(1)

F’konformità mal-Artikolu 14 tar-Regolament (UE) 2016/425 tal-Parlament Ewropew u tal-Kunsill (2), it-tagħmir ta’ protezzjoni personali li jkun konformi mal-istandards armonizzati jew ma’ partijiet minnhom, li r-referenzi tagħhom ikunu ġew ippubblikati f’Il-Ġurnal Uffiċjali tal-Unjoni Ewropea, għandu jkun preżunt konformi mar-rekwiżiti essenzjali tas-saħħa u tas-sikurezza stabbiliti fl-Anness II ta’ dak ir-Regolament koperti minn dawk l-istandards jew minn partijiet minnhom.

(2)

Bid-Deċiżjoni ta’ Implimentazzjoni tal-Kummissjoni C(2020)7924 (3), il-Kummissjoni talbet lill-Kumitat Ewropew għall-Istandardizzazzjoni (CEN, European Committee for Standardization) u lill-Kumitat Ewropew għall-Istandardizzazzjoni Elettroteknika (Cenelec, European Committee for Electrotechnical Standardization) biex jirrevedu u jlestu l-ħidma fuq l-istandards armonizzati b’appoġġ għar-Regolament (UE) 2016/425 ħalli jiżguraw li dawn ikomplu jirriflettu l-ogħla livell ta’ żvilupp tekniku rikonoxxut b’mod ġenerali sabiex jissodisfaw ir-rekwiżiti essenzjali tas-saħħa u tas-sikurezza stabbiliti fl-Anness II ta’ dak ir-Regolament.

(3)

Id-Deċiżjoni ta’ Implimentazzjoni C(2020)7924 ġiet emendata bid-Deċiżjoni ta’ Implimentazzjoni tal-Kummissjoni C(2024)2750 (4) sabiex jiġi adattat l-ambitu tat-talba billi jiżdiedu u jitneħħew ċerti standards biex jitqies l-aktar progress tekniku u xjentifiku riċenti, kif ukoll l-aktar żviluppi riċenti tal-attivitajiet ta’ standardizzazzjoni fil-livell internazzjonali u Ewropew, u biex tiġi estiża l-iskadenza tal-attivitajiet ta’ standardizzazzjoni fir-rigward ta’ ċerti standards u abbozzi ta’ standards, peress li x-xogħol fuq xi wħud minnhom ma setax jitlesta sal-iskadenzi stabbiliti fid-Deċiżjoni ta’ Implimentazzjoni C(2020)7924.

(4)

Abbażi tat-talba stabbilita fid-Deċiżjoni ta’ Implimentazzjoni C(2020)7924, is-Cenelec irreveda l-istandard armonizzat EN 50365:2002, li r-referenza tiegħu ma kinitx ġiet ippubblikata f’Il-Ġurnal Uffiċjali tal-Unjoni Ewropea. Dan irriżulta fl-adozzjoni tal-istandard armonizzat EN 50365:2023 dwar elmi elettrikament iżolanti għall-użu fuq installazzjonijiet b’vultaġġ baxx u medju.

(5)

Abbażi tat-talba stabbilita fid-Deċiżjoni ta’ Implimentazzjoni C(2020)7924, is-CEN irreveda l-istandards armonizzati li ġejjin, li r-referenzi tagħhom huma ppubblikati f’Il-Ġurnal Uffiċjali tal-Unjoni Ewropea bid-Deċiżjoni ta’ Implimentazzjoni tal-Kummissjoni (UE) 2023/941 (5): EN 360:2002 dwar tagħmir li jista’ jinġibed ’il ġewwa biex inaqqas il-veloċità ta’ waqgħa mill-għoli, EN 564:2014 dwar ħabel aċċessorju għal tagħmir għat-tixbit tal-muntanji, EN 12841:2006 dwar apparat ta’ aġġustament tal-ħbula, EN 12941:1998 kif emendat b’EN 12941:1998/A1:2003 u b’EN 12941:1998/A2:2008 dwar ir-rekwiżiti, l-ittestjar u l-immarkar ta’ apparati għall-iffiltrar li joperaw bl-elettriku u jinkoporaw elmu jew barnuż, EN 12942:1998 kif emendat b’EN 12942:1998/A1:2002 u b’EN 12942:1998/A2:2008 dwar ir-rekwiżiti, l-ittestjar u l-immarkar ta’ apparati respiratorji protettivi li jiffiltraw megħjunin bl-elettriku li jinkorporaw maskri tal-wiċċ sħaħ, nofs maskri jew maskri li jkopru kwart mill-wiċċ, EN 14058:2017 dwar ilbies għall-protezzjoni kontra ambjenti kesħin, EN ISO 20345:2022 dwar xedd is-saqajn sikur, EN ISO 20346:2014 dwar xedd is-saqajn protettiv u EN ISO 20347:2012 dwar xedd is-saqajn okkupazzjonali.

(6)

B’riżultat ta’ dan, is-CEN adotta l-istandards li ġejjin: EN 360:2023, EN 564:2023, EN 12841:2024, EN 12941:2023, EN 12942:2023, EN 14058:2017+A1:2023, l-emenda EN ISO 20345:2022/A1:2024, EN ISO 20346:2022 kif emendat b’EN ISO 20346:2022/A1:2024, u EN ISO 20347:2022 kif emendat b’EN ISO 20347:2022/A1:2024.

(7)

Il-Kummissjoni, flimkien mas-CEN, ivvalutat jekk l-istandards u l-emendi tagħhom jikkonformawx mat-talba stabbilita fid-Deċiżjoni ta’ Implimentazzjoni C(2020)7924.

(8)

L-istandards armonizzati li ġejjin u l-emendi tagħhom jissodisfaw ir-rekwiżiti essenzjali tas-saħħa u tas-sikurezza li għandhom l-għan li jkopru u li huma stabbiliti fir-Regolament (UE) 2016/425: EN 360:2023, EN 564:2023, EN 12841:2024, EN 12941:2023, EN 12942:2023, EN 14058:2017+A1:2023, l-emenda EN ISO 20345:2022/A1:2024, EN ISO 20346:2022 kif emendat b’EN ISO 20346:2022/A1:2024, EN ISO 20347:2022 kif emendat b’EN ISO 20347:2022/A1:2024 u EN 50365:2023. Għalhekk, jixraq li r-referenzi ta’ dawk l-istandards armonizzati u l-emendi tagħhom jiġu ppubblikati f’Il-Ġurnal Uffiċjali tal-Unjoni Ewropea.

(9)

L-Anness I tad-Deċiżjoni ta’ Implimentazzjoni (UE) 2023/941 jipprovdi r-referenzi tal-istandards armonizzati li jikkonferixxu preżunzjoni ta’ konformità mar-Regolament (UE) 2016/425. Sabiex jiġi żgurat li r-referenzi tal-istandards armonizzati abbozzati b’appoġġ għar-Regolament (UE) 2016/425 jkunu elenkati f’att wieħed, ir-referenzi ta’ dawk l-istandards u tal-emendi tagħhom jenħtieġ li jiġu inklużi f’dak l-Anness.

(10)

Jeħtieġ li r-referenzi tal-istandards armonizzati EN 360:2002, EN 564:2014, EN 12841:2006, EN 12941:1998 kif emendat b’EN 12941:1998/A1:2003 u b’EN 12941:1998/A2:2008, EN 12942:1998 kif emendat b’EN 12942:1998/A1:2002 u b’EN 12942:1998/A2:2008, EN 14058:2017, EN ISO 20345:2022, EN ISO 20346:2014 u EN ISO 20347:2012 jiġu rtirati minn Il-Ġurnal Uffiċjali tal-Unjoni Ewropea, peress li dawk l-istandards ġew riveduti. Għalhekk, jixraq li dawn ir-referenzi jitħassru mill-Anness I tad-Deċiżjoni ta’ Implimentazzjoni (UE) 2023/941.

(11)

Sabiex il-manifatturi jingħataw biżżejjed żmien biex iħejju għall-applikazzjoni tal-istandards riveduti, jeħtieġ jiġi differit l-irtirar tar-referenzi tal-istandards armonizzati EN 360:2002, EN 564:2014, EN 12841:2006, EN 12941:1998 kif emendat b’EN 12941:1998/A1:2003 u b’EN 12941:1998/A2:2008, EN 12942:1998, EN 14058:2017, EN ISO 20345:2022, EN ISO 20346:2014 u EN ISO 20347:2012.

(12)

L-istandards armonizzati EN 166:2001, EN 169:2002, EN 170:2002, EN 172:1994 kif emendat b’EN 172:1994/A1:2000 u b’EN 172:1994/A2:2001, u EN 379:2003+A1:2009 dwar il-protezzjoni personali tal-għajnejn ġew riveduti mis-CEN u r-referenzi tagħhom ġew inklużi fl-Anness II tad-Deċiżjoni ta’ Implimentazzjoni (UE) 2023/941, u l-11 ta’ Novembru 2024 ġie indikat bħala d-data tal-irtirar. L-istandards il-ġodda, li jkopru firxa wiesgħa ta’ prodotti għall-protezzjoni tal-għajnejn u tal-wiċċ għal użu okkupazzjonali, aġġornaw il-metodu tal-ittestjar tal-istandards preċedenti, żiedu l-għadd ta’ konfigurazzjonijiet tal-ittestjar għal prodott uniku billi introduċew forom ġodda tal-irjus, rekwiżiti ġodda għall-immarkar tal-prodotti, u rekwiżiti tekniċi ġodda, bħar-reżistenza għas-sħana radjanti, għall-impatt ta’ massa għolja, għall-kimiċi, għall-proprjetajiet elettrostatiċi, eċċ. Għaldaqstant, il-manifatturi jeħtieġu aktar żmien biex jadattaw il-produzzjoni tagħhom ħalli tkun tikkonforma mal-istandards il-ġodda. Barra minn hekk, il-korpi nnotifikati u l-laboratorji tal-ittestjar huma meħtieġa jadattaw il-metodi tal-ittestjar. Għalhekk, jixraq li tiġi posposta b’sena oħra d-data tal-irtirar tal-istandards armonizzati EN 166:2001, EN 169:2002, EN 170:2002, EN 172:1994 kif emendat b’EN 172:1994/A1:2000 u b’EN 172:1994/A2:2001, u EN 379:2003+A1:2009. Filwaqt li l-istandards riveduti jġibu bidliet sinifikanti f’xi wħud mir-rekwiżiti sostantivi applikabbli, dan il-posponiment mhuwiex mistenni li jkollu effett detrimentali fuq il-livelli ta’ sikurezza tal-prodotti kkonċernati, peress li l-istandards riveduti prinċipalment itejbu l-proċeduri tal-ittestjar. Għalhekk, jenħtieġ li jiġu sostitwiti r-ringieli fl-Anness II tad-Deċiżjoni ta’ Implimentazzjoni (UE) 2023/941 dwar l-istandards armonizzati EN 166:2001, EN 169:2002, EN 170:2002, EN 172:1994 kif emendat b’EN 172:1994/A1:2000 u EN 172:1994/A2:2001 u EN 379:2003+A1:2009.

(13)

Għalhekk, jenħtieġ li d-Deċiżjoni ta’ Implimentazzjoni (UE) 2023/941 tiġi emendata kif xieraq.

(14)

Il-konformità ma’ standard armonizzat tikkonferixxi preżunzjoni tal-konformità mar-rekwiżiti essenzjali korrispondenti stabbiliti fil-leġiżlazzjoni tal-Unjoni dwar l-armonizzazzjoni mid-data tal-pubblikazzjoni tar-referenza ta’ tali standard f’Il-Ġurnal Uffiċjali tal-Unjoni Ewropea. Din id-Deċiżjoni jenħtieġ li tidħol fis-seħħ fil-jum tal-pubblikazzjoni tagħha,

(1)

l-Anness I huwa emendat f’konformità mal-Anness I ta’ din id-Deċiżjoni;

(2)

l-Anness II huwa emendat f’konformità mal-Anness II ta’ din id-Deċiżjoni.