(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fl-għalf tal-annimali u r-raġunijiet u l-proċeduri għall-għoti ta’ tali awtorizzazzjoni. L-Artikolu 10(2) ta’ dak ir-Regolament jipprevedi l-evalwazzjoni mill-ġdid tal-addittivi awtorizzati skont id-Direttiva tal-Kunsill 70/524/KEE (2).

(2)

Is-sustanza tafal sepiolitiku ġiet awtorizzata mingħajr limitu ta’ żmien f’konformità mad-Direttiva 70/524/KEE bħala addittiv tal-għalf għall-ispeċijiet kollha tal-annimali, li jagħmlu parti mill-grupp funzjonali “leganti, antiagglomeranti u koagulanti”. Dik is-sustanza wara ġiet inkluża fir-Reġistru tal-addittivi tal-għalf bħala prodott eżistenti, f’konformità mal-Artikolu 10(1), punt (b), tar-Regolament (KE) Nru 1831/2003.

(3)

Skont l-Artikolu 10(2) tar-Regolament (KE) Nru 1831/2003 flimkien mal-Artikolu 7 tiegħu, tressqet applikazzjoni għar-rievalwazzjoni tat-tafal sepiolitiku bħala addittiv fl-għalf għall-ispeċijiet tal-annimali kollha, it-talba li l-addittiv jiġi kklassifikat fil-kategorija “addittivi teknoloġiċi” u fil-gruppi funzjonali “leganti” u “antiagglomeranti”. Flimkien ma’ dik l-applikazzjoni ntbagħtu d-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(4)

Fl-opinjoni tagħha tal-4 ta’ Mejju 2022 (3), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li, skont il-kundizzjonijiet tal-użu proposti, it-tafal sepiolitiku huwa sikur għar-ruminanti tal-ħalib, għall-ħnienes miftuma, għall-ħnieżer għat-tismin u Suidae oħra li jikbru f’livell ta’ 20 000 mg għal kull kilo ta’ għalf komplet, għas-salmonidi f’livell ta’ 17 600 mg għal kull kilo ta’ għalf komplet u għat-tiġieġ għat-tismin f’livell ta’ 10 000 mg għal kull kilo ta’ għalf komplet, u ma għandux effett negattiv fuq is-sikurezza tal-konsumatur jew fuq l-ambjent. Ma setgħetx tasal għal konklużjoni dwar is-sikurezza tal-addittiv għal speċijiet u kategoriji oħra ta’ annimali. L-awtorità kkonkludiet ukoll li l-addittiv joħloq riskju mill-inalazzjoni għall-utent, b’mod partikolari minħabba l-preżenza tas-silika kristallina u tan-nikil fl-addittiv, u li mhuwiex irritanti għall-ġilda jew għall-għajnejn iżda jenħtieġ li jitqies bħala sensitizzatur respiratorju u tal-ġilda. L-awtorità kkonkludiet li l-addittiv huwa effikaċi bħala legant u bħala antiagglomerant. Ivverifikat ukoll ir-rapport dwar il-metodu ta’ analiżi tal-addittivi tal-għalf ippreżentat mil-Laboratorju ta’ Referenza stabbilit permezz tar-Regolament (KE) Nru 1831/2003.

(5)

Il-valutazzjoni tat-tafal sepiolitiku turi li l-kundizzjonijiet għall-awtorizzazzjoni, kif previsti fl-Artikolu 5 tar-Regolament (KE) Nru 1831/2003, huma ssodisfati. Għaldaqstant, jenħtieġ li l-użu ta’ dak l-addittiv jiġi awtorizzat għar-ruminanti tal-ħalib, għas-suidae miftuma u għat-tismin, għas-salmonidi u għat-tiġieġ għat-tismin. Il-Kummissjoni talbet informazzjoni supplimentari lill-applikant dwar is-sikurezza tal-addittiv għall-ispeċijiet u l-kategoriji l-oħra tal-annimali. Il-Kummissjoni hija tal-fehma li jenħtieġ li jittieħdu miżuri protettivi xierqa sabiex jiġu evitati effetti negattivi fuq is-saħħa tal-bniedem, b’mod partikolari fir-rigward tal-utenti tal-addittiv. Dawk il-miżuri protettivi jenħtieġ li jikkonformaw mal-leġiżlazzjoni tal-Unjoni dwar ir-rekwiżiti tas-sikurezza tal-ħaddiema.

(6)

Peress li r-raġunijiet ta’ sikurezza ma jirrikjedux l-applikazzjoni immedjata tal-modifiki fil-kundizzjonijiet tal-awtorizzazzjoni għas-sustanza kkonċernata, jixraq li jiġi previst perjodu ta’ tranżizzjoni biex il-partijiet interessati jħejju ruħhom biex jissodisfaw ir-rekwiżiti l-ġodda li jirriżultaw mill-awtorizzazzjoni.

(7)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,