(1)

Fl-24 ta’ Frar 2022, ir-Russja bdiet invażjoni fuq skala sħiħa mhux provokata u mhux ġustifikata kontra l-Ukrajna. B’riżultat ta’ dan, miljuni ta’ persuni ħarbu mill-Ukrajna, u d-Deċiżjoni ta’ Implimentazzjoni tal-Kunsill (UE) 2022/382 (3) stabbiliet l-eżistenza ta’ influss bil-massa ta’ persuni spostati mill-Ukrajna u introduċiet protezzjoni temporanja. L-influss ta’ persuni li qed jaħarbu mill-aggressjoni militari Russa kontra l-Ukrajna joħloq sfida għall-Istati Membri kkonċernati meta jiġu biex jiżguraw li tingħata biżżejjed assistenza umanitarja u li jissodisfaw il-ħtiġijiet primarji ta’ dawk in-nies.

(2)

Fl-24 ta’ Frar 2022, l-Ukrajna talbet assistenza f’konformità mal-Artikolu 16(1) tad-Deċiżjoni Nru 1313/2013/UE tal-Parlament Ewropew u tal-Kunsill (4) fir-rigward tal-provvisti tal-protezzjoni ċivili. Bħala espressjoni ta’ solidarjetà u appoġġ, l-Istati Membri u l-komunità internazzjonali wieġbu billi pprovdew merkanzija ta’ assistenza umanitarja sabiex titqassam lill-persuni li qed jaħarbu mill-aggressjoni militari Russa u li jaslu fl-Unjoni u lill-persuni oħra affettwati mill-aggressjoni militari kontra l-Ukrajna.

(3)

Id-Deċiżjoni tal-Kummissjoni (UE) 2022/1108 (5) tat, fir-rigward ta’ ċerti Stati Membri, eżenzjoni mid-dazji fuq l-importazzjoni u eżenzjoni mit-taxxa fuq il-valur miżjud (“VAT”) fuq l-importazzjoni ta’ merkanzija li għandha titqassam jew issir disponibbli mingħajr ħlas lil persuni li qed jaħarbu mill-aggressjoni militari Russa kontra l-Ukrajna u lil persuni fil-bżonn fl-Ukrajna. Id-Deċiżjoni tal-Kummissjoni (UE) 2023/829 (6) estendiet dawk il-miżuri fir-rigward ta’ ċerti Stati Membri sal-31 ta’ Diċembru 2023.

(4)

Fid-19 ta’ Ottubru 2023, il-Kummissjoni kkonsultat lill-Istati Membri dwar jekk kinitx meħtieġa estensjoni tal-validità tal-miżuri stabbiliti fid-Deċiżjoni (UE) 2023/829. Wara dik il-konsultazzjoni, saru talbiet mill-Polonja fis-26 ta’ Ottubru 2023, mil-Litwanja fis-27 ta’ Ottubru 2023, mir-Rumanija fil-31 ta’ Ottubru 2023 u mil-Latvja u mis-Slovakkja fit-3 ta’ Novembru 2023 (“l-Istati Membri rikjedenti”) biex tkompli tapplika dawk il-miżuri.

(5)

Il-kriżi umanitarja kkawżata mill-invażjoni fuq skala sħiħa mhux provokata u mhux ġustifikata tal-Ukrajna mir-Russja għadha għaddejja u tista’ tkun meħtieġa assistenza għal dawk li qed jaħarbu mill-aggressjoni militari kontra l-Ukrajna u għal dawk li għadhom fl-Ukrajna. Din is-sitwazzjoni instabbli qed ikollha konsegwenzi kbar mhux biss għall-Ukrajna, iżda wkoll għal għadd ta’ Stati Membri. Għalhekk, tikkostitwixxi diżastru li jaffettwa t-territorju ta’ għadd ta’ Stati Membri kif imsemmi fl-Artikolu 74(1), il-punt (a), tar-Regolament (KE) Nru 1186/2009 u l-Artikolu 51, l-ewwel paragrafu, il-punt (a), tad-Direttiva 2009/132/KE.

(6)

Għalhekk jixraq li l-Istati Membri li qed jagħmlu t-talba jiġu awtorizzati jagħtu eżenzjoni mid-dazji imponibbli fuq għall-iskopijiet stabbiliti fl-Artikolu 74 tar-Regolament (KE) Nru 1186/2009 u eżenzjoni mill-VAT imponibbli fuq merkanzija importata għall-iskopijiet deskritti fl-Artikolu 51 tad-Direttiva 2009/132/KE minn organizzazzjonijiet tal-Istat, organizzazzjonijiet tal-karità jew filantropiċi approvati mill-awtoritajiet kompetenti tal-Istati Membri li qed jagħmlu t-talba, jew f’isimhom. Meta wieħed iqis is-sitwazzjoni bla preċedent, jixraq li l-Istati Membri li qed jagħmlu t-talba jiġu awtorizzati wkoll jagħtu eżenzjoni mid-dazju fuq l-importazzjoni u eżenzjoni mill-VAT fuq merkanzija għal assistenza umanitarja importati biex tiġi rilaxxata għaċ-ċirkolazzjoni libera minn organizzazzjonijiet tal-Istat jew organizzazzjonijiet tal-karità jew filantropiċi oħra li huma approvati u li jwettqu attivitajiet simili fi Stat Membru ieħor li jkun qed jagħmel it-talba fejn il-merkanzija tkun maħsuba biex tintuża. Sabiex tingħata tweġiba għat-talbiet tal-Istati Membri biex tingħata assistenza lill-persuni li baqgħu fl-Ukrajna u li huma affettwati serjament mill-aggressjoni militari Russa kontra l-Ukrajna, jeħtieġ ukoll li jiġi awtorizzat aktar trasferiment ta’ dik il-merkanzija lejn organizzazzjonijiet tal-Istat Ukreni jew organizzazzjonijiet tal-karità jew filantropiċi approvati mill-awtoritajiet kompetenti Ukreni għad-distribuzzjoni mingħajr ħlas ta’ dik il-merkanzija lill-persuni fil-bżonn fl-Ukrajna. Barra minn hekk, jixraq li l-Istati Membri li qed jagħmlu t-talba jiġu awtorizzati jagħtu eżenzjoni mid-dazji imponibbli fuq l-importazzjoni fuq il-merkanzija importata għall-finijiet stabbiliti fl-Artikolu 74 tar-Regolament (KE) Nru 1186/2009 u eżenzjoni mill-VAT imponibbli fuq merkanzija importata għall-finijiet stabbiliti fl-Artikolu 51 tad-Direttiva 2009/132/KE meta dawn jiġu importati għar-rilaxx għal ċirkolazzjoni libera mill-aġenziji għal għajnuna f’każ ta’ diżastru, jew f’isimhom, sabiex jissodisfaw il-ħtiġijiet tagħhom matul il-perjodu li jipprovdu għajnuna f’każ ta’ diżastru lill-persuni affettwati mill-aggressjoni militari Russa kontra l-Ukrajna.

(7)

Sabiex jiġu mmonitorjati l-importazzjonijiet li għalihom tingħata eżenzjoni mid-dazji ta’ importazzjoni jew eżenzjoni mill-VAT, jenħtieġ li l-Istati Membri li jagħmlu t-talba jinfurmaw lill-Kummissjoni bin-natura u l-kwantitajiet u l-valur tal-merkanzija differenti mdaħħla mingħajr dazji fuq l-importazzjoni u l-VAT għad-distribuzzjoni jew id-disponibbiltà mingħajr ħlas lill-persuni li qed jaħarbu mill-aggressjoni militari Russa kontra l-Ukrajna, bl-organizzazzjonijiet li jkunu approvaw għad-distribuzzjoni jew għad-disponibbiltà ta’ dik il-merkanzija u bil-miżuri meħuda biex jiġi evitat li l-merkanzija tintuża għal skopijiet oħra għajr dawk li jindirizzaw il-ħtiġijiet tal-persuni li qed jaħarbu mill-aggressjoni militari Russa kontra l-Ukrajna.

(8)

Sabiex tiġi żgurata l-konformità mal-kundizzjonijiet stabbiliti f’din id-Deċiżjoni, jiġu evitati l-irregolaritajiet, u jiġu protetti l-interessi finanzjarji tal-Unjoni u tal-Istati Membri, jenħtieġ li l-Istati Membri li jagħmlu t-talba jiżguraw l-applikazzjoni ta’ miżuri ta’ ġestjoni tar-riskju u ta’ kontroll doganali pertinenti fir-rigward tar-rilaxx għal ċirkolazzjoni u użu liberi u t-trasferiment sussegwenti lejn l-Ukrajna, ta’ merkanzija li għaliha tingħata l-eżenzjoni mid-dazji fuq l-importazzjoni jew mill-eżenzjoni mill-VAT. Il-miżuri meħuda jenħtieġ li jiġu rrappurtati lill-Kummissjoni sal-iskadenza stabbilita f’din id-Deċiżjoni.

(9)

Filwaqt li jitqiesu l-isfidi li qed jiffaċċjaw l-Istati Membri li qed jagħmlu t-talba, jenħtieġ li l-eżenzjoni mid-dazji fuq l-importazzjoni u l-eżenzjoni mill-VAT jingħataw għall-importazzjonijiet li saru mill-1 ta’ Jannar 2024. Jenħtieġ li l-eżenzjoni tibqa’ fis-seħħ sal-31 ta’ Diċembru 2024.

(10)

Fis-27 ta’ Novembru 2023, l-Istati Membri ġew ikkonsultati f’konformità mal-Artikolu 76, l-ewwel paragrafu, tar-Regolament (KE) Nru 1186/2009 u mal-Artikolu 53, l-ewwel paragrafu tad-Direttiva 2009/132/KE,

(a)

lista tal-organizzazzjonijiet approvati mill-awtoritajiet kompetenti fl-Istati Membri kif imsemmi fl-Artikolu 1(1)(c);

(b)

l-informazzjoni konsolidata li ġejja fir-rigward tal-merkanzija mdaħħla mingħajr dazji fuq l-importazzjoni u VAT f’konformità mal-Artikolu 1:

(c)

il-miżuri meħuda biex tiġi żgurata l-konformità mal-Artikoli 78, 79 u 80 tar-Regolament (KE) Nru 1186/2009 u mal-Artikoli 55, 56 u 57 tad-Direttiva 2009/132/KE u, kif jixraq, il-ġestjoni tar-riskju u l-miżuri ta’ kontroll doganali meħuda skont l-Artikolu 46 tar-Regolament (UE) Nru 952/2013 tal-Parlament Ewropew u tal-Kunsill (7), fir-rigward tal-merkanzija li taqa’ fil-kamp ta’ applikazzjoni ta’ din id-Deċiżjoni.