(1)

Cabo Verde huwa pajjiż li jibbenefika mill-arranġament speċjali tal-inċentivi għal żvilupp sostenibbli u governanza tajba previst fl-Artikolu 1(2)(b) tar-Regolament (UE) Nru 978/2012 tal-Parlament Ewropew u tal-Kunsill (2), imsejjaħ is-Sistema Ġeneralizzata ta’ Preferenzi (SĠP+). Ir-regoli dwar l-oriġini preferenzjali għall-finijiet tas-SĠP, minbarra r-regoli proċedurali, huma stabbiliti fir-Regolament Delegat tal-Kummissjoni (UE) 2015/2446 (3).

(2)

Permezz ta’ ittra bid-data tal-14 ta’ Lulju 2023, Cabo Verde ppreżenta talba għal estensjoni tad-derogi temporanji mir-regoli dwar l-oriġini preferenzjali stabbiliti fir-Regolament Delegat (UE) 2015/2446, li kienu ngħataw mir-Regolamenti ta’ Implimentazzjoni tal-Kummissjoni (UE) 2019/561 (4), (UE) 2019/620 (5) u (UE) 2021/966 (6). It-talba kienet tikkonċerna volum annwali ta’ 5 000 tunnellata ta’ fletti u lojns tat-tonn ippreparati jew ippreservati (nejjin, imsajrin u ffriżati), 3 000 tunnellata ta’ fletti tal-kavall ippreparati jew ippreservati u 1 000 tunnellata ta’ fletti tat-tumbrell ippreparati jew ippreservati. Skont id-deroga mitluba, dawn il-prodotti jitqiesu li joriġinaw minn Cabo Verde anki jekk ikunu ġew prodotti minn ħut mhux oriġinarju.

(3)

Cabo Verde sostna t-talba tiegħu għal estensjoni ta’ dawk id-derogi billi bbaża fuq l-argumenti ppreżentati f’talbiet preċedenti, li kollha kemm huma għadhom rilevanti, jiġifieri kwantitajiet baxxi ta’ tonn u kavall maqbuda fl-ilmijiet territorjali tiegħu, opportunitajiet tas-sajd skarsi barra mill-ilmijiet territorjali tiegħu u perjodu limitat tal-istaġun tas-sajd, li jnaqqas l-opportunitajiet li jinqabad ħut oriġinarju. Element importanti ieħor huwa li Cabo Verde żviluppa l-infrastruttura portwarja tiegħu. Minħabba f’hekk, issa jistgħu jiġu ttrattati kwantitajiet ikbar ta’ ħut u għalhekk, l-industrija tas-sajd issa għandha l-opportunità li tikber. Sfortunatament, Cabo Verde ma għandux flotta industrijali li tkun kapaċi sservi l-industrija tas-sajd tiegħu, u lanqas qed jinvesti biżżejjed fil-flotta. Il-kapaċitajiet limitati attwali tal-qbid ta’ ħut oriġinarju ma jippermettix lill-industrija tas-sajd tipproduċi sal-kapaċità massima tagħha. Fl-aħħar nett, it-talba enfasizzat id-diffikultajiet li jħabbat wiċċu magħhom Cabo Verde minħabba d-dewmien tad-dħul fis-seħħ tal-Ftehim ta’ Sħubija Ekonomika bejn l-Unjoni Ewropea u l-Afrika tal-Punent. Cabo Verde qajjem argument li fih jenfasizza l-ħtieġa tiegħu għal deroga mir-regoli SĠP dwar l-oriġini preferenzjali sabiex jikkumpensa għall-fatt li għadu mhux possibbli li wieħed jiddependi fuq il-kwoti tal-oriġini jew ir-regoli tal-akkumulazzjoni skont il-Ftehim ta’ Sħubija Ekonomika li għadu mhux applikat proviżorjament.

(4)

Id-deroga prevista fl-Artikolu 64(6) tar-Regolament (UE) Nru 952/2013 (il-“Kodiċi Doganali tal-Unjoni”) hija ta’ natura temporanja u soġġetta għal konformità mtejba mar-regoli dwar l-oriġini tal-prodotti kkonċernati u mar-rekwiżit dwar il-kooperazzjoni amministrattiva. Sabiex ikun jista’ jiġġestixxi din id-deroga mir-regoli dwar l-oriġini preferenzjali, jenħtieġ li l-pajjiż rikjedenti jikkonforma mar-rekwiżiti fir-rigward tal-informazzjoni dwar l-użu tad-deroga u l-ġestjoni tal-kwantitajiet li għalihom tkun mogħtija d-deroga.

(5)

Madankollu, l-azzjonijiet ta’ monitoraġġ li wettqet il-Kummissjoni matul dawn l-aħħar snin rigward il-konformità ta’ Cabo Verde mar-regoli dwar l-oriġini preferenzjali, il-proċeduri relatati u l-kooperazzjoni amministrattiva mal-Unjoni wrew ċerti nuqqasijiet, b’mod partikolari mar-rekwiżiti rigward il-kooperazzjoni amministrattiva tiegħu mal-awtoritajiet doganali tal-Istati Membri fil-verifika tal-provi tal-oriġini fis-settur tas-sajd.

(6)

Huwa d-dmir tal-Kummissjoni Ewropea li tieħu ħsieb li l-għoti ta’ derogi temporanji xorta waħda jwassal lil Cabo Verde biex jissodisfa l-kundizzjonijiet biex jikkonforma mal-verifika tal-provi tal-oriġini u jirrimedja n-nuqqasijiet fil-kooperazzjoni amministrattiva. Deroga mhijiex l-aktar strument ġustifikat biex jipprovdi soluzzjoni fit-tul għall-problemi strutturali fl-industrija tas-sajd ta’ Cabo Verde.

(7)

Minħabba d-iffikutajiet ekonomiċi rikorrenti u minħabba n-nuqqas ta’ soluzzjonijiet alternattivi, jenħtieġ li Cabo Verde xorta waħda jingħata, għalkemm b’kundizzjonijiet stretti, deroga temporanja mir-rekwiżit li jinsab fir-regoli dwar l-oriġini preferenzjali li l-prodotti jitqiesu li joriġinaw mill-pajjiż benefiċjarju biss meta jinkorporaw materjali li jinkisbu għalkollox f’dak il-pajjiż. Skont il-volumi li ntużaw bis-sħiħ matul id-deroga preċedenti tal-2020–2023, jenħtieġ li d-deroga tingħata għal volum annwali ta’ 3 000 tunnellata ta’ fletti u lojns tat-tonn ippreparati jew ippreservati (nejjin, imsajrin u ffriżati), 2 700 tunnellata ta’ fletti tal-kavall ippreparati jew ippreservati u 600 tunnellata ta’ fletti tat-tumbrell ippreparati jew ippreservati. Jenħtieġ li d-durata tad-deroga tkun limitata għal perjodu ta’ sentejn sabiex Cabo Verde jkun jista’ jagħmel ħiltu biex ilesti l-aġġustamenti strutturali meħtieġa fis-settur tas-sajd ħalli jikkonforma mar-regoli tal-oriġini għall-prodotti kkonċernati.. Madankollu, jenħtieġ li d-deroga tingħata bil-kundizzjoni li l-awtoritajiet doganali ta’ Cabo Verde jieħdu l-passi meħtieġa biex iwettqu kontrolli kwantitattivi fuq l-esportazzjonijiet tal-prodotti soġġetti għad-deroga, u li dawn jikkomunikaw lill-Kummissjoni dikjarazzjoni tal-kwantitajiet li għalihom ikunu nħarġu dikjarazzjonijiet tal-oriġini skont dan ir-Regolament u n-numri tas-serje ta’ dawk id-dikjarazzjonijiet.

(8)

Barra minn hekk, jenħtieġ li Cabo Verde jibbenefika minn deroga mir-regoli tal-oriġini għat-tonn u l-kavalli bil-kundizzjoni li jirrapporta regolarment lis-servizzi kompetenti tal-Kummissjoni dwar il-miżuri li jkun ħa biex jiżgura l-konformità mar-regoli tal-oriġini għall-prodotti kkonċernati u mal-proċeduri relatati u li jipprovdi kooperazzjoni amministrattiva xierqa għall-implimentazzjoni tal-arranġamenti preferenzjali skont is-SĠP imsemmija fl-Artikolu 1(2) tar-Regolament (UE) Nru 978/2012 (Regolament SĠP). Jenħtieġ li dawk ir-rapporti jiġu ppreżentati skont skeda taż-żmien preċiża. Jenħtieġ li kull dewmien biex jintlaħqu l-iskadenza stabbilita jkun iwassal għas-sospensjoni tad-deroga li għandha tiġi nnotifikata lill-awtoritajiet kompetenti ta’ Cabo Verde wara tfakkira u stedina biex jippreżentaw ir-rapporti fi żmien għaxart ijiem tax-xogħol. Jenħtieġ li l-elementi li għandhom jiġu inklużi f’dawk ir-rapporti jiġu elenkati f’Anness ta’ dan ir-Regolament. L-applikazzjoni tad-deroga hija soġġetta għall-konformità mal-kundizzjonijiet stabbiliti fl-Artikolu 43 tar-Regolament Delegat (UE) 2015/2446.

(9)

Jenħtieġ li l-kwantitajiet stabbiliti fl-Anness ta’ dan ir-Regolament ikunu ġestiti f’konformità mal-Artikoli 49 sa 54 tar-Regolament ta’ Implimentazzjoni tal-Kummissjoni (UE) 2015/2447 (7) li jirregolaw il-ġestjoni tal-kwoti tariffarji.

(10)

Jenħtieġ li l-miżuri previsti f’dan ir-Regolament jidħlu fis-seħħ fil-jum wara dak tal-pubblikazzjoni tiegħu u jiġu applikati b’mod retroattiv mill-1 ta’ Jannar 2024, sabiex titqies is-sitwazzjoni diffiċli ta’ Cabo Verde u biex dan il-pajjiż ikun jista’ japplika d-deroga minn dik id-data.

(11)

Il-miżuri previsti f’dan ir-Regolament huma f’konformità mal-opinjoni tal-Kumitat tal-Kodiċi Doganali,

(1)

L-awtoritajiet doganali ta’ Cabo Verde għandhom jieħdu l-passi neċessarji biex iwettqu kontrolli kwantitattivi fuq l-esportazzjonijiet tal-prodotti msemmijin fl-Artikolu 1.

(2)

Ir-referenza li ġejja għandha tiddaħħal fid-dikjarazzjonijiet dwar l-oriġini magħmula mill-esportaturi rreġistrati: “Deroga — ir-Regolament ta’ Implimentazzjoni tal-Kummissjoni (UE) 2024/1288”.

(3)

L-awtoritajiet kompetenti ta’ Cabo Verde għandhom jikkomunikaw lill-Kummissjoni dikjarazzjoni tal-kwantitajiet li għalihom ikunu nħarġu dikjarazzjonijiet dwar l-oriġini skont l-Artikolu 92 tar-Regolament ta’ Implimentazzjoni (UE) 2015/2447 u l-kopji ta’ dawn il-provi. Dawn ir-rapporti għandhom jiġu kkomunikati lill-Kummissjoni għal tliet perjodi, jiġifieri 6 xhur, 12-il xahar u 20 xahar wara d-dħul fis-seħħ ta’ dan ir-Regolament u fi żmien xahrejn wara t-tmiem ta’ kull perjodu.

Għalhekk, l-ewwel rapport għandu jiġi kkomunikat bejn l-1 ta’ Lulju u l-1 ta’ Settembru 2024. It-tieni rapport għandu jiġi kkomunikat bejn l-1 ta’ Jannar u l-1 ta’ Marzu 2025. It-tielet rapport għandu jiġi kkomunikat bejn l-1 ta’ Awwissu u l-1 ta’ Ottubru 2025. Il-perjodu li fadal ta’ bejn l-1 ta’ Awwissu u l-31 ta’ Diċembru 2025 għandu jkun soġġett għal rapport addizzjonali li għandu jintbagħat fi żmien xahrejn wara tmiem il-perjodu tal-applikazzjoni stabbilit fl-Artikolu 2(1).

(4)

Flimkien mar-rapporti msemmijin fil-paragrafu 3, l-awtoritajiet kompetenti ta’ Cabo Verde għandhom jikkomunikaw lill-Kummissjoni rapport b’informazzjoni dettaljata dwar il-miżuri li jkunu ħadu sabiex:

L-informazzjoni meħtieġa li għandha tiġi rrappurtata mill-awtoritajiet kompetenti ta’ Cabo Verde hija elenkata fl-Anness III.