjonijiet tar-riskju ta' kreditu tal-kontropartijiet jew fl-iskoperturi li l-istituzzjonijiet jista' jkollhom. F'kuntest ta' żviluppi rapidi u kontinwi madwar l-identifikazzjoni u l-kwantifikazzjoni tar-riskji ESG kemm mill-istituzzjonijiet kif ukoll mis-superviżuri, huwa meħtieġ ukoll li titressaq 'il quddiem għad-data tad-dħul fis-seħħ ta' dan ir-Regolament parti mill-mandat tal-EBA biex jiġi vvalutat u rrapportat dwar jekk ikunx ġustifikat trattament prudenzjali dedikat ta' skoperturi relatati ma' assi jew attivitajiet sostanzjalment assoċjati ma' objettivi ambjentali jew soċjali. Il-mandat eżistenti tal-EBA jenħtieġ li jinqasam f'sensiela ta' rapporti minħabba t-tul u l-kumplessità tal-ħidma ta' valutazzjoni li għandha titwettaq. Għalhekk, jenħtieġ li jitħejjew żewġ rapporti suċċessivi u annwali tal-EBA sa tmiem l-2024 u l-2025, rispettivament. Skont l-Aġenzija Internazzjonali tal-Enerġija, biex jintlaħaq l-objettiv tan-newtralità karbonika sal-2050, ma tista' sseħħ l-ebda esplorazzjoni u espansjoni ġdida tal-fjuwils fossili. Dak ifisser li l-iskoperturi għall-fjuwils fossili huma suxxettibbli li jirrappreżentaw riskju ogħla kemm fil-livell mikro, peress li l-valur ta' tali assi huwa mistenni li jonqos maż-żmien, kif ukoll fil-livell makro, peress li l-finanzjament tal-attivitajiet tal-fjuwils fossili jipperikola l-objettiv li ż-żieda fit-temperatura globali tiġi limitata għal 1.5 C il fuq mil-livelli preindustrijali u għalhekk jhedded l-istabbiltà finanzjarja. Għalhekk, jenħtieġ li l-awtoritajiet kompetenti u l-parteċipanti fis-suq jibbenefikaw minn trasparenza akbar mill-istituzzjonijiet dwar l-iskoperturi tagħhom lejn entitajiet tas-settur tal-fjuwils fossili, inkluż l-attività tagħhom fir-rigward tas-sorsi tal-enerġija rinnovabbli.

(57)

Sabiex jiġi żgurat li kwalunkwe aġġustament għall-iskoperturi għall-infrastruttura ma jimminax l-ambizzjonijiet klimatiċi tal-Unjoni, skoperturi ġodda jiksbu l-iskont tal-piż tar-riskju biss meta l-assi li jkunu qed jiġu ffinanzjati jikkontribwixxu b'mod pożittiv għal wieħed jew aktar mill-objettivi ambjentali stabbiliti fir-Regolament (UE) 2020/852 u ma jagħmlux ħsara sinifikanti lill-objettivi l-oħra stabbiliti f'dak ir-Regolament, jew l-assi li jkunu qed jiġu ffinanzjati ma jagħmlux ħsara sinifikanti lil xi wieħed mill-objettivi ambjentali stabbiliti f'dak ir-Regolament.

(58)

Huwa essenzjali għas-superviżuri li jkollhom is-setgħat neċessarji biex jivvalutaw u jikkalkolaw b'mod komprensiv ir-riskji li għalihom grupp bankarju jkun skopert f'livell konsolidat u li jkollhom il-flessibbiltà li jadattaw l-approċċi superviżorji tagħhom għal sorsi ġodda ta' riskju. Huwa importanti li jiġu evitati lakuni bejn il-konsolidazzjoni prudenzjali u kontabilistika li jistgħu jwasslu għal tranżazzjonijiet li għandhom l-għan li joħorġu assi mill-ambitu tal-konsolidazzjoni prudenzjali, anki jekk jibqgħu riskji fil-grupp bankarju. In-nuqqas ta' koerenza fid-definizzjonijiet ta' “impriża prinċipali”, “sussidjarja” u “kontroll”, u n-nuqqas ta' ċarezza fid-definizzjoni ta' “impriża ta' servizzi anċillari”, “kumpanija azzjonarja finanzjarja” u ta' “istituzzjoni finanzjarja” jagħmluha aktar diffiċli għas-superviżuri biex japplikaw ir-regoli applikabbli b'mod konsistenti fl-Unjoni u biex jidentifikaw u jindirizzaw kif xieraq ir-riskji f'livell konsolidat. Għalhekk, jenħtieġ li dawn id-definizzjonijiet jiġu emendati u ċċarati aktar. Barra minn hekk, huwa meqjus xieraq li l-EBA tinvestiga aktar jekk dawk is-setgħat tas-superviżuri jistgħux ikunu limitati b'mod mhux intenzjonat minn xi diskrepanza jew lakuna li jifdal fid-dispożizzjonijiet regolatorji jew fl-interazzjoni tagħhom mal-qafas kontabilistiku applikabbli.

(59)

Is-swieq fil-kriptoassi kibru b'mod rapidu f'dawn l-aħħar snin. Sabiex jiġu indirizzati r-riskji potenzjali għall-istituzzjonijiet ikkawżati mill-iskoperturi tagħhom għall-kriptoassi li mhumiex koperti biżżejjed mill-qafas prudenzjali eżistenti, f'Diċembru 2022 il-BCBS ippubblika standard komprensiv għat-trattament prudenzjali tal-iskoperturi għall-kriptoassi. Id-data rakkomandata tal-applikazzjoni ta' dak l-istandard hija l-1 ta' Jannar 2025, iżda xi elementi tekniċi tal-istandard kienu qed jiġu żviluppati aktar fil-livell tal-BCBS matul l-2023 u l-2024. Fid-dawl tal-iżviluppi li għaddejjin fis-swieq fil-kriptoassi u filwaqt li tiġi rikonoxxuta l-importanza tal-implimentazzjoni sħiħa tal-istandards ta' Basel dwar l-iskoperturi tal-istituzzjonijiet għall-kriptoassi fil-liġi tal-Unjoni, jenħtieġ li l-Kummissjoni tippreżenta proposta leġiżlattiva sat-30 ta' Ġunju 2025 biex timplimenta dak l-istandard, u jenħtieġ li tispeċifika t-trattament prudenzjali applikabbli għal dawk l-iskoperturi matul il-perjodu tranżitorju sal-implimentazzjoni ta’ dak l-istandard. It-trattament prudenzjali tranżizzjonali jenħtieġ li jqis il-qafas legali introdott bir-Regolament (UE) 2023/1114 tal-Parlament Ewropew u tal-Kunsill (14) għall-emittenti tal-kriptoassi u jispeċifika trattament prudenzjali ta' dawk il-kriptoassi. Għalhekk, matul il-perjodu tranżitorju, jenħtieġ li l-assi tradizzjonali tokenizzati, inkluż tokens tal-flus elettroniċi, jiġu rikonoxxuti bħala li jinvolvu riskji simili għall-assi tradizzjonali u għall-kriptoassi konformi ma' dak ir-Regolament u jenħtieġ li r-referenzjar ta' assi tradizzjonali għajr munita ta' kors legali waħda jibbenefika minn trattament prudenzjali konsistenti mar-rekwiżiti ta' dak ir-Regolament. L-iskoperturi għal kriptoassi oħra, inkluż derivattivi tokenizzati fuq kriptoassi differenti minn dawk li jikkwalifikaw għat-trattament kapitali aktar favorevoli, jenħtieġ li jiġu assenjati piż tar-riskju ta' 1 250 %.

(60)

In-nuqqas ta' ċarezza ta' ċerti aspetti tal-qafas tal-minimi tat-telf għal tranżazzjonijiet li jiffinanzjaw it-titoli, żviluppat mill-BCBS bħala parti mill-qafas finalizzat ta' Basel III, kif ukoll riżervi dwar il-ġustifikazzjoni ekonomika tal-applikazzjoni tiegħu għal ċerti tipi ta' tranżazzjonijiet li jiffinanzjaw it-titoli, qajmu l-kwistjoni dwar jekk l-objettivi prudenzjali ta' dak il-qafas jistgħux jintlaħqu mingħajr ma jinħolqu konsegwenzi mhux mixtieqa. Għalhekk, jenħtieġ li l-Kummissjoni tivvaluta mill-ġdid l-implimentazzjoni tal-qafas tal-minimi tat-telf għal tranżazzjonijiet li jiffinanzjaw it-titoli fil-liġi tal-Unjoni. Sabiex tipprovdi lill-Kummissjoni b'evidenza suffiċjenti, jenħtieġ li l-EBA, f'kooperazzjoni mill-qrib mal-ESMA, tirrapporta lill-Kummissjoni dwar l-impatt ta' dak il-qafas, u dwar l-aktar approċċ xieraq għall-implimentazzjoni tiegħu fil-liġi tal-Unjoni.

(61)

Skont il-qafas finalizzat ta' Basel III, in-natura b'terminu qasir ħafna tat-tranżazzjonijiet li jiffinanzjaw it-titoli tista' ma tkunx riflessa sew fl-SA-CR, li jwassal biex rekwiżiti ta' fondi proprji kkalkulati skont dak l-approċċ jistgħu jkunu eċċessivament ogħla mir-rekwiżiti ta' fondi proprji kkalkulati skont l-Approċċ IRB. B'riżultat ta' dan, u anki minħabba l-introduzzjoni tal-minimu tal-output, ir-rekwiżiti ta' fondi proprji kkalkulati għal dawk l-iskoperturi jistgħu jiżdiedu b'mod sinifikanti, u jaffettwaw il-likwidità tas-swieq tad-dejn u tat-titoli, inkluż is-swieq tad-dejn sovran. Għalhekk, jenħtieġ li l-EBA tirrapporta dwar l-adegwatezza u l-impatt tal-istandards tar-riskju ta' kreditu għal tranżazzjonijiet li jiffinanzjaw it-titoli, u speċifikament jekk aġġustament tal-SA-CR għal dawk l-iskoperturi jkunx iġġustifikat biex jirrifletti n-natura tagħhom b'terminu qasir.

(62)

Jenħtieġ li l-Kummissjoni timplimenta fil-liġi tal-Unjoni l-istandards riveduti ta' Basel III dwar ir-rekwiżiti ta' fondi proprji għar-riskju ta' aġġustament tal-valwazzjoni tal-kreditu (CVA), ippubblikati mill-BCBS f'Lulju 2020, peress li dawk l-istandards b'mod ġenerali jtejbu l-kalkolu tar-rekwiżiti ta' fondi proprji għar-riskju ta' CVA billi jindirizzaw diversi kwistjonijiet osservati qabel, b'mod partikolari li l-qafas eżistenti tar-rekwiżiti ta' fondi proprji ta' CVA jonqos milli jkopri b'mod xieraq ir-riskju ta' CVA.

(63)

Meta ġew implimentati l-istandards inizjali ta' Basel III dwar it-trattament tar-riskju ta' CVA fil-liġi tal-Unjoni, ċerti tranżazzjonijiet ġew eżentati mill-kalkolu tar-rekwiżiti ta' fondi proprji għar-riskju ta' CVA. Dawk l-eżenzjonijiet ġew miftiehma sabiex tiġi evitata żieda potenzjalment eċċessiva fil-kost ta' xi tranżazzjonijiet ta' derivattivi skattati mill-introduzzjoni tar-rekwiżiti ta' fondi proprji għar-riskju ta' CVA, b'mod partikolari meta l-istituzzjonijiet ma setgħux jimmitigaw ir-riskju ta' CVA ta' ċerti klijenti li ma setgħux jiskambjaw kollateral. Skont l-impatt stmat ikkalkulat mill-EBA, ir-rekwiżiti ta' fondi proprji għar-riskju ta' CVA skont l-istandards riveduti ta' Basel III jibqgħu għoljin wisq għal tranżazzjonijiet eżentati ma' dawk il-klijenti. Sabiex jiġi żgurat li dawk il-klijenti jkomplu jiħħeġġjaw ir-riskji finanzjarji tagħhom permezz ta' tranżazzjonijiet ta' derivattivi, jenħtieġ li l-eżenzjonijiet jinżammu meta jiġu implimentati l-istandards riveduti ta' Basel III.

(64)

Madankollu, ir-riskju attwali ta' CVA tat-tranżazzjonijiet eżentati jista' jkun sors ta' riskju sinifikanti għall-istituzzjonijiet li japplikaw dawk l-eżenzjonijiet. Jekk dawk ir-riskji jimmaterjalizzaw, l-istituzzjonijiet ikkonċernati jistgħu jġarrbu telf sinifikanti. Kif enfasizzat l-EBA fir-rapport tagħha dwar is-CVA tal-25 ta' Frar 2015, ir-riskju ta' CVA tat-tranżazzjonijiet eżentati jqajjem tħassib prudenzjali li mhuwiex indirizzat fir-Regolament (UE) Nru 575/2013. Sabiex jgħinu lis-superviżuri jimmonitorjaw ir-riskju ta' CVA li jinħoloq mit-tranżazzjonijiet eżentati, jenħtieġ li l-istituzzjonijiet jirrapportaw il-kalkolu tar-rekwiżiti ta' fondi propji għar-riskju ta' CVA tat-tranżazzjonijiet eżentati li jkunu meħtieġa jekk dawk it-tranżazzjonijiet ma jkunux eżentati. Barra minn hekk, jenħtieġ li l-EBA tiżviluppa linji gwida li jgħinu lis-superviżuri jidentifikaw riskju eċċessiv ta' CVA u jtejbu l-armonizzazzjoni tal-azzjonijiet superviżorji f'dak il-qasam madwar l-Unjoni.

(65)

Jenħtieġ li l-Kummissjoni tingħata s-setgħa li tadotta l-istandards tekniċi regolatorji żviluppati mill-EBA fir-rigward tal-indikaturi għad-determinazzjoni taċ-ċirkostanzi straordinarji għal aġġustamenti fil-valur addizzjonali; il-metodu biex jiġi speċifikat il-motivatur ewlieni tar-riskju għal pożizzjoni u jekk hijiex pożizzjoni twila jew qasira; il-proċess għall-kalkolu u l-monitoraġġ ta' pożizzjonijiet qosra netti ta' kreditu jew qosra netti ta' ekwità fil-portafoll mhux tan-negozjar; it-trattament tal-ħeġġijiet tar-riskju tal-kambju tal-proporzjonijiet kapitali; il-kriterji li għandhom jintużaw mill-istituzzjonijiet biex jassenjaw elementi li ma jidhrux fil-karta tal-bilanċ; il-kriterji għal finanzjament ta' proġetti ta’ kwalità għolja u għal skoperturi ta’ finanzjament ta’ oġġetti fil-kuntest ta' self speċjalizzat li għalih ma tkunx disponibbli valutazzjoni tal-kreditu direttament applikabbli; it-tipi ta' fatturi li għandhom jiġu kkunsidrati għall-valutazzjoni tal-adegwatezza tal-piżijiet tar-riskju; it-terminu “mekkaniżmu legali ekwivalenti fis-seħħ biex jiġi żgurat li l-proprjetà li tkun għadha qed tinbena titlesta f'perjodu ta' żmien raġonevoli”; il-kundizzjonijiet għall-valutazzjoni tal-materjalità tal-użu ta' sistema ta' klassifikazzjoni eżistenti; il-metodoloġija ta' valutazzjoni għall-konformità mar-rekwiżiti għall-użu tal-Approċċ IRB; il-kategorizzazzjoni tal-finanzjament tal-proġetti, il-finanzjament ta' oġġetti u l-finanzjament tal-komoditajiet; speċifikazzjoni ulterjuri tal-klassijiet tal-iskoperturi skont l-Approċċ IRB; il-fatturi għal self speċjalizzat; il-kalkolu tal-ammonti tal-iskoperturi ponderati għar-riskju għal riskji ta' dilwizzjoni ta' riċevibbli mixtrija; il-valutazzjoni tal-integrità tal-proċess ta' assenjazzjoni; il-metodoloġija ta' istituzzjoni għall-istima tal-probabbiltà ta' inadempjenza; il-proprjetà komparabbli; id-delta superviżorja tal-opzjonijiet ta' xiri u ta' put; il-komponenti tal-indikatur tan-negozju; l-aġġustament tal-indikatur tan-negozju; id-definizzjoni ta' piż bla bżonn fil-kuntest tal-kalkolu tat-telf annwali mir-riskji operazzjonali; it-tassonomija tar-riskju tar-riskju operazzjonali; il-valutazzjoni tal-awtoritajiet kompetenti tal-komputazzjoni tat-telf annwali mir-riskji operazzjonali; l-aġġustamenti għad-data dwar it-telf; il-ġestjoni tar-riskju operazzjonali; il-kalkolu tar-rekwiżiti ta' fondi proprji għar-riskju tas-suq għal pożizzjonijiet tal-portafoll mhux tan-negozjar li huma soġġetti għal riskju tal-kambju jew riskju tal-komoditajiet; il-metodoloġija ta' valutazzjoni għall-awtoritajiet kompetenti għall-approċċ standardizzat alternattiv; il-portafolli tan-negozjar tal-impriża ta' investiment kollettiv; il-kriterji għad-deroga supplimentari għar-riskju residwu; il-kundizzjonijiet u l-indikaturi użati biex jiġi ddeterminat jekk seħħewx ċirkostanzi straordinarji; il-kriterji għall-użu tal-inputs tad-data fil-mudell tal-kejl tar-riskju; il-kriterji għall-valutazzjoni tal-mudellabbiltà tal-fatturi tar-riskju; il-kundizzjonijiet u l-kriterji li skonthom istituzzjoni tista' titħalla ma tgħoddx qbiż fil-valur; il-kriterji li jispeċifikaw jekk il-bidliet teoretiċi fil-valur ta' portafoll tal-post tan-negozjar humiex qrib jew qrib biżżejjed tal-bidliet ipotetiċi; il-kundizzjonijiet u l-kriterji għall-valutazzjoni tar-riskju ta' CVA li jirriżulta minn tranżazzjonijiet li jiffinanzjaw it-titoli b'valur ġust; il-firxiet ta' approssimazzjoni indiretta; il-valutazzjoni tal-estensjonijiet u l-bidliet fl-approċċ standardizzat għar-riskju ta' CVA; u l-elementi tekniċi meħtieġa biex l-istituzzjonijiet jikkalkulaw ir-rekwiżiti ta' fondi proprji tagħhom fir-rigward ta' ċerti kriptoassi. Jenħtieġ li l-Kummissjoni tadotta l-istandards tekniċi regolatorji permezz ta' atti delegati skont l-Artikolu 290 TFUE u f'konformità mal-Artikoli 10 sa 14 tar-Regolament (UE) Nru 1093/2010.

(66)

Jenħtieġ li l-Kummissjoni tingħata s-setgħa li tadotta l-istandards tekniċi ta' implimentazzjoni żviluppati mill-EBA fir-rigward tal-proċess ta' deċiżjoni konġunta għall-Approċċ IRB ippreżentat mill-istituzzjonijiet prinċipali tal-UE, il-kumpaniji azzjonarji finanzjarji prinċipali tal-UE u l-kumpaniji azzjonarji finanzjarji mħallta prinċipali tal-UE; l-entrati tal-indikatur tan-negozju billi dawk l-entrati jiġu mmappjati maċ-ċelloli ta' rapportar ikkonċernati; formati ta' divulgazzjoni uniformi, l-istruzzjonijiet assoċjati, l-informazzjoni dwar il-politika tas-sottomissjoni mill-ġdid u s-soluzzjonijiet tal-IT għad-divulgazzjonijiet; u divulgazzjonijiet ESG. Jenħtieġ li l-Kummissjoni tadotta dawk l-istandards tekniċi ta' implimentazzjoni, permezz ta' atti ta' implimentazzjoni skont l-Artikolu 291 TFUE u f'konformità mal-Artikolu 15 tar-Regolament (UE) Nru 1093/2010.

(67)

Minħabba li l-objettiv ta' dan ir-Regolament, jiġifieri li jiġu żgurati rekwiżiti prudenzjali uniformi li japplikaw għall-istituzzjonijiet fl-Unjoni kollha, ma jistax jinkiseb b'mod suffiċjenti mill-Istati Membri iżda jista' pjuttost, minħabba l-iskala u l-effetti tiegħu, jinkiseb aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F'konformità mal-prinċipju ta’ proporzjonalità, kif stabbilit f'dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-objettiv.

(68)

Għalhekk, jenħtieġ li r-Regolament (UE) Nru 575/2013 jiġi emendat skont dan,

(1)

l-Artikolu 4 huwa emendat kif ġej:

(2)

l-Artikolu 5 huwa emendat kif ġej:

(3)

jiddaħħal l-artikolu li ġej:

(*8)  Ir-Regolament (UE) 2023/1114 tal-Parlament Ewropew u tal-Kunsill tal-31 ta' Mejju 2023 dwar is-swieq fil-kriptoassi, u li jemenda r-Regolamenti (UE) Nru 1093/2010 u (UE) Nru 1095/2010 u d-Direttivi 2013/36/UE u (UE) 2019/1937 (ĠU L 150, 9.6.2023, p. 40)."

(*9)  d-Direttiva 2014/49/UE tal-Parlament Ewropew u tal-Kunsill tas-16 ta' April 2014 dwar skemi ta' garanzija tad-depożiti (ĠU L 173, 12.6.2014, p. 149)."

(*10)  Id-Direttiva (UE) 2016/2341 tal-Parlament Ewropew u tal-Kunsill tal-14 ta' Diċembru 2016 dwar l-attivitajiet u s-superviżjoni ta' istituzzjonijiet għall-provvista ta' rtirar okkupazzjonali (IORPs) (ĠU L 354, 23.12.2016, p. 37)."

(*11)  Ir-Regolament (UE) 2019/1238 tal-Parlament Ewropew u tal-Kunsill tal-20 ta' Ġunju 2019 dwar Prodott tal-Pensjoni Personali Pan-Ewropew (PEPP) (ĠU L 198, 25.7.2019, p. 1)."

(*12)  Ir-Regolament (KE) Nru 883/2004 tal-Parlament Ewropew u tal-Kunsill tad-29 ta' April 2004 dwar il-kordinazzjoni ta' sistemi ta' sigurtà soċjali (ĠU L 166, 30.4.2004, p. 1)."

(*13)  Ir-Regolament (KE) Nru 987/2009 tal-Parlament Ewropew u tal-Kunsill tas-16 ta' Settembru 2009 li jistabbilixxi l-proċedura għall-implimentazzjoni tar-Regolament (KE) Nru 883/2004 dwar il-koordinazzjoni tal-iskemi ta' sigurtà soċjali (ĠU L 284, 30.10.2009, p. 1).”;"

(4)

l-Artikolu 10a huwa sostitwit b'dan li ġej:

(5)

fl-Artikolu 13(1), it-tieni subparagrafu huwa sostitwit b'dan li ġej:

“Sussidjarji kbar ta' istituzzjonijiet prinċipali tal-UE għandhom jiddivulgaw l-informazzjoni speċifikata fl-Artikoli 437, 438, 440, 442, 449a, 449b, 450, 451, 451a u 453 fuq bażi individwali jew, fejn applikabbli f'konformità ma' dan ir-Regolament u d-Direttiva 2013/36/UE, fuq bażi subkonsolidata.”

(6)

l-Artikolu 18 huwa emendat kif ġej:

(7)

l-Artikolu 19 huwa emendat kif ġej:

(8)

l-Artikolu 20 huwa emendat kif ġej:

(9)

l-Artikolu 22 huwa sostitwit b'dan li ġej:

(10)

fil-punt (a) tal-Artikolu 27(1), jitħassar il-punt (v);

(11)

l-Artikolu 34 huwa sostitwit b'dan li ġej:

(12)

l-Artikolu 36 huwa emendat kif ġej:

(13)

fl-Artikolu 46(1), il-punt (a), il-punt (ii) huwa sostitwit b'dan li ġej:

;

(14)

l-Artikolu 47c huwa emendat kif ġej:

(15)

fl-Artikolu 48, il-paragrafu 1 huwa emendat kif ġej:

(16)

fl-Artikolu 49, il-paragrafu 4 huwa sostitwit b'dan li ġej:

(17)

fil-punt (a) tal-Artikolu 60(1), il-punt (ii) huwa sostitwit b'dan li ġej:

;

(18)

fl-ewwel paragrafu tal-Artikolu 62, il-punt (d) huwa sostitwit b'dan li ġej:

;

(19)

fil-punt (a) tal-Artikolu 70(1), il-punt (ii) huwa sostitwit b'dan li ġej:

;

(20)

fl-Artikolu 72b(3), l-ewwel subparagrafu, il-formulazzjoni introduttorja hija sostitwita b'dan li ġej:

“Minbarra l-obbligazzjonijiet imsemmija fil-paragrafu 2 ta' dan l-Artikolu, l-awtorità ta' riżoluzzjoni tista' tippermetti li l-obbligazzjonijiet jikkwalifikaw bħala strumenti ta' obbligazzjonijiet eliġibbli sa ammont aggregat li ma jaqbiżx it-3,5 % tal-ammont tal-iskopertura totali tar-riskju kkalkulata f'konformità mal-Artikolu 92(3), sakemm:”

(21)

fil-punt (a) tal-Artikolu 72i(1), il-punt (ii) huwa sostitwit b'dan li ġej:

;

(22)

l-Artikolu 74 huwa sostitwit b'dan li ġej:

(23)

l-Artikolu 84 huwa emendat kif ġej:

(24)

fl-Artikolu 85, il-paragrafu 1 huwa emendat kif ġej:

(25)

fl-Artikolu 87, il-paragrafu 1 huwa emendat kif ġej:

(26)

jiddaħħal l-artikolu li ġej:

(27)

l-Artikolu 89 huwa emendat kif ġej:

(28)

l-Artikolu 92 huwa emendat kif ġej:

(29)

fl-Artikolu 92a(1), il-punt (a) huwa sostitwit b'dan li ġej:

;

(30)

l-Artikolu 94 huwa emendat kif ġej:

(31)

fl-Artikolu 95(2), il-punt (a) huwa sostitwit b'dan li ġej:

;

(32)

fl-Artikolu 96(2), il-punt (a) huwa sostitwit b’dan li ġej:

;

(33)

fl-Artikolu 102, il-paragrafu 4 huwa sostitwit b'dan li ġej:

(34)

l-Artikolu 104 huwa sostitwit b'dan li ġej:

(35)

l-Artikolu 104a huwa emendat kif ġej:

(36)

l-Artikolu 104b huwa emendat kif ġej:

(37)

jiddaħħal l-artikolu li ġej:

(38)

l-Artikolu 106 huwa emendat kif ġej:

(39)

fl-Artikolu 107, il-paragrafi 1, 2 u 3 huma sostitwiti b'dan li ġej:

(40)

l-Artikolu 108 huwa sostitwit b'dan li ġej:

(41)

jiddaħħal l-artikolu li ġej:

(42)

l-Artikolu 111 huwa sostitwit b'dan li ġej:

(43)

l-Artikolu 112 huwa emendat kif ġej:

(44)

l-Artikolu 113 huwa emendat kif ġej:

(45)

l-Artikolu 115 huwa emendat kif ġej:

(46)

l-Artikolu 116 huwa emendat kif ġej:

(47)

fl-Artikolu 117(1), l-ewwel subparagrafu huwa sostitwit b'dan li ġej:

“Skoperturi għal banek multilaterali tal-iżvilupp li mhumiex imsemmija fil-paragrafu 2 u li għalihom tkun disponibbli valutazzjoni tal-kreditu minn ECAI nominata għandhom jiġu assenjati piż tar-riskju f'konformità mat-Tabella 1. Skoperturi għal banek multilaterali tal-iżvilupp li mhumiex imsemmija fil-paragrafu 2 li għalihom ma tkunx disponibbli valutazzjoni tal-kreditu minn ECAI nominata għandhom jiġu assenjati piż tar-riskju ta' 50 %.

Tabella 1

”;

(48)

fl-Artikolu 119, jitħassru l-paragrafi 2 u 3;

(49)

fl-Artikolu 120, il-paragrafi 1 u 2 huma sostitwiti b'dawn li ġejjin:

(50)

l-Artikolu 121 huwa sostitwit b'dan li ġej:

(51)

l-Artikolu 122 huwa emendat kif ġej:

(52)

jiddaħħal l-artikolu li ġej:

(53)

l-Artikolu 123 huwa sostitwit b'dan li ġej:

(54)

jiddaħħal l-artikolu li ġej:

(55)

L-Artikoli 124, 125 u 126 huma sostitwiti b'dan li ġej:

(56)

jiddaħħal l-artikolu li ġej:

(57)

l-Artikolu 127 huwa emendat kif ġej:

(58)

l-Artikolu 128 huwa sostitwit b'dan li ġej:

(59)

l-Artikolu 129 huwa emendat kif ġej: