(1)

Ir-Regolament (KE) Nru 2065/2003 jistipula li l-aromatizzanti b’togħma affumikata inklużi fil-lista tal-Unjoni ta’ prodotti primarji ta’ aromatizzant b’togħma affumikata awtorizzati (“il-lista tal-Unjoni”) biss jistgħu jiġu introdotti fis-suq fl-Unjoni.

(2)

Ir-Regolament ta’ Implimentazzjoni tal-Kummissjoni (UE) Nru 1321/2013 (2) stabbilixxa l-lista tal-Unjoni. Il-prodott Zesti Smoke Code 10 (SF-002) ġie inkluż f’dik il-lista bid-data ta’ skadenza tal-awtorizzazzjoni tal-1 ta’ Jannar 2024.

(3)

Permezz ta’ ittra bid-data tal-10 ta’ Ġunju 2022, Kerry Ingredients (UK) Limited, li kienet topera taħt l-isem kummerċjali Mastertaste, infurmat lill-Kummissjoni li Kerry Inc. kienet se tirrappreżentaha fir-rigward tal-applikazzjoni għat-tiġdid ta’ Zesti Smoke Code 10 (SF-002) u bl-intenzjoni tagħha li jkollha l-awtorizzazzjoni rreġistrata f’isem Kerry Inc.

(4)

Fit-30 ta’ Ġunju 2022, il-kumpanija Kerry Inc ressqet applikazzjoni għat-tiġdid tal-awtorizzazzjoni ta’ Zesti Smoke Code 10 (SF-002) bħala prodott primarju ta’ aromatizzant b’togħma affumikata.

(5)

Fit-28 ta’ Settembru 2023, l-Awtorità Ewropea dwar is-Sigurtà fl-Ikel (“l-Awtorità”) adottat l-opinjoni xjentifika tagħha dwar is-sikurezza ta’ Zesti Smoke Code 10 (SF-002) (3).

(6)

Fl-opinjoni xjentifika tagħha, l-Awtorità nnotat li Zesti Smoke Code 10 (SF-002) fih is-sustanzi furan-2(5H)-on u benżen–1,2-diol u kkonkludiet li ġie identifikat tħassib dwar il-ġenotossiċità għal dawk is-sustanzi in vivo mal-amministrazzjoni orali. F’konformità mad-dikjarazzjoni tal-Awtorità dwar il-valutazzjoni tal-ġenotossiċità tat-taħlitiet kimiċi (4) u meta jitqies li l-istimi tal-esponiment għal dawk iż-żewġ komponenti huma ogħla mil-limitu ta’ tħassib tossikoloġiku (TTC) ta’ 0,0025 μg/kg bw kuljum għall-mutaġeni u/jew għall-karċinoġeni reattivi għad-DNA, l-Awtorità kkonkludiet li Zesti Smoke Code 10 (SF-002) iqajjem tħassib fir-rigward tal-ġenotossiċità. Barra minn hekk, l-Awtorità kkonkludiet li erba’ komponenti oħra f’Zesti Smoke Code 10 (SF-002) u l-parti mhux identifikata tiegħu jqajmu tħassib potenzjali dwar il-ġenotossiċità.

(7)

Skont l-Artikolu 4 tar-Regolament (KE) Nru 2065/2003, l-aromatizzanti b’togħma affumikata li ma jippreżentawx riskji għas-saħħa tal-bniedem biss jistgħu jiġu awtorizzati u introdotti fis-suq. Għalhekk, jixraq li t-tiġdid tal-awtorizzazzjoni ta’ Zesti Smoke Code 10 (SF-002) bħala prodott primarju ta’ aromatizzant b’togħma affumikata jiġi rrifjutat.

(8)

Madankollu, biex l-operaturi tan-negozji tal-ikel ikunu jistgħu jużaw il-prodott Zesti Smoke Code 10 (SF-002) bħala prodott primarju ta’ aromatizzant b’togħma affumikata għall-produzzjoni tal-ikel li għandu jiġi introdott fis-suq sal-1 ta’ Lulju 2029, kif previst fir-Regolament ta’ Implimentazzjoni tal-Kummissjoni (UE) 2024/2067 (5), jenħtieġ li l-prodott Zesti Smoke Code 10 (SF-002) jitħalla jiġi introdott fis-suq sa dik id-data.

(9)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,