(1)

Fil-11 ta’ Mejju 2023, Franza ressqet talba lill-Kummissjoni, f’konformità mal-Artikolu 7(4) tad-Direttiva (UE) 2016/797, għan-nuqqas temporanju ta’ applikazzjoni tal-punt 7.4.2.1 tal-Anness tar-Regolament tal-Kummissjoni (UE) 2016/919 (2) (“is-CCS-TSI”), għal erba’ vetturi V300 Zefiro I-F identifikati bin-numri ERT1000 -23, ERT1000 -28, ERT1000 -31 u ERT1000 -47.

(2)

It-talba tikkonċerna l-vetturi V300 Zefiro I-F li inizjalment inxtraw minn Trenitalia S.p.A. (permezz tal-kuntratt Nru 14625 tat-30 ta’ Settembru 2010) bħala parti minn flotta ta’ 50 vettura biex joperaw fuq in-network tas-sistema ferrovjarja Taljana. Fit-22 ta’ Ottubru 2021, Trenitalia S.p.A. (permezz tal-kuntratt Nru 4669), talbet l-aġġornament ta’ tliet vetturi tal-flotta oriġinali bl-iskop li joperaw f’servizz transfruntier bejn Franza u l-Italja. Fis-7 ta’ Novembru 2021, Trenitalia S.p.A., permezz ta’ ittra ta’ intenzjoni bir-referenza TRNIT-DACQ.ACQR\P\2022\0040367, talbet l-aġġornament ta’ vettura addizzjonali waħda għall-istess skop. It-tip ta’ vettura aġġornata jissejjaħ V300 Zefiro I-F. It-talba tressqet abbażi tal-Artikolu 7(1), il-punt (c), tad-Direttiva (UE) 2016/797, jiġifieri n-nuqqas ta’ vijabbiltà ekonomika tat-twettiq tal-aġġornament ulterjuri għal-Linja Bażi 3 tal-ETCS (“Sistema Ewropea ta’ Kontroll tal-Ferroviji”) stabbilit fil-punt 7.4.2.3 tal-Anness tar-Regolament (UE) 2016/919.

(3)

Wara l-preżentazzjoni tat-talba, ir-Regolament (UE) 2016/919 tħassar bir-Regolament ta’ Implimentazzjoni tal-Kummissjoni (UE) 2023/1695 (3). Fis-sustanza, ir-rekwiżit li tiġi installata l-ETCS (Linja Bażi 3) stabbilit fil-punt 7.4.2.1 tal-Anness tar-Regolament (UE) 2016/919 attwalment huwa stabbilit fil-punti 7.4.2.1 u 7.4.2.4 tal-Anness I tar-Regolament ta’ Implimentazzjoni (UE) 2023/1695. Għalhekk, it-talba oriġinali jenħtieġ li titqies bħala talba biex temporanjament ma jiġux applikati l-punti 7.4.2.1 u 7.4.2.4 tal-Anness I tar-Regolament ta’ Implimentazzjoni (UE) 2023/1695.

(4)

Għall-erba’ vetturi ġodda V300 Zefiro I-F, Trenitalia se tfittex li tikseb awtorizzazzjoni skont it-tip diġà awtorizzat (NIE EU8020210113) u se testendi ż-żona tal-użu tagħha min-network Taljan għan-network Franċiż. L-erba’ vetturi diġà joperaw fin-network Taljan bil-Linja Bażi 2 tal-ETCS.

(5)

Bl-iskop li l-operat tagħhom jiġi estiż fuq in-network nazzjonali Franċiż, il-vetturi V300 Zefiro I-F huma mgħammra b’sistema ta’ protezzjoni awtomatika tal-ferroviji (“ATP”) addizzjonali: is-subsistema bistandard ERTMS/TVM b’konfigurazzjoni “nazzjonali mnaqqsa” interfaċċata mas-subsistema ta’ protezzjoni tal-ferroviji KVB, flimkien mas-subsistema ATESS 3G interfaċċata mal-KVB. Din l-ATP hija l-unika waħda permessa għall-operat fuq linji tan-network Franċiż ta’ veloċità għolja li mhumiex mgħammra bl-ERTMS.

(6)

Skont il-punti 7.4.2.1 u 7.4.2.4 tal-Anness I tar-Regolament ta’ Implimentazzjoni (UE) 2023/1695, l-erba’ vetturi kkonċernati jenħtieġ li jkunu mgħammra bis-subsistema bistandard ERTMS/TVM kompatibbli mal-Linja Bażi 3.

(7)

Madankollu, dan kieku jobbliga lill-operatur Trenitalia u lill-fornitur Bombardier – Hitachi jimmodifikaw il-vetturi u jagħmlulhom modifika retroattiva, u b’hekk il-kost tal-proġett jiżdied tant li l-vijabbiltà ekonomika tiegħu tkun kompromessa, apparti li jaffettwa d-disponibbiltà tal-vetturi għall-isfruttament kummerċjali fuq linji oħra. Dan kieku jkollu impatt ekonomiku fuq it-telf tal-profitt minħabba n-nuqqas ta’ disponibbiltà tal-ferroviji u l-kostijiet addizzjonali tal-manutenzjoni, li jiżdiedu minħabba l-ħtieġa sussegwenti ta’ taħriġ għall-persunal tal-manutenzjoni u n-nuqqas ta’ sinerġiji bejn l-ewwel flotta ta’ ħames vetturi mgħammra bil-Linja Bażi 2 tal-ETCS fis-servizz transfruntier, u l-flotta l-ġdida ta’ erba’ vetturi mgħammra bil-Linja Bażi 3.

(8)

Il-manifattur tal-erba’ vetturi kkonċernati, u s-sid tagħhom, Trenitalia S.p.A., impenjaw ruħhom għal pjan ta’ inġinerija u installazzjoni biex jaġġornaw dawk il-vetturi bil-Linja Bażi 3 il-ġdida tal-ETCS għat-tagħmir abbord. Skont l-iżjed skedi reċenti pprovduti mill-applikant, l-aġġornament mil-Linja Bażi 2 tal-ETCS għal-Linja Bażi 3 tal-ETCS jenħtieġ li jibda f’Diċembru 2026 u jitlesta sal-31 ta’ Awwissu 2027. L-ETCS tal-ħames ferroviji Zefiro l-oħra li jiffurmaw il-flotta se tiġi aġġornata wkoll għal-Linja Bażi 3 fl-istess dati.

(9)

In-nuqqas ta’ deċiżjoni pożittiva kieku jimplika dewmien ta’ 4 snin fid-disponibbiltà ta’ ferroviji ġodda li kapaċi jwettqu l-istess servizz, bl-impatt ekonomiku sussegwenti, il-bidla għal mezzi tat-trasport li jniġġsu iktar kif ukoll in-nuqqas ta’ sinerġiji bejn il-ħames ferroviji Zefiro fis-servizz u l-vetturi li jiffurmaw is-suġġett ta’ din it-talba.

(10)

L-analiżi mwettqa mill-Kummissjoni turi li l-ispeċifikazzjonijiet alternattivi li kieku jiġu applikati biex jiggarantixxu s-sikurezza u l-interoperabbiltà tal-vetturi huma biżżejjed.

(11)

Abbażi tal-argumenti ppreżentati mill-applikanti u ddikjarati mill-ġdid fil-premessi 7, 8 u 9, il-kundizzjonijiet stabbiliti fl-Artikolu 7(1), il-punt (c), u fl-Artikolu 7(4) tad-Direttiva (UE) 2016/797 jenħtieġ li jitqiesu bħala ssodisfati għall-erba’ vetturi kkonċernati. Għalhekk, it-talba mressqa minn Franza għan-nuqqas ta’ applikazzjoni tal-punti 7.4.2.1 u 7.4.2.4 tal-Anness I tar-Regolament ta’ Implimentazzjoni (UE) 2023/1695 għal dawk il-vetturi sakemm jiġu mgħammra bil-Linja Bażi 3 tal-ETCS sal-31 ta’ Awwissu 2027 jenħtieġ li tiġi aċċettata.

(12)

Sabiex ikollha ħarsa ġenerali lejn l-ippjanar tat-tiġdid tal-vetturi u l-progress tiegħu, jenħtieġ li Franza tinforma lill-Kummissjoni sal-31 ta’ Diċembru ta’ kull sena, sabiex tiggarantixxi l-iżvilupp tal-proġett fiż-żmien prestabbilit.

(13)

Il-miżuri previsti f’din id-Deċiżjoni huma skont l-opinjoni tal-Kumitat imsemmi fl-Artikolu 51(1) tad-Direttiva (UE) 2016/797,