(1)

L-Unjoni aderiet mal-Konvenzjoni li tirrigwarda t-Trasport Internazzjonali bil-Ferrovija tad-9 ta’ Mejju 1980, kif emendata mill-Protokoll ta’ Vilnius tat-3 ta’ Ġunju 1999 (il-COTIF) skont id-Deċiżjoni tal-Kunsill 2013/103/UE (1) u l-Ftehim bejn l-Unjoni Ewropea u l-Organizzazzjoni Intergovernattiva għat-Trasport Internazzjonali bil-Ferrovija (OTIF) dwar l-Adeżjoni tal-Unjoni Ewropea mal-Konvenzjoni, (il-“Ftehim dwar l-Adeżjoni għall-Konvenzjoni”).

(2)

L-Assemblea Ġenerali tal-OTIF ġiet stabbilita f’konformità mal-Artikolu 13, il-paragrafu 1, l-ittra a) tal-COTIF (l-“Assemblea Ġenerali”). Skont l-Artikolu 14 il-paragrafu 2, tal-COTIF, l-Assemblea Ġenerali, fost l-oħrajn, tistabbilixxi r-regoli ta’ proċedura tagħha, teleġġi s-Segretarju-Ġenerali, tiddeċiedi, jekk ikun meħtieġ, dwar l-istabbiliment temporanju ta’ kumitati oħra għal kompiti speċifiċi, u tieħu deċiżjonijiet dwar proposti li għandhom l-għan li jimmodifikaw il-COTIF.

(3)

L-Unjoni tipparteċipa fl-Assemblea Ġenerali f’konformità mal-COTIF, ir-Regoli ta’ Proċedura tal-Assemblea Ġenerali, u l-Ftehim dwar l-Adeżjoni tal-Unjoni Ewropea mal-Konvenzjoni.

(4)

Fis-16-il sessjoni tagħha li għandha ssir mill-25 sas-26 ta’ Settembru 2024, l-Assemblea Ġenerali mistennija tieħu għadd ta’ deċiżjonijiet. Huwa xieraq li tiġi stabbilita l-pożizzjoni li għandha tittieħed f’isem l-Unjoni, peress li dawk id-deċiżjonijiet jew ser ikollhom impatt fuq il-funzjonament tal-OTIF u fuq l-iżvilupp tal-istrateġija tal-organizzazzjoni, jew ser iwasslu għall-adozzjoni ta’ atti li huma vinkolanti skont id-dritt internazzjonali u li jistgħu jinfluwenzaw b’mod determinanti l-kontenut tal-leġiżlazzjoni tal-Unjoni, u b’hekk jikkostitwixxu “atti li jkollhom effetti legali” għall-finijiet tal-Artikolu 218(9) TFUE.

(5)

B’mod partikolari, fil-punt 5 tal-aġenda, is-16-il sessjoni tal-Assemblea Ġenerali hija mistennija tiddeċiedi dwar l-applikazzjoni tar-Repubblika tal-Poplu taċ-Ċina (minn hawn ’il quddiem iċ-“Ċina”) biex issir Membru Assoċjat tal-OTIF. Tabilħaqq, f’konformità mal-Artikolu 37, il-paragrafi 2 sa 5 tal-COTIF, il-Kummissjoni ressqet oġġezzjoni għal dik l-applikazzjoni f’isem l-Unjoni, bl-għadd ta’ voti ugwali għal dawk tal-Membri tagħha li huma wkoll Stati Membri tal-OTIF. Għaldaqstant, kif imħabbar mis-Segretarju-Ġenerali tal-OTIF fil-proposta tiegħu tat-28 ta’ Awwissu 2024, l-applikazzjoni taċ-Ċina ser tiġi ppreżentata lis-16-il Assemblea Ġenerali għal deċiżjoni, f’konformità mal-Artikolu 37, il-paragrafu 4 tal-COTIF. Fid-19 ta’ Awwissu 2024, bi tweġiba għall-oġġezzjoni mressqa mill-Kummissjoni f’isem l-Unjoni u l-Istati Membri tagħha li huma membri tal-OTIF id-dipartiment tar-relazzjonijiet esterni tal-Amministrazzjoni Ferrovjarja Nazzjonali taċ-Ċina pprovda spjegazzjonijiet u ġustifikazzjoni addizzjonali għat-talba tiegħu għal sħubija assoċjata fl-OTIF. Madankollu, xorta jkunu meħtieġa aktar elementi ta’ informazzjoni sabiex tiġi fformulata l-pożizzjoni tal-Unjoni. Għalhekk, fis-16-il Assemblea Ġenerali, jenħtieġ li l-pożizzjoni tal-Unjoni tkun li tiddifferixxi d-deċiżjoni dwar l-applikazzjoni taċ-Ċina għall-adeżjoni bħala Membru Assoċjat tal-OTIF għal sessjoni sussegwenti tal-Assemblea Ġenerali tal-OTIF, u li tagħti struzzjonijiet lis-Segretarju-Ġenerali tal-OTIF biex jorganizza konsultazzjonijiet mal-partijiet interessati dwar l-applikazzjoni taċ-Ċina.

(6)

Taħt il-punt 7 tal-aġenda, l-adozzjoni tal-istrateġija fit-tul għall-OTIF tista’ tinfluwenza l-politika u l-ħidma sostantiva tal-OTIF, u t-teħid ta’ deċiżjonijiet fl-OTIF. L-istrateġija fit-tul riveduta proposta kif ippreżentata lill-Assemblea Ġenerali ġiet diskussa u maqbula fis-sessjonijiet rilevanti tal-Kumitat ad hoc dwar l-Affarijiet Legali u l-Kooperazzjoni Internazzjonali (minn hawn ’il quddiem il-“Kumitat ad hoc”), f’konformità mal-pożizzjonijiet tal-Unjoni li ġew stabbiliti rigward dawn il-kwistjonijiet. Għalhekk, il-pożizzjoni tal-Unjoni jenħtieġ li tkun li tappoġġa l-adozzjoni ta’ dik l-istrateġija fit-tul riveduta.

(7)

Taħt il-punt 13 tal-aġenda, l-Assemblea Ġenerali ser tintalab tapprova l-“Linji Gwida dwar l-applikazzjoni tal-proċeduri għall-modifika tal-COTIF”, tirrakkomanda li dawn jiġu segwiti fit-tħejjija għall-modifiki tal-COTIF fil-limiti tal-kompetenza tal-Assemblea Ġenerali, u tagħti struzzjonijiet lill-Kumitat ad hoc biex jimmonitorja u jivvaluta l-applikazzjoni tal-linji gwida u jirrevedihom kif meħtieġ. Filwaqt li dawk il-Linji Gwida waħedhom mhumiex vinkolanti, jistgħu jinfluwenzaw b’mod determinanti l-proċeduri għall-modifika tal-COTIF. Il-Linji Gwida kif ippreżentati lill-Assemblea Ġenerali ġew diskussi u maqbula fis-sessjonijiet rilevanti tal-Kumitat ad hoc, f’konformità mal-pożizzjonijiet tal-Unjoni li ġew stabbiliti rigward dawn il-kwistjonijiet. Għalhekk, il-pożizzjoni tal-Unjoni jenħtieġ li tkun li tapprova dawk il-Linji Gwida.

(8)

Taħt il-punt 13 tal-aġenda, l-Assemblea Ġenerali ser tintalab tapprova l-prinċipji regolatorji bażiċi, kif stipulati fir-rapport tal-Kumitat ad hoc u kif jirriflettu l-pożizzjoni tal-Unjoni kif stipulati fid-Deċiżjoni tal-Kunsill (UE) 2023/2582 (2), sabiex jiggwidaw lill-Kumitat ad hoc u lill-Kumitat tar-Reviżjoni fit-tħejjija għall-modifika tal-COTIF u għan-noti korrispondenti fir-Rapport ta’ Spjegazzjoni tal-COTIF, bl-għan li jiġi introdott obbligu li l-Istati Membri tal-OTIF li jirrispettaw li ma jdgħajfux l-integrità fiżika u funzjonali tal-infrastruttura ferrovjarja ta’ Stati Membri oħra tal-OTIF, kif ukoll dispożizzjonijiet sostantivi u proċedurali dwar sanzjonijiet biex tiġi żgurata l-konformità mal-obbligi skont il-COTIF li huma essenzjali biex jintlaħaq l-għan tal-OTIF. Dawn il-prinċipji regolatorji bażiċi jikkonċernaw l-organizzazzjoni u l-funzjonament tal-organizzazzjoni, li għaliha l-Unjoni hija Parti Kontraenti, u jistgħu jwasslu biex jiġu żviluppati proposti sabiex tiġi emendata l-COTIF; din il-kwistjoni topika tikkonċerna l-ambitu kollu tal-attivitajiet tal-OTIF, inkluż l-oqsma li għalihom l-UE hija esklużivament kompetenti fir-rigward tal-Istati Membri tal-Unjoni. Il-proposti relatati biex tiġi mmodifikata l-COTIF ser ikunu vinkolanti skont id-dritt internazzjonali u ser ikunu jistgħu jinfluwenzaw b’mod determinanti kemm il-kontenut tal-leġiżlazzjoni tal-Unjoni kif ukoll l-interpretazzjoni u l-applikazzjoni tal-COTIF. Il-prinċipji regolatorji bażiċi kif ippreżentati lill-Assemblea Ġenerali ġew diskussi u maqbula fis-sessjonijiet rilevanti tal-Kumitat ad hoc, f’konformità mal-pożizzjonijiet tal-Unjoni li ġew stabbiliti rigward dawn il-kwistjonijiet. Għalhekk, il-pożizzjoni tal-Unjoni jenħtieġ li tkun li tapprova dawn il-prinċipji regolatorji bażiċi.

(9)

Taħt il-punt 13 tal-aġenda, l-Assemblea Ġenerali ser tintalab tapprova r-“Rakkomandazzjoni dwar l-użu ta’ firem elettroniċi fil-komunikazzjonijiet uffiċjali bejn l-OTIF u l-membri tagħha”. Kif speċifikat fil-pożizzjoni tal-Unjoni skont id-Deċiżjoni tal-Kunsill (UE) 2023/2582, l-iżvilupp tal-komunikazzjonijiet elettroniċi jirrikjedi ċerti aġġornamenti amministrattivi biex jiġi żgurat l-użu sikur u affidabbli tal-firem elettroniċi fil-komunikazzjonijiet uffiċjali bejn l-OTIF u l-membri tagħha. Huwa importanti li tiġi appoġġata t-tħejjija ta’ rakkomandazzjoni f’dak ir-rigward, li tqis il-livelli differenti ta’ esperjenza tal-membri tal-OTIF u li tkun konformi mar-regoli stabbiliti fil-livell tal-Unjoni, b’mod partikolari r-Regolament (UE) Nru 910/2014 tal-Parlament Ewropew u tal-Kunsill. (3) Filwaqt li din ir-Rakkomandazzjoni waħedha mhijiex vinkolanti, ser ikollha implikazzjonijiet għal-“Linji Gwida dwar l-atti tat-trattati skont il-COTIF” kif ukoll fuq in-noti ta’ spjegazzjoni tar-“Regoli ta’ Proċedura tal-Assemblea Ġenerali” għar-“Regolament dwar l-elezzjoni u l-kundizzjonijiet tas-servizz tas-Segretarju-Ġenerali” u għad-“Deċiżjoni dwar ir-rappreżentanti permanenti”, li jeħtieġ li kollha jiġu emendati kif xieraq. Għalhekk, ir-Rakkomandazzjoni tista’ tinfluwenza b’mod determinanti l-proċeduri għall-modifika tal-COTIF. Il-proposti għal deċiżjonijiet ppreżentati lill-Assemblea Ġenerali ġew diskussi u maqbula fis-sessjonijiet rilevanti tal-Kumitat ad hoc, f’konformità mal-pożizzjonijiet tal-Unjoni li ġew stabbiliti rigward dawn il-kwistjonijiet. Għalhekk, il-pożizzjoni tal-Unjoni jenħtieġ li tkun li tapprova din ir-rakkomandazzjoni.

(10)

Taħt il-punt 13 tal-aġenda, l-Assemblea Ġenerali ser tintalab tadotta d-“Deċiżjoni dwar is-simboli, l-isem u l-abbrevjazzjoni tal-Organizzazzjoni Intergovernattiva għat-Trasport Internazzjonali bil-Ferrovija” u d-“Deċiżjoni dwar id-drittijiet tal-awtur u l-aċċess miftuħ”, u tapprova għal kull deċiżjoni n-“Noti ta’ Spjegazzjoni” relatati. Kif speċifikat fil-pożizzjoni skont id-Deċiżjoni tal-Kunsill (UE) 2023/2582, politika mfassla biex tiffaċilita l-użu mill-ġdid tal-informazzjoni u tad-dokumenti li jkunu proprjetà tal-OTIF jenħtieġ li titfassal f’konformità mar-regoli stipulati fid-Direttiva (UE) 2019/1024 tal-Parlament Ewropew u tal-Kunsill (4) u fid-Deċiżjoni tal-Kummissjoni 2011/833/UE. (5) Għalhekk, l-atti previsti f’dan il-qasam jistgħu jinfluwenzaw b’mod determinanti l-kontenut tal-leġiżlazzjoni tal-Unjoni. Il-proposti għal deċiżjonijiet ppreżentati lill-Assemblea Ġenerali ġew diskussi u maqbula fis-sessjonijiet rilevanti tal-Kumitat ad hoc, f’konformità mal-pożizzjonijiet tal-Unjoni li ġew stabbiliti rigward dawn il-kwistjonijiet. Għalhekk, il-pożizzjoni tal-Unjoni jenħtieġ li tkun li tadotta dawk id-Deċiżjonijiet u li tapprova n-Noti ta’ Spjegazzjoni relatati.

(11)

Taħt il-punti 14 u 15 tal-aġenda, id-deċiżjonijiet previsti tal-Assemblea Ġenerali jikkonċernaw l-adozzjoni ta’ verżjonijiet riveduti, rispettivament, tar-Regoli ta’ Proċedura tagħha u tar-Regolament dwar l-elezzjoni u l-kundizzjonijiet tas-servizz tas-Segretarju -Ġenerali, kif ukoll dwar l-approvazzjoni tan-Noti ta’ Spjegazzjoni relatati ma’ dawk l-atti, kollha adattati f’konformità mal-linji gwida l-ġodda dwar l-użu ta’ lingwaġġ li juża ġens newtrali. In-noti ta’ spjegazzjoni rispettivi ser jinkorporaw ukoll il-proposta tal-Kumitat ad hoc fir-“Rakkomandazzjoni dwar l-użu ta’ firem elettroniċi fil-komunikazzjonijiet uffiċjali bejn l-OTIF u l-membri tagħha”. Ir-Regoli ta’ Proċedura tal-Assemblea Ġenerali u r-Regolament dwar l-elezzjoni u l-kundizzjonijiet tas-servizz tas-Segretarju-Ġenerali huma atti legalment vinkolanti skont il-COTIF, u n-noti ta’ spjegazzjoni rispettivi tagħhom jistgħu jinfluwenzaw b’mod determinanti l-interpretazzjoni u l-applikazzjoni tal-COTIF. Il-verżjonijiet riveduti tar-Regoli ta’ Proċedura tal-Assemblea Ġenerali u r-Regolament dwar l-elezzjoni u l-kundizzjonijiet tas-servizz tas-Segretarju-Ġenerali, u n-Noti ta’ Spjegazzjoni relatati, ġew diskussi u maqbula fis-sessjonijiet rilevanti tal-Kumitat ad hoc, f’konformità mal-pożizzjonijiet tal-Unjoni li ġew stabbiliti fir-rigward ta’ dawn il-kwistjonijiet. Għalhekk, l-Unjoni jenħtieġ li tappoġġa l-adozzjoni ta’ dawn l-emendi.

(12)

Id-deċiżjonijiet proposti huma konformi mal-liġi u mal-objettivi strateġiċi tal-Unjoni, u għalhekk jenħtieġ li jiġu appoġġati mill-Unjoni.

(13)

F’konformità mal-Anness III tad-Deċiżjoni 2013/103/UE, it-tħejjija għal-laqgħat tal-OTIF testendi għall-koordinazzjoni fuq il-post. Għalhekk, jista’ jintlaħaq qbil dwar bidliet żgħar għal din il-pożizzjoni tal-Unjoni matul il-koordinazzjoni fuq il-post mingħajr il-ħtieġa ta’ deċiżjoni ulterjuri tal-Kunsill, b’mod partikolari sabiex tkun tista’ tirreaġixxi għal proposti u żviluppi li ma tqisux fi żmien din id-Deċiżjoni,