(1)

L-Artikolu 6 tar-Regolament (UE) Nru 1380/2013 tal-Parlament Ewropew u tal-Kunsill (1) jirrikjedi li jiġu adottati miżuri ta' konservazzjoni filwaqt li jitqiesu l-pariri xjentifiċi, tekniċi u ekonomiċi disponibbli, inkluż, meta jkunu rilevanti, rapporti mfassla mill-Kumitat Xjentifiku, Tekniku u Ekonomiku għas-Sajd (STECF) u minn korpi konsultattivi oħrajn, kif ukoll kwalunkwe parir li jasal mingħand il-kunsilli konsultattivi.

(2)

Il-Kunsill jenħtieġ li jadotta miżuri dwar l-iffissar u l-allokazzjoni tal-opportunitajiet tas-sajd, inklużi ċerti kundizzjonijiet li jkunu marbuta b'mod funzjonali ma' dawk l-opportunitajiet tas-sajd, kif xieraq. Skont l-Artikolu 16(4) tar-Regolament, l-opportunitajiet tas-sajd għandhom jiġu stabbiliti f'konformità mal-objettivi tal-politika komuni tas-sajd (PKS), kif stabbilit fl-Artikolu 2(2) ta' dak ir-Regolament. Skont l-Artikolu 16(1) ta’ dak ir-Regolament, l-opportunitajiet tas-sajd għandhom jiġu allokati fost l-Istati Membri sabiex tiġi żgurata l-istabbiltà relattiva tal-attivitajiet tas-sajd ta' kull Stat Membru għal kull stokk ta' ħut jew sajd.

(3)

Għalhekk, il-qabdiet totali permissibbli (TACs) jenħtieġ li jiġu stabbiliti, f'konformità mal-Artikolu 3 tar-Regolament (UE) Nru 1380/2013, abbażi tal-pariri xjentifiċi disponibbli, filwaqt li jitqiesu l-aspetti bijoloġiċi u soċjoekonomiċi, u jiġi żgurat trattament ġust bejn is-setturi tas-sajd, u filwaqt li jitqiesu l-opinjonijiet espressi matul il-konsultazzjoni mal-partijiet ikkonċernati.

(4)

Skont l-Artikolu 15 tar-Regolament (UE) Nru 1380/2013, l-istokkijiet kollha li għalihom hemm limiti ta' qbid kienu soġġetti għall-obbligu ta' ħatt l-art mill-1 ta' Jannar 2019, għalkemm japplikaw ċerti eżenzjonijiet. Abbażi tar-rakkomandazzjonijiet konġunti mill-Istati Membri u f'konformità mal-Artikolu 15 tar-Regolament (UE) Nru 1380/2013, il-Kummissjoni tadotta atti delegati li jistabbilixxu d-dettalji għall-implimentazzjoni tal-obbligu ta' ħatt l-art għal ċertu sajd.

(5)

L-opportunitajiet tas-sajd għall-istokkijiet koperti mill-obbligu ta' ħatt l-art jenħtieġ li jqisu l-fatt li l-iskartar fil-prinċipju ma għadux permess. Għalhekk, dawn jenħtieġ li jkunu bbażati fuq iċ-ċifra ssuġġerita għall-qabdiet totali kif stipulat mill-Kunsill Internazzjonali għall-Esplorazzjoni tal-Baħar (ICES). Il-kwantitajiet li, b'eżenzjoni mill-obbligu ta' ħatt l-art, jistgħu jibqgħu jiġu skartati jenħtieġ li jitnaqqsu minn dik iċ-ċifra ssuġġerita għall-qabdiet totali. Barra minn hekk, l-opportunitajiet tas-sajd għal stokkijiet li għalihom l-ICES jipprovdi biss parir dwar il-ħatt l-art, jenħtieġ li jiġu stabbiliti abbażi ta' dak il-parir.

(6)

Ir-Regolamenti (UE) 2018/973 tal-Parlament Ewropew u tal-Kunsill (2) stabbilixxa pjan pluriennali (MAP) għall-Baħar tat-Tramuntana (“il-MAP tal-Baħar tat-Tramuntana”) u r-Regolament (UE) 2019/472 tal-Parlament Ewropew u tal-Kunsill (3) stabbilixxa MAP għall-Ilmijiet tal-Punent (“il-MAP tal-Ilmijiet tal-Punent”). L-MAPs jistabbilixxu miri u miżuri għall-ġestjoni fit-tul tal-istokkijiet koperti minn dawk l-MAPs. L-opportunitajiet tas-sajd għall-istokkijiet elenkati fl-Artikolu 1(1) ta' dawk ir-Regolamenti (stokkijiet fil-mira) jenħtieġ li jiġu stabbiliti f'konformità mal-firxa ta' valuri tal-mortalità mis-sajd li jirriżultaw f'rendiment massimu sostenibbli (MSY) (meded ta' FMSY), jew f'livell aktar baxx, u f'konformità mas-salvagwardji previsti f'dawk ir-Regolamenti. Il-meded ta' FMSY ġew stabbiliti fil-parir rilevanti tal-ICES. Meta ma tkun disponibbli l-ebda informazzjoni xjentifika xierqa, l-opportunitajiet tas-sajd għall-istokkijiet fil-mira jew għall-istokkijiet imsemmija fl-Artikolu 1(4) ta' dawk ir-Regolamenti (stokkijiet tal-qabdiet aċċessorji) jenħtieġ li jiġu stabbiliti f'konformità mal-approċċ prekawzjonarju, kif stabbilit f'dawk ir-Regolamenti. Skont l-Artikolu 5(3) ta' dawk ir-Regolamenti, meta jiġu stabbiliti l-opportunitajiet tas-sajd għall-istokkijiet tal-qabdiet aċċessorji, jenħtieġ li jitqiesu wkoll kunsiderazzjonijiet tas-sajd imħallta.

(7)

F'konformità mal-Artikolu 7 tal-MAP tal-Baħar tat-Tramuntana u l-Artikolu 8 tal-MAP tal-Ilmijiet tal-Punent, meta l-parir xjentifiku jindika li l-bijomassa ta’ stokk li jbid ta' kwalunkwe wieħed mill-istokkijiet imsemmija fl-Artikolu 1(1) ta' dawk ir-Regolamenti tkun anqas mill-punt ta' referenza tal-bijomassa ta' limitu (Blim) (4), għandhom jittieħdu aktar miżuri ta' rimedju sabiex jiżguraw ir-ritorn rapidu tal-istokk għal livelli ogħla minn dawk li huma kapaċi jipproduċu l-MSY. B'mod partikolari, dawk il-miżuri ta' rimedju jistgħu jinkludu s-sospensjoni tas-sajd fil-mira għall-istokk inkwistjoni u t-tnaqqis adegwat tal-opportunitajiet tas-sajd għal dawk l-istokkijiet jew stokkijiet oħrajn fis-sajd.

(8)

Hemm ċerti stokkijiet li għalihom l-ICES jagħti pariri dwar qabdiet żero. Madankollu, jekk it-TACs għal dawk l-istokkijiet jiġu stabbiliti fil-livell rakkomandat, l-obbligu li jinħattu l-art il-qabdiet kollha, inklużi qabdiet aċċessorji minn dawk l-istokkijiet fis-sajd imħallat, iwassal għall-fenomenu ta' "speċijiet bi kwota limitanti". "Speċijiet bi kwota limitanti" huma speċijiet b'nuqqas ta' kwota li tista' twassal biex bastiment tas-sajd wieħed jew aktar jieqaf mis-sajd anki jekk xorta jkollhom kwota għal speċijiet oħra. Sabiex jinkiseb bilanċ bejn iż-żamma tas-sajd, fid-dawl tal-implikazzjonijiet soċjoekonomiċi potenzjalment serji li jirriżultaw min-nuqqas ta' dan, u l-ħtieġa li jinkiseb status bijoloġiku tajjeb għal dawk l-istokkijiet, filwaqt li titqies id-diffikultà tas-sajd tal-istokkijiet kollha f'sajd imħallat b'MSY, huwa xieraq li jiġu stabbiliti TACs speċifiċi għal qabdiet aċċessorji għal dawk l-istokkijiet. Dawk it-TACs għal qabdiet aċċessorji jenħtieġ li jiġu stabbiliti f'livelli li jiżguraw li l-mortalità għal dawk l-istokkijiet titnaqqas u li jipprovdu inċentivi sabiex tittejjeb is-selettività u sabiex jiġu evitati l-qabdiet aċċessorji ta' dawk l-istokkijiet. Sabiex jitnaqqsu l-qabdiet tal-istokkijiet li għalihom jiġu stabbiliti t-TACs tal-qabdiet aċċessorji, l-opportunitajiet tas-sajd għall-attivitajiet tas-sajd li fihom jinqabad il-ħut minn dawn l-istokkijiet jenħtieġ li jiġu stabbiliti f'livelli li jgħinu sabiex il-bijomassa tal-istokkijiet vulnerabbli tirkupra għal livelli sostenibbli.

(9)

Fil-parir xjentifiku tiegħu għall-bakkaljaw (Gadus morhua) fis-subdiviżjoni 21 tal-ICES (Kattegat), l-ICES jagħti parir ta' qabdiet żero ta' dak l-istokk fl-2024. Barra minn hekk, skont l-ICES, il-bakkaljaw f'dik iż-żona jinqabad prinċipalment bħala qabda aċċessorja fis-sajd għall-iskampu (Nephrops norvegicus). Għalhekk, jekk it-TAC għall-bakkaljaw fil-Kattegat għall-2024 tiġi stabbilita għal żero, dan jirriżulta b'mod partikolari fil-bastimenti li jistadu għall-iskampu f'dik iż-żona jieqfu mis-sajd fl-2024, u b'hekk potenzjalment iwasslu għall-għeluq prematur ta' dan is-sajd. Abbażi tad-data tal-Osservatorju Ewropew tas-Suq tal-Prodotti tas-Sajd u l-Akkwakultura (EUMOFA) (5), il-valur indikattiv (6) tal-qabdiet possibbli tas-sajd għall-iskampu fid-diviżjoni 3a (Skagerrak-Kattegat) fil-limiti tat-TAC għall-2024 huwa stmat għal EUR 98 561 451. Għalhekk huwa xieraq li tiġi stabbilita TAC għall-qabdiet aċċessorji tal-ispeċi bi kwota limitanti tal-bakkaljaw fil-Kattegat.

(10)

Sabiex jiġi ggarantit, sa fejn huwa possibbli, l-użu tal-opportunitajiet tas-sajd f'sajd imħallat f'konformità mal-Artikolu 16(2) tar-Regolament (UE) Nru 1380/2013, huwa xieraq li tiġi stabbilita riżerva komuni għall-iskambji ta' kwoti għall-Istati Membri li ma għandhomx kwota sabiex ikopru l-qabdiet aċċessorji inevitabbli tagħhom.

(11)

F'konformità mal-Artikoli 2(2) u 16(4) tar-Regolament (UE) Nru 1380/2013, għall-istokkijiet li ma humiex koperti mill-MAP tal-Baħar tat-Tramuntana jew mill-MAP tal-Ilmijiet tal-Punent:fejn tkun disponibbli informazzjoni xjentifika adegwata, l-opportunitajiet tas-sajd jenħtieġ li jiġu stabbiliti f'konformità mal-mortalità mis-sajd tal-MSY u fejn tali informazzjoni ma tkunx disponibbli, jenħtieġ li l-opportunitajiet tas-sajd jiġu stabbiliti f'konformità mal-approċċ prekawzjonarju għall-ġestjoni tas-sajd, kif definit fl-Artikolu 4(1), il-punt (8) tar-Regolament (UE) Nru 1380/2013.

(12)

Għal ċerti stokkijiet, il-parir tal-ICES jibqa' validu għal diversi snin, u dak il-parir jibqa' l-aħjar parir xjentifiku disponibbli għall-perjodu kollu tal-għoti tal-pariri. F'dawk il-każijiet, jenħtieġ li jiġu stabbiliti TACs annwali li jkopru l-perjodu kollu tal-għoti tal-pariri (TAC pluriennali). Madankollu, jekk parir ġdid tal-ICES isir disponibbli matul dak il-perjodu, jenħtieġ li jiġi żgurat li t-TAC pluriennali tibqa' konsistenti mal-parir il-ġdid. Barra minn hekk, jenħtieġ li jiġi żgurat li t-tnaqqis annwali miċ-ċifra tal-parir għall-qabdiet totali biex jitqiesu l-eżenzjonijiet mill-obbligu ta' ħatt l-art jibqa' konsistenti mad-data disponibbli.

(13)

L-ispnotta (Dicentrarchus labrax) fid-diviżjonijiet 8a u 8b tal-ICES (il-Golf tal-Biskalja) hija stokk fil-mira taħt il-MAP tal-Ilmijiet tal-Punent. Skont il-parir tal-ICES għall-2024, il-bijomassa ta' dak l-istokk naqset għal taħt l-MSY Btrigger fl-2023 u hija mistennija li tonqos aktar fl-2024 filwaqt li tibqa' ogħla minn Blim. Għalhekk, jenħtieġ li jiġu adottati miżuri ta' rimedju xierqa biex jiġi żgurat ir-ritorn rapidu ta' dak l-istokk għal livelli ogħla minn dawk li kapaċi jipproduċu l-MSY. Għalhekk, Franza u Spanja jenħtieġ li jiżguraw li ħatt l-art kummerċjali u t-tneħħija rikreattiva għal dak l-istokk, li huma għandhom jistabbilixxu għall-2024, ikunu taħt il-valur tal-punt FMSY (7), kif imnaqqas proporzjonalment biex jitqies it-tnaqqis fil-bijomassa, u jadottaw miżuri addizzjonali f'konformità mal-Artikolu 19 tar-Regolament (UE) Nru 1380/2013.

(14)

Jenħtieġ li jissaħħu l-miżuri li jirregolaw is-sajd rikreattiv għall-ispnotta fid-diviżjonijiet 8a u 8b tal-ICES, fid-dawl tal-impatt sinifikanti tagħhom fuq il-bijomassa ta' dak l-istokk u filwaqt li titqies il-bijomassa mnaqqsa. Għalhekk, il-limitu tal-qabda jenħtieġ li jitnaqqas għal ħuta waħda li tinqabad u li tinżamm għal kull sajjied kuljum. Ix-xbieki fissi jenħtieġ li jiġu esklużi, peress li ma humiex selettivi biżżejjed u x'aktarx jaqbdu għadd ta' eżemplari li jaqbżu l-limitu stabbilit.

(15)

L-Artikolu 5(3) tal-MAP tal-Ilmijiet tal-Punent jipprevedi l-ġestjoni tas-sajd imħallat fir-rigward tal-istokkijiet tal-qabdiet aċċessorji b'kont meħud tad-diffikultà tas-sajd tal-istokkijiet kollha bl-MSY fl-istess ħin, speċjalment f'sitwazzjonijiet fejn dan iwassal għall-għeluq prematur tas-sajd. Il-kunsiderazzjonijiet tas-sajd imħallat fil-Bajja ta' Biscay ippubblikati fl-14 ta' Novembru 2023 jindikaw li, jekk is-sawrell jiġi eskluż, il-pollakkju (Pollachius pollachius) huwa l-aktar stokk limitanti għas-sajd demersali fil-Bajja ta' Biscay għal tliet segmenti tas-sajd minn 21. Minħabba d-data soċjoekonomika ppreżentata minn wieħed mill-Istati Membri kkonċernati, li tissuġġerixxi li għall-pollakkju fil-Bajja ta' Biscay u fl-ilmijiet Iberiċi (is-subżona 8 u d-diviżjoni 9a tal-ICES), il-kunsiderazzjonijiet tas-sajd imħallat jindikaw li huwa diffiċli li t-TACs kollha jiġu mistada kompletament, huwa meħtieġ aktar żmien sabiex jiġi vvalutat l-impatt soċjoekonomiku tal-istabbiliment tal-opportunitajiet tas-sajd għall-pollakkju għas-sajjieda attivi f'dak is-sajd imħallat (lingwata komuni (Solea solea) u l-iskampu). Għal dik ir-raġuni, jenħtieġ li għall-ewwel nofs tas-sena 2024 tiġi stabbilita TAC proviżorja għall-pollakkju fil-Bajja ta' Biscay (id-diviżjonijiet 8abde). Abbażi tal-parir tal-ICES tat-30 ta' Ġunju 2023 dwar il-pollakkju fil-Bajja ta' Biscay u fl-ilmijiet Iberiċi, u b'kont meħud tal-istaġjonalità tas-sajd, il-livell ta' dik il-kwota proviżorja jenħtieġ li jiġi stabbilit għal 500 tunnellata mill-1 ta' Jannar 2024 sat-30 ta' Ġunju 2024. Tali TAC proviżorja għandha l-għan li tiżgura li l-attivitajiet tas-sajd ikunu jistgħu jkomplu waqt li tkun qed tiġi vvalutata d-data, sakemm il-Kunsill jistabbilixxi TAC definittiva tal-Unjoni.

(16)

Skont il-parir xjentifiku, il-qabdiet rikreattivi tal-pollakkju fis-subżoni 8, 9, 10 tal-ICES u fl-ilmijiet tal-Unjoni tas-CECAF 34.1.1 (il-Bajja ta' Biscay u l-ilmijiet Iberiċi) mhumiex negliġibbli u għalhekk xieraq li jiġu introdotti limiti għas-sajd rikreattiv tiegħu f'dawk iż-żoni. Sabiex jiġu protetti ż-żoni ta' riproduzzjoni u jiġu limitati l-qabdiet ta' ħut li għadu qed jikber, mill-1 ta' Jannar sat-30 ta' April ma jista’ jinqabad u jinżamm ebda kampjun ta' pollakkju fis-sajd rikreattiv, filwaqt li l-massimu ta' żewġ eżemplari jista' jkun permess għall-bqija tas-sena.

(17)

F'Mejju 2022, l-ICES innota li minkejja l-isforzi tal-Istati Membri għall-irkupru tas-sallura (Anguilla anguilla), ma sar l-ebda progress ġenerali fl-ilħuq tal-objettiv ta' ħarba tal-bijomassa tas-sallura tal-fidda ta' 40 % madwar l-Unjoni kollha, kif meħtieġ mill-Artikolu 2(4) tar-Regolament tal-Kunsill (KE) Nru 1100/2007 (8), u li ma ġiet osservata l-ebda xejra ċara għall-mortalità. F'Novembru 2023, l-ICES ta parir għal darb'oħra li, meta jiġi applikat l-approċċ prekawzjonarju, jenħtieġ li jkun hemm qabdiet żero tas-sallura (Anguilla anguilla) fil-ħabitats kollha u fl-istadji kollha tal-ħajja, tul il-medda naturali tagħha, li tinkludi l-Atlantiku tal-Grigal u l-Mediterran. Dan jikkonċerna kemm il-qabdiet rikreattivi kif ukoll dawk kummerċjali, u jinkludi l-qabdiet ta' frieħ tas-sallura għar-ristokkjar u għall-akkwakultura.

(18)

Ir-Regolament tal-Kunsill (UE) 2023/194 (9) estenda għal sitt xhur il-perjodu ta' għeluq għal kwalunkwe attività tas-sajd tas-sallura kummerċjali fl-ilmijiet tal-baħar u salmastri tal-Unjoni tal-Grigal tal-Atlantiku u tal-Baħar Mediterran, u għall-bastimenti tas-sajd tal-Unjoni fl-ilmijiet tal-baħar kollha tal-Mediterran. Dan ipprojbixxa wkoll is-sajd rikreattiv kollu tas-sallura f'dawk l-ilmijiet. Tqies li perjodu ta' waqfien mis-sajd ta' 6 xhur jipproteġi aħjar l-istokk mill-miżuri tal-Unjoni u dawk nazzjonali implimentati sal-2022. Tqies ukoll li l-perjodu ta' għeluq estiż jippermetti t-tkomplija tal-miżuri ta' ristokkjar, jikkontribwixxi għall-irkupru tal-istokk tas-sallura, u b'hekk ikompli jintlaħaq l-objettiv ta' ħarba ta' mill-inqas 40 % tas-sallura tal-fidda stabbilit fl-Artikolu 2(4) tar-Regolament (KE) Nru 1100/2007. Minħabba l-istat kritiku kontinwu tas-sallura, huwa xieraq li jinżammu dawk il-miżuri fl-2024.

(19)

Il-perjodu ta' migrazzjoni tas-sallura huwa influwenzat minn firxa wiesgħa ta' fatturi ambjentali u bijoloġiċi, u għalhekk jista' jvarja skont l-istadju tal-ħajja tas-sallura, u skont il-ħabitat u ż-żona ġeografika, b'mod partikolari l-istretti. Għalhekk jista' jkun xieraq li jiġu stabbiliti perjodi ta' għeluq differenti, b'mod partikolari għal żoni tas-sajd differenti ta' Stat Membru u għal tipi differenti ta' sajd f'dawk iż-żoni tas-sajd, sabiex jitqiesu dawk l-elementi kif ukoll ix-xejriet tal-migrazzjoni temporali u ġeografika tas-sallura fl-istadji tal-ħajja tal-frieħ tas-sallura u tas-sallura tal-fidda, rispettivament. Jenħtieġ li l-Istati Membri kkonċernati jiddeterminaw il-perjodu jew il-perjodi ta' għeluq rilevanti bbażati fuq dawk l-elementi.

(20)

Fl-ilmijiet tal-baħar tal-Unjoni u l-ilmijiet salmastri tal-Atlantiku tal-Grigal, il-perjodu jew il-perjodi ta' għeluq jenħtieġ li jkopru l-perjodu jew il-perjodi ewlenin ta' migrazzjoni tal-ferħ ta' sallura u tas-sallura tal-fidda, rispettivament, bl-eċċezzjoni ta’ operazzjonijiet tas-sajd imwettqa, b'bastiment tas-sajd jew mingħajru, esklużivament għall-fini ta' investigazzjonijiet xjentifiċi u f'konformità sħiħa mal-kondizzjonijiet stipulati fl-Artikolu 25 tar-Regolament (UE) 2019/1241 tal-Parlament Ewropew u tal-Kunsill (10). Meta jitqiesu l-implikazzjonijiet soċjoekonomiċi potenzjalment severi ta' għeluq sħiħ tas-sajd immirat lejn il-ferħ ta' sallura u s-sallura tal-fidda matul il-perjodu jew il-perjodi ta' migrazzjoni ewlenin tagħhom, l-Istati Membri jistgħu jippermettu s-sajd għas-sallura għal xahar matul dawk il-perjodi. Biex tiġi żgurata l-protezzjoni effettiva tas-sallura tal-fidda li temigra mill-Baħar Baltiku lejn il-Baħar tat-Tramuntana, l-Istati Membri kostali tas-subżona 3 tal-ICES, jiġifieri d-Danimarka, il-Ġermanja, l-Estonja, il-Latvja, il-Litwanja, il-Polonja, il-Finlandja u l-Iżvezja, jenħtieġ li jaqblu dwar perjodi ta' għeluq konsistenti għas-sallura tal-fidda. F'każ li l-Istati Membri kkonċernati ma jkunux jistgħu jaqblu, il-perjodu ta' għeluq għas-sallura tal-fidda fil-Baħar Baltiku jenħtieġ li jkun mill-1 ta' Awwissu sal-31 ta' Jannar.

(21)

Skont ir-Regolament (KE) Nru 1100/2007, ir-ripopolazzjoni tal-ferħ ta' sallura hija miżura ta' konservazzjoni magħżula minn ċerti Stati Membri fil-pjanijiet ta' ġestjoni tas-sallura tagħhom. Sabiex dawk l-Istati Membri jkunu jistgħu jkomplu jimplimentaw dik il-miżura, jistgħu jkunu meħtieġa qabdiet tal-ferħ ta' sallura fl-ilmijiet marini u salmastri tal-Unjoni tal-Atlantiku tal-Grigal fiż-żmien xieraq tas-sena u possibbilment matul il-perjodu jew il-perjodi ta' migrazzjoni ewlenin tagħhom. Għalhekk, l-Istati Membri jistgħu jippermettu li jitkompla s-sajd tal-frieħ tas-sallura għal 50 jum addizzjonali matul il-perjodu jew il-perjodi ta' migrazzjoni ewlenin tal-frieħ tas-sallura.

(22)

Fil-parir xjentifiku tiegħu għal ċerti stokkijiet tal-elażmobranki (rebekkini, klieb il-baħar, raj), l-ICES jirrakkomanda li ma jkunx hemm qabdiet, minħabba l-istat ta' konservazzjoni ħażin tagħhom. Barra minn hekk, tali elażmobranki għandhom rati ta' sopravivenza għoljin meta jintremew. Konsegwentement, il-qabdiet ta' dawk l-istokkijiet jenħtieġ li jiġu skartati aktar milli jinħattu l-art, peress li l-iskartar ma jitqiesx li jżid b'mod sinifikanti l-mortalità mis-sajd tagħhom u saħansitra jappoġġa l-konservazzjoni ta' dawk l-istokkijiet. Għalhekk, is-sajd ta' tali speċi jenħtieġ li jiġi pprojbit, peress li skont l-Artikolu 15(4), il-punt (a), tar-Regolament (UE) Nru 1380/2013, l-obbligu ta' ħatt l-art ma japplikax għal speċijiet li għalihom is-sajd huwa pprojbit. Meta jinqabdu b'mod aċċidentali, jenħtieġ li dawk l-ispeċijiet ma ssirilhomx ħsara u jenħtieġ li jinħelsu minnufih.

(23)

Għal ċerti speċijiet, bħal ċerti speċijiet ta' klieb il-baħar, anke attività limitata tas-sajd tista' twassal għal riskju serju għall-konservazzjoni. Għalhekk, l-opportunitajiet tas-sajd għal tali speċijiet jenħtieġ li jiġu ristretti bis-sħiħ permezz ta' projbizzjoni ġenerali tas-sajd għal dawk l-ispeċijiet.

(24)

Fit-12-il Konferenza tal-Partijiet għall-Konvenzjoni dwar il-Konservazzjoni tal-Ispeċi Migratorji tal-Annimali Selvaġġi (Manila, mit-23 sat-28 ta' Ottubru 2017), ġew inklużi numru ta' speċijiet fil-listi ta' speċijiet protetti fl-Appendiċijiet I u II ta' dik il-Konvenzjoni. Għalhekk, huwa xieraq li tiġi prevista l-protezzjoni ta' dawk l-ispeċijiet fir-rigward tal-bastimenti tas-sajd tal-Unjoni li joperaw fl-ilmijiet kollha u l-bastimenti tas-sajd ta' pajjiżi terzi u li joperaw fl-ilmijiet tal-Unjoni.

(25)

Sabiex jiġi mmassimizzat l-użu sħiħ tal-opportunitajiet tas-sajd, huwa xieraq li tkun permessa l-implimentazzjoni ta' arranġament flessibbli bejn ċerti żoni tat-TAC fejn l-istess stokk bijoloġiku huwa kkonċernat.

(26)

L-Artikoli 3 u 4 tar-Regolament tal-Kunsill (KE) Nru 847/96 (11) jipprevedu flessibbiltà minn sena għal sena għall-kwoti għall-istokkijiet soġġetti kemm għal TACs prekawzjonarji kif ukoll għal dawk analitiċi. Skont l-Artikolu 2 ta' dak ir-Regolament, meta jiġu stabbiliti t-TACs, il-Kunsill għandu jiddeċiedi liema huma l-istokkijiet li għalihom ma għandhomx japplikaw l-Artikoli 3 u 4 ta' dak ir-Regolament, b'mod partikolari abbażi tal-istat bijoloġiku tagħhom. Barra minn hekk, l-Artikolu 15(9) tar-Regolament (UE) Nru 1380/2013 jipprevedi flessibbiltà ulterjuri minn sena għal sena għall-istokkijiet kollha li huma soġġetti għall-obbligu ta' ħatt l-art. Sabiex tiġi evitata flessibbiltà eċċessiva li timmina l-ilħuq tal-objettivi tal-PKS, jenħtieġ li l-flessibbiltà minn sena għal sena għall-kwoti skont l-Artikoli 3 u 4 tar-Regolament (KE) Nru 847/96 u l-Artikolu 15(9) tar-Regolament (UE) Nru 1380/2013 ma tapplikax b'mod kumulattiv. Fl-aħħar nett, il-flessibbiltà minn sena għal sena skont l-Artikolu 15(9) tar-Regolament (UE) Nru 1380/2013 jenħtieġ li, fejn rilevanti, tiġi eskluża abbażi tal-istatus bijoloġiku tal-istokkijiet.

(27)

Meta TAC tiġi allokata lil Stat Membru wieħed biss, jaf ikun xieraq li dak l-Istat Membru jingħata s-setgħa jistabbilixxi dik it-TAC, f'konformità mal-Artikolu 2(1) tat-Trattat dwar il-Funzjonament tal-Unjoni Ewropea (TFUE). Tali setgħa hija xierqa, dment li, meta jiġi ddeterminat il-livell tat-TAC, l-Istat Membru jikkonforma mal-prinċipji u r-regoli tal-PKS. Sabiex tiġi żgurata l-applikazzjoni korretta minn dawk l-Istati Membri tal-prinċipji u r-regoli tal-PKS, il-Kummissjoni tevalwa l-informazzjoni ppreżentata mill-Istat Membru lilha rigward id-determinazzjoni ta' dak il-livell tat-TAC u d-data użata bħala bażi għal dik id-determinazzjoni.

(28)

Huwa meħtieġ li jiġu stabbiliti l-limitazzjonijiet tal-isforz tas-sajd għal-lingwata fil-Kanal tal-Punent (id-diviżjoni 7e tal-ICES) f'konformità mal-Artikolu 12 tal-MAP tal-Ilmijiet tal-Punent.

(29)

Huwa meħtieġ li jiġu stabbiliti l-limiti massimi tal-isforz tas-sajd għall-2024 f'konformità mal-Artikoli 6, 11, 13 u 16 tar-Regolament (UE) 2023/2053 tal-Parlament Ewropew u tal-Kunsill (12) u mal-Anness I tiegħu.

(30)

L-użu tal-opportunitajiet tas-sajd li l-bastimenti tas-sajd tal-Unjoni għandhom għad-dispożizzjoni tagħhom stabbiliti f'dan ir-Regolament huwa soġġett għar-Regolament tal-Kunsill (KE) Nru 1224/2009 (13), u b'mod partikolari l-Artikoli 33 u 34 ta' dak ir-Regolament, dwar ir-reġistrazzjoni tal-qabdiet u tal-isforz tas-sajd u n-notifika tad-data dwar l-eżawriment tal-opportunitajiet tas-sajd. Għalhekk, jeħtieġ jiġu speċifikati l-kodiċijiet li l-Istati Membri għandhom jużaw meta jibagħtu d-data lill-Kummissjoni dwar il-ħatt l-art tal-istokkijiet soġġetti għal dan ir-Regolament.

(31)

Fil-laqgħa annwali tagħha tal-2022, il-Kummissjoni tas-Sajd tal-Atlantiku tal-Grigal (NEAFC) ikkonfermat il-miżuri ta' konservazzjoni għaż-żewġ stokkijiet tar-redfish (Sebastes mentella) (pelaġiku tal-baxx u pelaġiku tal-fond) fil-Baħar Irminger u fl-ilmijiet tal-madwar, li bihom tipprojbixxi sajd dirett għal dawk l-istokkijiet u pprojbiet kwalunkwe attività ta' sostenn. Barra minn hekk, sabiex jitnaqqsu kemm jista' jkun il-qabdiet aċċessorji, l-NEAFC ipprojbiet l-attivitajiet tas-sajd fiż-żona fejn jinġema' r-redfish. Jenħtieġ li dawk il-miżuri jiġu implimentati fid-dritt tal-Unjoni.

(32)

L-NEAFC ma adottatx rakkomandazzjonijiet għall-2024 għall-ħalibatt ta' Greenland (Reinhardtius hippoglossoides) fis-subżoni 1 u 2 tal-ICES. Jenħtieġ li l-kwota tal-Unjoni għall-ħalibatt ta' Greenland fl-ilmijiet internazzjonali tas-subżoni 1 u 2 tal-ICES għall-2024 tiġi stabbilita fil-livell ta' 1 711-il tunnellata. Il-livell tal-kwota tal-Unjoni jikkorrispondi għal 9.25 % tal-livell tal-aħħar parir xjentifiku disponibbli mill-ICES għall-ħalibatt ta' Greenland fis-subżoni 1 u 2 tal-ICES, jiġifieri il-parir għal dak l-istokk ippubblikat mill-ICES fl-2021 li ta l-parir ta’ livell massimu ta’ 18 494 tunnellata kemm għall-2022 kif ukoll għall-2023.

(33)

L-NEAFC adottat limitu tal-qbid għar-redfish (Sebastes mentella) fl-ilmijiet internazzjonali tas-subżoni 1 u 2 tal-ICES għall-2024. Madankollu, sakemm jiġi konkluż l-eżami tal-Unjoni dwar jekk għandhiex toġġezzjona għal dik ir-rakkomandazzjoni tal-NEAFC, b'mod partikolari fir-rigward tad-drittijiet storiċi tas-sajd tal-Unjoni, huwa xieraq li attwalment il-kwota tal-Unjoni għar-redfish (Sebastes spp.) fl-ilmijiet internazzjonali tas-subżoni 1 u 2 tal-ICES tiġi mmarkata bħala "għad trid tiġi stabbilita". Huwa xieraq ukoll li fl-ewwel nofs tal-2024, permezz ta' emenda matul is-sena, l-Unjoni tistabbilixxi dik il-kwota tal-Unjoni waqt li tqis ukoll li s-sajd huwa limitat għall-perjodu mill-1 ta' Lulju sal-31 ta' Diċembru 2024.

(34)

Il-kavalli (Scomber scombrus), l-istokkafixx (Micromesistius poutassou) u l-aringa Atlantu-Skandjana (Clupea harengus) fil-Grigal tal-Atlantiku huma soġġetti għal konsultazzjonijiet mal-Istati kostali dwar il-ġestjoni tas-sajd għal dawk l-istokkijiet, u huma stokkijiet ġestiti wkoll mill-NEAFC. L-Unjoni ħadet sehem f'dawk il-konsultazzjonijiet abbażi tal-pożizzjonijiet tagħha approvati mill-Kunsill fil-5 ta' Ottubru 2023. L-eżitu ta' dawk il-konsultazzjonijiet ġie ddokumentat f'Rekords Maqbula għal Aringa Atlantu-Skandjana fil-Grigal tal-Atlantiku għall-2024 iffirmati fit-13 ta' Ottubru 2023; għall-istokkafixx fil-Grigal tal-Atlantiku għall-2024 iffirmati fit-18 ta' Ottubru 2023; u għall-kavalli fil-Grigal tal-Atlantiku għall-2024 iffirmati wkoll fit-18 ta' Ottubru 2023. Fit-42 laqgħa annwali tagħha fl-2023, l-NEAFC adottat rakkomandazzjonijiet dwar miżuri ta' konservazzjoni u ġestjoni għall-aringi u l-kavalli Atlantu-Skandjani għall-2024. L-NEAFC ma adottatx rakkomandazzjoni dwar miżuri ta' konservazzjoni u ġestjoni għall-istokkafixx għall-2024. Huwa għalhekk xieraq li t-TACs għall-aringi Atlantu-Skandjani u l-kavalli fil-Grigal tal-Atlantiku jiġu stabbiliti fil-livell tal-opportunitajiet tas-sajd maqbula fir-Rekords Maqbula tal-Istati kostali rispettivi u r-rakkomandazzjonijiet tal-NEAFC. Huwa xieraq ukoll li t-TAC għall-istokkafixx fil-Grigal tal-Atlantiku tiġi stabbilita fil-livell tal-opportunitajiet tas-sajd stabbiliti fir-Rekords Maqbula tal-Istati kostali għall-istokkafixx u f'konformità mal-pożizzjoni tal-Unjoni espressa fl-NEAFC.

(35)

Mill-2021 'l hawn, l-Unjoni m'għandhiex aċċess għas-sajd tal-kwota tagħha tal-kavalli fl-ilmijiet Norveġiżi tal-Baħar tat-Tramuntana (MAC/2A4A-N). Sabiex l-Unjoni tuża dik il-kwota, huwa xieraq li jiġu allokati opportunitajiet tas-sajd ġodda għal TAC (MAC/2A34-N) li tkopri l-firxa ġeografika tal-Baħar tat-Tramuntana (MAC/2A34) u tal-Ilmijiet Norveġiżi (MAC/2A4A-N) b'fattur ta' stabbiltà relattiv ġdid. Jenħtieġ li parti mill-opportunitajiet tas-sajd allokati għall-MAC/2A34-N tiġi ttrasferita mid-Danimarka lid-detenturi tal-kwoti fit-TAC tal-Ilmijiet tal-Punent (MAC/2CX14-) abbażi tal-koeffiċjent ta' stabbiltà relattiv eżistenti għal dik it-TAC.

(36)

Fil-laqgħa annwali tagħha tal-2023, il-Kummissjoni Internazzjonali għall-Konservazzjoni tat-Tonn tal-Atlantiku (ICCAT) qablet li għall-2024 żżomm it-TACs stabbiliti għall-2023 għat-tonna tal-Lvant tal-Atlantiku (Thunnus thynnus), għall-alonga tal-Mediterran u l-Alonga tan-Nofsinhar (Thunnus alalunga), il-pixxispad tal-Mediterran, u tat-Tramuntana u tan-Nofsinhar tal-Atlantiku (Xiphias gladius), għall-marlin blu (Makaira nigricans), għall-marlin abjad (Tetrapturus albidus), għat-tonna safra (Thunnus albacares), għat-tonn obeż (Thunnus obesus), kif ukoll l-allokazzjoni għaż-żamma għall-pixxitondu tan-Nofsinhar tal-Atlantiku (Isurus oxyrinchus). L-ICCAT stabbiliet ukoll għall-2024 it-TACs għall-alonga tat-Tramuntana tal-Atlantiku ta' 47 251 tunnellata, għall-ħuta kaħla tat-Tramuntana u tan-Nofsinhar tal-Atlantiku (Prionace glauca) ta' 30 000 u 27 711-il tunnellata, rispettivament. Jenħtieġ li dawk il-miżuri jiġu implimentati fid-dritt tal-Unjoni.

(37)

Sabiex titnaqqas il-mortalità mis-sajd tal-frieħ tat-tonn obeż u tat-tonna safra, l-ICCAT qablet ukoll li żżomm limitu massimu ta' 300 irkaptu sabiex jinġema l-ħut (FADs) għal kull bastiment tas-sajd fl-2024 u perjodu ta' għeluq ta' tnejn u sebgħin jum għall-użu tal-FADs.

(38)

Skont diversi rakkomandazzjonijiet tal-ICCAT, l-Unjoni tista', fuq talba, tittrasferixxi perċentwal tal-kwota mhux użata tagħha tal-istokkijiet tal-ICCAT minn dik ta' qabel l-aħħar jew mis-sena ta' qabel għal sena partikolari, skont ir-regoli għal kull stokk kif stabbiliti mill-ICCAT. Sabiex l-Istati Membri jagħmlu użu minn tali riporti, il-kwantitajiet korrispondenti previsti f'dawk ir-rakkomandazzjonijiet jenħtieġ li jiġu implimentati fid-dritt tal-Unjoni abbażi ta' proposta tal-Kummissjoni malajr kemm jista' jkun, sabiex l-Istati Membri jkunu jistgħu jużaw il-kwoti tal-Unjoni għall-istokkijiet tal-ICCAT fit-totalità tagħhom kif previst mill-ICCAT għall-2024. Sakemm jiġu implimentati dawk ir-rakkomandazzjonijiet fid-dritt tal-Unjoni, jenħtieġ li jiġu stabbiliti kwoti għal Stati Membri individwali għal ċerti stokkijiet abbażi ta' kwota totali tal-Unjoni għall-2024 kif miftiehem mill-ICCAT qabel kwalunkwe aġġustament minħabba sajd eċċessiv jew sajd insuffiċjenti mill-Istati Membri.

(39)

Fil-laqgħa annwali tagħha tal-2023, il-Kummissjoni għall-Konservazzjoni tar-Riżorsi Ħajjin tal-Baħar Antartiku (CCAMLR) adottat limiti ta' qbid għall-ispeċijiet fil-mira u għal dawk aċċessorji għall-perjodu mill-1 ta' Diċembru 2023 sat-30 ta' Novembru 2024. Jenħtieġ li dawk il-miżuri jiġu implimentati fid-dritt tal-Unjoni.

(40)

Fil-laqgħa annwali tagħha tal-2023, il-Kummissjoni dwar it-Tonn tal-Oċean Indjan (IOTC), żammet il-limitazzjoni tal-kapaċità tas-sajd, tal-FADs u tal-bastimenti tal-provvista u l-limitu tal-qbid għat-tonna safra fiż-Żona ta' Kompetenza tal-IOTC. L-IOTC adottat ukoll ir-Riżoluzzjoni 23/04 li tistabbilixxi għall-ewwel darba limitu tal-qbid għat-tonn obeż (Thunnus obesus) għall-2024 u l-2025 fiż-Żona ta' Kompetenza tal-IOTC. Jenħtieġ li dawk il-miżuri jiġu implimentati fid-dritt tal-Unjoni.

(41)

Il-laqgħa annwali tal-Organizzazzjoni Reġjonali għall-Ġestjoni tas-Sajd fin-Nofsinhar tal-Paċifiku (SPRFMO) ser issir mid-29 ta' Jannar sat-2 ta' Frar 2024. Għalhekk, il-miżuri kurrenti fiż-żona tal-Konvenzjoni tal-SPRFMO li huma marbuta b'mod funzjonali mat-TACs jenħtieġ li jinżammu b'mod proviżorju sakemm issir il-laqgħa annwali u jiġu ddeterminati t-TACs għall-2024.

(42)

Fil-laqgħa annwali tagħha tal-2023, il-Kummissjoni Inter-Amerikana għat-Tonn Tropikali (IATTC) iddeċidiet li żżomm il-miżuri kurrenti applikabbli fiż-żona tal-Konvenzjoni IATTC. Jenħtieġ li dawk il-miżuri jiġu implimentati fid-dritt tal-Unjoni.

(43)

Fil-laqgħa annwali tagħha tal-2023, il-Kummissjoni għall-Konservazzjoni tat-Tonna tan-Nofsinhar (CCSBT) adottat it-TAC għat-tonna tan-Nofsinhar (Thunnus maccoyii) għal perjodu ta' tliet snin mill-2024 sal-2026. Jenħtieġ li dik il-miżura tiġi implimentata fid-dritt tal-Unjoni.

(44)

Fil-laqgħa annwali tagħha tal-2023, l-Organizzazzjoni tas-Sajd tal-Atlantiku tax-Xlokk (SEAFO) iddeċidiet li għall-2024 iżżomm it-TACs fiż-żona tal-Konvenzjoni tas-SEAFO stabbiliti għall-2023.

(45)

Il-laqgħa annwali tal-2023 tal-Kummissjoni għas-Sajd fil-Punent tal-Paċifiku u l-Paċifiku Ċentrali (WCPFC) saret mill-4 sat-8 ta' Diċembru 2023. Sakemm l-eżitu ta' dik il-laqgħa jkun disponibbli, il-miżuri attwali fiż-żona tal-Konvenzjoni tad-WCPFC li huma funzjonalment marbuta mat-TACs u mal-għadd massimu ta' bastimenti tas-sajd jenħtieġ li jinżammu proviżorjament sakemm dawk il-miżuri għall-2024 isiru disponibbli.

(46)

Fil-45 laqgħa annwali tagħha fl-2023, l-Organizzazzjoni tas-Sajd fl-Atlantiku tal-Majjistral (NAFO) adottat opportunitajiet tas-sajd għal ċerti stokkijiet fiż-żona tal-Konvenzjoni tan-NAFO għall-2024. Hija adottat ukoll ċerti miżuri għall-2024 li huma funzjonalment marbuta mal-opportunitajiet tas-sajd tal-klamar tal-pinen qosra (Illex illecebrosus) fis-subżoni 3 u 4 tan-NAFO u tal-barbun denbu isfar (Limanda ferruginea) fid-diviżjonijiet 3LNO tan-NAFO, bil-għan li jiġu minimizzati l-livelli ta' qabdiet inċidentali ta' speċijiet mhux fil-mira u li mingħajrhom l-opportunitajiet tas-sajd għal dawk l-istokkijiet ikollhom jitnaqqsu biex jiġu protetti l-ispeċijiet mhux fil-mira. Jenħtieġ li dawk il-miżuri jiġu implimentati fid-dritt tal-Unjoni.

(47)

Fl-10 laqgħa annwali tiegħu fl-2023, il-Ftehim dwar is-Sajd fin-Nofsinhar tal-Oċean Indjan (SIOFA) żamm l-opportunitajiet tas-sajd li kienu ġew adottati qabel għall-istokkijiet koperti minn dak il-Ftehim. Dan adotta wkoll limitu tal-qabdiet aċċessorji għall-mazzola Portugiża (Centroscymnus coelolepis) u emenda l-konfini taż-żoni ta' ġestjoni tal-pixxisinna ta' Del Cano u Williams Ridge (Dissostichus spp.), filwaqt li estenda r-rekwiżiti tal-osservaturi u tat-tikkettar għall-pixxisinna fil-bqija taż-Żona tal-Ftehim. Jenħtieġ li dawk il-miżuri jiġu implimentati fid-dritt tal-Unjoni.

(48)

Skont l-Artikolu 498(2) tal-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, min-naħa waħda, u r-Renju Unit tal-Gran Brittanja u l-Irlanda ta' Fuq, min-naħa l-oħra (14) (il-"Ftehim dwar il-Kummerċ u l-Kooperazzjoni "), l-Unjoni u r-Renju Unit għandu jkollhom konsultazzjonijiet kull sena biex jaqblu, sal-10 ta' Diċembru ta' kull sena, dwar it-TACs għas-sena ta' wara għall-istokkijiet elenkati fl-Anness 35 tal-Ftehim dwar il-Kummerċ u l-Kooperazzjoni. Jekk tali TACs ma jiġux konklużi sal-10 ta' Diċembru, il-Partijiet għandhom minnufih jerġgħu jibdew il-konsultazzjonijiet bil-għan kontinwu li jintlaħaq qbil dwar it-TACs, kif meħtieġ mill-Artikolu 499(1) tal-Ftehim dwar il-Kummerċ u l-Kooperazzjoni.

(49)

Fl-2023, l-Unjoni u r-Renju Unit organizzaw konsultazzjonijiet bilaterali dwar l-istabbiliment ta' għadd kbir ta' TACs għall-2024 għall-istokkijiet elenkati fl-Anness 35 tal-Ftehim dwar il-Kummerċ u l-Kooperazzjoni. Dawk il-konsultazzjonijiet twettqu skont l-Artikolu 498(2), (4) u (6) tal-Ftehim tal-Kummerċ u l-Kooperazzjoni.L-Unjoni ħadet sehem f'dawk il-konsultazzjonijiet abbażi tal-ispeċifikazzjonijiet għall-pożizzjoni tal-Unjoni approvati mill-Kunsill fit-12 ta' Ottubru 2023 u d-dokumenti informali supplimentari sussegwenti, skont l-Artikolu 2 tad-Deċiżjoni tal-Kunsill (UE) 2021/1875 (15). L-eżitu ta’ dawk il-konsultazzjonijiet ġie ddokumentat f'Rekord bil-Miktub iffirmat fis-6 ta' Diċembru 2023 u ġie kkompletat b’addendum fit-8 ta’ Diċembru 2023. Għalhekk, l-opportunitajiet tas-sajd rilevanti jenħtieġ li jiġu stabbiliti fil-livell stabbilit f'dak ir-Rekord bil-Miktub. Il-miżuri l-oħrajn marbuta b'mod funzjonali mal-opportunitajiet tas-sajd stabbiliti wkoll f'dak ir-Rekord bil-Miktub jenħtieġ li jiġu implimentati fid-dritt tal-Unjoni.

(50)

It-TACs għall-istokkijiet tal-baħar fond elenkati fl-Anness 35 tal-Ftehim Kummerċjali u ta' Kooperazzjoni għall-2024 ġew inklużi fir-Regolament (UE) 2023/194 iżda huma mmarkati bħala "għad iridu jiġu stabbiliti". Għalhekk, jenħtieġ li r-Regolament (UE) 2023/194 jiġi emendat u l-opportunitajiet tas-sajd għal dawk l-istokkijiet jiġu stabbiliti fil-livell stabbilit fir-Rekord bil-Miktub tal-konsultazzjonijiet dwar is-sajd bejn l-Unjoni u r-Renju Unit għall-2024.

(51)

L-Unjoni u r-Renju Unit qablu li jenħtieġ li jiġi rispettat daqs massimu ta' 100 cm meta tiġi mmirata l-mazzola griża (Squalus acanthias), biex jiġi skoraġġut is-sajd dirett immirat lejn aggregazzjonijiet ta' ħut femminili matur sabiex jiġi protett komponent ta' dan l-istokk li huwa partikolarment vulnerabbli għall-mortalità mis-sajd. Tali miżura hija marbuta b'mod funzjonali mat-TAC għall-istokk, peress li mingħajr tali miżura il-livell tat-TAC waħdu ma jiżgurax protezzjoni suffiċjenti għall-ħut femminili li jkun qed iwelled, li jikkostitwixxi grupp partikolarment vulnerabbli tal-popolazzjoni. Dik il-miżura dwar id-daqs massimu jenħtieġ li tapplika biss sakemm isir applikabbli att delegat li jintroduċi miżuri korrispondenti.

(52)

L-Unjoni u r-Renju Unit qablu dwar aċċess reċiproku fl-2024 biex jimmiraw għal total inizjali ta' 280 tunnellata ta' alonga tat-Tramuntana fiż-żoni ekonomiċi esklużivi tal-Istati Membri u tar-Renju Unit. Dan jeskludi l-aċċess għaż-żoni koperti mill-Artikolu 5(3) tar-Regolament (UE) Nru 1380/2013.

(53)

Il-miżuri biex jitnaqqsu l-qabdiet inċidentali tal-gadojdi adottati reċentement f'att delegat huma funzjonalment marbuta mat-TACs tal-ispeċijiet maqbuda f'sajd imħallat flimkien mal-gadojdi, bħal merluzz tal-linja sewda, megrims, petriċa kbira u skampu), peress li mingħajr dawk il-miżuri fis-seħħ, il-livelli tat-TAC tal-ispeċijiet fil-mira jenħtieġ li jitnaqqsu biex jiġi żgurat li l-istokkijiet tal-gadojdi ikunu jistgħu jirkupraw.

(54)

Il-miżuri biex jittejjeb l-istatus ta' konservazzjoni tal-paġella ħamra, biex jitnaqqas il-livell ta' qabdiet mhux mixtieqa u biex jiġu protetti aħjar iż-żoni ta' riproduzzjoni u l-frieħ tal-ħut fis-subżoni 6 sa 8 tal-ICES adottati reċentement f'att delegat huma funzjonalment marbuta mat-TAC tal-paġella ħamra, peress li mingħajrhom il-livell tat-TAC jenħtieġ li jitnaqqas aktar biex jiġi żgurat l-irkupru tal-istokk.

(55)

Il-miżuri tekniċi funzjonalment marbuta għall-gadojdi u għall-paġella ħamra għandhom japplikaw biss sakemm l-atti delegati rilevanti li jintroduċu miżuri korrispondenti jsiru applikabbli.

(56)

L-għeluq staġjonali għas-sajd taċ-ċiċċirell b'ċertu rkaptu rmunkat fid-diviżjonijiet 2a, 3a tal-ICES u fis-subżona 4 tal-ICES jenħtieġ li jitkompla sabiex jippermetti l-protezzjoni taż-żoni ta' riproduzzjoni u l-limitazzjoni ta' qabdiet ta' frieħ tal-ħut.

(57)

Fl-2023, l-Unjoni, ir-Renju Unit u n-Norveġja kellhom konsultazzjonijiet trilaterali dwar sitt stokkijiet kondiviżi u ġestiti b'mod konġunt li jinsabu fiż-żoni taħt il-ġuriżdizzjoni tat-tliet partijiet, bl-għan li jintlaħaq qbil dwar il-ġestjoni ta' dawk l-istokkijiet inkluż l-opportunitajiet tas-sajd għall-2024. Dawn il-konsultazzjonijiet saru bejn it-3 ta' Novembru u t-8 ta' Diċembru 2023, abbażi tal-pożizzjoni tal-Unjoni approvata mill-Kunsill fit-12 ta' Ottubru 2023 u ta’ dokumenti informali supplimentari sussegwenti. L-eżitu tal-konsultazzjonijiet ġie ddokumentat f'Rekord Maqbul iffirmat mill-Kapijiet tad-Delegazzjonijiet fit-8 ta' Diċembru 2023. L-opportunitajiet tas-sajd rilevanti jenħtieġ li jiġu stabbiliti fil-livell maqbul mar-Renju Unit u n-Norveġja, flimkien mad-dispożizzjonijiet l-oħra ta’ dak ir-Rekord Maqbul.

(58)

L-Unjoni kellha konsultazzjonijiet bilaterali man-Norveġja dwar stokk (tal-merlangu) kondiviż u ġestit b'mod konġunt fiż-żona ta' Skagerrak, bl-għan li jintlaħaq qbil dwar il-ġestjoni ta' dak l-istokk u dwar l-opportunitajiet tas-sajd għall-2024, kif ukoll dwar l-iskambju ta' kwoti u l-arranġamenti dwar l-aċċess. Dawn il-konsultazzjonijiet saru bejn it-30 ta' Ottubru u t-8 ta' Diċembru 2023, abbażi tal-pożizzjoni tal-UE approvata mill-Kunsill fit-12 ta' Ottubru 2023. L-eżitu tal-konsultazzjonijiet ġie ddokumentat f'Rekords Maqbula. L-opportunitajiet tas-sajd rilevanti jenħtieġ li jiġu stabbiliti fil-livell maqbul man-Norveġja, flimkien mad-dispożizzjonijiet l-oħra ta’ dak ir-Rekords Maqbula.

(59)

L-Unjoni fl-2023 qablet b'mod konġunt mar-Renju Unit u n-Norveġja biex jinżammu l-miżuri ta' rimedju fir-rigward tal-bakkaljaw tal-Baħar tat-Tramuntana (Gadus morhua) sabiex tiġi appoġġata l-ġestjoni sostenibbli fit-tul tal-istokk, f'konformità mal-Artikolu 13 tal-MAP għall-Baħar tat-Tramuntana.

(60)

F'konformità mal-proċedura prevista fil-Ftehim ta' Sħubija dwar is-Sajd Sostenibbli bejn l-Unjoni Ewropea, min-naħa waħda, u l-Gvern ta' Greenland u l-Gvern tad-Danimarka, min-naħa l-oħra, u l-Protokoll li jimplimenta dak il-Ftehim (16), il-Kumitat Konġunt stabbilixxa l-livell tal-opportunitajiet tas-sajd disponibbli għall-Unjoni fl-ilmijiet ta' Greenland fl-2024. Il-livell tal-opportunitajiet tas-sajd disponibbli għall-Unjoni fl-ilmijiet ta' Greenland fl-2024 ġie ddokumentat fil-minuti tal-laqgħa tal-Kumitat Konġunt li saret mill-21 sat-23 ta' Novembru 2023 fi Brussell. Għalhekk, jenħtieġ li l-opportunitajiet tas-sajd rilevanti jiġu stabbiliti fil-livell stipulat f'dawk il-minuti, u b'kont meħud tat-trasferimenti lin-Norveġja skont l-iskambju annwali tal-opportunitajiet tas-sajd. Il-livell tal-opportunitajiet tas-sajd stabbiliti għall-gamblu tat-Tramuntana (Pandalus borealis) fl-ilmijiet ta' Greenland tas-subżoni 5 u 14 tal-ICES ma jinkludix riżerva ta' 150 tunnellata li għandhom jitqiesu bħala stabbiliti fir-Rekord Maqbul tal-konsultazzjonijiet għas-sajd bejn l-Unjoni u n-Norveġja għall-2024.

(61)

It-Trattat tad-9 ta' Frar 1920 relatat ma' Spitsbergen (Svalbard) ("it-Trattat ta' Pariġi tal-1920") jagħti aċċess ugwali u nondiskriminatorju għar-riżorsi fl-inħawi ta' Svalbard lill-partijiet kollha ta' dak it-Trattat, inkluż fir-rigward tas-sajd. Il-pożizzjoni tal-Unjoni dwar dak l-aċċess ġiet stabbilita f'diversi notes verbales lin-Norveġja, li l-aktar reċenti huma datati s-26 ta' Frar 2021, it-28 ta' Ġunju 2021 u l-1 ta' Awwissu 2022. Fir-rigward tal-opportunitajiet tas-sajd għas-snow crab (Chionoecetes spp.) madwar iż-żona ta' Svalbard, huwa xieraq li jiġi stabbilit l-għadd ta' bastimenti tas-sajd li huma awtorizzati jwettqu tali sajd sabiex jiġi żgurat li l-isfruttament tas-snow crab madwar Svalbard ikun konsistenti ma' tali regoli ta' ġestjoni mhux diskriminatorji li jistgħu jiġu stabbiliti min-Norveġja, li tgawdi minn sovranità u ġuriżdizzjoni fiż-żona f'konformità mad-dispożizzjonijiet rilevanti tal-Konvenzjoni tan-Nazzjonijiet Uniti dwar il-Liġi tal-Baħar u t-Trattat ta' Pariġi tal-1920. L-allokazzjoni ta' tali opportunitajiet tas-sajd fost l-Istati Membri hija limitata għall-2024. Huwa mfakkar li fl-Unjoni, ir-responsabbiltà primarja li tiġi żgurata l-konformità mal-liġi applikabbli hija tal-Istati Membri tal-bandiera.

(62)

Fir-rigward tal-opportunitajiet tas-sajd għall-bakkaljaw fil-Grigal tal-Artiku, huwa xieraq li tiġi stabbilita l-kwota tal-Unjoni għall-bakkaljaw fl-ilmijiet ta' Svalbard u fl-ilmijiet internazzjonali tas-subżona 1 u d-diviżjoni 2b tal-ICES abbażi tat-TAC ta' referenza għal dak l-istokk u d-drittijiet storiċi tas-sajd tal-Unjoni. Dik il-kwota tal-Unjoni jenħtieġ li tiġi allokata lill-Istati Membri f'konformità mad-Deċiżjoni tal-Kunsill 87/277/KEE (17), soġġetta għall-adattamenti meħtieġa minħabba l-ħruġ tar-Renju Unit mill-Unjoni kif stabbilit fl-Anness 36, tabella E, għall-Ftehim dwar il-Kummerċ u l-Kooperazzjoni.

(63)

F'konformità mad-Dikjarazzjoni indirizzata lir-Repubblika Bolivarjana tal-Venezwela dwar l-għoti ta' opportunitajiet tas-sajd fl-ilmijiet tal-Unjoni lil bastimenti tas-sajd li jtajru l-bandiera tal-Venezwela fiż-żona ekonomika esklużiva 'l barra mill-kosta tal-Guyana Franċiża, approvata f'isem l-Unjoni permezz tad-Deċiżjoni tal-Kunsill (UE) 2015/1565 (18), jeħtieġ li jiġi stabbilit l-għadd massimu tal-awtorizzazzjonijiet tas-sajd għal-lutjan li huma disponibbli għall-Venezwela fl-ilmijiet tal-Unjoni.

(64)

Sabiex jiġu żgurati kundizzjonijiet uniformi għall-implimentazzjoni ta' dan ir-Regolament, jenħtieġ li jiġu kkonferiti setgħat ta' implimentazzjoni lill-Kummissjoni biex l-Istati Membri individwali jkunu awtorizzati jimmaniġġjaw l-allokazzjonijiet tal-isforz tas-sajd f'konformità ma' sistema ta' kilowatt-jiem, biex tagħti jiem addizzjonali fuq il-baħar għall-waqfien permanenti tal-attivitajiet tas-sajd u għat-titjib tal-kopertura tal-osservaturi xjentifiċi; u biex tistabbilixxi formati ta' spreadsheets għall-ġbir u t-trażmissjoni tal-informazzjoni dwar it-trasferiment tal-jiem fuq il-baħar bejn il-bastimenti tas-sajd li jtajru l-bandiera ta' Stat Membru. Il-Kummissjoni jenħtieġ li teżerċita dawk is-setgħat f'konformità mar-Regolament (UE) Nru 182/2011 tal-Parlament Ewropew u tal-Kunsill (19).

(65)

Minħabba li ċerti dispożizzjonijiet jenħtieġ li jiġu applikati fuq bażi kontinwa, u sabiex tiġi evitata l-inċertezza legali fil-perjodu bejn it-tmiem tas-sena preċedenti u d-data tad-dħul fis-seħħ tar-Regolament li jistabbilixxi l-opportunitajiet tas-sajd għas-sena sussegwenti, id-dispożizzjonijiet ta' dan ir-Regolament li jikkonċernaw il-projbizzjonijiet u l-istaġuni magħluqin jenħtieġ li jkomplu japplikaw fil-bidu tal-2025 sad-dħul fis-seħħ tar-Regolament li jistabbilixxi l-opportunitajiet tas-sajd għall-2025. Għall-istess raġunijiet, id-dispożizzjonijiet li japplikaw mill-1 ta' Jannar 2024 sal-31 ta' Diċembru 2025 jew il-31 ta' Diċembru 2026 jenħtieġ li jkomplu japplikaw fil-bidu tal-2026 jew tal-2027 sad-dħul fis-seħħ tar-Regolament li jistabbilixxi l-opportunitajiet tas-sajd għall-2026 jew għall-2027, rispettivament.

(66)

Biex jiġi evitat li jiġu interrotti l-attivitajiet tas-sajd u biex jiġi żgurat l-għajxien tas-sajjieda, jenħtieġ li dan ir-Regolament jibda japplika mill-1 ta' Jannar 2024. Madankollu, id-dispożizzjonijiet dwar il-limiti tal-isforz tas-sajd jenħtieġ li jibdew japplikaw mill-1 ta' Frar 2024. Barra minn hekk, id-dispożizzjonijiet dwar l-attivitajiet tas-sajd kummerċjali għas-sallura Ewropea fl-ilmijiet marini u salmastri tal-Unjoni tas-subżoni 3, 4, 6, 7, 8 u 9 tal-ICES, u fl-ilmijiet salmastri tal-Unjoni kontigwi jenħtieġ li jibdew japplikaw mill-1 ta' April 2024, sabiex jiġu evitati dispożizzjonijiet li jikkoinċidu mar-Regolament (UE) 2023/194 dwar l-istess suġġett. Minħabba l-urġenza, jenħtieġ li dan ir-Regolament jidħol fis-seħħ fil-jum tal-pubblikazzjoni tiegħu.

(67)

Dan ir-Regolament jenħtieġ li japplika għall-opportunitajiet tas-sajd għall-kavalli fid-diviżjoni 3a tal-ICES, fl-ilmijiet tar-Renju Unit u dawk tal-Unjoni tad-diviżjonijiet 2a, 3b, 3c; fid-diviżjoni 3d u s-subżona 4 tal-ICES kif ukoll fl-ilmijiet Norveġiżi fid-diviżjonijiet 2a u 4a (f'MAC/2A34-N) mill-1 ta' Jannar 2023 sabiex l-Unjoni jkollha aċċess sħiħ għall-kwota tagħha tal-kavalli. Għaldaqstant, tali applikazzjoni retroattiva ma taffettwax il-prinċipji taċ-ċertezza legali jew tal-protezzjoni tal-aspettattivi leġittimi.

(68)

Ċerti miżuri internazzjonali li joħolqu jew li jirrestrinġu l-opportunitajiet tas-sajd għall-Unjoni ġew adottati mill-organizzazzjonijiet reġjonali tal-ġestjoni tas-sajd (RFMOs) rilevanti fl-aħħar tal-2023 u saru applikabbli qabel id-dħul fis-seħħ ta' dan ir-Regolament. Id-dispożizzjonijiet ta' dan ir-Regolament li jimplimentaw tali miżuri fid-dritt tal-Unjoni b'hekk jenħtieġ li japplikaw b'mod retroattiv. B'mod partikolari, peress li l-istaġun tas-sajd fiż-żona tal-Konvenzjoni tas-CCAMLR huwa mill-1 ta' Diċembru sat-30 ta' Novembru, u peress li ċerti opportunitajiet jew projbizzjonijiet tas-sajd fiż-żona tal-Konvenzjoni tas-CCAMLR huma stabbiliti għal perjodu li jibda mill-1 ta' Diċembru 2023, id-dispożizzjonijiet rilevanti ta' dan ir-Regolament jenħtieġ li japplikaw minn dik id-data. Barra minn hekk, l-istaġun tas-sajd għall-pixxisinna fiż-Żona tal-Ftehim tas-SIOFA jibda mill-1 ta' Diċembru sat-30 ta' Novembru, u billi t-TACs għal dak il-grupp ta' speċijiet huma stabbiliti għal perjodu li jibda mill-1 ta' Diċembru 2023, it-TACs jenħtieġ li japplikaw minn dik id-data. Tali applikazzjoni retroattiva ma tippreġudikax il-prinċipju tal-aspettattivi leġittimi peress li huwa pprojbit għall-bastimenti tas-sajd li jtajru l-bandiera tal-Parti Kontraenti li jistadu mingħajr awtorizzazzjoni fiż-żona tal-Konvenzjoni tas-CCAMLR u fiż-Żona tal-Ftehim tas-SIOFA.

(69)

F'konformità mar-regoli tal-ICCAT, l-Istati Membri jenħtieġ li jiżguraw li l-bastimenti tas-sajd tagħhom ma jużawx FADs matul il-15-il jum qabel il-bidu tal-perjodu tal-għeluq, jiġifieri mis-17 ta' Diċembru 2023 'il quddiem. Id-dispożizzjoni ta' dan ir-Regolament li timplimenta dik il-miżura fid-dritt tal-Unjoni b'hekk jenħtieġ li tapplika b'mod retroattiv,