(1)

Permezz tal-ittra datata l-21 ta’ Ġunju 2021, il-Kanada esprimiet l-interess formali tagħha li tiġi assoċjata ma’ Orizzont Ewropa – il-Programm Qafas għar-Riċerka u l-Innovazzjoni (2021-2027) stabbilit bir-Regolament (UE) 2021/695 tal-Parlament Ewropew u tal-Kunsill (1) (“il-Programm Orizzont Ewropa”).

(2)

Fid-9 ta’ Settembru 2022, il-Kunsill adottat id-Deċiżjoni (UE) 2022/1526 (2), li tawtorizza li jinfetħu n-negozjati mal-Kanada, f’isem l-Unjoni, għalftehim dwar il-prinċipji ġenerali għall-parteċipazzjoni tal-Kanada fi programmi tal-Unjoni u dwar l-assoċjazzjoni tal-Kanada mal-Programm Orizzont Ewropa.

(3)

In-negozjati huma lesti, u l-Ftehim bejn l-Unjoni Ewropea, minn naħa waħda, u l-Kanada, min-naħa l-oħra, dwar il-parteċipazzjoni tal-Kanada fil-programmi tal-Unjoni (“il-Ftehim”) ġie inizjalat fis-17 ta’ Novembru 2022. Il-konklużjoni tan-negozjati tħabbret uffiċjalment fis-Summit bejn l-UE u l-Kanada li sar fit-23 u l-24 ta’ Novembru 2023 f’St John’s, il-Kanada.

(4)

Bil-ħsieb li jiġi stabbilit qafas dejjiemi għall-kooperazzjoni bejn l-Unjoni u l-Kanada, il-Ftehim jistabbilixxi t-termini u l-kundizzjonijiet għall-parteċipazzjoni tal-Kanada fil-programmi jew l-attivitajiet tal-Unjoni li jinfetħu għall-parteċipazzjoni tal-Kanada f’konformità mal-atti bażiċi li jistabbilixxu dawk il-programmi jew l-attivitajiet tal-Unjoni. Skont il-Ftehim, l-Unjoni ser twettaq miżuri ta’ kooperazzjoni mal-Kanada skont l-Artikolu 212 tat-Trattat dwar il-Funzjonament tal-Unjoni Ewropea.

(5)

Skont l-Artikolu 1 tal-Ftehim, it-termini u l-kundizzjonijiet speċifiċi applikabbli għall-parteċipazzjoni tal-Kanada fi kwalunkwe programm jew attività tal-Unjoni huma soġġetti għall-adozzjoni ta’ protokolli tal-Ftehim.

(6)

Skont l-Artikolu 3(3) tal-Ftehim, it-termini u l-kundizzjonijiet speċifiċi għall-parteċipazzjoni tal-Kanada fil-Programm Orizzont Ewropa huma stabbiliti fil-Protokoll dwar l-assoċjazzjoni tal-Kanada ma’ Orizzont Ewropa – il-Programm Qafas għar-Riċerka u l-Innovazzjoni (2021-2027) (“il-Protokoll dwar l-assoċjazzjoni tal-Kanada ma’ Orizzont Ewropa”).

(7)

F’konformità mal-mandat tal-Kunsill, il-Protokoll dwar l-assoċjazzjoni tal-Kanada ma’ Orizzont Ewropa ġie negozjat b’mod parallel mal-Ftehim u, skont l-Artikolu 19(14) tal-Ftehim, jifforma parti integrali minnu. Il-Kanada jenħtieġ li tipparteċipa bħala pajjiż assoċjat fil-Pilastru II (“Sfidi Globali u Kompetittività Industrijali Ewropea”) tal-Programm Orizzont Ewropa.

(8)

Il-Kanada tissodisfa l-kriterji stabbiliti fl-Artikolu 16(1), il-punt (d), tar-Regolament (UE) 2021/695.

(9)

Il-Ftehim jikkonforma mal-Artikolu 16(2) tar-Regolament (UE) 2021/695, li jirrikjedi li l-assoċjazzjoni mal-Programm Orizzont Ewropa tal-pajjiżi terzi taħt l-Artikolu 16(1), il-punt (d), ta’ dak ir-Regolament tkun f’konformita mal-kundizzjonijiet stabbiliti fi ftehim li jkopri l-parteċipazzjoni ta’ tali pajjiż jew territorju fi kwalunkwe programm tal-Unjoni, dment li l-ftehim: jiżgura bilanċ ġust fir-rigward tal-kontribuzzjonijiet u l-benefiċċji tal-pajjiż terz li jipparteċipa fil-programmi tal-Unjoni; jistabbilixxi l-kundizzjonijiet ta’ parteċipazzjoni fil-programmi tal-Unjoni; inkluż il-kalkolu tal-kontribuzzjonijiet finanzjarji għal programmi individwali, u l-kostijiet amministrattivi tagħhom, ma jikkonferixxi lill-pajjiż terz ebda setgħa ta’ teħid ta’ deċiżjonijiet fir-rigward tal-programm tal-Unjoni; u jiggarantixxi d-drittijiet tal-Unjoni li tiżgura ġestjoni finanzjarja tajba u biex tipproteġi l-interessi finanzjarji tal-Unjoni.

(10)

Il-Ftehim jenħtieġ li jiġi ffirmat.

(11)

Bil-ħsieb li tiġi żgurata l-kooperazzjoni f’waqtha bejn l-Unjoni u l-Kanada fil-qasam tar-riċerka, tal-iżvilupp teknoloġiku u tal-innovazzjoni u li tiġi permessa l-parteċipazzjoni tal-entitajiet Kanadiżi fil-Programm Orizzont Ewropa, il-Ftehim jenħtieġ li jiġi applikat fuq bażi proviżorja, sakemm jitlestew il-proċeduri meħtieġa għad-dħul fis-seħħ tiegħu.

(12)

F’konformità mat-Trattati, jenħtieġ li l-Kummissjoni tiżgura l-iffirmar tal-Ftehim, soġġett għall-konklużjoni tiegħu,