(1)

L-Artikolu 13(1) tar-Regolament (KE) Nru 1967/2006 jipprojbixxi l-użu ta’ tagħmir irmunkat sa 3 mili nawtiċi mill-kosta jew sa livell ta’ fond ta’ 50 m meta dak il-fond jintlaħaq ’il ġewwa minn dik id-distanza mill-kosta.

(2)

Meta tintalab minn Stat Membru, il-Kummissjoni tista’ tagħti permess li ssir deroga mill-Artikolu 13(1), l-ewwel subparagrafu tar-Regolament (KE) Nru 1967/2006, dment li jintlaħqu l-kundizzjonijiet stabbiliti fl-Artikolu 13(5) u (9) ta’ dak ir-Regolament.

(3)

Il-Kummissjoni ingħatat deroga mill-ewwel subparagrafu tal-Artikolu 13(1) għas-sajd mit-tartaruni għall-makku u l-makku ferreri (Aphia minuta u Pseudaphia ferreri) u għall-arżnell (Spicara smaris) fl-ibħra territorjali Spanjoli tal-Gżejjer Baleariċi għall-ewwel darba sas-6 ta’ Diċembru 2016 permezz tar-Regolament ta’ Implimentazzjoni tal-Kummissjoni (UE) Nru 1233/2013 (2). Bir-Regolament ta’ Implimentazzjoni tal-Kummissjoni (UE) 2019/662 (3), ingħatat estensjoni ta’ dik id-deroga li skadiet fil-31 ta’ Diċembru 2019. Ingħatat estensjoni oħra ta’ dik id-deroga bir-Regolament ta’ Implimentazzjoni tal-Kummissjoni (UE) 2020/1243 (4), li skadiet fit-30 ta’ April 2023.

(4)

Il-Komunità Awtonoma tal-Gżejjer Baleariċi emendat il-pjan ta’ ġestjoni tagħha fil-31 ta’ Mejju 2021 (5) u ppreżentat rapporti ta’ monitoraġġ dwar l-implimentazzjoni tiegħu f’Novembru 2021 kif ukoll f’Jannar u f’Ġunju 2023. Wara r-rapporti tal-STECF, Spanja talbet l-estensjoni tad-deroga f’Ottubru 2023.

(5)

Matul it-73 sessjoni plenarja tiegħu organizzata f’Lulju 2023, il-Kumitat Xjentifiku, Tekniku u Ekonomiku għas-Sajd (STECF) ivvaluta t-talba għall-estensjoni tad-deroga, id-data ta’ appoġġ u r-rapporti ta’ monitoraġġ (6). Ir-rakkomandazzjonijiet tal-STECF tqiesu minn Spanja, li kkonfermat li d-data tas-Sistema ta’ Monitoraġġ tal-Bastimenti (VMS) se tintuża biex ikun magħruf b’mod aktar preċiż fejn isiru l-kalat, li osservaturi diġà ngħataw kuntratt għall-istaġuni tas-sajd li jmiss, u li hemm monitoraġġ perjodiku u permanenti tal-qigħan tal-Posidonia tal-Baleares (7).

(6)

Id-deroga li talbet Spanja tikkonforma mal-kundizzjonijiet stabbiliti fl-Artikolu 13(5) u (9) tar-Regolament (KE) Nru 1967/2006.

(7)

B’mod partikolari, jeżistu limitazzjonijiet ġeografiċi speċifiċi meta wieħed iqis id-daqs limitat tal-blata kontinentali u l-firxa limitata taż-żoni tas-sajd bix-xbieki tat-tkarkir, billi l-ispeċi fil-mira hija limitata esklużivament għal ċerti żoni fiż-żoni kostali f’fond li jkun anqas minn 50 metru.

(8)

Barra minn hekk, il-pjan ta’ ġestjoni jiggarantixxi li fil-ġejjieni mhux se jkun hemm żieda fl-isforz tas-sajd, kif meħtieġ mill-Artikolu 13(9) tar-Regolament (KE) Nru 1967/2006. L-awtorizzazzjonijiet tas-sajd se jinħarġu biss lil 55 bastiment speċifikat, kull wieħed limitat għal 12-il metru fid-daqs u 198,5 kW f’potenza li diġà huma awtorizzati jistadu.

(9)

Is-sajd ma għandu l-ebda impatt sinifikanti fuq l-ambjent tal-baħar, peress li t-tartaruni huma kalati fil-kolonna tal-ilma u ma jmissux qiegħ il-baħar. Permezz tal-użu tal-ekosondi, is-sajd huwa selettiv ħafna bi ftit qabdiet aċċessorji. Barra minn hekk, il-qabdiet mhux mixtieqa jintelqu ħajjin immedjatament, u għandhom sopravvivenza għolja ħafna. It-tartaruni ma għandhomx fil-mira ċ-ċefalopodi.

(10)

Is-sajd ma jistax isir bi rkaptu ieħor, minħabba li t-tartaruni huma l-uniku rkaptu rregolat li huwa permess li jaqbad dawn it-tliet speċijiet fil-mira bi mġiba ta’ ġliba fl-ilmijiet kostali baxxi.

(11)

It-talba tikkonċerna attivitajiet tas-sajd diġà awtorizzati minn Spanja, għal bastimenti li huma rreġistrati fiċ-Ċensiment Nazzjonali tal-Flotta tas-Sajd Operazzjonali Spanjol u li għandhom esperjenza ta’ aktar minn 5 snin fis-sajd f’konformità mal-Artikolu 13(9) tar-Regolament (KE) Nru 1967/2006.

(12)

Spanja awtorizzat deroga mill-qies minimu tal-malji stabbilit fl-Artikolu 9 tar-Regolament (KE) Nru 1967/2006 abbażi tal-issodisfar tar-rekwiżiti tal-Artikolu 9(7) ta’ dak ir-Regolament minħabba n-natura selettiva ħafna tas-sajd ikkonċernat, l-effett negliġibbli tiegħu fuq l-ambjent tal-baħar u l-fatt li mhuwiex affettwat mid-dispożizzjonijiet fl-Artikolu 4(5) ta’ dak ir-Regolament.

(13)

Għalkemm id-dispożizzjonijiet tal-Artikolu 9 tar-Regolament (KE) Nru 1967/2006 tħassru bir-Regolament (UE) 2019/1241 tal-Parlament Ewropew u tal-Kunsill (8), il-punt 4 tal-Parti B tal-Anness IX tar-Regolament (UE) 2019/1241 jipprovdi l-possibbiltà ta’ derogi mid-daqsijiet minimi tal-malji maħruġa fil-qafas tal-Artikolu 9 tar-Regolament (KE) Nru 1967/2006 u li kienu fis-seħħ fl-14 ta’ Awwissu 2019 biex ikomplu japplikaw abbażi tal-kundizzjonijiet imsemmija fl-Artikolu 15(5) tar-Regolament (UE) 2019/1241.

(14)

Il-Kummissjoni vvalutat din l-estensjoni tad-deroga mitluba minn Spanja u kkonkludiet li tikkonforma mal-kundizzjonijiet stabbiliti fl-Artikolu 15(5) tar-Regolament (UE) 2019/1241 u l-punt 4 tal-Parti B tal-Anness IX ta’ dak ir-Regolament. Din id-deroga ma twassalx għal deterjorament tal-istandards ta’ selettività, b’mod partikolari mil-lat ta’ żieda fil-qabdiet ta’ ferħ tal-ħut. Għandha l-għan li tilħaq l-objettivi u l-miri stabbiliti fl-Artikoli 3 u 4 tar-Regolament (UE) 2019/1241.

(15)

Is-sajd ikkonċernat jissodisfa r-rekwiżiti tal-Artikolu 4(1) tar-Regolament (KE) Nru 1967/2006 peress li l-pjan ta’ ġestjoni jipprojbixxi s-sajd fuq il-Posidonia oceanica, il-maerl u l-ħabitats koralliġenużi.

(16)

L-attivitajiet tas-sajd ikkonċernati jissodisfaw ir-rekwiżiti tar-reġistrazzjoni stabbiliti fl-Artikolu 14 tar-Regolament tal-Kunsill (KE) Nru 1224/2009 (9).

(17)

Is-sajd ikkonċernat jitwettaq f’distanza qasira ħafna mill-kosta u għalhekk ma jfixkilx l-attivitajiet tas-sajd ta’ bastimenti oħra.

(18)

Is-sajd ikkonċernat huwa regolat fil-pjan ta’ ġestjoni adottat minn Spanja li jiżgura li l-qabdiet tal-ispeċijiet imsemmijin fl-Anness IX tar-Regolament (UE) 2019/1241 ikunu minimi.

(19)

Il-pjan ta’ ġestjoni emendat fil-15 ta’ Diċembru 2023 (10) jinkludi miżuri għall-monitoraġġ tas-sajd, f’konformità mal-Artikolu 13(9), it-tielet subparagrafu, tar-Regolament (KE) Nru 1967/2006.

(20)

Għaldaqstant, jenħtieġ li d-deroga mitluba tingħata.

(21)

Spanja jenħtieġ li tirrapporta lill-Kummissjoni fi żmien xieraq u f’konformità mal-pjan ta’ monitoraġġ previst fil-pjan ta’ ġestjoni.

(22)

F’każ li l-monitoraġġ tal-pjan ta’ ġestjoni jkun juri status ta’ konservazzjoni dgħajjef għall-istokk sfruttat, b’limitu fid-durata tad-deroga jkunu jistgħu jittieħdu miżuri ta’ ġestjoni korrettivi fil-pront, filwaqt li jkun hemm lok li tissaħħaħ il-bażi xjentifika għal pjan ta’ ġestjoni mtejjeb. Jenħtieġ li t-tmiem tad-deroga tiġi ffissata fi tmiem l-istaġun tas-sajd. Għalhekk, jenħtieġ li d-deroga tapplika sat-30 ta’ April 2026.

(23)

Billi d-deroga li ngħatat permezz tar-Regolament ta’ Implimentazzjoni (UE) 2020/1243 skadiet fit-30 ta’ April 2023, dan ir-Regolament jenħtieġ li japplika mill-1 ta’ Mejju 2023 sabiex tiġi żgurata l-kontinwità legali. Għal raġunijiet ta’ ċertezza legali, dan ir-Regolament jenħtieġ li jidħol fis-seħħ b’urġenza.

(24)

Dan ir-Regolament huwa mingħajr preġudizzju għall-pożizzjoni tal-Kummissjoni fir-rigward tal-konformità mal-attività koperta b’din id-deroga ma’ leġiżlazzjoni oħra tal-Unjoni, b’mod partikolari d-Direttiva tal-Kunsill 92/43/KEE (11).

(25)

Il-miżuri previsti f’dan ir-Regolament huma konformi mal-opinjoni tal-Kumitat għas-Sajd u l-Akkwakultura,

(a)

ikunu rreġistrati fiċ-ċensiment marittimu ġestit mid-Direttorat Ġenerali għas-Sajd u l-Ambjent tal-Baħar tal-Gżejjer Baleariċi;

(b)

ikollhom aktar minn 5 snin esperjenza fis-sajd u mhuma involuti fl-ebda żieda fil-ġejjieni fl-isforz tas-sajd ntużat;

(c)

ikollhom awtorizzazzjoni għas-sajd u joperaw skont il-pjan ta’ ġestjoni li adottat Spanja f’konformità mal-Artikolu 19(2) tar-Regolament (KE) Nru 1967/2006.