(1)

It-traffikar tal-bnedmin huwa reat gravi, li ħafna drabi jiġi mwettaq fil-qafas tal-kriminalità organizzata, huwa ksur serju tad-drittijiet fundamentali, u huwa pprojbit espliċitament mill-Karta tad-Drittijiet Fundamentali tal-Unjoni Ewropea (il-“Karta”). Il-prevenzjoni u l-ġlieda kontra t-traffikar tal-bnedmin, u l-appoġġ lill-vittmi tiegħu, irrispettivament mill-pajjiż tal-oriġini tagħhom, jibqgħu prijorità għall-Unjoni u għall-Istati Membri tagħha.

(2)

It-traffikar tal-bnedmin għandu diversi kawżi fundamentali. Il-faqar, il-konflitt, l-inugwaljanza, il-vjolenza abbażi tal-ġeneru, in-nuqqas ta’ opportunitajiet ta’ impjieg vijabbli jew ta’ appoġġ soċjali, kriżijiet umanitarji, l-apolidija u d-diskriminazzjoni huma fost il-fatturi ewlenin li jagħmlu lill-persuni, speċjalment lin-nisa, lit-tfal u lil membri ta’ gruppi emarġinati oħra, vulnerabbli għat-traffikar.

(3)

Id-Direttiva 2011/36/UE tal-Parlament Ewropew u tal-Kunsill (3) hija l-istrument legali ewlieni tal-Unjoni dwar il-prevenzjoni u l-ġlieda kontra t-traffikar tal-bnedmin u l-protezzjoni tal-vittmi ta’ dan ir-reat. Dik id-Direttiva tistipula qafas komprensiv biex jiġi indirizzat it-traffikar tal-bnedmin billi jiġu stabbiliti regoli minimi dwar id-definizzjoni ta’ reati kriminali u sanzjonijiet. Tinkludi wkoll dispożizzjonijiet komuni biex jissaħħu l-prevenzjoni tat-traffikar, l-assistenza pprovduta lill-vittmi kif ukoll il-protezzjoni tagħhom, b’kont meħud tal-perspettivi tal-ġeneru, tad-diżabbiltà u tat-tfal, u bl-użu ta’ approċċ iffukat fuq il-vittmi.

(4)

It-traffikar tal-bnedmin jista’ jiġi aggravat fejn jikkoinċidi ma’ diskriminazzjoni bbażata fuq raġunijiet ta’ sess imħallta ma’ raġunijiet oħra ta’ diskriminazzjoni pprojbiti mil-liġi tal-Unjoni. Għalhekk jenħtieġ li l-Istati Membri jagħtu l-attenzjoni dovuta lill-vittmi affettwati minn tali diskriminazzjoni u vjolenza intersezzjonali, u liż-żieda fil-vulnerabbiltà li tirriżulta minnhom, billi jipprovdu miżuri speċifiċi fejn ikunu preżenti forom ta’ diskriminazzjoni li jikkoinċidu. Jenħtieġ li tingħata attenzjoni partikolari lid-diskriminazzjoni bbażata fuq ir-razza u l-oriġini etnika.

(5)

Fil-komunikazzjoni tagħha tal-14 ta’ April 2021 dwar l-Istrateġija tal-UE dwar il-Ġlieda kontra t-Traffikar tal-Bnedmin 2021-2025, il-Kummissjoni stipulat rispons politiku li jadotta approċċ multidixxiplinari u komprensiv għall-prevenzjoni tat-traffikar, mill-protezzjoni tal-vittmi sal-prosekuzzjoni u l-kundanna tat-traffikanti. Dik il-komunikazzjoni kienet tinkludi sensiela ta’ azzjonijiet li jridu jiġu implimentati bl-involviment qawwi tal-organizzazzjonijiet tas-soċjetà ċivili. Sabiex jiġu indirizzati x-xejriet li qed jevolvu fil-qasam tat-traffikar tal-bnedmin, kif ukoll in-nuqqasijiet identifikati mill-Kummissjoni, u biex ikomplu jiżdiedu l-isforzi kontra dan ir-reat, jeħtieġ li tiġi emendata d-Direttiva 2011/36/UE. In-nuqqasijiet identifikati tar-rispons tad-dritt kriminali li jeħtieġu adattament tal-qafas legali huma relatati ma’ reati li jikkonċernaw it-traffikar tal-bnedmin li huma mwettqa fl-interess ta’ persuni ġuridiċi, mas-sistema tal-ġbir ta’ data, mal-kooperazzjoni u l-koordinazzjoni fil-livell tal-Unjoni u dak nazzjonali, u mas-sistemi nazzjonali mmirati lejn id-detezzjoni bikrija tal-vittmi tat-traffikar, l-identifikazzjoni tagħhom, u l-assistenza speċjalizzata u l-appoġġ li jingħataw.

(6)

L-isfruttament tal-maternità surrogata, iż-żwieġ furzat, jew l-adozzjoni illegali jistgħu diġà jiġu koperti mill-kamp ta’ applikazzjoni ta’ reati li jikkonċernaw it-traffikar tal-bnedmin kif definit fid-Direttiva 2011/36/UE, sa fejn il-kriterji kollha li jikkostitwixxu dawk ir-reati huma sodisfatti. Madankollu, minħabba l-gravità ta’ dawk il-prattiki u sabiex tiġi miġġielda ż-żieda kontinwa fl-għadd u fir-rilevanza tar-reati li jikkonċernaw it-traffikar tal-bnedmin imwettqa għal skopijiet oltre l-isfruttament sesswali jew tal-ħaddiema, l-isfruttament tal-maternità surrogata, taż-żwieġ furzat, jew tal-adozzjoni illegali jenħtieġ li jiġu inklużi bħala forom ta’ sfruttament f’dik id-Direttiva, sa fejn jissodisfaw l-elementi kostituttivi tat-traffikar tal-bnedmin, inkluż il-kriterju tal-mezzi. B’mod aktar speċifiku, fir-rigward tat-traffikar għall-isfruttament tal-maternità surrogata, din id-Direttiva tqiegħed fil-mira dawk li jġiegħlu lin-nisa jew iqarrqu bihom biex jaġixxu ta’ ommijiet surrogati. L-emendi għad-Direttiva 2011/36/UE li saru minn din id-Direttiva huma mingħajr preġudizzju għad-definizzjonijiet ta’ żwieġ, adozzjoni, żwieġ furzat u adozzjoni illegali, jew għal dawk ta’ reati relatati magħhom għajr it-traffikar, fejn previst fil-liġi nazzjonali jew fid-dritt internazzjonali. Dawk ir-regoli huma wkoll mingħajr preġudizzju għar-regoli nazzjonali dwar il-maternità surrogata, inkluż id-dritt kriminali jew il-liġi tal-familja.

(7)

It-tfal imqiegħda f’istituzzjonijiet residenzjali u tat-tip magħluqa huma grupp partikolarment vulnerabbli għat-traffikar tal-bnedmin. Huma jistgħu jisfaw vittmi tat-traffikar waqt li jkunu qed jitqiegħdu f’dawk l-istituzzjonijiet, meta jkunu hemm u wara.

(8)

Għadd dejjem akbar ta’ reati li jikkonċernaw it-traffikar tal-bnedmin jitwettqu jew jiġu ffaċilitati permezz ta’ teknoloġiji tal-informazzjoni jew tal-komunikazzjoni. It-traffikanti jużaw frekwentement l-internet u l-media soċjali, biex fost l-oħrajn jirreklutaw, jirreklamaw jew jisfruttaw il-vittmi, jeżerċitaw kontroll fuqhom u jorganizzaw it-trasport tagħhom. L-internet u l-media soċjali jintużaw ukoll biex jitqassmu materjali ta’ sfruttament. It-teknoloġija tal-informazzjoni xxekkel ukoll id-detezzjoni f’waqtha tar-reat u l-identifikazzjoni tal-vittmi u tal-awturi ta’ reat.

(9)

Il-qafas legali eżistenti fid-Direttiva 2011/36/UE diġà jinkludi, fil-kamp ta’ applikazzjoni tad-definizzjoni tat-traffikar tal-bnedmin, reati mwettqa bl-użu ta’ teknoloġiji tal-informazzjoni u tal-komunikazzjoni, pereżempju fir-reklutaġġ u l-isfruttament tal-vittmi, l-organizzazzjoni tat-trasport u l-akkomodazzjoni tagħhom, ir-reklamar tal-vittmi online u l-kuntatt ma’ klijenti potenzjali, il-kontroll tal-vittmi u l-komunikazzjoni bejn l-awturi ta’ reati, inkluż it-tranżazzjonijiet finanzjarji relatati kollha. Sabiex jiġi indirizzat dan il-modus operandi tat-traffikanti, hemm bżonn li l-infurzar tal-liġi jtejjeb il-kapaċitajiet u l-għarfien espert diġitali tiegħu, u jlaħħaq mal-iżviluppi teknoloġiċi. Barra minn hekk, l-Istati Membri li huma mistiedna jikkunsidraw l-użu ta’ miżuri preventivi li jindirizzaw il-kwistjoni tal-abbuż tas-servizzi online għall-fini tat-traffikar tal-bnedmin, b’mod partikolari dawk li għandhom l-għan li jiskoraġġixxu d-domanda.

(10)

Il-livell tal-pieni għat-traffikar jirrifletti l-għajb pubbliku ogħla għal tipi ta’ mġiba aktar serja, u għall-impatti l-aktar dannużi u dewwiema li dawn iħallu fuq il-vittmi. Dan jinkludi l-effett ta’ amplifikazzjoni tad-disseminazzjoni ta’ materjal ta’ sfruttament, inkluż id-disseminazzjoni fi gruppi magħluqa aċċessibbli għal għadd limitat ta’ parteċipanti. Għalhekk, huwa meħtieġ li tiġi prevista bħala ċirkostanza aggravanti, id-disseminazzjoni, permezz ta’ teknoloġiji tal-informazzjoni u tal-komunikazzjoni, ta’ immaġnijiet jew filmati jew materjal simili ta’ natura sesswali li jinvolvi lill-vittma.

(11)

Għalkemm ma hemm l-ebda obbligu li jiżdiedu s-sentenzi, jenħtieġ li l-Istati Membri jiżguraw li l-imħallfin u l-qrati, meta jagħtu sentenzi lit-trasgressuri, ikunu jistgħu jieħdu inkonsiderazzjoni ċ-ċirkostanzi aggravanti li jinsabu f’din id-Direttiva. Tibqa’ fid-diskrezzjoni tal-imħallfin jew tal-qrati li jiddeterminaw jekk iżidux mas-sentenza minħabba ċ-ċirkostanzi aggravanti speċifiċi, fil-qies tal-fatti kollha tal-każ partikolari. Jenħtieġ li l-Istati Membri ma jkunux obbligati jipprevedu ċirkostanzi aggravanti fejn liġi nazzjonali tipprevedi r-reat kriminali tad-disseminazzjoni ta’ immaġnijiet jew filmati jew materjal ieħor simili ta’ natura sesswali li jinvolvu l-vittma, permezz tat-teknoloġiji tal-informazzjoni u tal-komunikazzjoni, ikun punibbli bħala reat kriminali separat u li dan jista’ jwassal għal pieni eħrex skont il-liġi nazzjonali.

(12)

Sabiex jissaħħaħ ir-rispons tal-ġustizzja kriminali għal reati li jikkonċernaw it-traffikar tal-bnedmin imwettqa għall-benefiċċju ta’ persuni ġuridiċi u sabiex jiġi skoraġġut it-twettiq ta’ dawk ir-reati, ir-reġim ta’ sanzjonijiet kontra persuni ġuridiċi jenħtieġ li jiġi ċċarat u allinjat ma’ strumenti oħra tad-dritt kriminali tal-Unjoni. Skont id-Direttivi 2014/23/UE (4), 2014/24/UE (5) u 2014/25/UE (6) tal-Parlament Ewropew u tal-Kunsill, kundanna b’sentenza definittiva għat-tħaddim tat-tfal jew forom oħra ta’ traffikar tal-bnedmin hija raġuni għal esklużjoni mill-parteċipazzjoni fi proċedura ta’ akkwist jew proċedura tal-għoti ta’ konċessjoni. Madankollu, l-Istati Membri jistgħu jiddeċiedu wkoll li jinkludu, fost sanzjonijiet kriminali jew mhux kriminali jew miżuri li jistgħu jiġu imposti fuq persuni ġuridiċi, l-esklużjoni ta’ tali persuni ġuridiċi mill-proċeduri ta’ akkwist jew ta’ konċessjoni, sabiex ikopru wkoll l-akkwist u l-konċessjonijiet taħt il-livelli limitu tad-Direttivi rilevanti.

(13)

Id-Direttiva (UE) 2024/1260 tal-Parlament Ewropew u tal-Kunsill (7) tistabbilixxi regoli minimi dwar l-iffriżar u l-konfiska ta’ mezzi strumentali u r-rikavat minn attività kriminali f’materji kriminali, u hija applikabbli għar-reati kriminali koperti mid-Direttiva 2011/36/UE. Id-dispożizzjonijiet tad-Direttiva 2011/36/UE dwar l-iffriżar u l-konfiska huma għalhekk obsoleti u jenħtieġ li jitħassru.

(14)

Id-Direttiva 2011/36/UE tagħti l-possibbiltà tan-nonprosekuzzjoni u n-nonapplikazzjoni tal-pieni lill-vittmi tat-traffikar fir-rigward ta’ reati kriminali li kienu mġiegħla jwettqu bħala konsegwenza diretta talli kienu soġġetti għat-traffikar. Huwa xieraq li l-kamp ta’ applikazzjoni tad-dispożizzjoni rilevanti jiġi estiż għall-attivitajiet illegali kollha li l-vittmi kienu mġiegħla jwettqu bħala konsegwenza diretta talli kienu soġġetti għat-traffikar, bħal reati amministrattivi marbuta mal-prostituzzjoni, it-talb tal-elemosina, it-tlajjar jew ix-xogħol mhux iddikjarat, jew atti oħra li mhumiex ta’ natura kriminali iżda li huma soġġetti, f’konformità mal-liġi nazzjonali, għal pieni amministrattivi jew pekunarji, sabiex il-vittmi tat-traffikar jiġu mħeġġa aktar jirrapportaw ir-reat jew ifittxu appoġġ u assistenza, u biex ikunu assigurati dwar il-possibbiltajiet li ma jinżammux responsabbli.

(15)

Sabiex tissaħħaħ il-kapaċità nazzjonali għad-detezzjoni u l-identifikazzjoni tal-vittmi fi stadju bikri, u li dawn jiġu riferuti għas-servizzi xierqa ta’ protezzjoni, assistenza u appoġġ, huwa meħtieġ li fl-Istati Membri jiġu stabbiliti mekkaniżmi ta’ riferiment wieħed jew aktar, permezz ta’ liġijiet, regolamenti jew dispożizzjonijiet amministrattivi. L-istabbiliment ta’ mekkaniżmi ta’ riferiment formali u l-ħatra ta’ punt fokali nazzjonali għar-riferiment transkonfinali tal-vittmi huma miżuri essenzjali biex tissaħħaħ il-kooperazzjoni transkonfinali. Jenħtieġ li mekkaniżmu ta’ riferiment ikun qafas trasparenti, aċċessibbli u armonizzat li jiffaċilita d-detezzjoni bikrija, l-identifikazzjoni, l-assistenza għall-vittmi tat-traffikar u l-appoġġ tagħhom, u li jiffaċilita r-riferiment tagħhom lill-organizzazzjonijiet u l-korpi nazzjonali responsabbli. Jenħtieġ li tali qafas jidentifika l-awtoritajiet kompetenti parteċipanti, l-organizzazzjonijiet tas-soċjetà ċivili u partijiet ikkonċernati oħra u jistipula r-responsabbiltajiet rispettivi tagħhom, inkluż il-proċeduri u l-linji ta’ komunikazzjoni. Dawk il-mekkaniżmi ta’ riferiment jistgħu jieħdu l-forma ta’ sett ta’ proċeduri stabbiliti, linji gwida, arranġamenti ta’ kooperazzjoni jew protokolli. Jenħtieġ li mekkaniżmu ta’ riferiment japplika għall-vittmi kollha u għall-forom kollha ta’ reati tat-traffikar filwaqt li titqies il-vulnerabbiltà individwali tal-vittmi. L-Istati Membri huma mħeġġa jkollhom mekkaniżmu wieħed ta’ riferiment fis-seħħ meta l-organizzazzjoni tal-amministrazzjoni pubblika tippermetti dan. Jenħtieġ li l-punt fokali jservi bħala punt ta’ kuntatt għar-riferiment transkonfinali tal-vittmi, fir-relazzjonijiet bejn l-awtoritajiet jew l-istituzzjonijiet responsabbli għall-appoġġ transkonfinali tal-vittmi fid-diversi Stati Membri, iżda mhux bħala punt ta’ kuntatt għall-vittmi nfushom. Il-punti fokali jistgħu jkunu bbażati fuq mekkaniżmi jew strutturi ta’ governanza eżistenti u mhux ser ikollhom jissostitwixxu mekkaniżmi jew hotlines nazzjonali tal-ilmenti.

(16)

Sabiex jittejbu l-assistenza u l-appoġġ għall-vittmi tat-traffikar tal-bnedmin, jenħtieġ li l-Istati Membri jiżguraw li l-vittmi jkollhom aċċess għal postijiet ta’ kenn u akkomodazzjoni sikura mgħammra biex jakkomodaw il-ħtiġijiet speċifiċi tal-vittmi tat-traffikar tal-bnedmin. Sabiex tissaħħaħ is-sikurezza tal-vittmi preżunti jew identifikati, l-Istati Membri huma mħeġġa jirrikjedu li l-persunal li jiġi f’kuntatt fil-postijiet ta’ kenn mal-vittmi tat-traffikar ma jkollux rekord kriminali ta’ reati li jikkonċernaw it-traffikar tal-bnedmin, jew ta’ delitti jew reati oħra li jwasslu għal dubji serji dwar il-kapaċità tiegħu li jassumi rwol ta’ responsabbiltà fir-rigward tal-vittmi.

(17)

Il-persuni b’diżabbiltà, b’mod partikolari n-nisa u t-tfal, jinsabu f’riskju akbar li jisfaw vittmi tat-traffikar. Jenħtieġ li l-Istati Membri jqisu l-bżonnijiet speċifiċi tal-persuni b’diżabbiltà vittmi tat-traffikar meta jipprovdulhom miżuri ta’ appoġġ.

(18)

Jenħtieġ li l-Istati Membri jiżguraw ukoll li l-vittmi jirċievu assistenza irrispettivament min-nazzjonalità jew l-apolidija tagħhom, miċ-ċittadinanza, mill-post ta’ residenza jew mill-istatus ta’ residenza tagħhom, kif ukoll mill-forma ta’ sfruttament tagħhom. Jenħtieġ li l-mira tal-assistenza tkun ir-riintegrazzjoni sħiħa tagħhom fis-soċjetà, li tista’ tinkludi l-aċċess għall-edukazzjoni u t-taħriġ, u l-aċċess għas-suq tax-xogħol, f’konformità mal-liġi nazzjonali, kif ukoll ir-ritorn għal ħajja indipendenti.

(19)

Jenħtieġ li l-Istati Membri jqisu, matul il-proċeduri tal-ażil, is-sitwazzjoni speċifika ta’ vulnerabbiltà tal-vittmi tat-traffikar li jistgħu jkunu fi ħtieġa għal protezzjoni internazzjonali, inkluż, fejn applikabbli, permezz ta’ garanziji proċedurali speċjali f’konformità mar-Regolament (UE) 2024/1348 tal-Parlament Ewropew u tal-Kunsill (8) u bżonnijiet ta’ akkoljenza speċjali f’konformità mad-Direttiva (UE) 2024/1346 tal-Parlament Ewropew u tal-Kunsill (9).

(20)

Sabiex l-Istati Membri jipprevjenu t-traffikar mill-ġdid tal-vittmi fl-Unjoni, importanti li, meta l-vittmi jkunu ttrasferiti skont ir-Regolament (UE) 2024/1351 tal-Parlament Ewropew u tal-Kunsill (10), l-Istati Membri ma jittrasferux lill-vittmi lejn Stat Membru fejn ikun hemm raġunijiet sostanzjali biex wieħed jemmen li l-vittmi, minħabba t-trasferiment lejn dak l-Istat Membru, ser ikunu f’riskju reali ta’ ksur tad-drittijiet fundamentali tagħhom li jammonta għal trattament inuman jew degradanti skont it-tifsira tal-Artikolu 4 tal-Karta.

(21)

Il-vittmi tat-traffikar tal-bnedmin għandhom id-dritt li japplikaw għal protezzjoni internazzjonali jew status nazzjonali ekwivalenti. Jistgħu wkoll jibbenefikaw minn permess ta’ residenza skont id-Direttiva tal-Kunsill 2004/81/KE (11), fejn applikabbli. Għalhekk, jenħtieġ li l-Istati Membri jiżguraw li dawn iż-żewġ proċeduri rilevanti jkunu komplementari u waħda ma tipprekludix lill-oħra.

(22)

Il-persuni apolidi huma f’riskju akbar li jisfaw vittmi tat-traffikar tal-bnedmin. Fl-applikazzjoni ta’ din id-Direttiva, huwa importanti li tingħata attenzjoni partikolari lil dak il-grupp vulnerabbli.

(23)

It-tfal jitqiesu bħala wieħed mill-aktar gruppi vulnerabbli fil-mira tal-organizzazzjonijiet kriminali involuti fit-traffikar tal-bnedmin. Tali gruppi kriminali spiss jisfruttaw lit-tfal billi jirreklutawhom u mbagħad jużawhom biex iwettqu attivitajiet kriminali. Jenħtieġ li l-Istati Membri jippromwovu jew joffru taħriġ regolari u speċjalizzat lill-professjonisti li x’aktarx jiġu f’kuntatt ma’ dawn it-tfal, sabiex jindunaw bihom u jidentifikawhom bħala vittmi.

(24)

Jenħtieġ li kwalunkwe miżura li tillimita l-libertà tat-tfal sabiex tipproteġihom mit-traffikar tkun strettament meħtieġa, proporzjonata u raġonevoli għall-għan tal-protezzjoni tat-tifel jew tifla individwali.

(25)

Sabiex jiffaċilitaw il-ħlas ta’ kumpens lill-vittmi, l-Istati Membri jistgħu jistabbilixxu fond nazzjonali għall-vittmi jew strumenti simili li jistgħu jinkludu liġijiet li jiżguraw il-kumpens lill-vittmi tat-traffikar tal-bnedmin.

(26)

Sabiex jiġi żviluppat rispons ta’ politika koerenti biex jindirizza d-domanda li trawwem it-traffikar tal-bnedmin, u biex ikompli jsaħħaħ u jarmonizza l-isforzi tal-ġustizzja kriminali fl-Istati Membri kollha biex titnaqqas din id-domanda, importanti li jiġi kriminalizzat l-użu tas-servizzi fejn il-vittma tiġi sfruttata biex tagħti tali servizzi u l-utent tas-servizzi jkun jaf li dik il-persuna li qed tagħti s-servizz hija vittma ta’ reat li jikkonċerna t-traffikar tal-bnedmin. L-istabbiliment ta’ dan bħala reat kriminali huwa parti minn approċċ komprensiv biex titnaqqas id-domanda, li għandu l-għan li jindirizza l-livelli għoljin ta’ domanda li jrawmu kull forma ta’ sfruttament. Jenħtieġ li l-kriminalizzazzjoni tolqot biss l-użu ta’ servizzi pprovduti fil-qafas tal-isfruttament li huma koperti mir-reat tat-traffikar tal-bnedmin. Għalhekk, jenħtieġ li r-reat ma japplikax għall-klijenti li jixtru prodotti manifatturati taħt kundizzjonijiet tax-xogħol abbużivi, peress li mhumiex l-utenti ta’ servizz. Din id-Direttiva tistabbilixxi qafas legali minimu f’dan ir-rigward, u l-Istati Membri huma liberi li jadottaw jew iżommu regoli kriminali aktar stretti. Fil-liġi nazzjonali, l-Istati Membri jistgħu jikkriminalizzaw ix-xiri ta’ atti sesswali. Din id-Direttiva hija mingħajr preġudizzju għall-mod li bih l-Istati Membri jittrattaw il-prostituzzjoni fil-liġi nazzjonali tagħhom.

(27)

Din id-Direttiva tikkriminalizza l-użu ta’ servizz ipprovdut minn vittma tat-traffikar tal-bnedmin meta l-utent tas-servizz għandu għarfien li l-persuna li tipprovdi s-servizz hija vittma. Il-kunċett ta’ “għarfien” jenħtieġ li jiġi interpretat f’konformità mal-liġi nazzjonali. F’kull każ, meta jiġi vvalutat jekk l-utent kienx jaf li l-persuna kienet vittma tat-traffikar, u mingħajr preġudizzju għall-indipendenza ġudizzjarja, jenħtieġ li jitqiesu ċ-ċirkostanzi speċifiċi tal-każ. L-għarfien jista’ jiġi dedott minn ċirkostanzi fattwali u oġġettivi. Iċ-ċirkostanzi jistgħu jirrigwardaw, fost l-oħrajn, il-vittmi nfushom, il-kundizzjonijiet li taħthom is-servizzi kellhom jiġu pprovduti mill-vittmi, u fatti speċifiċi li jistgħu jitqiesu bħala sinjali ta’ kontroll tat-traffikant fuq il-vittmi. Fir-rigward taċ-ċirkostanzi relatati mal-vittmi nfushom, jista’ jittieħed kont tan-nuqqas ta’ profiċjenza tagħhom f’lingwa waħda nazzjonali jew reġjonali, ta’ sinjali ċari ta’ ħsara psikoloġika jew fiżika jew ta’ biża’, jew tan-nuqqas ta’ għarfien tagħhom dwar l-ibliet jew il-postijiet fejn jinsabu jew fejn kienu. Fir-rigward taċ-ċirkostanzi relatati mal-kundizzjonijiet li taħthom kellhom jiġu pprovduti s-servizzi, jista’ jittieħed kont tal-istandards tal-għajxien u l-kundizzjonijiet tax-xogħol tal-fornitur tas-servizz, kif ukoll il-kundizzjoni tal-post fejn ġie pprovdut is-servizz. Sinjali ta’ kontroll ta’ traffikant fuq il-vittmi jistgħu jiġu stabbiliti meta jkun hemm miżuri ċari ta’ kontroll estern fuq il-fornituri tas-servizzi, restrizzjoni fuq il-moviment liberu tagħhom, jew mill-fatt li l-fornituri tas-servizzi ma jkunux fil-pussess tal-karti tal-identità jew tal-passaporti nazzjonali tagħhom.

(28)

Jenħtieġ li l-azzjonijiet ta’ prevenzjoni u ta’ tnaqqis fid-domanda jkunu mmirati u differenzjati sabiex jindirizzaw b’effiċjenza l-ispeċifiċitajiet tal-forom varji tat-traffikar. Sabiex jintlaħaq l-objettiv tal-iskoraġġiment u tat-tnaqqis fid-domanda li trawwem it-traffikar, importanti li l-Istati Membri jqisu azzjoni xierqa ulterjuri mmirata lejn utenti potenzjali u attwali, bħall-offerta ta’ kampanji ta’ sensibilizzazzjoni ddiżinjati apposta.

(29)

Fil-kuntest tat-taħriġ, u sabiex tiġi żgurata l-implimentazzjoni effettiva tad-dispożizzjonijiet nazzjonali rigward in-nonprosekuzzjoni jew in-nonapplikazzjoni tal-pieni, jenħtieġ li l-Istati Membri jissensibilizzaw lill-prosekuturi u lill-awtoritajiet tal-infurzar tal-liġi li x’aktarx jiġu f’kuntatt mal-vittmi jew ma’ vittmi potenzjali tat-traffikar tal-bnedmin.

(30)

Sabiex jissaħħaħ ir-rispons tal-politika nazzjonali, jeħtieġ li jiġu stabbiliti koordinaturi nazzjonali kontra t-traffikar jew mekkaniżmi ekwivalenti, u jenħtieġ li l-Istati Membri jkunu jistgħu jistabbilixxu korpi indipendenti. Hija fil-kompetenza tal-Istati Membri li jiddeċiedu liema entitajiet jinħatru jew jiġu stabbiliti bħala koordinaturi nazzjonali kontra t-traffikar, jew bħala mekkaniżmi ekwivalenti jew korpi indipendenti, irrispettivament mit-titolu tagħhom, f’konformità mal-prinċipju ta’ awtonomija proċedurali tal-Istati Membri, dment li tali entitajiet ikollhom il-kompetenzi meħtieġa biex iwettqu l-kompiti previsti f’din id-Direttiva.

(31)

Il-ġbir ta’ data preċiża, koerenti u anonimizzata u l-pubblikazzjoni f’waqtha tad-data u l-istatistika miġbura huma fundamentali biex jiġi żgurat għarfien sħiħ dwar il-firxa tat-traffikar tal-bnedmin fl-Unjoni. L-introduzzjoni ta’ rekwiżit għall-Istati Membri biex jiġbru u jirrapportaw lill-Kummissjoni data statistika dwar it-traffikar tal-bnedmin kull sena b’mod armonizzat hija pass rilevanti biex jittejjeb il-fehim ġenerali dwar il-fenomenu u biex tiġi żgurata l-adozzjoni ta’ politiki u strateġiji infurmati bid-data.

(32)

Bil-ħsieb li jappoġġaw il-politiki nazzjonali tagħhom, jenħtieġ li l-Istati Membri jiżviluppaw ukoll Pjanijiet ta’ Azzjoni Nazzjonali Kontra t-Traffikar.

(33)

Fil-każ tat-tfal, l-Istati Membri huma mħeġġa jiżguraw li s-sistemi nazzjonali għall-protezzjoni tat-tfal jiżviluppaw pjanijiet speċifiċi għall-prevenzjoni tat-traffikar tal-bnedmin, inkluż dak tat-tfal f’istituzzjonijiet residenzjali jew tat-tip magħluqa.

(34)

Minħabba li l-objettivi ta’ din id-Direttiva, jiġifieri l-prevenzjoni u l-ġlieda kontra t-traffikar tal-bnedmin u l-protezzjoni tal-vittmi ta’ dak ir-reat, ma jistgħux jinkisbu b’mod suffiċjenti mill-Istati Membri, iżda jistgħu pjuttost, minħabba l-iskala u l-effetti tal-azzjoni, jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, din id-Direttiva ma tmurx lil hinn minn dak li hu meħtieġ sabiex jinkisbu dawk l-objettivi.

(35)

Din id-Direttiva tirrispetta d-drittijiet fundamentali u tosserva l-prinċipji rikonoxxuti mill-Karta, b’mod partikolari r-rispett u l-protezzjoni tad-dinjità tal-bniedem, il-projbizzjoni tal-iskjavitù, ix-xogħol furzat u t-traffikar tal-bnedmin, id-dritt għall-integrità fiżika u mentali tal-persuna, il-projbizzjoni tat-tortura u ta’ pieni jew trattament inumani jew degradanti, id-dritt għal-libertà u s-sigurtà, il-protezzjoni tad-data personali, il-libertà tal-espressjoni u tal-informazzjoni, il-libertà professjonali u d-dritt għax-xogħol, l-ugwaljanza bejn in-nisa u l-irġiel, id-drittijiet tat-tfal, id-drittijiet tal-persuni b’diżabbiltà, u l-projbizzjoni tat-tħaddim tat-tfal, id-dritt għal rimedju effettiv u għal proċess imparzjali, u l-prinċipji ta’ legalità u proporzjonalità ta’ reati u ta’ pieni. B’mod partikolari, din id-Direttiva għandha l-għan li tiggarantixxi rispett sħiħ għal dawk id-drittijiet u l-prinċipji, li għandhom jiġu implimentati kif meħtieġ.

(36)

F’konformità mal-Artikolu 3 u mal-Artikolu 4a(1) tal-Protokoll Nru 21 dwar il-pożizzjoni tar-Renju Unit u l-Irlanda fir-rigward tal-ispazju ta’ libertà, sigurtà u ġustizzja, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, l-Irlanda nnotifikat, permezz tal-ittra tal-20 ta’ April 2023, ix-xewqa tagħha li tipparteċipa fl-adozzjoni u l-applikazzjoni ta’ din id-Direttiva.

(37)

F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, id-Danimarka mhijiex qed tieħu sehem fl-adozzjoni ta’ din id-Direttiva u mhix marbuta biha jew soġġetta għall-applikazzjoni tagħha.

(38)

F’konformità mad-Dikjarazzjoni Politika Konġunta tat-28 ta’ Settembru 2011 tal-Istati Membri u tal-Kummissjoni dwar id-dokumenti ta’ spjegazzjoni (12), l-Istati Membri impenjaw ruħhom li jżidu man-notifika tal-miżuri ta’ traspożizzjoni tagħhom, f’każijiet ġustifikati, dokument wieħed jew aktar li jispjegaw ir-relazzjoni bejn il-komponenti ta’ direttiva u l-partijiet ekwivalenti tal-istrumenti nazzjonali ta’ traspożizzjoni. Fir-rigward ta’ din id-Direttiva, il-leġiżlatur iqis li t-trażmissjoni ta’ dokumenti ta’ dak it-tip hija ġustifikata.

(39)

Għalhekk, jenħtieġ li d-Direttiva 2011/36/UE tiġi emendata skont dan,

(1)

l-Artikolu 2 huwa emendat kif ġej:

(2)

l-Artikolu 4 huwa emendat kif ġej:

(3)

l-Artikolu 5 huwa emendat kif ġej:

(4)

l-Artikolu 6 huwa sostitwit b’dan li ġej:

(5)

L-Artikolu 7 huwa mħassar;

(6)

l-Artikolu 8 huwa sostitwit b’dan li ġej:

(7)

l-Artikolu 9 huwa emendat kif ġej:

(8)

l-Artikolu 10 huwa emendat kif ġej:

(9)

l-Artikolu 11 huwa emendat kif ġej:

(10)

Jiddaħħal l-artikolu li ġej:

(11)

fl-Artikolu 12, il-paragrafu 1 huwa sostitwit b’dan li ġej:

(12)

fl-Artikolu 13, jiddaħħal il-paragrafu li ġej:

(13)

fl-Artikolu 14, il-paragrafi 1, 2 u 3 huma sostitwiti b’dawn li ġejjin:

(14)

l-Artikoli 17 u 18 huma sostitwiti b’dan li ġej:

(15)

jiddaħħlu l-artikoli li ġejjin:

(16)

l-Artikolu 19 huwa sostitwit b’dan li ġej:

(17)

jiddaħħlu l-artikoli li ġejjin:

(18)

l-Artikolu 20 huwa sostitwit b’dan li ġej:

(19)

fl-Artikolu 23, jiddaħħal il-paragrafu li ġej: