(1)

Ir-Regolament (UE, Euratom) 2022/2434 tal-Parlament Ewropew u tal-Kunsill (2) introduċa l-istrateġija ta’ finanzjament diversifikata bħala metodu uniku ta’ finanzjament għall-implimentazzjoni ta’ operazzjonijiet ta’ teħid b’self u ta’ ġestjoni tad-dejn imwettqa mill-Kummissjoni fir-Regolament (UE, Euratom) 2018/1046 L-istrateġija ta’ finanzjament diversifikata, ħlief f’każijiet debitament ġustifikati, tapplika għal programmi ta’ assistenza finanzjarja li għalihom l-atti bażiċi jkunu daħlu fis-seħħ fid-9 ta’ Novembru 2022 jew wara.

(2)

Jenħtieġ li l-Kummissjoni tistabbilixxi l-arranġamenti meħtieġa għall-implimentazzjoni tal-istrateġija ta’ finanzjament diversifikata. L-applikazzjoni tal-istrateġija ta’ finanzjament diversifikata teħtieġ l-adozzjoni ta’ sett ta’ regoli biex tiġi determinata l-allokazzjoni tal-kostijiet rispettivi għall-programmi ta’ assistenza finanzjarja rilevanti, li jenħtieġ li jiżguraw li l-kostijiet kollha mġarrba mill-Unjoni li huma relatati mal-assistenza finanzjarja jiġu ddebitati lill-benefiċjarju tar-rikavati mis-self.

(3)

Il-metodoloġija għall-allokazzjoni tal-kostijiet relatati mal-implimentazzjoni tal-istrateġija ta’ finanzjament diversifikata permezz tan-NextGenerationEU (NGEU) kienet stabbilita [għall-ewwel darba] bid-Deċiżjoni ta’ Implimentazzjoni tal-Kummissjoni (UE) 2021/1095 (3). Id-Deċiżjoni ta’ Implimentazzjoni tal-Kummissjoni (UE, Euratom) 2022/2545 (4) estendiet dawk l-arranġamenti għall-operazzjonijiet kollha ta’ teħid b’self u ta’ ġestjoni tad-dejn imwettqa skont l-istrateġija ta’ finanzjament diversifikata skont l-Artikolu 220a tar-Regolament (UE, Euratom) 2018/1046 permezz ta’ aġġustamenti mmirati għall-metodoloġija tal-allokazzjoni tal-kostijiet.

(4)

Jenħtieġ li l-obbligu li jiġu koperti l-kostijiet relatati mal-assistenza finanzjarja jibqa’ f’idejn il-benefiċjarji tal-assistenza finanzjarja, f’konformità mal-Artikolu 220(5), il-punt (e), tar-Regolament (UE, Euratom) 2018/1046 u f’konformità mal-prinċipji baġitarji tal-ġestjoni finanzjarja tajba u tal-ekwilibriju. Jenħtieġ li l-kostijiet kollha jiġġarrbu mill-benefiċjarji abbażi ta’ metodoloġija unika għall-allokazzjoni tal-kostijiet li tiżgura allokazzjoni trasparenti u proporzjonali tal-kostijiet.

(5)

Jenħtieġ li l-metodoloġija tal-allokazzjoni tal-kostijiet tiżgura li ma jkun hemm l-ebda sussidju inkroċjat tal-kostijiet ta’ kategorija waħda ta’ benefiċjarju minn oħra. Jenħtieġ li l-kostijiet tas-selfiet jiġu imputati bis-sħiħ lill-benefiċjarji ta’ dawk is-selfiet, minn naħa waħda, u, fejn applikabbli, il-kostijiet ta’ ammonti mhux ripagabbli lill-baġit ġenerali tal-Unjoni, min-naħa l-oħra, abbażi tal-kostijiet reali mġarrba biex jiżdied u jiġi żburżat is-sehem rispettiv tar-rikavati lill-benefiċjarji differenti. Jenħtieġ li l-metodoloġija tkopri l-kostijiet kollha mġarrba mill-Unjoni għall-operazzjonijiet ta’ teħid b’self u tal-immaniġġar tad-dejn, inklużi l-kostijiet amministrattivi kollha, u jenħtieġ li din tiżgura li jiġu kkalkulati kategoriji differenti ta’ kostijiet għal kull żborż.

(6)

Sabiex jiġi żgurat trattament ġust u ugwali bejn il-benefiċjarji, jenħtieġ li tiġi implimentata metodoloġija komuni u unifikata għall-kostijiet, applikabbli għat-tipi kollha ta’ żborżi, jiġifieri dawk imħallsa lura mill-baġit ġenerali tal-Unjoni u dawk imħallsa lura mill-benefiċjarji. Il-kostijiet jenħtieġ li jiġu imputati lill-benefiċjarji abbażi tas-sehem tar-rikavati riċevuti.

(7)

Jenħtieġ li din il-metodoloġija tal-allokazzjoni tal-kostijiet tiddistingwi bejn tliet kategoriji ta’ kostijiet: il-kost tal-finanzjament, il-kost tal-ġestjoni tal-likwidità u l-kostijiet amministrattivi. Il-kost tal-finanzjament jirriżulta mir-rata tal-imgħax u imposti oħra li l-Kummissjoni għandha tħallas fuq l-istrumenti differenti maħruġa biex tiffinanzja l-iżborżi inkwistjoni. Il-kostijiet tal-ġestjoni tal-likwidità huma l-kostijiet imġarrba b’riżultat tal-ammonti maħruġa u miżmuma temporanjament fil-kontijiet tal-likwidità bħala riżervi biex jiġu ssodisfati l-pagamenti li ġejjin. Din l-ispiża ġenerali operazzjonali kontinwa hija karatteristika essenzjali tal-istrateġija ta’ finanzjament diversifikata u jenħtieġ li tinqasam b’mod ġust mill-benefiċjarji kollha. It-tielet kategorija ta’ kostijiet hija l-kostijiet amministrattivi għaż-żamma tal-kapaċità teknika u operazzjonali biex tiġi implimentata strateġija ta’ finanzjament diversifikata, li jirriżultaw direttament b’riżultat tal-implimentazzjoni tal-istrateġija ta’ finanzjament diversifikata.

(8)

Jekk il-programmi ta’ assistenza finanzjarja, iffinanzjati permezz tal-istrateġija ta’ finanzjament diversifikata, ikollhom durata u struttura differenti mill-NGEU u s-self skont ir-Regolament (UE) 2022/2463 tal-Parlament Ewropew u tal-Kunsill (5), huwa xieraq li tkun permessa flessibbiltà addizzjonali permezz tal-emenda tal-metodoloġija tal-allokazzjoni tal-kostijiet. Id-Deċiżjoni ta’ Implimentazzjoni (UE, Euratom) 2022/2545 tipprevedi li l-adegwatezza tal-metodoloġija tal-ikkostjar tal-NGEU għandha tiġi rieżaminata fil-każ tal-adozzjoni ta’ programmi ġodda ta’ assistenza finanzjarja li jkollhom durata u struttura differenti.

(9)

Sabiex tipprovdi l-flessibbiltà mixtieqa, il-metodoloġija tal-allokazzjoni tal-kostijiet jenħtieġ li tinkludi l-kunċett ta’ kompartimenti tal-programm biex jorganizzaw u jimmonitorjaw l-allokazzjoni tal-iżborżi u l-istrumenti ta’ finanzjament relatati għal kull programm. Dan jippermetti l-assenjazzjoni ta’ strumenti ta’ finanzjament għal karatteristiċi finanzjarji speċifiċi għall-programm, u jipprevedi ġestjoni tal-obbligazzjonijiet imfassla apposta permezz ta’ għażla kkalibrata ta’ maturitajiet. L-introduzzjoni ta’ kompartimenti tal-programm tevita s-sussidjar inkroċjat tal-ispejjeż minn programm għal ieħor.

(10)

Dan jenħtieġ li jkun konformi wkoll mal-qafas tas-sistema ta’ governanza stabbilit bid-Deċiżjoni ta’ Implimentazzjoni tal-Kummissjoni (UE, Euratom) 2023/2825 (6), li tipprevedi li l-attribuzzjoni ta’ strumenti ta’ finanzjament fil-programmi kollha għandha tiġi ddeterminata filwaqt li jitqiesu l-miri ta’ maturità rispettivi u r-restrizzjonijiet speċifiċi tal-programmi differenti.

(11)

Jenħtieġ li l-mira ta’ maturità medja u l-ammonti tentattivi tal-operazzjonijiet ta’ finanzjament jiġu indikati għal kull programm permezz ta’ deċiżjonijiet dwar il-pjan ta’ finanzjament adottati skont l-Artikolu 4 tad-Deċiżjoni ta’ Implimentazzjoni (UE, Euratom) 2023/2825. Il-miri stabbiliti għal kull programm, fil-limiti ġenerali stabbiliti bid-deċiżjoni annwali dwar it-teħid b’self, jipprovdu orjentazzjoni mhux vinkolanti fir-rigward tal-livelli li għandhom jintlaħqu fi tmiem il-perjodu ta’ finanzjament, jekk wieħed jassumi li l-ħtiġijiet ta’ finanzjament jibqgħu l-istess. Matul il-perjodu meta jiġi kostitwit programm jew kompartiment taż-żmien, il-maturità medja ponderata tal-istrumenti ta’ finanzjament għal kull programm tista’ tkun differenti mill-objettiv ta’ tmiem il-perjodu. Jenħtieġ li l-Kummissjoni talloka strumenti ta’ finanzjament lill-kompartimenti differenti fuq is-semestri rilevanti, filwaqt li tqis it-tranżazzjonijiet ta’ teħid b’self li jifdal ippjanati fil-bqija tal-perjodu ta’ finanzjament. Meta tagħmel dan, jenħtieġ li l-Kummissjoni tiżgura, bl-aħjar mod possibbli, il-kisba ekwa tal-miri ta’ maturità medja differenti għal kull programm ta’ assistenza finanzjarja fil-kamp ta’ applikazzjoni tal-Artikolu 220a tar-Regolament (UE, Euratom) 2018/1046, u appoġġ mhux ripagabbli skont l-Artikolu 5(1) tad-Deċiżjoni tal-Kunsill (UE, Euratom) 2020/2053 (7), matul il-perjodu kollu ta’ finanzjament. Meta teżegwixxi operazzjonijiet ta’ teħid b’self, jenħtieġ li l-Kummissjoni tipprijoritizza l-kisba tal-aktar termini vantaġġużi, u tqis il-kisba ekwa tal-miri ta’ maturità medja rispettivi fil-kompartimenti tal-programmi fil-livell tal-allokazzjoni bħala objettiv sekondarju. Jenħtieġ li l-Kummissjoni taġġorna u timmonitorja l-ilħuq ta’ tali miri fuq bażi regolari.

(12)

Jenħtieġ li jinħoloq kompartiment tal-programm mad-dħul fis-seħħ ta’ kwalunkwe programm ġdid ta’ assistenza finanzjarja li għandu jiġi ffinanzjat minn tranżazzjonijiet implimentati skont l-istrateġija ta’ finanzjament diversifikata. Il-kompartimenti tal-programm jenħtieġ li jkunu ddedikati għal benefiċjarju wieħed jew għal diversi benefiċjarji, skont jekk l-att bażiku ta’ programm jippermettix biss benefiċjarju wieħed jew aktar tal-assistenza finanzjarja.

(13)

Għal programmi li jippermettu l-għoti ta’ assistenza finanzjarja lil aktar minn benefiċjarju wieħed, l-iżborżi u l-istrumenti ta’ finanzjament relatati fil-kompartiment iddedikat tal-programm jenħtieġ li jiġu kompartimentalizzati aktar f’kompartimenti taż-żmien biex jiġi żgurat li l-kost tal-finanzjament iddebitat għall-iżborż ta’ dak il-benefiċjarju jkun marbut mill-qrib mar-rati prevalenti tas-suq fiż-żmien tal-iżborż. Il-kost tal-finanzjament jiġi stabbilizzat waqt l-għeluq tal-kompartiment taż-żmien.

(14)

Mhuwiex meħtieġ li kompartiment tal-programm relatat ma’ programm ta’ assistenza finanzjarja mfassal biex iservi benefiċjarju wieħed jinqasam f’kompartimenti taż-żmien minħabba li l-ispejjeż kollha jakkumulaw għall-istess benefiċjarju.

(15)

Iż-żieda ta’ kompartimenti tal-programm taħt din id-Deċiżjoni ma għandux ikollha impatt fuq l-allokazzjoni tal-ispejjeż eżistenti għal kwalunkwe wieħed mill-programmi li għalihom diġà tapplika l-metodoloġija eżistenti tal-allokazzjoni tal-ispejjeż. Sabiex jinkiseb dan, l-iżborżi li jsiru qabel id-dħul fis-seħħ ta’ din id-Deċiżjoni, skont l-NGEU, ir-Regolament (UE) 2022/2463, u kwalunkwe programm CAM ieħor fis-seħħ qabel id-dħul fis-seħħ tagħha, kif ukoll strumenti ta’ finanzjament diġà allokati għal kompartimenti taż-żmien eżistenti skont id-Deċiżjoni ta’ Implimentazzjoni (UE, Euratom) 2022/2545, jenħtieġ li jiġu raggruppati taħt kompartiment tal-legat tal-programm iddedikat b’kompartimenti taż-żmien. Jenħtieġ li dan il-kompartiment tal-legat tal-programm jinkludi l-kompartimenti taż-żmien kollha diġà stabbiliti għall-finanzjament ta’ dawk il-programmi kif ukoll kwalunkwe żborż futur u strumenti ta’ finanzjament relatati ma’ dawn il-programmi. Dan se jiżgura li l-attribuzzjoni tal-kostijiet imġarrba mill-Kummissjoni abbażi tal-metodoloġija ta’ allokazzjoni eżistenti tibqa’ mhux affettwata mill-approċċ il-ġdid.

(16)

Il-kalkolu tal-kost tal-finanzjament li jirriżulta minn tranżazzjonijiet ta’ teħid b’self jenħtieġ li jiġi derivat mill-kostijiet li jirriżultaw mill-operazzjonijiet kollha ta’ teħid b’self f’kompartiment tal-programm u, fil-każ ta’ programm multibenefiċjarju, kwalunkwe kompartiment taż-żmien korrispondenti. Il-benefiċjarji tas-self jew, għad-dħul assenjat estern skont l-Artikolu 3(1) tar-Regolament tal-Kunsill (UE) 2020/2094 (8), jenħtieġ li l-baġit ġenerali tal-Unjoni jiġi ddebitat fuq l-istess livell meta l-kostijiet jiġu allokati lill-benefiċjarji tal-istess kompartiment. Dan il-metodu fejn il-kostijiet jiġu ddeterminati matul id-durata ta’ programm jew ta’ perjodu ta’ żmien, jevita l-arbitrarjetà abbażi ta’ “punt fiż-żmien” li tikkaratterizza l-metodu back-to-back tradizzjonali fejn il-kostijiet għal kwalunkwe benefiċjarju partikolari jkunu jirriflettu t-termini li jistgħu jinkisbu fil-jum partikolari li fih ikun sar is-self.

(17)

Kompartiment tal-programm jenħtieġ li jkun attiv matul il-perjodu kollu li fih isiru l-iżborżi ta’ programm iddedikat. Jenħtieġ li f’kompartiment tal-programm multibenefiċjarju, jkun hemm kompartiment taż-żmien attiv wieħed biss fi kwalunkwe ħin. Jenħtieġ li bħala regola, il-kompartimenti taż-żmien, meta stabbiliti, idumu għaddejjin għal semestru li jibda fl-1 ta’ Jannar jew fl-1 ta’ Lulju. Għall-kompartiment tal-legat tal-programm, jenħtieġ li l-ewwel perjodu ta’ żmien ikopri l-perjodu mill-1 ta’ Ġunju 2021 sal-31 ta’ Diċembru 2021 li jirrifletti t-twaqqit għat-tnedija tal-operazzjonijiet ta’ finanzjament tal-NGEU. Bħala regola ġenerali, l-ewwel perjodu ta’ żmien ta’ programm partikolari jenħtieġ li jinħoloq fil-perjodu li fih isir l-ewwel żborż. Kwalunkwe kompartiment taż-żmien jew kompartiment tal-programm jenħtieġ li jibqa’ attiv sakemm l-ammont ta’ finanzjament ta’ terminu twil allokat għalih ikun jaqbel mal-ammont ta’ żborżi. Madankollu, fil-każ ta’ diskrepanza fi tmiem is-semestru, jenħtieġ li perjodu ta’ żmien jibqa’ attiv sakemm l-ammont ta’ żborż u finanzjament ta’ terminu twil ikunu jaqblu. F’dak il-każ, jenħtieġ li jkun possibbli li l-iżborżi jkomplu jiġu allokati temporanjament lill-kompartiment taż-żmien attiv, filwaqt li fl-istess ħin jiġu attribwiti l-istrumenti ta’ finanzjament għall-kompartiment taż-żmien li jmiss.

(18)

Filwaqt li l-kost tal-finanzjament jista’ jvarja matul il-perjodu li fih kompartiment tal-programm jew, meta applikabbli, kompartiment taż-żmien, jkun attiv minħabba differenzi fil-kundizzjonijiet ta’ finanzjament lil hinn mill-kontroll tal-Kummissjoni, jenħtieġ li l-Kummissjoni tiġġestixxi l-operazzjonijiet ta’ teħid b’self u ta’ ġestjoni tad-dejn sabiex tiżgura li kull kompartiment tal-programm u, fejn applikabbli, kompartiment taż-żmien, jilħqu l-mira ta’ maturità rispettiva tagħhom sa grad komparabbli filwaqt li dejjem tipprijoritizza l-kisba tal-aktar termini vantaġġużi fil-programmi kollha.

(19)

L-istrateġija ta’ finanzjament tal-Kummissjoni tippermetti ġestjoni aħjar tar-riskju taċ-ċaqliq fir-rata tal-imgħax u riskji finanzjarji oħra. Filwaqt li r-rati tal-imgħax imposti fuq il-benefiċjarji tas-self huma mistennija li jkunu stabbli, jista’ jkun meħtieġ kalkolu mill-ġdid perjodiku u marġinali tar-rati meta l-istrumenti ta’ finanzjament ta’ terminu twil li jimmaturaw jeħtieġ li jiġu sostitwiti. Jekk ikun ġustifikat, il-Kummissjoni se tiżviluppa l-kapaċità tagħha li tuża derivattivi bħal swaps biex timmaniġġa kwalunkwe riskju taċ-ċaqliq fir-rata tal-imgħax li jifdal u toffri l-opzjoni ta’ selfiet b’rata tal-imgħax fissa lil benefiċjarju. Jenħtieġ li l-kostijiet ta’ din il-faċilità b’rata tal-imgħax fissa jiġġarrbu b’mod sħiħ u esklużiv mill-benefiċjarju li jeżerċita din l-opzjoni.

(20)

L-ammonti ta’ żborżi f’kompartiment tal-programm jew, fejn applikabbli, f’kompartiment taż-żmien, jenħtieġ li jkunu daqs l-ammont ta’ strumenti ta’ finanzjament ta’ terminu twil attribwiti għal dak il-kompartiment jew perjodu ta’ żmien partikolari tal-programm. Fil-biċċa l-kbira tal-każijiet għall-kompartimenti ta’ programmi multibenefiċjarji, l-iżborżi tar-rikavati jenħtieġ li jseħħu u jiġu attribwiti lill-istess kompartiment taż-żmien tal-ħruġ tal-istrumenti ta’ finanzjament ta’ terminu twil użati biex jiġu ġġenerati r-rikavati. Madankollu, dewmien mhux previst fl-iżborżi jista’ jirriżulta f’sitwazzjonijiet fejn ir-rikavati tal-finanzjament ta’ terminu twil ikunu ġew iġġenerati iżda ma jkunx possibbli li dawn jiġu żborżati kif skedat inizjalment. Din il-possibbiltà jenħtieġ li titqies fl-allokazzjoni tal-iżborż lill-kompartimenti taż-żmien differenti.

(21)

Huwa xieraq li tiġi prevista wkoll il-possibbiltà li jiġu antiċipati, fil-kompartiment taż-żmien preċedenti, il-ħtiġijiet ta’ żborż li jinqalgħu kmieni fil-ħajja tal-kompartiment taż-żmien li jmiss. Sabiex jiġu indirizzati sitwazzjonijiet bħal dawn u jiġi żgurat finanzjament b’termini vantaġġużi, jenħtieġ li jkun hemm il-possibbiltà li l-istrumenti ta’ finanzjament ta’ terminu twil jiġu attribwiti lill-perjodu ta’ żmien li jmiss.

(22)

Il-kapaċità li tiġi ġestita l-likwidità tal-operazzjonijiet ta’ finanzjament permezz ta’ aċċess għal teħid b’self għal terminu qasir u ż-żamma ta’ flus għal finijiet prudenzjali hija karatteristika ċentrali u li tiddefinixxi l-istrateġija ta’ finanzjament diversifikata. Din il-ġestjoni tal-likwidità jenħtieġ li tippermetti li l-Kummissjoni tissodisfa l-ħtiġijiet kollha ta’ pagament u tadatta l-ħruġ għall-kundizzjonijiet tas-suq. Huwa xieraq li jiġu stabbiliti metodi għall-kalkolu tal-kostijiet relatati mal-ġestjoni tal-likwidità msemmija fl-Artikoli 6 u 8 tad-Deċiżjoni ta’ Implimentazzjoni (UE, Euratom) 2023/2825. Jenħtieġ li dawn jinkludu l-kostijiet li jirriżultaw mill-ħruġ ta’ strumenti ta’ finanzjament ta’ terminu qasir, iż-żamma ta’ xi rikavati fuq bażi temporanja f’kont tal-likwidità sabiex tiġi żgurata l-kapaċità li jsiru l-pagamenti kollha fuq talba u l-ġestjoni tar-rata tal-imgħax u riskju finanzjarju ieħor. Jenħtieġ li l-kostijiet imġarrba b’rabta ma’ riakkwisti u/jew maż-żamma ta’ bonds proprji għall-finijiet tal-ġestjoni tal-likwidità jitqiesu wkoll bħala kostijiet tal-ġestjoni tal-likwidità. Jenħtieġ li din id-Deċiżjoni tistabbilixxi bażi għall-kalkolu ta’ dawn il-kostijiet ta’ likwidità u l-impożizzjoni tagħhom fuq bażi ġusta u ekwa fuq il-benefiċjarji rilevanti kollha tar-rikavati matul is-sena inkwistjoni.

(23)

L-operazzjonijiet ta’ ġestjoni tal-likwidità jenħtieġ li jgħinu biex jimminimizzaw il-kostijiet tal-ġestjoni tal-likwidità li jistgħu jiġġarrbu meta jinżammu flus kontanti għal finijiet prudenzjali. Ir-redditu fuq l-investiment ta’ parteċipazzjonijiet ta’ likwidità, li jirriżulta minn tranżazzjonijiet tas-suq monetarju garantiti jew mhux garantiti, jenħtieġ li jinkludi l-imgħax ta’ kuljum fir-rigward ta’ kull tranżazzjoni u tariffa kummerċjali potenzjali jew agio/disagio. Ir-redditu fuq l-investiment ta’ dawn l-operazzjonijiet jenħtieġ li jkun is-somma tal-kostijiet tal-ħruġ u ż-żamma ta’ tali likwidità u kwalunkwe redditu fuq l-investiment ta’ tali parteċipazzjonijiet, jenħtieġ li jiġi attribwit kull tliet xhur għall-iżborżi pendenti fuq bażi pro rata.

(24)

Żborżi ogħla mill-ammont ta’ strumenti ta’ finanzjament ta’ terminu twil allokati lill-kompartiment rispettiv tal-programm jew, fejn applikabbli, kompartiment taż-żmien, jew pagamenti tal-imgħax, jistgħu jirriżultaw f’defiċit ta’ likwidità ta’ dak il-kompartiment. Żborżi aktar baxxi mill-ammont ta’ strumenti ta’ finanzjament ta’ terminu twil allokati għall-kompartiment tal-programm rispettiv jew, fejn applikabbli, għall-kompartiment taż-żmien, jew għall-pagamenti ta’ tifdija, jistgħu jirriżultaw f’surplus tal-likwidità. Il-kumpens ta’ dawn is-surpluses jew defiċits ta’ likwidità huwa rekwiżiti inevitabbli tal-implimentazzjoni tal-istrateġija ta’ finanzjament diversifikata. Jenħtieġ li dawn il-kostijiet ma jiġġarrbux mill-kompartimenti rispettivi, iżda jenħtieġ li jiġu iżolati u ġestiti bħala parti minn spiża ġenerali distinta tal-ġestjoni tal-likwidità. Jenħtieġ li din id-Deċiżjoni tistabbilixxi mekkaniżmu biex jiġu separati l-kostijiet li jirriżultaw minn defiċits jew surpluses ta’ likwidità sabiex ikunu jistgħu jiġu assorbiti mill-programm ta’ finanzjament usa’ fil-forma ta’ kostijiet tal-ġestjoni ta’ likwidità. Jenħtieġ li l-Kummissjoni tuża l-kompartiment tal-ġestjoni tal-likwidità biex jiġi bbilanċjat kwalunkwe bilanċ ta’ flus pożittiv jew negattiv fil-kompartimenti tal-programm tal-benefiċjarju uniku jew fil-kompartimenti taż-żmien multibenefiċjarji għall-ammont totali tal-iżborżi.

(25)

L-implimentazzjoni tal-istrateġija ta’ finanzjament diversifikata teħtieġ l-akkwist ta’ kapaċitajiet ġodda meħtieġa biex jinkiseb l-aktar aċċess vantaġġuż għas-swieq kapitali u biex tiġi żgurata l-manutenzjoni ta’ tali infrastruttura b’mod kontinwu u effettiv. Dan jinkludi l-kostijiet meħtieġa biex jinżammu l-kontijiet tal-likwidità, biex tinkiseb il-kapaċità biex isiru rkanti għall-kambjali u l-bonds tal-UE u biex jiġu implimentati kapaċitajiet interni ġodda għall-ipproċessar tad-data. Jenħtieġ li tali kostijiet li jirriżultaw direttament mill-implimentazzjoni tal-operazzjonijiet tat-teħid b’self u ta’ żborż jiġu trattati bħala spejjeż ġenerali li jiddistingwu l-kostijiet relatati mal-istabbiliment u l-manutenzjoni tal-infrastruttura tat-teħid b’self u ta’ pagament. Jenħtieġ li dawn il-kostijiet jiġu koperti mill-kost tas-servizz għall-ispejjeż ġenerali amministrattivi.

(26)

Il-kost tas-servizz għall-ispejjeż ġenerali amministrattivi jiġbor fih il-kostijiet amministrattivi kollha mġarrba direttament bl-implimentazzjoni tal-istrateġija ta’ finanzjament diversifikata. Dawn il-kostijiet għandhom jiġġarrbu bħala kostijiet tal-istabbiliment, relatati ma’ kostijiet ta’ darba għall-bini ta’ kapaċitajiet operazzjonali jew bħala kostijiet rikorrenti, li huma kostijiet inevitabbli direttament attribwibbli għall-operazzjonijiet ta’ teħid b’self u tal-ġestjoni tad-dejn permezz tal-istrateġija ta’ finanzjament diversifikata u li jseħħu maż-żmien. Filwaqt li l-kostijiet rikorrenti huma kostijiet annwali regolari ddebitati għall-iżborżi li jseħħu f’sena partikolari, jenħtieġ li l-kostijiet tal-istabbiliment ikunu tariffi ta’ darba.

(27)

Il-kostijiet relatati mal-istabbiliment u mal-bini tal-kapaċitajiet ta’ dawn l-operazzjonijiet ilhom jiġġarrbu mill-2021 u diġà ġew attribwiti lill-benefiċjarji tal-programmi ta’ appoġġ finanzjarju tal-NGEU, permezz ta’ spiża ġenerali speċifika għall-istabbiliment. Għaldaqstant, jenħtieġ li l-benefiċjarji ta’ programmi oħra ta’ assistenza finanzjarja fil-kamp ta’ applikazzjoni tal-Artikolu 220a tar-Regolament (UE, Euratom) 2018/1046 ma jġarrbux kostijiet relatati ma’ dan il-bini ta’ kapaċitajiet preċedenti iżda nefqa futura relatata mal-manutenzjoni ta’ din l-infrastruttura jew l-iżvilupp ulterjuri tagħha. Is-sehem tal-kostijiet amministrattivi tal-programmi ta’ assistenza finanzjarja fil-kamp ta’ applikazzjoni tal-Artikolu 220a tar-Regolament (UE, Euratom) 2018/1046, għajr l-NGEU, jenħtieġ li jiġi ddeterminat mis-sehem tal-programm fir-rikavati miġbura permezz tal-istrateġija ta’ finanzjament diversifikata matul is-sena li fiha jkunu ġġarrbu l-kostijiet amministrattivi rilevanti.

(28)

Jenħtieġ li l-kostijiet amministrattivi inklużi fil-kost tas-servizz għall-ispejjeż ġenerali amministrattivi jkunu limitati għal lista magħluqa ta’ kostijiet eliġibbli, li huma relatati direttament mal-istrateġija ta’ finanzjament diversifikata. It-tariffi kuntrattwali għar-reklutaġġ ta’ konsulenti esterni huma parti mil-lista ta’ nefqa amministrattiva eliġibbli wara ftehimiet milħuqa fil-kuntest tal-Baġit Annwali għall-2023. L-estensjoni tal-lista ta’ nefqiet amministrattivi eliġibbli ġiet ikkomunikata lill-awtoritajiet tal-Istati Membri qabel l-adozzjoni ta’ din id-Deċiżjoni. Il-kost aggregat tas-servizz għall-ispejjeż ġenerali amministrattivi jirrappreżenta sehem limitat ħafna tal-kostijiet aggregati mill-operazzjonijiet tal-istrateġija finanzjarja diversifikata.

(29)

Il-proċess ta’ fatturazzjoni ex post huwa mfassal biex jiżgura li l-kostijiet jiġu rkuprati fis-sena ta’ wara u sal-mument li l-kostijiet ma jibqgħux jiġu ġġenerati minn operazzjonijiet ta’ teħid b’self, ta’ ġestjoni tad-dejn u ta’ pagament skont l-istrateġija ta’ finanzjament diversifikata.

(30)

B’mod eċċezzjonali, l-Unjoni tista’ ġġarrab il-kost tal-imgħaxijiet u l-kostijiet amministrattivi relatati mat-teħid u t-teħid b’self, bħal fil-każ tas-self ta’ assistenza finanzjarja lill-Ukrajna mogħti skont ir-Regolament (UE) 2022/2463, u r-Regolament (UE) 2024/792 tal-Parlament Ewropew u tal-Kunsill (9). Skont ir-Regolament (UE) 2022/2463, ir-riżorsi meħtieġa għandhom jiġu pprovduti permezz ta’ kontribuzzjonijiet mill-Istati Membri f’konformità mal-Artikolu 5(1) ta’ dak ir-Regolament, sa fejn dawk il-kostijiet ma jkunux koperti permezz ta’ mezzi oħra. F’każ bħal dan, jenħtieġ li l-fatturazzjoni tal-kostijiet tiġi allinjata mal-fatturazzjoni tal-kostijiet fir-rigward tal-iżborżi bħala dħul assenjat estern skont l-Artikolu 3(1) tar-Regolament (UE) 2020/2094 u tiġi raggruppata kull trimestru.

(31)

Jenħtieġ li l-Kummissjoni toħroġ avviż ta’ konferma dwar kull żborż, inkluż appoġġ mhux ripagabbli fis-sens tal-Artikolu 2(2), il-punti (a) u (c), tar-Regolament (UE) 2020/2094, appoġġ ripagabbli lill-Istati Membri fis-sens tal-Artikolu 2(2), il-punt (b), tar-Regolament (UE) 2020/2094, u selfiet lil Stat Membru jew pajjiż terz permezz ta’ programmi għall-assistenza finanzjarja fil-kamp ta’ applikazzjoni tal-Artikolu 220a tar-Regolament Finanzjarju (UE, Euratom) 2018/1046.

(32)

Jenħtieġ li s-self taħt l-istrateġija ta’ finanzjament diversifikata jiġi implimentat fuq termini finanzjarji armonizzati (profil ta’ maturità u ripagament) għal kull żborż li jappartjeni għall-istess programm ta’ assistenza, soġġett għall-kompatibbiltà tiegħu mal-istrateġija ta’ finanzjament diversifikata. Għal appoġġ mhux ripagabbli, jenħtieġ li l-avviż ta’ konferma jkun l-element ta’ sostenn ewlieni li jiddetermina dawn it-termini finanzjarji għall-baġit ġenerali tal-Unjoni. L-avviż ta’ konferma għandu jiddetermina t-talba dwar il-kostijiet abbażi tat-termini finanzjarji tagħha. Jenħtieġ li dawn it-termini jinkludu d-data tal-iżborż, l-ammont tal-appoġġ finanzjarju, id-data tal-kost tal-pagamenti ta’ finanzjament u d-data tal-maturità. L-avviż ta’ konferma jikkostitwixxi l-bażi essenzjali li fuqha huwa bbażat l-ippjanar baġitarju, iċ-ċirkwiti finanzjarji u l-kontabbiltà għal appoġġ mhux ripagabbli tal-UE.

(33)

Jenħtieġ li l-ftehimiet ta’ self jirreferu għal din id-Deċiżjoni bħala l-metodu għall-kalkolu u l-impożizzjoni tal-ispejjeż tas-self.

(34)

Jenħtieġ li din id-Deċiżjoni tapplika għat-tranżazzjonijiet ta’ teħid b’self u l-iżborżi kollha permezz tal-programm NGEU, inklużi dawk li seħħew qabel id-dħul fis-seħħ tagħha.

(35)

Minħabba l-ħtieġa urġenti li tiġi pprovduta assistenza finanzjarja lill-Ukrajna f’Lulju 2024, fost prijoritajiet ta’ politika oħra, taħt il-Faċilità tal-Ukrajna bl-aktar mod adegwat u vantaġġuż, jenħtieġ li din id-deċiżjoni tidħol fis-seħħ b’urġenza.