(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fl-għalf tal-annimali u r-raġunijiet u l-proċeduri għall-għoti ta’ din l-awtorizzazzjoni.

(2)

F’konformità mal-Artikolu 7 tar-Regolament (KE) Nru 1831/2003, ġiet ippreżentata applikazzjoni għall-awtorizzazzjoni tal-kumpless tal-manganiż(II) – betaina. Ma’ dik l-applikazzjoni nbagħtu wkoll id-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(3)

L-applikazzjoni tikkonċerna l-awtorizzazzjoni tal-kumpless tal-manganiż(II) – betaina bħala addittiv tal-għalf għall-ispeċijiet kollha tal-annimali, biex jiġi kklassifikat fil-kategorija tal-addittivi “addittivi nutrittivi”, u fil-grupp funzjonali “komposti ta’ mikroelementi”.

(4)

Fl-opinjoni tagħha tas-27 ta’ Settembru 2023 (2), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li skont il-kundizzjonijiet tal-użu proposti, il-kumpless tal-manganiż(II) – betaina huwa sikur għall-ispeċijiet kollha tal-annimali, għall-konsumaturi, u għall-ambjent diment li ma jinqabżux il-livelli massimi awtorizzati tal-manganiż totali fl-għalf. Rigward is-sikurezza għall-ispeċijiet kollha tal-annimali, l-Awtorità kkonkludiet li abbażi tar-riżultati tal-istudju ta’ tolleranza, l-addittiv huwa sikur għat-tiġieġ tas-simna meta jintuża sal-livelli massimi awtorizzati tal-manganiż fl-għalf, u li din il-konklużjoni tista’ tiġi estrapolata għall-ispeċijiet u l-kategoriji kollha tal-annimali diment li ma jinqabżux il-livelli massimi awtorizzati fl-UE tal-kwantità totali ta’ manganiż fl-għalf. L-Awtorità kkonkludiet ukoll li l-kumpless tal-manganiż (II) – betaina huwa sensitizzatur respiratorju u tal-ġilda, minħabba li fih in-nikil. Huwa irritant tal-għajnejn iżda mhux tal-ġilda. L-Awtorità kkonkludiet li s-sustanza hija effikaċi bħala sors ta’ manganiż fl-ispeċijiet u l-kategoriji kollha tal-annimali. Hija ma qisitx li hemm ħtieġa għal rekwiżiti speċifiċi ta’ monitoraġġ ta’ wara l-introduzzjoni fis-suq. L-Awtorità vverifikat ukoll ir-rapport dwar il-metodu ta’ analiżi tal-addittiv tal-għalf fl-għalf, li ġie ppreżentat mil-Laboratorju ta’ Referenza stabbilit bir-Regolament (KE) Nru 1831/2003.

(5)

Fid-dawl ta’ dan ta’ hawn fuq, il-Kummissjoni tqis li l-kumpless tal-manganiż(II) – betaina jissodisfa l-kundizzjonijiet għall-awtorizzazzjoni previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-użu ta’ dik is-sustanza jiġi awtorizzat. Il-Kummissjoni tqis ukoll li għal raġunijiet ta’ sikurezza l-addittiv jenħtieġ li jiżdied fl-għalf permezz ta’ premixxeli. Barra minn hekk, il-Kummissjoni tqis li jenħtieġ li jittieħdu miżuri protettivi xierqa biex jiġu evitati effetti avversi fuq is-saħħa tal-utenti tal-addittiv.

(6)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,