(1)

Fil-konklużjonijiet tiegħu tat-22 ta' Marzu 2024, il-Kunsill Ewropew iddikjara li minħabba l-urġenza tas-sitwazzjoni, l-Unjoni Ewropea hija determinata li tkompli tipprovdi lill-Ukrajna u lill-poplu tagħha l-appoġġ politiku, finanzjarju, ekonomiku, umanitarju, militari u diplomatiku kollu meħtieġ sakemm ikun hemm bżonn.

(2)

Fil-21 ta’ Mejju 2024 il-Kunsill adotta d-Deċiżjoni (PESK) 2024/1470 (1), li emendat id-Deċiżjoni 2014/512/PESK (2) sabiex tipprovdi li d-depożitorji ċentrali tat-titoli skont it-tifsira tar-Regolament (UE) Nru 909/2014 tal-Parlament Ewropew u tal-Kunsill (3) (“id-depożitorji ċentrali tat-titoli”) li jkollhom assi u riżervi b'valur totali ta' aktar minn EUR 1 miljun għandhom jikkontribwixxu mill-profitti netti straordinarji tagħhom li ġejjin mill-immobilizzazzjoni tal-assi Russi kontribuzzjoni finanzjarja ekwivalenti għal 99,7 % ta' dawk il-profitti netti li jakkumulaw mill-15 ta' Frar 2024. Jenħtieġ li l-pagamenti jsiru f'pagamenti parzjali biannwali sakemm il-profitti straordinarji jieqfu jakkumulaw fuq il-karti tal-bilanċ tad-depożitorji ċentrali tat-titoli minħabba l-waqfien tal-miżuri restrittivi li jipprojbixxu tranżazzjonijiet bl-assi u r-riżervi tal-Bank Ċentrali tar-Russja. Skont dik id-Deċiżjoni, 90 % tal-ammonti tal-kontribuzzjoni finanzjarja mħallsa lill-Unjoni għandhom jintużaw biex jappoġġaw lill-Ukrajna, permezz tal-Faċilità Ewropea għall-Paċi stabbilita fid-Deċiżjoni tal-Kunsill (PESK) 2021/509 (4) (EPF). Peress li l-allokazzjoni għandha tiġi rieżaminata kull sena u għall-ewwel darba qabel l-1 ta' Jannar 2025, il-perċentwal tal-kontribuzzjoni finanzjarja allokata lill-EPF jista' jinbidel fil-futur.

(3)

Sabiex isir użu mill-mekkaniżmi eżekuttivi eżistenti, jenħtieġ li l-ammonti allokati għall-EPF jiġu allokati għal miżuri ta' assistenza għall-provvista ta' appoġġ militari lill-Forzi Armati Ukreni flimkien mal-kontribuzzjonijiet volontarji msemmija fl-Artikolu 30 tad-Deċiżjoni (PESK) 2021/509. Jenħtieġ li dawn l-ammonti allokati jiżdiedu mal-ammonti ta' referenza miftiehma għall-miżuri ta' assistenza rispettivi. Huwa xieraq li jiġu previsti regoli speċifiċi għal dan is-sors ġdid ta' finanzjament, li jenħtieġ li jikkomplementaw ir-regoli eżistenti tal-EPF. B'mod partikolari, m'hemmx bżonn li l-kontribuzzjoni addizzjonali tiġi aċċettata mill-Kumitat Politiku u ta' Sigurtà (KPS) jew li tiġi awtorizzata mill-Kumitat tal-EPF; peress li d-Deċiżjoni (PESK) 2024/1470 diġà tipprevedi awtorizzazzjoni direttament mill-Kunsill, mhija meħtieġa l-ebda proċedura ta' aċċettazzjoni addizzjonali bħal din. Barra minn hekk, m'hemmx bżonn li jiġu konklużi arranġamenti amministrattivi ma' depożitorji ċentrali tat-titoli, peress li r-regoli għall-kontribuzzjoni huma stipulati f'din id-Deċiżjoni.

(4)

L-allokazzjoni tal-ammonti għall-miżuri ta' assistenza b'appoġġ għall-Ukrajna hija mingħajr preġudizzju għan-natura speċifika tal-politika ta' sigurtà u ta' difiża ta' ċerti Stati Membri u għall-pożizzjoni tal-Istati Membri li astjenew f'vot u għamlu dikjarazzjoni formali jew ser jastjenu f'vot u jagħmlu dikjarazzjoni formali f'konformità mat-tieni subparagrafu tal-Artikolu 31(1) tat-Trattat dwar l-Unjoni Ewropea (TUE) fir-rigward ta' miżura ta' assistenza taħt l-EPF. Dawk l-Istati Membri, għalhekk, jibqgħu ma jkunux obbligati japplikaw id-deċiżjonijiet rigward il-miżuri ta' assistenza tal-EPF meta jkunu astjenew u għamlu dikjarazzjoni formali. It-tieni sentenza tal-Artikolu 5(3) tad-Deċiżjoni (PESK) 2021/509 ma tapplikax.

(5)

Huwa xieraq li jiġi previst li l-kostijiet amministrattivi relatati mal-ġestjoni tal-ammonti ma għandhomx jiġġarrbu mill-kontribuzzjonijiet nazzjonali lill-EPF, iżda għandhom jiġu koperti minn dawk l-ammonti. L-appoġġ militari taħt l-EPF għandu jiġi pprovdut f'konformità mal-qafas regolatorju rilevanti, inkluż ir-regoli ta' implimentazzjoni tal-EPF. Barra minn hekk, kwalunkwe appoġġ militari skont l-EPF għandu jingħata b'rispett sħiħ għall-politika ta' sigurtà u ta' difiża ta' ċerti Stati Membri, filwaqt li jiġu żgurati t-trasparenza u t-traċċabbiltà tal-appoġġ iffinanzjat mill-EPF, u filwaqt li jitqiesu l-interessi tas-sigurtà u tad-difiża tal-Istati Membri kollha. Minbarra dan, f'konformità mal-Artikolu 73(10) tad-Deċiżjoni (PESK) 2021/509, f'każijiet fejn Stat Membru jkun astjena f'vot u għamel dikjarazzjoni formali f'konformità mat-tieni subparagrafu tal-Artikolu 31(1) TUE fir-rigward ta' miżura ta' assistenza li għandha tiġi ffinanzjata mill-ammont iddedikat stipulat fl-ewwel subparagrafu tal-Artikolu 73(10) tad-Deċiżjoni (PESK) 2021/509, dak l-Istat Membru ma jikkontribwixxix għall-kostijiet ta' dik il-miżura ta' assistenza u, f'konformità mal-Artikolu 16(4) tad-Deċiżjoni (PESK) 2021/509, mhuwiex Stat Membru kontribwenti għall-finijiet li tiġi koperta r-responsabbiltà mhux kuntrattwali tal-Unjoni li tirriżulta mill-implimentazzjoni ta' miżura ta' assistenza adottata skont id-Deċiżjoni (PESK) 2021/509. Dan japplika għal Stat Membru li jkun astjena u għamel dikjarazzjoni formali f'konformità mat-tieni subparagrafu tal-Artikolu 31(1) TUE fir-rigward għall-miżura ta' assistenza prevista fid-Deċiżjoni tal-Kunsill (PESK) 2022/338 (5).

(6)

Fid-dawl tal-ħtiġijiet li qed jevolvu tal-Forzi Armati Ukreni u sabiex jiġi massimizzat il-valur miżjud tal-Unjoni, il-Kumitat tal-Faċilità stabbilit bid-Deċiżjoni (PESK) 2021/509 jenħtieġ li jiddetermina u perjodikament jirrieżamina l-allokazzjoni tal-ammonti riċevuti bejn il-miżuri ta' assistenza f’konformità ma’ orjentazzjoni strateġika ddedikata pprovduta mill-KPS skont l-Artikolu 9(2) tad-Deċiżjoni (PESK) 2021/509. Jenħtieġ li r-regoli stabbiliti fl-Artikolu 5(5), kif ukoll fl-Artikolu 11(8) u (14) tad-Deċiżjoni (PESK) 2021/509 japplikaw,