(1)

Il-protezzjoni tat-tfal minn kull forma ta’ vjolenza hija objettiv ewlieni tal-Unjoni Ewropea. L-Artikolu 3(3) tat-Trattat dwar l-Unjoni Ewropea (“TUE”) jistabbilixxi l-objettiv li l-Unjoni tippromwovi l-protezzjoni tad-drittijiet tat-tfal. Dan id-dritt fundamentali huwa fost il-valuri li fuqhom hija bbażata l-Unjoni skont l-Artikolu 2 tat-TUE. F’konformità mal-Artikolu 24 tal-Karta tad-Drittijiet Fundamentali tal-Unjoni Ewropea (“il-Karta”), dan id-dritt jipprevedi li t-tfal għandu jkollhom id-dritt għall-protezzjoni u għall-kura meħtieġa għall-benesseri tagħhom, u li fl-azzjonijiet kollha relatati mat-tfal, kemm jekk jittieħdu minn awtoritajiet pubbliċi jew minn istituzzjonijiet privati, l-aħjar interessi tat-tfal iridu jkunu kunsiderazzjoni primarja. Tali protezzjoni jenħtieġ li ma tkunx prevista biss fl-Unjoni, iżda wkoll fir-relazzjonijiet tal-Unjoni mal-bqija tad-dinja f’konformità mal-Artikolu 3(5) TUE.

(2)

Il-protezzjoni tat-tfal hija wkoll objettiv ewlieni tal-Konvenzjoni tan-Nazzjonijiet Uniti dwar id-Drittijiet tat-Tfal (“il-Konvenzjoni tan-NU”) (1), tal-Konvenzjoni Ewropea għall-Protezzjoni tad-Drittijiet tal-Bniedem u tal-Libertajiet Fundamentali (KEDB) (2), kif ukoll ta’ strumenti legali internazzjonali oħra (3) u strumenti mhux legalment vinkolanti fil-livell tan-NU (4) u fil-livell tal-Kunsill tal-Ewropa (5).

(3)

Ir-rispett u t-twettiq tad-drittijiet tat-tfal huma ċentrali fl-Istrateġija tal-UE dwar id-drittijiet tat-tfal (l-Istrateġija) (6). Fl-istrateġija, il-Kummissjoni impenjat ruħha li “tippreżenta inizjattiva mmirata biex tappoġġa l-iżvilupp u t-tisħiħ ta’ sistemi integrati għall-protezzjoni tat-tfal”, bħala riżultat ewlieni fil-ġlieda kontra l-forom kollha ta’ vjolenza kontra t-tfal u tiżgura l-protezzjoni tat-tfal.

(4)

Fir-riżoluzzjoni tiegħu tal-2021 dwar id-drittijiet tat-tfal (7), il-Parlament Ewropew enfasizza l-importanza li jiġu żviluppati u msaħħa sistemi integrati nazzjonali u transnazzjonali għall-protezzjoni tat-tfal, mgħammra b’riżorsi, skemi ta’ implimentazzjoni u monitoraġġ. Il-konklużjonijiet tal-Kunsill dwar l-Istrateġija tal-UE dwar id-Drittijiet tat-Tfal ta’ Ġunju 2022 appellaw ukoll lill-Istati Membri biex jieħdu approċċ integrat (koordinat u multidixxiplinari) għall-protezzjoni tat-tfal (8). Il-Kumitat tar-Reġjuni enfasizza wkoll il-ħtieġa kruċjali li l-awtoritajiet lokali u reġjonali jingħataw is-setgħa fis-sistemi integrati għall-protezzjoni tat-tfal, fl-opinjoni tiegħu (9).

(5)

Il-konsultazzjoni ta’ aktar minn 1 000 tifel u tifla taħt il-Pjattaforma l-ġdida tal-UE għall-Parteċipazzjoni tat-Tfal (10) dwar il-ħtiġijiet ta’ protezzjoni tagħhom turi li l-protezzjoni tat-tfal għadha mhix ċerta (11). Din ir-Rakkomandazzjoni tibni wkoll fuq konsultazzjoni pubblika miftuħa u sejħa għal evidenza. L-Aġenzija tal-Unjoni Ewropea għad-Drittijiet Fundamentali (“FRA”) wettqet ukoll immappjar tas-sistemi nazzjonali għall-protezzjoni tat-tfal fl-Unjoni (12) u l-funzjonament tagħhom, fuq talba tal-Kummissjoni. L-eżiti ewlenin huma deskritti fid-Dokument ta’ Ħidma tal-Persunal ibbażat fuq l-evidenza li jakkumpanja din ir-Rakkomandazzjoni.

(6)

Sejba ewlenija turi li s-sistemi nazzjonali għall-protezzjoni tat-tfal huma diversi. Dawn is-sistemi huma mfassla skont il-ħtiġijiet speċifiċi, ir-riżorsi allokati, u ffurmati minn fatturi kulturali, soċjali u storiċi speċifiċi, u b’livelli differenti ta’ deċentralizzazzjoni. Madankollu, l-isfidi kondiviżi jikkonċernaw, pereżempju, politiki ta’ prevenzjoni insuffiċjenti u sistemi ta’ identifikazzjoni bikrija, kif ukoll appoġġ f’waqtu, komprensiv (inkluż psikosoċjali) nieqes, b’mod partikolari għat-tfal li jiffaċċjaw ħtiġijiet ta’ protezzjoni li jseħħu b’mod konġunt, u l-monitoraġġ. Ħafna drabi jkun hemm nuqqas ta’ mekkaniżmi ta’ koordinazzjoni biex jiġi żgurat rispons multidixxiplinari effettiv fil-ministeri kollha jew f’saffi differenti ta’ kompetenzi. Id-disponibbiltà u l-koordinazzjoni tar-riżorsi umani u finanzjarji huma wkoll sfida. Abbażi ta’ dan, huma meħtieġa b’mod ċar sistemi aktar effiċjenti u integrati għall-protezzjoni tat-tfal.

(7)

Il-promozzjoni ta’ kultura ta’ tolleranza żero għall-vjolenza kontra t-tfal teħtieġ li jingħalaq id-distakk bejn l-istandards internazzjonali, l-impenji politiċi, u l-azzjoni u li jiġu mobilizzati l-atturi rilevanti kollha fis-soċjetà kollha (13). Dan jenħtieġ li jikkonċerna kwalunkwe forma ta’ vjolenza, jiġifieri l-forom kollha ta’ vjolenza fiżika jew mentali, korriment jew abbuż, negliġenza jew trattament negliġenti, trattament ħażin jew sfruttament, inkluż abbuż sesswali, fiżikament, online, jew f’dinjiet virtwali (“vjolenza kontra t-tfal”). Tali vjolenza tinkludi pereżempju l-vjolenza domestika, it-traffikar tal-bnedmin, l-abbuż sesswali, il-vjolenza sessista, inkluża l-mutilazzjoni ġenitali femminili u ż-żwieġ tat-tfal, kif ukoll il-forom kollha ta’ bullying u kastig korporali. Fid-dawl ta’ dan, din ir-Rakkomandazzjoni prinċipalment għandha l-għan li trawwem l-iżvilupp ta’ sistemi integrati għall-protezzjoni tat-tfal fl-Istati Membri u li ssaħħaħ il-funzjonament tagħhom, u li tippromwovi l-protezzjoni tat-tfal bħala prijorità tal-Unjoni fl-azzjoni esterna tagħha.

(8)

Biex jirrispondu aħjar għall-fehmiet u l-ħtiġijiet tat-tfal, li huwa ċentrali għal din ir-Rakkomandazzjoni, is-sistemi nazzjonali għall-protezzjoni tat-tfal jenħtieġ li jkunu speċifiċi għall-kuntest, iċċentrati fuq it-tfal u implimentati fl-aktar livell xieraq ta’ governanza. L-Istati Membri għandhom jiffaċilitaw il-kooperazzjoni u l-koordinazzjoni transsettorjali bejn l-atturi privati, l-awtoritajiet lokali, reġjonali u nazzjonali u l-istituzzjonijiet, il-korpi u l-organi tal-Unjoni, biex jiżguraw aċċess ugwali għas-servizzi tal-protezzjoni tat-tfal. L-aħjar interessi tat-tfal għandhom jitqiesu bħala kunsiderazzjoni primarja, filwaqt li jinstemgħu l-fehmiet tat-tfal. Approċċ integrat jenħtieġ li jgħaqqad ukoll il-prevenzjoni, it-twissija bikrija, ir-rapportar, l-appoġġ transettorjali u l-monitoraġġ.

(9)

Atturi differenti, f’livelli differenti ta’ kompetenza u setturi, qed ikollhom responsabbiltajiet speċifiċi fil-protezzjoni tat-tfal. Rwoli definiti b’mod ċar u koordinazzjoni mill-qrib huma essenzjali bejn l-atturi rilevanti kollha, b’mod partikolari l-awtoritajiet pubbliċi (fil-livelli kollha, skont il-kompetenzi tagħhom), l-atturi privati u l-organizzazzjonijiet tas-soċjetà ċivili. Il-professjonisti u l-atturi rilevanti jkopru diversi setturi, bħall-edukazzjoni u t-taħriġ (l-għalliema, l-edukaturi, is-servizzi ta’ appoġġ fil-livelli kollha, inkluż l-edukazzjoni u l-kura bikrija tat-tfal), soċjali (eż. il-ħaddiema soċjali, il-fornituri ta’ servizzi, dawk li jagħtu kura residenzjali u foster care), is-saħħa (inkluż is-saħħa mentali), il-ġustizzja u l-infurzar tal-liġi (eż. l-avukati, l-imħallfin, il-pulizija, il-professjonisti li jaħdmu f’istituzzjonijiet magħluqa jew semimagħluqa), l-ażil u l-migrazzjoni, l-awtoritajiet diplomatiċi u konsulari, is-setturi diġitali, tal-isport, tad-divertiment, tal-media jew kulturali, il-finanzi, in-negozju u l-ambjent, kif ukoll il-mexxejja tradizzjonali u reliġjużi. Il-familji u l-komunitajiet għandhom rwol ċentrali fil-protezzjoni tat-tfal, kif ukoll fit-tfal infushom.

(10)

Il-varjetà wiesgħa ta’ għodod għad-dispożizzjoni tal-Istati Membri, inkluż fil-livell tal-Unjoni (il-leġiżlazzjoni, il-politiki u l-finanzjament), tista’ tgħin biex is-sistemi għall-protezzjoni tat-tfal isiru aktar integrati u robusti. Bħala tali, din ir-Rakkomandazzjoni tibni fuq l-acquis rilevanti tal-Unjoni relatat mad-drittijiet tat-tfal kif ukoll azzjonijiet mhux vinkolanti meħuda f’dan il-qasam (14). Din għandha l-għan li ġġib approċċ olistiku u trażversali għall-protezzjoni tat-tfal, billi tiġbor flimkien il-leġiżlazzjoni u l-azzjoni diġà eżistenti biex is-sistemi ta’ protezzjoni tat-tfal jaħdmu b’mod aktar integrat, iċċentrat fuq it-tfal.

(11)

Il-promozzjoni tal-ugwaljanza u l-inklużjoni fis-soċjetajiet tagħna hija għodda importanti għall-prevenzjoni tal-vjolenza. It-tfal b’karatteristiċi relatati ma’ kawżi ta’ diskriminazzjoni huma aktar probabbli li jiffaċċjaw il-bullying. Pereżempju, it-tfal b’diżabilità għandhom riskju ogħla li jkunu vittmi ta’ vjolenza u abbuż kemm fl-ambjent tad-dar tagħhom kif ukoll fl-istituzzjonijiet (15). 11 % tat-tfal LGBTI ta’ bejn il-15 u s-17-il sena esperjenzaw attakk fiżiku jew sesswali minħabba li kienu LGBTI fil-ħames snin qabel l-istħarriġ tal-2019 (16). It-tfal li jkunu xhieda ta’ atti ta’ razziżmu u jesperjenzaw awtoċensura fl-iżvelar tal-identità tagħhom huma aktar probabbli li jiżviluppaw problemi soċjoemozzjonali minn dawk li ma jkunux. Dan huwa partikolarment minnu għat-tfal Rom, li spiss jiffaċċjaw diskriminazzjoni, antiżingariżmu u esklużjoni soċjoekonomika fil-ħajja ta’ kuljum tagħhom (17). Għalhekk huwa essenzjali li s-sistemi integrati għall-protezzjoni tat-tfal ikunu inklużivi, filwaqt li jiġi żgurat li t-tfal kollha dejjem jiġu trattati b’mod ugwali u mingħajr diskriminazzjoni f’konformità mal-ħames strateġiji tal-Unjoni ta’ ugwaljanza tal-Kummissjoni (18), l-Istrateġija tal-UE dwar il-Ġlieda kontra l-Antisemitiżmu u s-Sostenn tal-Ħajja Lhudija (19) u l-Pjan ta’ Azzjoni dwar l-Integrazzjoni u l-Inklużjoni (20). Il-Komunikazzjoni Konġunta dwar l-ebda post għall-mibegħda għandha l-għan li żżid l-isforzi tal-UE fil-ġlieda kontra l-mibegħda fil-forom kollha tagħha (21).

(12)

Is-saħħa mentali u l-appoġġ psikoloġiku huma elementi kostituttivi fi kwalunkwe stadju tal-protezzjoni tat-tfal. Il-Komunikazzjoni tal-Kummissjoni dwar approċċ komprensiv għas-saħħa mentali (22) tiffoka fuq it-tisħiħ tas-saħħa mentali tat-tfal. Il-Kummissjoni tirrikonoxxi t-tfulija bħala stadju determinanti għas-saħħa mentali tul il-ħajja kollha. F’approċċ ta’ skola sħiħa għall-benesseri, is-saħħa mentali u l-lingwa mhux vjolenti huma kruċjali għall-prevenzjoni tal-bullying, inkluż il-bullying ċibernetiku, u l-vjolenza, f’kollaborazzjoni mal-professjonisti tas-saħħa mentali u l-familji. Dan huwa enfasizzat b’mod partikolari mill-Grupp ta’ Esperti tal-Kummissjoni dwar ambjenti ta’ apprendiment ta’ appoġġ għal gruppi f’riskju ta’ progress insuffiċjenti u għall-appoġġ tal-benesseri fl-iskola (23), li jikkontribwixxi għall-kisba taż-Żona Ewropea tal-Edukazzjoni sal-2025 (24). Din il-ħidma tappoġġa l-implimentazzjoni tar-Rakkomandazzjoni tal-Kunsill tat-28 ta’ Novembru 2022 dwar il-Perkorsi għas-Suċċess fl-Iskola (25).

(13)

Wieħed mid-determinanti ewlenin tal-esklużjoni soċjali tat-tfal huwa l-aċċess mhux ugwali għal servizzi ewlenin. Dawn huma essenzjali għall-benesseri tat-tfal u għall-iżvilupp tal-ħiliet soċjali, konjittivi u emozzjonali tagħhom. Il-Pilastru Ewropew tad-Drittijiet Soċjali (26), fil-prinċipju 11, jiddikjara li t-tfal għandhom id-dritt għal edukazzjoni u kura bikrija tat-tfal affordabbli ta’ kwalità tajba; id-dritt għall-protezzjoni mill-faqar kif ukoll li t-tfal minn sfondi żvantaġġati jkollhom id-dritt għal miżuri speċifiċi biex itejbu l-opportunitajiet indaqs. Barra minn hekk, ir-Rakkomandazzjoni tal-Kunsill (UE) 2021/1004 (27) għal Garanzija Ewropea għat-Tfal tistieden lill-Istati Membri jipprevjenu u jiġġieldu l-esklużjoni soċjali billi jiggarantixxu aċċess effettiv tat-tfal fil-bżonn għal sett ta’ servizzi ewlenin, bħall-edukazzjoni, il-kura tas-saħħa u l-akkomodazzjoni. Dan jikkonċerna b’mod partikolari tfal li ġejjin minn ambjenti familjari prekarji, vjolenti u abbużivi. Il-Pilastru Ewropew tad-Drittijiet Soċjali, il-Garanzija Ewropea għat-Tfal u l-Istrateġija Ewropea għall-Kura (28) jippreżentaw qafas ta’ politika komprensiv tal-UE biex jiġi żgurat l-aċċess għal servizzi bażiċi għat-tfal f’sitwazzjonijiet vulnerabbli jew minn sfondi żvantaġġati. Ir-Rakkomandazzjoni tal-Kunsill dwar l-edukazzjoni u l-kura bikrija tat-tfal (29) tappoġġja wkoll lill-Istati Membri fl-isforzi tagħhom biex itejbu l-aċċess għall-edukazzjoni u l-kura bikrija tat-tfal u l-kwalità tagħhom. L-Istrateġija tal-UE għaż-Żgħażagħ 2019–2027 (30) fakkret li terz taż-żgħażagħ fl-Ewropa jinsabu f’riskju ta’ faqar u esklużjoni soċjali, li għandu impatt fuq it-tgawdija tad-drittijiet soċjali tagħhom. Ħafna għadhom jiffaċċjaw diversi forom ta’ diskriminazzjoni, jesperjenzaw preġudizzju u reati ta’ mibegħda. Għalhekk huwa kruċjali li jiġu indirizzati d-disparitajiet u ssir ħidma biex jiġu żgurati opportunitajiet indaqs għall-iżgħar ġenerazzjonijiet fl-Ewropa, inklużi dawk l-aktar emarġinati u esklużi.

(14)

L-abbuż u l-isfruttament sesswali tat-tfal huwa reat li qed jevolvi u li qed jiżdied fil-frekwenza fl-Unjoni. Din ir-Rakkomandazzjoni tirrifletti l-importanza tal-impenn tal-Unjoni li tipproteġi lit-tfal kontra l-abbuż sesswali tat-tfal, kemm online kif ukoll offline. L-Istrateġija tal-UE għal ġlieda aktar effettiva kontra l-abbuż sesswali tat-tfal (31) tieħu perspettiva olistika dwar dan ir-reat, filwaqt li tingrana l-għodod kollha disponibbli fil-livell tal-UE, kemm leġiżlattivi kif ukoll mhux leġiżlattivi, biex tipprevjeni u tiġġieled dawn ir-reati u tipprovdi assistenza lill-vittmi, filwaqt li timmobilizza l-partijiet ikkonċernati rilevanti kollha, mill-awtoritajiet pubbliċi għas-settur privat. Bħala parti minn din l-Istrateġija, il-Kummissjoni adottat proposta għal Regolament għall-prevenzjoni u l-ġlieda kontra l-abbuż sesswali tat-tfal (32), li jobbliga lill-fornituri tas-servizzi online jipprevjenu d-disseminazzjoni ta’ materjal ta’ abbuż sesswali tat-tfal u l-grooming tat-tfal. Id-Direttiva dwar l-Abbuż Sesswali tat-Tfal (33) tipprevedi definizzjonijiet ta’ reati kriminali u sanzjonijiet fil-qasam tal-abbuż u l-isfruttament sesswali tat-tfal u tistabbilixxi obbligi għall-Istati Membri fir-rigward tal-prevenzjoni ta’ dawk ir-reati u l-assistenza u l-appoġġ għall-vittmi. Bħala parti mill-Istrateġija, il-Kummissjoni adottat proposta għar-reviżjoni ta’ din id-Direttiva (34).

(15)

It-tfal iridu jiġu protetti kemm f’ambjenti fiżiċi kif ukoll f’dawk diġitali minn riskji bħal bullying (ċibernetiku) u fastidju. Dan huwa enfasizzat b’mod partikolari fil-konklużjonijiet tal-Kunsill dwar l-awtonomizzazzjoni diġitali biex jiġu protetti u infurzati d-drittijiet fundamentali fl-era diġitali (35) u dwar l-appoġġ għall-benesseri fl-edukazzjoni diġitali (36). L-Istrateġija Ewropea għal Internet Aħjar għat-Tfal Plus (37) (BIK+) għandha l-għan li tiżgura li t-tfal jiġu protetti, rispettati u mogħtija s-setgħa online fid-deċennju diġitali l-ġdid, filwaqt li l-protezzjoni tal-minorenni hija ta’ tħassib ewlieni fil-qafas leġiżlattiv u ta’ politika, pereżempju l-Att dwar is-Servizzi Diġitali (38), id-Direttiva dwar is-Servizzi tal-Media Awdjoviżiva (39), ir-Regolament Ġenerali dwar il-Protezzjoni tad-Data (40), u l-inizjattiva tal-UE dwar il-Web 4.0 u d-dinjiet virtwali (41). Taħt l-umbrella BIK+, il-Kummissjoni tkompli tiġġieled kontra l-bullying ċibernetiku, b’mod partikolari permezz tal-ħidma tan-network kofinanzjat mill-UE ta’ Ċentri għal Internet Aktar Sikur (SICs) li jipprovdu linji telefoniċi għall-għajnuna, kif ukoll taħriġ u riżorsi li għandhom jintużaw fl-ambjenti tal-edukazzjoni formali u informali.

(16)

Is-sistemi ġudizzjarji nazzjonali tal-Istati Membri għandhom iqisu l-ħtiġijiet tat-tfal bħala vittmi, persuni suspettati, akkużati jew ikkundannati, xhieda jew bħala partijiet oħra għal proċedimenti legali, biex jiffaċilitaw l-eżerċizzju effettiv tad-drittijiet tagħhom. Id-Direttiva dwar id-Drittijiet tal-Vittmi (42), id-Direttiva dwar is-Salvagwardji Proċedurali għal tfal li huma persuni suspettati jew akkużati fi proċedimenti kriminali (43), u l-Istrateġija tal-UE dwar id-drittijiet tal-vittmi (2020–2025) (44) jistabbilixxu b’mod espliċitu jew għandhom l-għan li jippromwovu drittijiet u salvagwardji speċifiċi għat-tfal koperti minnhom. Huwa meħtieġ approċċ immirat u integrat bejn diversi aġenziji biex jiġu appoġġati u protetti l-vittmi tfal, b’servizzi adattati għall-età, għall-vittmi tal-kriminalità. Għandu jiġi adottat approċċ multidixxiplinari għal tfal li huma suspettati jew persuni akkużati, b’mod partikolari għall-valutazzjoni individwali taċ-ċirkostanzi, il-ħtiġijiet u l-vulnerabbiltajiet speċifiċi tat-tfal. Din ir-Rakkomandazzjoni tirrifletti wkoll l-importanza tar-Regolament dwar il-Manteniment (45) u tar-Regolament Brussell IIb (46), billi ssaħħaħ il-kooperazzjoni ġudizzjarja transfruntiera fl-Unjoni f’materji ċivili relatati mat-tfal. L-awtoritajiet Ċentrali maħtura skont ir-Regolament Brussell IIb għandhom rwol fl-għoti ta’ assistenza f’każijiet transfruntiera ta’ protezzjoni tat-tfal. It-tfal huma wkoll vittmi tat-traffikar tal-bnedmin għall-forom kollha ta’ sfruttament (47). It-tfal vittmi tat-traffikar huma meqjusa bħala partikolarment vulnerabbli skont id-Direttiva Kontra t-Traffikar (48) u huma l-enfasi speċifika tal-Istrateġija tal-UE kontra t-traffikar tal-bnedmin (2021–2025). Il-helplines għat-tfal (116 111), il-hotlines għat-tfal neqsin (116 000) u helplines u hotlines nazzjonali oħra (għat-tfal) għandhom rwol fis-sistemi tal-protezzjoni tat-tfal.

(17)

Il-protezzjoni tad-drittijiet tat-tfal migranti, inklużi t-tfal li mhumiex akkumpanjati u li qed ifittxu protezzjoni internazzjonali, teħtieġ sforzi kontinwi biex jiġi indirizzat it-tħassib. Il-vjolenza hija theddida ta’ kuljum għat-tfal li jivvjaġġaw, speċjalment dawk li jivvjaġġaw mhux akkumpanjati jew li huma separati mill-familji tagħhom (49). It-tfal migranti u refuġjati jinsabu fi stat ta’ vulnerabbiltà partikolari u jeħtieġu protezzjoni speċifika u xierqa, kif enfasizzat fil-Komunikazzjoni dwar il-protezzjoni tat-tfal migranti (50). Il-vulnerabbiltà tat-tfal tiġi aggravata meta jkunu tfal mhux akkumpanjati jew separati. Wara l-gwerra ta’ aggressjoni tar-Russja kontra l-Ukrajna, il-Kummissjoni impenjat ruħha bis-sħiħ li tappoġġa lill-Istati Membri biex jipproteġu lit-tfal spostati mill-Ukrajna lejn it-territorju tal-UE (51). Dan jinkludi l-appoġġ għall-hotlines tat-tfal neqsin u l-helplines għat-tfal, kif ukoll l-għajnuna biex tiġi żgurata l-inklużjoni tagħhom fis-sistemi edukattivi nazzjonali u l-għoti ta’ gwida lill-Istati Membri biex jgħinu fl-iżgurar tal-konnessjoni rapida tat-tfal spostati mas-sistemi nazzjonali għall-protezzjoni tat-tfal (52).

(18)

Il-Patt dwar il-Migrazzjoni u l-Ażil, li qed jistenna l-adozzjoni finali mill-Kunsill (53), jintroduċi salvagwardji u obbligi addizzjonali dwar il-protezzjoni tat-tfal li se jkollhom jiġu operazzjonalizzati qabel ma jsir applikabbli. L-aħjar interessi tat-tfal jibqgħu ċentrali fl-acquis tal-UE dwar l-Ażil, fejn irid jkun kunsiderazzjoni primarja. L-Istati Membri għandhom jidentifikaw u jakkomodaw kwalunkwe dispożizzjoni speċjali li t-tfal li jfittxu l-ażil jista’ jkollhom bżonn wara li jaqsmu l-fruntiera, filwaqt li jqisu l-kontinwità u l-istabbiltà tal-kura. Il-Patt iqassar l-iskadenzi għall-ħatra tar-rappreżentanti tat-tfal u jsaħħaħ l-istandards relatati mat-taħriġ, il-kwalifiki u s-sorveljanza tagħhom, filwaqt li jħaddan bl-istess mod il-ħtieġa li jitqiesu l-fehmiet tat-tfal u tiġi pprovduta informazzjoni apposta għat-tfal. Dan iqassar l-iskadenzi relatati mal-aċċess tat-tfal kollha għall-edukazzjoni u jespandi l-aċċess tat-tfal għall-kura tas-saħħa sabiex jirċievu l-istess tip ta’ kura tas-saħħa kif ipprovduta liċ-ċittadini tagħhom stess li huma minorenni. Dan jinkludi garanziji aktar b’saħħithom għall-minorenni fir-rigward tad-detenzjoni, filwaqt li jispeċifika li, bħala regola, jenħtieġ li t-tfal ma jiġux detenuti. Kif enfasizzat fil-Pjan ta’ Azzjoni dwar l-Integrazzjoni u l-Inklużjoni (54), it-tranżizzjoni lejn l-appoġġ għall-ħajja adulta hija aspett essenzjali ieħor li għandu jitqies fis-sistema tal-protezzjoni tat-tfal, sabiex tiġi żgurata l-aħjar tranżizzjoni u l-aktar waħda sostenibbli.

(19)

L-Unjoni tipprevedi bosta opportunitajiet ta’ finanzjament biex tikkontribwixxi għall-protezzjoni tat-tfal minn kull forma ta’ vjolenza. Il-fondi tal-Unjoni huma disponibbli biex jappoġġaw l-iżvilupp u t-tisħiħ ta’ sistemi integrati għall-protezzjoni tat-tfal fl-Istati Membri u miżuri rilevanti oħra. Biex tiffaċilita n-navigazzjoni ta’ programmi differenti, il-Kummissjoni stabbiliet gateway unika għall-fondi tal-Unjoni u tippermetti lill-utenti jsibu opportunitajiet ta’ finanzjament rilevanti (55). Il-benefiċjarji tal-finanzjament tal-Unjoni huma obbligati jirrispettaw il-valuri, il-prinċipji, il-liġi applikabbli u d-dispożizzjonijiet kuntrattwali tal-Unjoni meta jimplimentaw tali finanzjament. Il-Kummissjoni implimentat miżuri biex tappoġġja l-konformità u tindirizza ksur possibbli. Barra minn hekk, għall-fondi tal-UE koperti mir-Regolament dwar Dispożizzjonijiet Komuni (56), l-Istati Membri huma meħtieġa jissodisfaw il-kundizzjonijiet abilitanti orizzontali dwar il-Karta kif ukoll dwar il-Konvenzjoni tan-NU dwar id-Drittijiet ta’ Persuni b’Diżabilità (UNCRPD). Għaldaqstant, l-Istati Membri huma meħtieġa jistabbilixxu mekkaniżmi effettivi biex jiżguraw li l-programmi appoġġati minn dawk il-fondi tal-Unjoni u l-implimentazzjoni tagħhom ikunu konformi mal-Karta u l-UNCRPD.

(20)

Il-Kummissjoni tipprovdi wkoll appoġġ finanzjarju ddedikat għall-prevenzjoni u l-ġlieda kontra l-vjolenza fuq it-tfal, il-vjolenza abbażi tal-ġeneru kontra l-bniet, u l-vjolenza domestika, u biex tipproteġi lill-vittmi ta’ tali vjolenza, taħt il-fergħa Daphne tal-Programm dwar iċ-Ċittadini, l-Ugwaljanza, id-Drittijiet u l-Valuri (“CERV”) (57). Il-linja tal-Ugwaljanza, id-Drittijiet u l-Ugwaljanza bejn is-Sessi tas-CERV tipprovdi aktar opportunitajiet ta’ finanzjament għall-promozzjoni tad-drittijiet tat-tfal u l-parteċipazzjoni tat-tfal, u għall-ġlieda kontra d-diskriminazzjoni li jiffaċċjaw ċerti gruppi ta’ tfal. Il-programm dwar il-Ġustizzja (58) jappoġġa wkoll il-protezzjoni tat-tfal b’opportunitajiet ta’ finanzjament b’mod partikolari fil-qasam tal-ġustizzja apposta għat-tfal.

(21)

L-Istrument ta’ Appoġġ Tekniku (59) jipprovdi għarfien espert tekniku mfassal apposta fuq talba għat-tfassil u l-implimentazzjoni ta’ riformi strutturali fl-Istati Membri. Dan jinkludi l-oqsma tal-edukazzjoni, is-servizzi soċjali, il-migrazzjoni u l-ġestjoni tal-fruntieri, is-saħħa u l-ġustizzja, pereżempju l-appoġġ għall-implimentazzjoni tad-djar tat-tfal (Barnahus (60)). Is-sistemi integrati għall-protezzjoni tat-tfal huma wkoll parti minn inizjattiva ewlenija ta’ appoġġ tekniku tal-2024 dwar it-Tisħiħ tad-Demokrazija u l-Istat u d-Dritt (61). Ir-riformi transsettorjali jistgħu jindirizzaw il-faqar u l-esklużjoni soċjali fost it-tfal taħt l-inizjattiva ewlenija dwar l-implimentazzjoni tal-Garanzija Ewropea għat-Tfal, filwaqt li joffru l-possibbiltà li jiġi pprovdut appoġġ tekniku multinazzjonali.

(22)

Għadd ta’ programmi oħra ta’ finanzjament tal-Unjoni jistgħu jkopru tħassib speċifiku ieħor relatat mal-protezzjoni tat-tfal u l-benesseri tat-tfal. Dan jista’ jindirizza b’mod partikolari s-saħħa mentali tat-tfal, it-tilqim u l-prevenzjoni u l-kura tal-kanċer fit-tfulija taħt il-programm EU4Health (62). Il-faqar u l-esklużjoni soċjali fost it-tfal huma koperti mill-Fond Soċjali Ewropew Plus (63); it-traffikar tat-tfal u l-abbuż sesswali tat-tfal taħt il-Fond għas-Sigurtà Interna (64); appoġġ għall-ażil, għall-integrazzjoni jew għar-ritorn immirat lejn tfal mhux tal-UE, taħt il-Fond għall-Ażil, il-Migrazzjoni u l-Integrazzjoni (65); aċċess għal servizzi mhux segregati fl-edukazzjoni, l-akkomodazzjoni, il-kura tas-saħħa, il-kura soċjali u tat-tfal taħt il-Fond Ewropew għall-Iżvilupp Reġjonali (66). Ir-riformi, l-investimenti u l-politiki għall-ġenerazzjoni li jmiss ta’ tfal u żgħażagħ, bħall-edukazzjoni u l-ħiliet, jistgħu jiġu indirizzati wkoll taħt il-Faċilità għall-Irkupru u r-Reżiljenza (67). L-Unjoni tikkofinanzja ċ-Ċentri għal Internet Aktar Sikur fl-Istati Membri biex jipprovdu attivitajiet ta’ sensibilizzazzjoni u riżorsi dwar is-sikurezza online tat-tfal. Hija tappoġġa wkoll lit-tfal, lill-persuni li jindukraw u lill-edukaturi b’servizzi ta’ konsulenza u rapportar permezz ta’ linji telefoniċi għall-għajnuna għat-tfal u hotlines biex jirrapportaw materjal ta’ abbuż sesswali tat-tfal. Il-programm qafas tal-Unjoni għar-riċerka u l-innovazzjoni Orizzont Ewropa (68) jappoġġa wkoll diversi proġetti marbuta mal-protezzjoni tat-tfal f’oqsma tematiċi tar-riċerka, inkluż dwar il-prevenzjoni tal-isfruttament sesswali tat-tfal u l-vjolenza domestika u sesswali.

(23)

L-impenn tal-Unjoni għall-protezzjoni tat-tfal huwa rifless ukoll fl-azzjoni esterna tagħha. Fl-2022, madwar 468 miljun tifel u tifla (aktar minn wieħed minn kull sitta) kienu qed jgħixu f’żona ta’ kunflitt. 160 miljun tifel u tifla (9,6 % tat-tfal kollha globalment) kienu vittmi tat-tħaddim tat-tfal fl-2020 (69). Kull 10 minuti, xi mkien fid-dinja, tfajla adolexxenti tmut b’riżultat tal-vjolenza (70). L-azzjoni tal-Unjoni biex tiddefendi d-drittijiet tat-tfal u l-protezzjoni tat-tfal globalment hija bbażata fuq il-mod kif l-Unjoni trawwem u ssaħħaħ il-pedamenti demokratiċi u tad-drittijiet fundamentali tagħha fl-Unjoni. Il-Pjan ta’ Azzjoni għaż-Żgħażagħ fl-Azzjoni Esterna tal-UE (71) għandu l-għan li jippromwovi l-parteċipazzjoni sinifikanti tat-tfal u ż-żgħażagħ u l-awtonomizzazzjoni tagħhom fl-azzjoni esterna tal-Unjoni. Il-Pjan ta’ Azzjoni dwar l-Ugwaljanza bejn is-Sessi III (72) għandu l-għan li jiġġieled il-forom kollha ta’ vjolenza abbażi tal-ġeneru. Il-protezzjoni tat-tfal hija objettiv ewlieni tal-Linji Gwida tal-Unjoni dwar il-Promozzjoni u l-Protezzjoni tad-Drittijiet tat-Tfal u dwar it-Tfal u l-Kunflitti Armati (73). Il-Pjan ta’ Azzjoni tal-Unjoni dwar id-Drittijiet tal-Bniedem u d-Demokrazija (2020–2024) (74) jistieden lill-pajjiżi sħab pereżempju jibnu u jsaħħu s-sistemi ta’ protezzjoni tat-tfal u jieħdu politika ta’ tolleranza żero kontra t-tħaddim tat-tfal; ir-Regolament propost dwar il-projbizzjoni ta’ prodotti magħmula b’xogħol furzat fis-suq tal-Unjoni għandu jikkontribwixxi għal dan l-għan. Dan l-impenn kien rifless ukoll fil-Komunikazzjoni dwar Xogħol Deċenti (75) li se tappoġġja l-ġlieda kontra t-tħaddim tat-tfal.

(24)

Hemm ħtieġa qawwija li t-tfal jiġu protetti mit-tibdil fil-klima u mill-perikli ambjentali, kemm fit-territorju tal-UE kif ukoll globalment. It-tfal huma ferm aktar probabbli mill-adulti li jsofru ħsara serja, inklużi konsegwenzi irriversibbli u tul il-ħajja u mewt, mid-degradazzjoni ambjentali (76), it-tibdil fil-klima, it-tniġġis u t-telf tal-bijodiversità. Dan iżid ir-riskju tat-tfal li jiffaċċjaw ksur serju tad-drittijiet, b’mod partikolari f’kunflitt armat, minħabba l-ispostament, il-karestija u ż-żieda fil-vjolenza (77). Jeħtieġ li jiġu indirizzati l-impatti differenzjati tat-tibdil fil-klima u d-degradazzjoni ambjentali fuq in-nisa, it-tfal u l-gruppi vulnerabbli (78). Il-linji Gwida tal-2023 dwar l-Istrateġiji u l-Pjanijiet ta’ Adattament tal-Istati Membri (79) jenfasizzaw it-tfal fost il-partijiet ikkonċernati bi probabbiltà akbar li jiġu affettwati mit-tibdil fil-klima, u li jeħtieġ li jiġu inklużi wkoll fil-proċess ta’ adattament għat-tibdil fil-klima. Meta jieħdu azzjoni biex jindirizzaw it-tibdil fil-klima, il-partijiet għandhom jirrispettaw, jippromwovu u jikkunsidraw l-obbligi rispettivi tagħhom dwar id-drittijiet tal-bniedem, inklużi d-drittijiet tat-tfal (80). Il-qafas dwar l-għan globali dwar l-adattament kif adottat fil-COP28 (81), iħeġġeġ lill-partijiet jiżguraw l-ekwità interġenerazzjonali u l-ġustizzja soċjali, filwaqt li jqisu l-gruppi vulnerabbli inkluż it-tfal. Dan jirrikjedi wkoll li tiġi żgurata l-parteċipazzjoni attiva tat-tfal fit-teħid tad-deċiżjonijiet dwar kwistjonijiet kritiċi li jaffettwaw il-protezzjoni tad-drittijiet tagħhom. Il-perspettiva tat-tfal u ż-żgħażagħ hija parti mill-attivitajiet tal-Patt Klimatiku Ewropew (82), u b’mod partikolari n-network ta’ Ambaxxaturi u Sħab tal-Patt Klimatiku.

(25)

Din ir-Rakkomandazzjoni hija indirizzata lill-Istati Membri. Il-pajjiżi kandidati, il-kandidati potenzjali għall-adeżjoni mal-Unjoni, u l-pajjiżi tal-politika tal-viċinat tal-Unjoni huma mħeġġa wkoll isegwu din ir-Rakkomandazzjoni.