(1)

F’konformità mal-Artikolu 88(6), it-tieni subparagrafu, tar-Regolament (UE) 2021/2115, Franza ddeċidiet fil-Pjan Strateġiku tal-PAK tagħha li tuża sa 5 % tal-allokazzjonijiet tagħha għall-pagamenti diretti għal tipi ta’ interventi f’setturi oħra msemmija fit-Titolu III, il-Kapitolu III, it-Taqsima 7, tar-Regolament (UE) 2021/2115 għas-snin kalendarji mill-2024 sal-2027. Għalhekk, l-ammonti korrispondenti għandhom jitnaqqsu mill-allokazzjonijiet ta’ Franza għall-pagamenti diretti.

(2)

Ir-Regolament Delegat tal-Kummissjoni (UE) 2023/813 (2) irrifletta l-bidliet fl-allokazzjonijiet tal-Istati Membri għall-pagamenti diretti wara l-approvazzjoni tal-Pjanijiet Strateġiċi tal-PAK, iżda ma inkludiex il-bidliet deċiżi minn Franza għal dan it-tip ta’ trasferiment. Għalhekk, biex tiġi riflessa id-deċiżjoni ta’ dak l-Istat Membru, jeħtieġ li jiġu adattati l-allokazzjonijiet ta’ Franza għall-pagamenti diretti stabbiliti fl-Annessi V u IX tar-Regolament (UE) 2021/2115.

(3)

Għalhekk, jenħtieġ li l-Annessi V u IX tar-Regolament (UE) 2021/2115 jiġu emendati skont dan.

(4)

Peress li t-trasferiment tal-allokazzjonijiet deċiż minn Franza jikkonċerna l-implimentazzjoni ta’ interventi fis-snin kalendarji mill-2024 sal-2027, dan isir effettiv mill-1 ta’ Jannar 2024. Sabiex din il-modifika tiġi riflessa b’mod adegwat fir-Regolament (UE) 2021/2115 ukoll u peress li l-emendi li saru b’dan ir-Regolament jaffettwaw l-applikazzjoni tar-Regolament (UE) 2021/2115 mis-sena 2024, b’mod partikolari fir-rigward tat-tipi ta’ intervent fil-forma ta’ pagamenti diretti, jenħtieġ li dan ir-Regolament jidħol fis-seħħ l-għada tal-pubblikazzjoni tiegħu f’Il-Ġurnal Uffiċjali tal-Unjoni Ewropea u jenħtieġ li japplika b’mod retroattiv mill-1 ta’ Jannar 2024,