(1)

Skont ir-Regolament (UE) 2021/1119 (il-Liġi Ewropea dwar il-Klima), il-Kummissjoni hija meħtieġa tivvaluta l-konsistenza tal-miżuri nazzjonali mal-objettiv tan-newtralità klimatika u mal-iżgurar tal-progress fl-adattament. Il-Kummissjoni vvalutat il-konsistenza tal-miżuri tal-Latvja ma’ dawn l-objettivi (2). Ir-rakkomandazzjonijiet li ġejjin huma bbażati fuq dik il-valutazzjoni. Jenħtieġ li l-Latvja tqis kif xieraq dawn ir-rakkomandazzjonijiet u ssegwihom f’konformità mal-Liġi Ewropea dwar il-Klima.

(2)

Filwaqt li l-emissjonijiet netti ta’ gassijiet serra tal-Unjoni (inkluż mill-użu tal-art, mit-tibdil tal-użu tal-art u mill-forestrija (LULUCF) u bl-esklużjoni tat-trasport internazzjonali) b’mod kumplessiv juru xejra ’l isfel, ġeneralment f’konformità mat-trajettorja lineari li tilħaq il-mira klimatika tal-Unjoni għall-2030 ta’ -55 % u l-objettiv tan-newtralità klimatika tal-Unjoni għall-2050, il-pass tat-tnaqqis fl-emissjonijiet jeħtieġ jiġi aċċellerat u hemm bżonn li tittieħed azzjoni mill-Istati Membri. Il-progress fl-Istati Membri tħallat ma’ diversi sfidi u dgħufijiet settorjali li jeħtieġ jiġu rimedjati mingħajr aktar dewmien. Il-valutazzjoni, ibbażata fuq l-informazzjoni disponibbli, turi li l-progress lejn l-objettiv tan-newtralità klimatika tal-Unjoni jidher li fil-biċċa l-kbira huwa insuffiċjenti għal-Latvja. L-istrateġiji fit-tul u affidabbli huma l-pedament biex tinkiseb it-trasformazzjoni ekonomika meħtieġa biex noqorbu lejn l-objettiv tan-newtralità klimatika tal-Unjoni.

(3)

L-ewwel pass fit-tisħiħ tal-ambizzjoni ta’ adattament jenħtieġ li jkun l-adozzjoni ta’ qafas legali xieraq għall-politika nazzjonali dwar il-klima li jistabbilixxi għanijiet ta’ adattament vinkolanti u aġġornati regolarment biex jitkejjel il-progress kumplessiv fil-bini tar-reżiljenza. Il-politiki ta’ adattament jenħtieġ li jiffukaw fuq oqsma jew setturi partikolarment vulnerabbli għat-tibdil fil-klima, jew li l-attivitajiet tagħhom huma essenzjali għar-reżiljenza ta’ setturi oħra, jew li għandhom importanza sinifikanti għall-ekonomija nazzjonali jew għas-saħħa pubblika. Hemm bżonn rispons prijoritarju dwar l-impatti u r-riskji li huma mistennija jaffettwaw l-infrastruttura kritika jew is-sistemi b’ħajja twila, jew li huma mistennija li jaffettwaw is-sistemi b’mod irriversibbli, filwaqt li titqies l-interazzjoni mal-iżvilupp soċjoekonomiku jew ma’ fatturi oħra mhux klimatiċi. Il-monitoraġġ u l-evalwazzjoni tal-isforzi ta’ adattament huma meħtieġa biex tinżamm ir-responsabbiltà u tittejjeb il-politika ta’ adattament.

(4)

Il-partijiet ikkonċernati privati huma l-aġenti tal-bidla peress li huma jipprovdu l-informazzjoni, ir-riżorsi, il-kapaċitajiet u l-finanzjament. Il-livell lokali għandu kompetenzi li jistgħu jħallu impatt fuq ir-reżiljenza għall-klima b’mod aktar ġenerali. It-tħejjija u l-implimentazzjoni ta’ politiki ta’ adattament subnazzjonali huma ta’ importanza sinifikanti,