(1)

Ir-Regolament ta’ Implimentazzjoni tal-Kummissjoni (UE) 2018/2019 (2) jistabbilixxi, abbażi ta’ valutazzjoni preliminari tar-riskju, lista ta’ pjanti, prodotti mill-pjanti u oġġetti oħra ta’ riskju għoli.

(2)

Wara valutazzjoni preliminari, fir-Regolament ta’ Implimentazzjoni (UE) 2018/2019 ġew elenkati b’mod proviżorju 34 ġeneru u speċi waħda ta’ pjanti għat-tħawwil li joriġinaw minn pajjiżi terzi, bħala pjanti ta’ riskju għoli. Dik il-lista tinkludi l-ġeneru Prunus L.

(3)

Fl-4 ta’ Marzu 2020, il-Moldova ressqet talba lill-Kummissjoni għall-esportazzjoni lejn l-Unjoni tal-pjanti għat-tħawwil ta’ Prunus L. li ġejjin: pjanti għat-tħawwil, mingħajr weraq, imlaqqmin, bl-għeruq mikxufin, ta’ mhux aktar minn sentejn, tal-Prunus armeniaca, tal-Prunus avium, tal-Prunus cerasus, tal-Prunus domestica, tal-Prunus dulcis, tal-Prunus persica, u tal-Prunus salicina, b’dijametru massimu ta’ 17 mm fil-bażi taz-zokk, u salvaġġ mingħajr weraq, bl-għeruq mikxufin, ta’ mhux aktar minn sentejn, tal-Prunus armeniaca, tal-Prunus avium, tal-Prunus canescens, tal-Prunus cerasifera, tal-Prunus cerasus, tal-Prunus davidiana, tal-Prunus domestica, tal-Prunus dulcis, tal-Prunus fontanesiana, tal-Prunus persica, tal-Prunus salicina, tal-Prunus tomentosa u ibridi bejn l-ispeċijiet ta’ hawn fuq, b’dijametru massimu ta’ 17 mm fil-bażi taz-zokk, li joriġinaw mill-Moldova (“il-pjanti rilevanti”). Dik it-talba kienet sostnuta mid-dossiers tekniċi rilevanti.

(4)

Fl-1 ta’ Frar 2024, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni xjentifika dwar il-valutazzjoni tar-riskju tal-pjanti rilevanti (3). L-awtorità identifikat l-Erwinia amylovora, il-Xanthomonas arboricola pv. pruni u l-Xiphinema rivesi (popolazzjonijiet mhux tal-UE) bħala pesti rilevanti għal dawk il-pjanti, evalwat il-miżuri ta’ mitigazzjoni tar-riskju deskritti fid-dossier u stmat il-probabbiltà ta’ ħelsien tal-pjanti rilevanti minn dawk il-pesti.

(5)

L-Erwinia amylovora u l-Xanthomonas arboricola pv. pruni huma elenkati kemm bħala pesti tal-kwarantina f’żona protetta kif ukoll bħala pesti rregolati mhux tal-kwarantina fl-Unjoni fl-Annessi III u IV tar-Regolament ta’ Implimentazzjoni (UE) 2019/2072 (4), rispettivament, filwaqt li l-Xiphinema rivesi (popolazzjonijiet mhux tal-UE) hija elenkata bħala pest tal-kwarantina fl-Unjoni fl-Anness II ta’ dak ir-Regolament.

(6)

Abbażi tal-opinjoni tal-Awtorità, ir-riskju fitosanitarju li jirriżulta mill-introduzzjoni tal-pjanti rilevanti fit-territorju tal-Unjoni jitqies aċċettabbli, dment li jkun hemm konformità mar-rekwiżiti speċjali korrispondenti fl-Annessi VII u X tar-Regolament ta’ Implimentazzjoni (UE) 2019/2072.

(7)

Għalhekk, jenħtieġ li r-Regolament ta’ Implimentazzjoni (UE) 2018/2019 jiġi emendat kif xieraq.

(8)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,