(1)

Ir-Regolament tal-Kummissjoni (UE) 2023/915 (2) jiffissa l-livelli massimi ta’ ċerti kontaminanti, inkluż il-perklorat, fl-ikel.

(2)

Fit-30 ta’ Settembru 2014, l-Awtorità Ewropea dwar is-Sigurtà fl-Ikel adottat opinjoni xjentifika dwar il-perklorat fl-ikel, b’mod partikolari l-frott u l-ħaxix, u kkonkludiet li l-preżenza tiegħu f’ċerti oġġetti tal-ikel, inkluża l-fażola (Phaseolus vulgaris) bl-imżiewed, kienet ta’ tħassib għas-saħħa (3).

(3)

Il-livelli massimi għall-perklorat f’firxa wiesgħa ta’ ikel ġew stabbiliti bir-Regolament tal-Kummissjoni (UE) 2020/685 (4) u dawn il-livelli massimi ġew integrati fir-Regolament (UE) 2023/915. Għalkemm data komprensiva dwar l-okkorrenzi ma kinitx disponibbli għas-subkategoriji kollha ta’ frott u ħaxix fiż-żmien meta ġew stabbiliti dawn il-livelli, ġie stabbilit livell massimu ġenerali strett għall-frott u l-ħxejjex kollha, inkluża l-fażola, biex jiġi żgurat livell għoli ta’ protezzjoni tas-saħħa tal-bniedem.

(4)

Madankollu, data estensiva reċenti dwar l-okkorrenzi dwar il-livelli ta’ perklorat preżenti fil-fażola turi li l-livell massimu ma jistax jintlaħaq fil-fażola (Phaseolus vulgaris) bl-imżiewed f’żoni ta’ produzzjoni ewlenin fl-Unjoni, anki jekk jiġu applikati prattiki tajbin.

(5)

Għalhekk jixraq li jiżdied il-livell massimu għall-perklorat fil-fażola (Phaseolus vulgaris) bl-imżiewed f’konformità mal-prinċipju li l-livelli massimi għandhom jiġu stabbiliti f’livelli baxxi kemm jista’ jkun raġonevolment possibbli skont prattiki tajba.

(6)

Għalhekk, jenħtieġ li r-Regolament (UE) 2023/915 jiġi emendat skont dan.

(7)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,