(1)

Skont l-Artikolu 78(3) tar-Regolament (KE) Nru 1107/2009, is-sustanzi attivi inklużi fl-Anness I tad-Direttiva tal-Kunsill 91/414/KEE (2) jitqiesu li ġew approvati skont ir-Regolament (KE) Nru 1107/2009. Dawk is-sustanzi huma elenkati fil-Parti A tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (3) u s-sustanzi attivi approvati skont ir-Regolament (KE) Nru 1107/2009 huma elenkati fil-Parti B ta’ dak l-Anness, filwaqt li s-sustanzi attivi approvati skont ir-Regolament (KE) Nru 1107/2009 bħala kandidati għas-sostituzzjoni huma elenkati fil-Parti E ta’ dak l-Anness.

(2)

Is-sustanzi attivi 1-dekanol, 6-benżiladenina, sulfat tal-aluminju, ażadiraktin, bupirimat, ditijanon, dodina, fluwometuron, eżitijażoss, isossaben, kubrit tal-ġir, kinmerak, sintofen, tau-fluvalinat, tebufenożur u fosfid taż-żingu huma elenkati fil-Parti A tal-Anness tar-Regolament ta’ Implimentazzjoni (UE) Nru 540/2011. Is-sustanzi attivi żejt tal-larinġ, tijosulfat tal-fidda u s-sodju u tembotrion huma elenkati fil-Parti B ta’ dak l-Anness u s-sustanza attiva prosulfuron hija elenkata fil-Parti E ta’ dak l-Anness.

(3)

Ir-Regolament ta’ Implimentazzjoni tal-Kummissjoni (UE) 2020/2007 (4) estenda l-perjodu ta’ approvazzjoni tas-sustanzi attivi żejt tal-larinġ, prosulfuron, kinmerak, tijosulfat tal-fidda u s-sodju, tembotrion u fosfid taż-żingu sal-31 ta’ Lulju 2024 u tas-sustanzi attivi 1-dekanol, 6-benżiladenina, sulfat tal-aluminju, ażadiraktin, bupirimat, ditijanon, dodina, fluwometuron, eżitijażoss, isossaben, kubrit tal-ġir, sintofen, tau-fluvalinat u tebufenożur sal-31 ta’ Awwissu 2024.

(4)

L-applikazzjonijiet u d-dossiers supplimentari għat-tiġdid tal-approvazzjoni ta’ kull waħda minn dawk is-sustanzi attivi ġew sottomessi f’konformità mar-Regolament ta’ Implimentazzjoni tal-Kummissjoni (UE) Nru 844/2012 (5) u (UE) 2020/1740 (6), rispettivament.

(5)

Għas-sustanzi attivi ażadiraktin, bupirimat, ditijanon, eżitijażoss, isossaben, kubrit tal-ġir, żejt tal-larinġ, kinmerak, tijosulfat tal-fidda u s-sodju, tau-fluvalinat, tebufenożur, tembotrion u fosfid taż-żingu, il-valutazzjoni tar-riskju skont l-Artikolu 11 tar-Regolament ta’ Implimentazzjoni (UE) Nru 844/2012 għadha ma ġietx iffinalizzata mill-Istati Membri relaturi rispettivi.

(6)

Għas-sustanzi attivi 1-dekanol, 6-benżiladenina, sulfat tal-aluminju, dodina, fluwometuron, prosulfuron, u sintofen, l-Awtorità Ewropea dwar is-Sigurtà fl-Ikel (“l-Awtorità”) teħtieġ żmien addizzjonali biex tasal għal konklużjoni, u meta xieraq, tkun tesiġi konsultazzjoni mal-esperti. Huwa meħtieġ aktar żmien biex il-Kummissjoni tadotta d-deċiżjoni li tirriżulta dwar il-ġestjoni tar-riskju.

(7)

Peress li aktarx li l-ebda deċiżjoni dwar it-tiġdid tal-approvazzjoni ta’ dawn is-sustanzi attivi mhi se tkun tista’ tittieħed qabel l-iskadenza tal-perjodi tal-approvazzjoni rispettivi tagħhom fil-31 ta’ Lulju 2024 u fil-31 ta’ Awwissu 2024, u minħabba li r-raġunijiet għad-dewmien fil-proċeduri tat-tiġdid mhumiex fil-kontroll tal-applikanti rispettivi, jenħtieġ li l-perjodi tal-approvazzjoni ta’ dawk is-sustanzi attivi jiġu estiżi sabiex ikunu jistgħu jitlestew il-valutazzjonijiet meħtieġa u sabiex jiġu ffinalizzati l-proċeduri rispettivi għat-tiġdid tal-approvazzjoni.

(8)

Għas-sustanzi attivi ażadiraktin, bupirimat, ditijanon, eżitijażoss, isossaben, kubrit tal-ġir, żejt tal-larinġ, kinmerak, tijosulfat tal-fidda u s-sodju, tau-fluvalinat, tebufenożur, tembotrion u fosfid taż-żingu, peress li l-valutazzjoni tar-riskju għadha ma ġietx iffinalizzata mill-Istati Membri relaturi u fid-dawl taż-żmien meħtieġ biex jitlestew il-passi li fadal f’kull proċedura tat-tiġdid, id-durata tal-estensjoni tal-perjodi ta’ approvazzjoni jenħtieġ li tiġi stabbilita għal 29 xahar.

(9)

Għas-sustanzi attivi 1-dekanol, 6-benżiladenina, sulfat tal-aluminju, dodina, fluwometuron, prosulfuron u sintofen, peress li l-Awtorità teħtieġ żmien addizzjonali biex tasal għal konklużjoni dwar il-valutazzjoni tar-riskju tagħhom, id-durata tal-estensjoni tal-perjodu ta’ approvazzjoni għal dawn is-sustanzi attivi jenħtieġ li tiġi stabbilita għal 23 xahar u ġimagħtejn.

(10)

Għaldaqstant, jenħtieġ li r-Regolament ta’ Implimentazzjoni (UE) Nru 540/2011 jiġi emendat skont dan.

(11)

F’każ li l-Kummissjoni tadotta Regolament li jipprevedi li l-approvazzjoni ta’ sustanza attiva msemmija fl-Anness ta’ dan ir-Regolament ma tiġġeddidx, il-Kummissjoni tiffissa d-data tal-iskadenza fid-data tad-dħul fis-seħħ ta’ dak ir-Regolament jew fl-istess data kif kienet qabel l-adozzjoni ta’ dan ir-Regolament, skont liema data tiġi l-aħħar. F’każ li l-Kummissjoni tadotta Regolament li jipprevedi t-tiġdid tal-approvazzjoni ta’ sustanza attiva msemmija fl-Anness ta’ dan ir-Regolament, il-Kummissjoni tistabbilixxi l-eqreb data ta’ applikazzjoni possibbli kif ikun xieraq skont iċ-ċirkostanzi.

(12)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,