(1)

Fit-13 ta’ Mejju 2013 il-Kunsill impona dazju antidumping definittiv fuq l-importazzjonijiet fl-Unjoni ta’ oġġetti taċ-ċeramika li jintużaw fuq il-mejda u fil-kċina (“oġġetti li jintużaw fuq il-mejda”) li joriġinaw mir-Repubblika tal-Poplu taċ-Ċina (“RPĊ”) permezz tar-Regolament ta’ Implimentazzjoni tal-Kunsill (UE) Nru 412/2013 (3).

(2)

Fit-12 ta’ Lulju 2019, wara rieżami ta’ skadenza skont l-Artikolu 11(2) tar-Regolament (UE) 2016/1036, il-Kummissjoni estendiet il-miżuri tar-regolament oriġinali għal ħames snin oħra permezz tar-Regolament ta’ Implimentazzjoni tal-Kummissjoni (UE) 2019/1198.

(3)

Fl-investigazzjoni oriġinali, il-kampjunar ġie applikat għall-investigazzjoni tal-produtturi esportaturi fir-RPĊ skont l-Artikolu 17 tar-Regolament (UE) 2016/1036.

(4)

Fl-investigazzjoni oriġinali, il-Kummissjoni imponiet rati individwali ta’ dazju anti-dumping li jvarjaw minn 13,1 % sa 18,3 % fuq l-importazzjonijiet tal-prodott ikkonċernat għall-produtturi esportaturi mir-RPĊ inklużi fil-kampjun. Għall-produtturi esportaturi li kkooperaw u li ma kinux inklużi fil-kampjun ġiet imposta rata ta’ dazju anti-dumping ta’ 17,9 %. Il-produtturi esportaturi li kkooperaw mhux inklużi fil-kampjun huma elenkati fl-Anness I tar-Regolament ta’ Implimentazzjoni (UE) 2019/1198. Barra minn hekk, ġiet imposta wkoll rata ta’ dazju anti-dumping mal-pajjiż kollu ta’ 36,1 % fuq il-prodott ikkonċernat minn kumpaniji fir-RPĊ li jew ma ddikjarawx ruħhom jew inkella ma kkooperawx fl-investigazzjoni.

(5)

Fit-28 ta’ Novembru 2019, wara investigazzjoni antiċirkomvenzjoni skont l-Artikolu 13(3) tar-Regolament (UE) 2016/1036, ir-Regolament ta’ Implimentazzjoni (UE) 2019/1198 ġie emendat permezz tar-Regolament ta’ Implimentazzjoni tal-Kummissjoni (UE) 2019/2131 (4). Fost l-oħrajn, il-lista ta’ produtturi esportaturi li kkooperaw mhux inklużi fil-kampjun fl-Anness I tar-Regolament ta’ Implimentazzjoni (UE) 2019/1198 ġiet emendata.

(6)

Skont l-Artikolu 2 tar-Regolament ta’ Implimentazzjoni (UE) 2019/1198, l-Anness I ta’ dak ir-Regolament jista’ jiġi emendat billi l-produttur esportatur il-ġdid jingħata r-rata tad-dazju applikabbli għall-kumpaniji li kkooperaw u li mhumiex inklużi fil-kampjun, jiġifieri r-rata tad-dazju medja ponderata ta’17,9 %, meta dak il-produttur esportatur ġdid jagħti biżżejjed evidenza lill-Kummissjoni li:

(7)

Ir-Regolament ta’ Implimentazzjoni (UE) 2019/1198 ġie emendat f’diversi okkażjonijiet wara l-konklużjoni ta’ rieżamijiet tal-produtturi esportaturi ġodda fejn il-produtturi esportaturi pprovdew biżżejjed evidenza lill-Kummissjoni li ssodisfaw il-kriterji elenkati fil-premessa (6).

(8)

Madankollu, il-parti operattiva ta’ 4 Regolamenti ta’ Implimentazzjoni tal-Kummissjoni li jemendaw ir-Regolament ta’ Implimentazzjoni (UE) 2019/1198 b’mod żbaljat tirreferi għar-Regolament ta’ Implimentazzjoni (UE) 2019/2131 minflok għar-Regolament ta’ Implimentazzjoni (UE) 2019/1198.

(9)

Għalhekk, jenħtieġ li r-Regolamenti ta’ Implimentazzjoni tal-Kummissjoni (UE) 2023/1596 (5), (UE) 2023/1595 (6), (UE) 2023/711 (7) u (UE) 2022/269 (8) jiġu kkoreġuti skont dan.

(10)

Il-miżuri previsti f’dan ir-Regolament huma f’konformità mal-opinjoni tal-Kumitat stabbilit bl-Artikolu 15(1) tar-Regolament (UE) 2016/1036,