(1)

Ir-Regolament tal-Kunsill (UE) Nru 216/2013 (1) jipprovdi li Il-Ġurnal Uffiċjali tal-Unjoni Ewropea (“Il-Ġurnal Uffiċjali”) ippubblikat f’forma elettronika (“l-edizzjoni elettronika tal-Ġurnal Uffiċjali”) għandu jkollu firma elettronika kwalifikata jew siġill elettroniku kwalifikat kif definit fir-Regolament (UE) Nru 910/2014 tal-Parlament Ewropew u tal-Kunsill (2). Ir-Regolament (UE) Nru 216/2013 jistabbilixxi wkoll obbligu li jiġu ppubblikati ċertifikati kwalifikati għal firma elettronika jew għal siġill elettroniku u tiġdid tiegħu fuq is-sit web EUR-Lex sabiex il-pubbliku jkun jista’ jivverifika l-awtentiċità tal-edizzjoni elettronika tal-Ġurnal Uffiċjali.

(2)

L-awtentiċità, l-integrità u l-inalterabbiltà tal-edizzjoni elettronika tal-Ġurnal Uffiċjali jistgħu jiġu żgurati minn firxa ta’ mezzi tekniċi. Huwa neċessarju li tali mezzi joffru garanziji komparabbli għal dawk ipprovduti minn servizzi fiduċjarji kwalifikati, kif definiti fir-Regolament (UE) Nru 910/2014, kemm fil-livell tekniku kif ukoll organizzattiv. Il-ħtieġa li jiġi emendat ir-Regolament (UE) Nru 216/2013 kull darba li soluzzjoni jew teknoloġija ġdida tkun użata jew meta l-qafas legali li jirregola tali soluzzjonijiet u teknoloġiji jinbidel jenħtieġ li tiġi evitata.

(3)

Huwa neċessarju li jiġu stabbiliti regoli ċari li jirrikonċiljaw ir-rekwiżit ta’ inalterabbiltà ta’ Il-Ġurnal Uffiċjali mal-obbligi li jirriżultaw minn atti legali tal-Unjoni dwar il-protezzjoni tad-data personali u minn deċiżjonijiet tal-Qorti tal-Ġustizzja tal-Unjoni Ewropea li ċerta informazzjoni titneħħa. Jenħtieġ li tali tneħħija titwettaq billi ssir disponibbli verżjoni ġdida tal-edizzjoni elettronika tal-Ġurnal Uffiċjali kkonċernat, akkumpanjata minn avviż dwar dan. Il-verżjoni oriġinali tal-edizzjoni elettronika tal-Ġurnal Uffiċjali kkonċernat jenħtieġ li tinżamm fl-arkivji tal-Uffiċċju tal-Pubblikazzjonijiet għal perjodu illimitat taħt kundizzjonijiet tekniċi u organizzattivi li jiżguraw li l-verżjoni oriġinali tista’ tintwera biss f’konformità mal-liġi tal-Unjoni, b’mod partikolari r-regoli li jirregolaw id-dritt ta’ aċċess għal dokumenti u l-protezzjoni tad-data personali.

(4)

L-Uffiċċju tal-Pubblikazzjonijiet daħħal fis-seħħ miżuri ta’ kontinġenza li jimminimizzaw ir-riskju li ma tkunx tista’ tiġi ppubblikata u tkun disponibbli l-edizzjoni elettronika tal-Ġurnal Uffiċjali fuq is-sit web EUR-Lex.

(5)

F’sitwazzjonijiet eċċezzjonali fejn, minkejja l-miżuri ta’ kontinġenza fis-seħħ, " ma jkunx possibbli li l-Ġurnal Uffiċjali jiġi ppubblikat fuq is-sit web tal-EUR-Lex u l-pubblikazzjoni ssir, f’forma stampata, l-Uffiċċju tal-Pubblikazzjonijiet jenħtieġ li jipprovdi informazzjoni li tikkonċerna t-tali pubblikazzjoni fuq is-sit web tal-EUR-Lex mill-aktar fis possibbli. Għal raġunijiet ta’ ċertezza legali, huwa neċessarju li jiġi żgurat li l-edizzjoni elettronika tal-Ġurnal Uffiċjali li sussegwentement titqiegħed għad-dispożizzjoni tal-pubbliku fuq is-sit web tal-EUR-Lex issir l-unika edizzjoni awtentika u li tipproduċi effetti legali.

(6)

Biex jiġi pprovdut il-benefiċċju massimu liċ-ċittadini f’termini ta’ faċilità ta’ aċċess għall-Ġurnal Uffiċjali, kif ukoll sabiex tiġi żgurata ċ-ċertezza legali, huwa xieraq ukoll li jingħata status ta’ awtentiċità esklussiva lill-verżjonijiet elettroniċi ta’ ftit edizzjonijiet stampati ta’ Il-Ġurnal Uffiċjali ppubblikati wara d-dħul fis-seħħ tar-Regolament (UE) Nru 216/2013.

(7)

Għaldaqstant, jenħtieġ li r-Regolament (UE) Nru 216/2013 jiġi emendat skont dan,

(1)

L-Artikolu 2 huwa emendat kif ġej:

(2)

L-Artikolu 3 huwa sostitwit b’dan li ġej: