This document is an excerpt from the EUR-Lex website
Document 32024R1073
Council Implementing Regulation (EU) 2024/1073 of 12 April 2024 implementing Regulation (EU) 2020/1998 concerning restrictive measures against serious human rights violations and abuses
Regolament ta’ Implimentazzjoni tal-Kunsill (UE) 2024/1073 tat-12 ta’ April 2024 li jimplimenta r-Regolament (UE) 2020/1998 dwar miżuri restrittivi kontra ksur u abbużi serji tad-drittijiet tal-bniedem
Regolament ta’ Implimentazzjoni tal-Kunsill (UE) 2024/1073 tat-12 ta’ April 2024 li jimplimenta r-Regolament (UE) 2020/1998 dwar miżuri restrittivi kontra ksur u abbużi serji tad-drittijiet tal-bniedem
ST/7951/2024/INIT
ĠU L, 2024/1073, 12.4.2024, ELI: http://data.europa.eu/eli/reg_impl/2024/1073/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
Il-Ġurnal Uffiċjali |
MT Is-serje L |
2024/1073 |
12.4.2024 |
REGOLAMENT TA’ IMPLIMENTAZZJONI TAL-KUNSILL (UE) 2024/1073
tat-12 ta’ April 2024
li jimplimenta r-Regolament (UE) 2020/1998 dwar miżuri restrittivi kontra ksur u abbużi serji tad-drittijiet tal-bniedem
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea,
Wara li kkunsidra r-Regolament tal-Kunsill (UE) 2020/1998 tas-7 ta’ Diċembru 2020 dwar miżuri restrittivi kontra ksur u abbużi serji tad-drittijiet tal-bniedem (1), u b’mod partikolari l-Artikolu 14(1) tiegħu,
Wara li kkunsidra l-proposta tar-Rappreżentant Għoli tal-Unjoni għall-Affarijiet Barranin u l-Politika ta’ Sigurtà,
Billi:
(1) |
Fis-7 ta’ Diċembru 2020, il-Kunsill adotta r-Regolament (UE) 2020/1998. |
(2) |
Fit-8 ta’ Diċembru 2020, fid-Dikjarazzjoni mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà (ir-“Rappreżentant Għoli”), f’isem l-Unjoni Ewropea, dwar ir-Reġim Globali ta’ Sanzjonijiet tal-UE b’rabta mad-Drittijiet tal-Bniedem, l-Unjoni u l-Istati Membri tagħha affermaw mill-ġdid l-impenn qawwi tagħhom lejn il-promozzjoni u l-ħarsien tad-drittijiet tal-bniedem madwar id-dinja. Ir-Reġim Globali ta’ Sanzjonijiet tal-UE b’rabta mad-Drittijiet tal-Bniedem jenfasizza d-determinazzjoni tal-Unjoni li ssaħħaħ ir-rwol tagħha fl-indirizzar ta’ ksur u abbużi serji tad-drittijiet tal-bniedem madwar id-dinja. Il-kisba tat-tgawdija effettiva tad-drittijiet tal-bniedem minn kulħadd hija għan strateġiku tal-Unjoni. Ir-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt u d-drittijiet tal-bniedem huwa valur fundamentali tal-Unjoni u tal-politika estera u ta’ sigurtà komuni tagħha. |
(3) |
Fil-konklużjonijiet tiegħu tal-14 ta’ Novembru 2022, il-Kunsill esprima tħassib dwar l-effett sproporzjonat li l-konflitti armati għadhom qed ikollhom fuq in-nisa u l-bniet madwar id-dinja, kif ukoll il-prevalenza tal-vjolenza sesswali u dik abbażi tal-ġeneru inkluż il-vjolenza sesswali b’rabta mal-konflitt, offline u online. Huwa impenja ruħu għat-tisħiħ tal-isforzi biex tiġi miġġielda din il-vjolenza sabiex tiġi żgurata responsabbiltà sħiħa u biex tiġi miġġielda l-impunità. Barra minn hekk, fil-konklużjonijiet tiegħu ta’ Ġunju 2014, il-Kunsill kien enfasizza li l-ġlieda kontra l-forom kollha ta’ vjolenza kontra n-nisa u l-eliminazzjoni ta’ kwalunkwe forma ta’ din il-vjolenza jeħtieġu politiki koordinati fil-livelli rilevanti kollha u approċċ komprensiv li jkollu fil-mira l-kwistjonijiet ewlenin ta’ prevenzjoni, sottorapportar, ħarsien, appoġġ għall-vittmi u prosekuzzjoni tal-awturi tar-reati, kif ukoll miżuri oħra. L-użu strateġiku ta’ miżuri restrittivi jsaħħaħ dan l-approċċ billi jżid il-pressjoni biex jiġu evitati aktar ksur u abbużi u, f’koordinazzjoni ma’ strumenti oħra tal-Unjoni fis-sett ta’ għodod b’rabta mad-drittijiet tal-bniedem, jiġbed l-attenzjoni għal dak il-ksur u l-abbużi u għal dawk responsabbli. |
(4) |
Fis-7 ta’ Ottubru 2023, ir-Rappreżentant Għoli ħareġ dikjarazzjoni f’isem l-Unjoni Ewropea dwar l-attakki kontra Iżrael, li tikkundanna bl-aktar mod qawwi possibbli l-attakki multipli u indiskriminati f’Iżrael mill-Ħamas u tiddeplora profondament it-telf ta’ ħajjiet. |
(5) |
Fil-konklużjonijiet tiegħu tas-26 u s-27 ta’ Ottubru 2023, il-Kunsill Ewropew tenna l-kundanna tiegħu bl-aktar mod qawwi possibbli tal-Ħamas għall-attakki terroristiċi brutali u indiskriminati tiegħu f’Iżrael. |
(6) |
F’dak il-kuntest, jenħtieġ li tliet entitajiet jiġu inklużi fil-lista ta’ persuni fiżiċi jew ġuridiċi, entitajiet jew korpi soġġetti għal miżuri restrittivi stipulati fl-Anness I tar-Regolament (UE) 2020/1998. |
(7) |
Għalhekk, jenħtieġ li r-Regolament (UE) 2020/1998 jiġi emendat skont dan, |
ADOTTA DAN IR-REGOLAMENT:
Artikolu 1
L-Anness I tar-Regolament tal-Kunsill (UE) 2020/1998 huwa emendat kif stipulat fl-Anness ta’ dan ir-Regolament.
Artikolu 2
Dan ir-Regolament għandu jidħol fis-seħħ fid-data tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fil-Lussemburgu, it-12 ta’ April 2024.
Għall-Kunsill
Il-President
V. VAN PETEGHEM
ANNESS
L-entrati li ġejjin jiżdiedu mal-lista ta’ persuni fiżiċi jew ġuridiċi, entitajiet jew korpi taħt l-intestatura B “Persuni ġuridiċi, entitajiet jew korpi” fl-Anness I tar-Regolament (UE) 2020/1998:
|
Ismijiet (Trażlitterazzjoni bl-alfabett Latin) |
Ismijiet |
Informazzjoni ta’ identifikazzjoni |
Raġunijiet għall-elenkar |
Data tal-elenkar |
“24. |
Al-Quds Brigades magħrufa wkoll bħala Sarāyā al-Quds |
سرايا القدس (Ortografija Għarbija) |
Reġjuni attivi: L-Istrixxa ta’ Gaża, ix-Xatt tal-Punent, in-Nofsinhar tal-Libanu |
Al-Quds Brigades huma l-fergħa armata tal-Ġiħad Iżlamika tal-Palestina (PIJ), organizzazzjoni terroristika li hija soġġetta għal miżuri restrittivi tal-Unjoni. Fis-7 ta’ Ottubru 2023, il-ġellieda ta’ Al-Quds Brigades wettqu flimkien mal-Ħamas, attakki terroristiċi brutali u indiskriminati f’Iżrael. B’dan il-mod, huma wettqu wkoll vjolenza sesswali u dik abbażi tal-ġeneru b’mod mifrux u sistematiku, billi użawha bħala arma tal-gwerra. B’mod partikolari, ġellieda ta’ Al-Quds Brigades kienu involuti f’attakki fuq kibbutzim bħal Kfar Aza u Nahal Oz, fejn twettqu forom gravi ta’ vjolenza sesswali u dik abbażi tal-ġeneru inkluż stupru, qtil ta’ trabi bniet u l-ħtif immirat ta’ nisa u bniet. Għalhekk, Al-Quds Brigades huma responsabbli għal abbużi jew ksur serju tad-drittijiet tal-bniedem, inkluż il-vjolenza sesswali u dik abbażi tal-ġeneru b’mod mifrux u sistematiku, li hija wkoll ta’ tħassib serju fir-rigward tal-objettivi tal-politika estera u ta’ sigurtà komuni kif jinsabu fl-Artikolu 21 tat-Trattat dwar l-Unjoni Ewropea. |
12.4.2024 |
25. |
Nukhba Force magħrufa wkoll bħala Al-Nukhba |
نخبة (Ortografija Għarbija) |
Reġjuni attivi: L-Istrixxa ta’ Gaża, ix-Xatt tal-Punent, in-Nofsinhar tal-Libanu |
Nukhba Force hija unità tal-forzi speċjali tal-organizzazzjoni terroristika Ħamas li hija soġġetta għal miżuri restrittivi tal-Unjoni. Fis-7 ta’ Ottubru 2023, il-ġellieda ta’ Nukhba Force wettqu attakki terroristiċi brutali u indiskriminati madwar Iżrael. B’dan il-mod, huma wettqu wkoll vjolenza sesswali u dik abbażi tal-ġeneru b’mod mifrux u sistematiku, billi użawha bħala arma tal-gwerra. B’mod partikolari, ġellieda ta’ Nukhba Force infiltraw, fost l-oħrajn, Kibbutz Kfar Aza u niżlu permezz ta’ paraxut fil-festival mużikali Re’im (Nova). Fiż-żewġ postijiet, il-ġellieda ta’ Nukhba Force wettqu vjolenza sesswali u dik abbażi tal-ġeneru b’mod mifrux u sistematiku, inkluż l-istupru u l-qtil sussegwenti ta’ minuri nisa, il-mutilazzjoni tal-katavri kif ukoll il-mutilazzjoni ġenitali. Għalhekk, Nukhba Force hija responsabbli għal abbużi jew ksur serju tad-drittijiet tal-bniedem, inkluż il-vjolenza sesswali u dik abbażi tal-ġeneru b’mod mifrux u sistematiku, li hija wkoll ta’ tħassib serju fir-rigward tal-objettivi tal-politika estera u ta’ sigurtà komuni kif jinsabu fl-Artikolu 21 tat-Trattat dwar l-Unjoni Ewropea. |
12.4.2024 |
26. |
Qassam Brigades magħrufa wkoll bħala Izz ad-Din al-Qassam Brigades; AQB |
|
Reġjuni attivi: L-Istrixxa ta’ Gaża, ix-Xatt tal-Punent, in-Nofsinhar tal-Libanu |
Qassam Brigades huma l-fergħa militari tal-Organizzazzjoni terroristika tal-Ħamas li hija soġġetta għal miżuri restrittivi tal-Unjoni. Fis-7 ta’ Ottubru 2023, il-ġellieda ta’ Qassam Brigades wettqu attakki terroristiċi brutali u indiskriminati f’Iżrael. B’dan il-mod, huma wettqu wkoll vjolenza sesswali u dik abbażi tal-ġeneru b’mod mifruxa u sistematiku, billi użawha bħala arma tal-gwerra, inkluż l-abbuż sesswali ta’ minuri u katavri, mutilazzjonijiet ġenitali u l-ħtif immirat ta’ nisa u bniet. Għalhekk, Qassam Brigades huma responsabbli għal abbużi jew ksur serju tad-drittijiet tal-bniedem, inkluż il-vjolenza sesswali u dik abbażi tal-ġeneru b’mod mifrux u sistematiku, li hija wkoll ta’ tħassib serju fir-rigward tal-objettivi tal-politika estera u ta’ sigurtà komuni kif jinsabu fl-Artikolu 21 tat-Trattat dwar l-Unjoni Ewropea. |
12.4.2024” |
ELI: http://data.europa.eu/eli/reg_impl/2024/1073/oj
ISSN 1977-074X (electronic edition)