(1)

Id-Direttiva (UE) 2019/904 tistabbilixxi miri għall-kontenut minimu tal-plastik riċiklat fil-fliexken tax-xorb tal-plastik li jintużaw darba biss elenkati fil-Parti F tal-Anness ta’ dik id-Direttiva, inkluż il-fliexken tal-PET. Skont id-Direttiva (UE) 2019/904, il-mira għall-2025 hi tal-anqas 25% plastik riċiklat għall-fliexken tal-PET, ikkalkolat bħala medja għall-fliexken tal-PET kollha mqegħdin fis-suq fit-territorju tal-Istat Membru, u l-mira għall-2030 hi tal-anqas 30% plastik riċiklat għall-fliexken tax-xorb, ikkalkulat bħala medja għall-fliexken tax-xorb kollha mqegħdin fis-suq fit-territorju tal-Istat Membru. Il-Kummissjoni qed tistabbilixxi l-metodoloġija għall-kalkolu u l-verifika ta’ dawk il-miri tal-kontenut tal-plastik riċiklat u l-format li bih l-Istati Membri jridu jirrapportaw id-data dwar il-kontenut tal-plastik riċiklat fil-fliexken tal-PET u fil-fliexken tax-xorb kull sena.

(2)

Għall-finijiet tal-kalkolu u l-verifika tal-miri tal-kontenut tal-plastik riċiklat fil-fliexken tax-xorb tal-plastik li jintużaw darba biss, jenħtieġ li t-tikketti u l-koperturi jitqiesu bħala partijiet mill-fliexken tax-xorb. L-ewwel nett, flixkun tax-xorb, fil-format li bih jinbiegħ b’mod komuni lill-konsumaturi, jikkonsisti mill-qafas tiegħu, it-tapp, l-għatu, u minn tikketta jew kopertura. It-tikketti u l-koperturi jintużaw biex titwassal l-informazzjoni lill-konsumaturi inkluż għal skopijiet ta’ mmarkar u ta’ reklamar. Filwaqt li l-koperturi ġeneralment ikunu jilħqu d-dawra kollha tal-flixkun, it-tikketti l-oħra normalment ikunu jkopru biss parti iżgħar tal-flixkun. It-tieni, it-tikketti u l-koperturi spiss jitwaħħlu mal-flixkun fl-istess stadju tal-produzzjoni bħat-tappijiet u l-għotjien. Għalhekk, jenħtieġ li l-piż tat-tikketti u l-koperturi jiġi inkluż fil-piż tal-fliexken tax-xorb, u kull plastik riċiklat li jkun hemm fit-tikketti u l-koperturi għandu jiġi inkluż fil-piż tal-plastik riċiklat tal-fliexken tax-xorb. Il-Parti F tal-Anness tad-Direttiva (UE) 2019/904 tispeċifika li l-fliexken tax-xorb jinkludu t-tappijiet u l-għotjien. B’kuntrast għat-tappijiet u l-għotjien, it-tikketti u l-koperturi spiss ma jintremewx separatament mill-qafas tal-fliexken, u din hi r-raġuni għalfejn ma jissemmewx b’mod espliċitu bħala element tal-flixkun fid-Direttiva (UE) 2019/904.

(3)

Il-miri tal-kontenut minimu tal-plastik riċiklat stabbiliti fid-Direttiva (UE) 2019/904 jingħataw bħala persentaġġ tal-fliexken tal-PET u tal-fliexken tax-xorb kollha mqegħdin fis-swieq tal-Istati Membri. Billi l-objettiv tal-miri, skont il-premessa 17 ta’ dik id-Direttiva, hu li jippromwovu l-użu fis-suq tal-plastik riċiklat, bl-għan aħħari li jkun żgurat l-użu ċirkolari tal-plastik, jixraq li meta jiġu stabbiliti r-regoli għall-kalkolu u l-verifika tal-kontenut tal-plastik riċiklat, jitqiesu biss il-partijiet tal-plastik tal-fliexken tax-xorb. L-unika parti ta’ flixkun komuni tax-xorb tal-plastik li jintuża darba biss li tista’ ma tkunx magħmula mill-plastik mistennija tkun it-tikketta tiegħu, li jaf tkun tal-karta. Billi l-piż tat-tikketta hu stmat li ma jkunx aktar minn 5% tal-piż tal-flixkun, l-esklużjoni ta’ partijiet mhux tal-plastik tal-fliexken tax-xorb mill-kalkolu ma tħalli l-ebda impatt sinifikanti fuq il-valutazzjoni ta’ jekk il-miri ntlaħqux.

(4)

Għall-fini tal-kalkolu u l-verifika tal-kontenut tal-plastik riċiklat fil-fliexken tax-xorb u r-rapportar dwaru, jenħtieġ li jiġi definit it-terminu “plastik riċiklat”. Il-plastik riċiklat jenħtieġ li jinkludi biss il-materjal li kien skart tal-plastik ta’ wara l-konsum qabel ma jidħol fir-riċiklaġġ għax diġà hemm biżżejjed inċentivi tas-suq għar-riċiklaġġ tal-iskart tal-plastik ta’ qabel l-użu mill-konsumatur. Barra minn hekk, id-Direttiva (UE) 2019/904 għandha l-għan li tnaqqas l-impatt ta’ ċerti prodotti tal-plastik fuq l-ambjent, u l-iskart tal-plastik ta’ qabel l-użu mill-konsumatur normalment ma jiġix rilaxxat fl-ambjent. L-iskart tal-plastik ta’ wara l-użu mill-konsumatur jeħtieġ li jinftiehem bħala l-iskart iġġenerat mill-prodotti tal-plastik imqegħdin fis-suq. Għalhekk, l-iskart tal-plastik li jirriżulta mill-imballaġġ tal-plastik tal-prodotti mqegħdin fis-suq iżda li qabżu d-data tal-iskadenza tagħhom qabel ma nbiegħu lill-konsumaturi jenħtieġ li jitqies bħala skart tal-plastik ta’ wara l-konsum. Għaldaqstant, il-materjali tal-plastik u l-iskart iġġenerat tul il-proċessi tal-produzzjoni jew tal-manifattura, inkluż l-ipproċessar, l-ittestjar, il-ħżin u t-trasferimenti sekondarji kollha qabel ma l-prodott jitqiegħed fis-suq jenħtieġ li ma jitqisux bħala skart ta’ wara l-użu mill-konsumatur.

(5)

Skont id-Direttiva (UE) 2019/904, l-Istati Membri għandhom jirrapportaw informazzjoni dwar il-kontenut tal-plastik riċiklat fil-fliexken tal-PET u fil-fliexken kollha tax-xorb lill-Kummissjoni biex juru li ntlaħqu l-miri tal-kontenut tal-plastik riċiklat. Filwaqt li l-kontenut riċiklat jirreferi għall-ammont tal-materjal riċiklat, il-miri huma espressi bħala persentaġġ, jiġifieri bħala l-proporzjon tal-plastik riċiklat fil-fliexken tax-xorb u fil-fliexken tal-PET. Biex juru li laħqu l-miri, l-Istati Membri jenħtieġ li jkunu obbligati jirrapportaw mhux biss il-piż totali tal-kontenut tal-plastik riċiklat fil-fliexken tax-xorb u fil-fliexken tal-PET, iżda anki l-piż totali tal-partijiet tal-plastik tal-fliexken infushom biex ikun jista’ jiġi kkalkolat il-proporzjon tal-kontenut tal-plastik riċiklat.

(6)

Ir-Regolament tal-Kummissjoni (UE) 2022/1616 (2) jistabbilixxi katina tar-rapportar tul il-passi konsekuttivi tal-manifattura li tinkludi r-rapportar tal-persentaġġ tal-plastik riċiklat f’kull lott tal-materjal li fih plastik riċiklat u li hu maħsub biex jiġi f’kuntatt mal-ikel. Dik il-katina tar-rapportar tobbliga lill-operaturi ekonomiċi li joperaw fl-istadji bikrija tal-katina tal-manifattura, jiġifieri r-riċiklaturi u l-konvertituri, biex jipprovdu dikjarazzjoni tal-konformità. Il-konvertituri li ma jqegħdux il-fliexken tax-xorb fis-suq u r-riċiklaturi mhumiex meħtieġa jikkalkulaw il-piż tal-plastik riċiklat f’dawk il-fliexken. Id-dikjarazzjoni tal-konformità trid tingħata lill-operaturi ekonomiċi fi stadji aktar tard tal-katina tal-manifattura, inkluż lill-operaturi ekonomiċi li jqiegħdu l-fliexken tax-xorb fis-suq. L-obbligi tar-rapportar skont ir-Regolament (UE) 2022/1616 ikopru l-partijiet kollha tal-plastik b’kontenut riċiklat tal-fliexken tax-xorb li jaqgħu fil-kamp ta’ applikazzjoni tad-Direttiva (UE) 2019/904. Għalhekk, l-operaturi ekonomiċi li jqiegħdu l-fliexken tax-xorb fis-suq jistgħu jikkalkulaw il-piż tal-plastik riċiklat fi fliexken bħal dawn abbażi tal-persentaġġ tal-kontenut tal-plastik riċiklat indikat fid-dikjarazzjoni tal-konformità għal kull parti tal-fliexken. Billi l-objettiv ta’ din id-Deċiżjoni hu li tippermetti kalkolu u verifika uniformi tal-miri tal-kontenut riċiklat stabbiliti fid-Direttiva (UE) 2019/904, il-kalkolu jeħtieġ li jsir b’mod konsistenti fl-Istati Membri kollha. Għalhekk l-Istati Membri jenħtieġ li jibbażaw il-kalkolu tal-kontenut tal-plastik riċiklat fil-fliexken tax-xorb fuq id-data ġġenerata f’konformità mar-Regolament (UE) 2022/1616. Barra minn hekk, metodoloġija bħal din tnaqqas kemm jista’ jkun il-piż amministrattiv fuq l-operaturi ekonomiċi u l-Istati Membri. Għalhekk, l-Istati Membri jenħtieġ li jiġbru data mingħand l-operaturi ekonomiċi li jqiegħdu fliexken tax-xorb fis-suq tagħhom dwar il-piż tal-partijiet tal-plastik ta’ dawk il-fliexken u l-piż tal-plastik riċiklat li hemm fihom.

(7)

Id-definizzjonijiet ta’ “plastik” imsemmija fir-Regolament (UE) 2022/1616 u fid-Direttiva (UE) 2019/904 ivarjaw għax jirreferu għal definizzjonijiet differenti ta’ “polimeru”; l-ewwel waħda hi bbażata fuq kif ġie manifatturat il-materjal filwaqt li t-tieni waħda hi bbażata fuq il-proprjetajiet strutturali attwali tiegħu. Barra minn hekk, id-definizzjoni ta’ “plastik” fid-Direttiva (UE) 2019/904 teskludi l-polimeri naturali li ma ġewx modifikati kimikament. Iżda dawn id-differenzi mhumiex rilevanti għall-fliexken tax-xorb li jaqgħu fil-kamp ta’ applikazzjoni tad-Direttiva (UE) 2019/904. Id-definizzjoni ta’ “plastik riċiklat” fir-Regolament (UE) 2022/1616 hi differenti mid-definizzjoni introdotta f’din id-Deċiżjoni fis-sens li, teoretikament, jista’ jinkludi l-plastik verġni li ġie miżjud fil-proċess tad-dekontaminazzjoni. Iżda meta jiżdied xi materjal verġni, dan jiġi rifless fl-informazzjoni mogħtija mir-riċiklaturi u jingħadda fil-katina tal-valur. Dan mhux se jgħodd għall-kontenut tal-plastik riċiklat kif definit f’din id-Deċiżjoni. Għalhekk id-differenzi fid-definizzjonijiet ta’ “plastik” u ta’ “plastik riċiklat” mhumiex rilevanti għall-finijiet ta’ din id-Deċiżjoni.

(8)

Billi l-partijiet kollha tal-fliexken tax-xorb huma materjali maħsuba biex jiġu f’kuntatt mal-ikel, ir-Regolament (UE) 2017/625 tal-Parlament Ewropew u tal-Kunsill (3) japplika għall-fliexken tax-xorb, inkluż il-kontrolli uffiċjali tal-persentaġġ tal-plastik riċiklat li r-riċiklaturi u l-konvertituri jridu jipprovdu fid-dikjarazzjoni tal-konformità, f’konformità mar-Regolament (UE) 2022/1616. Għalhekk, l-Istati Membri jenħtieġ li jintalbu biss jintroduċu dispożizzjonijiet ta’ verifika addizzjonali rigward it-trażmissjoni tal-informazzjoni lill-Istati Membri mill-operaturi ekonomiċi li jqiegħdu fliexken tax-xorb fis-suq, meħtieġa b’din id-Deċiżjoni.

(9)

Il-plastik riċiklat fil-fliexken tax-xorb hu soġġett għar-Regolament (UE) 2022/1616 jew għar-Regolament tal-Kummissjoni (UE) Nru 10/2011 (4), skont b’liema teknoloġija tar-riċiklaġġ jinkiseb. Skont ir-Regolament (UE) 2022/1616, l-unika teknoloġija tar-riċiklaġġ xierqa li bħalissa tista’ tintuża biex jinkiseb il-plastik riċiklat għall-fliexken tax-xorb hi r-riċiklaġġ mekkaniku tal-iskart tal-PET ta’ wara l-użu mill-konsumatur. Il-plastik miksub b’teknoloġiji tar-riċiklaġġ kimiċi li jkissru l-input tal-iskart f’sustanzi elenkati fl-Anness I tar-Regolament (UE) Nru 10/2011 u li sussegwentement jintuża fil-manifattura ta’ plastik ġdid f’konformità ma’ dak ir-Regolament, ma jistax jiġi distint mill-materjal verġni. Għalhekk id-dokumentazzjoni tal-konformità maħruġa f’konformità ma’ dak ir-Regolament bħalissa ma tindikax l-ammont tal-kontenut riċiklat fih. Din id-Deċiżjoni tqis biss il-plastik riċiklat fil-fliexken tax-xorb li jaqa’ fil-kamp ta’ applikazzjoni tar-Regolament (UE) 2022/1616.

(10)

Biex jitqies ukoll il-plastik riċiklat fil-fliexken tax-xorb li ma jkunx inkiseb bir-riċiklaġġ mekkaniku tal-iskart tal-PET, il-Kummissjoni qed tippjana li tfassal emenda għal din id-Deċiżjoni biex tinkludi metodoloġija biex tikkalkola, tivverifika u tirrapporta l-kontenut tal-plastik riċiklat fil-fliexken tax-xorb abbażi tal-applikazzjoni ta’ ċerti mudelli tal-katina tal-kustodja kif definiti fl-ISO 22095-2020 (Katina tal-kustodja — Terminoloġija u mudelli ġenerali). B’mod partikolari, it-taħlit ikkontrollat li jippermetti li jitqies ukoll il-PET mhux riċiklat mekkanikament, hu mudell possibbli tal-katina tal-kustodja. Barra minn hekk, approċċ ta’ bilanċ tal-massa jista’ jiġi inkluż bħala mudell ta’ katina tal-kustodja ammissibbli biex jitqies ukoll il-plastik fil-fliexken li mhumiex tal-PET miksub bir-riċiklaġġ tal-materja prima.

(11)

Ir-regoli għall-kalkolu u l-verifika tal-miri tal-kontenut tal-plastik riċiklat u l-format għar-rapportar tad-data u tal-informazzjoni dwar il-kontenut tal-plastik riċiklat huma marbuta mill-qrib għax jirreferu għall-istess plastik riċiklat fl-istess fliexken. Biex tkun żgurata l-koerenza, ir-regoli għall-kalkolu u l-verifika tal-miri tal-kontenut, u l-format għar-rapportar tad-data u tal-informazzjoni jenħtieġ li jiġu stabbiliti f’att legali wieħed.

(12)

Il-format għar-rapportar tad-data u l-informazzjoni jqis il-metodi tal-kejl u l-formati tar-rapportar għall-imballaġġ u l-iskart mill-imballaġġ stabbiliti fid-Deċiżjoni tal-Kummissjoni 2005/270/KE (5), li huma bbażati wkoll fuq il-piż u l-materjal.

(13)

Il-miżuri previsti f’din id-Deċiżjoni huma skont l-opinjoni tal-Kumitat stabbilit bl-Artikolu 39 tad-Direttiva 2008/98/KE tal-Parlament Ewropew u tal-Kunsill (6),

(1)

“skart tal-plastik ta’ wara l-konsum” tfisser skart, kif definit fl-Artikolu 3(1) tad-Direttiva 2008/98/KE, jiġifieri plastik u li ġie ġġenerat minn prodotti tal-plastik imqegħdin fis-suq;

(2)

“plastik riċiklat” tfisser plastik li kien skart tal-plastik ta’ wara l-użu mill-konsumatur qabel ir-riċiklaġġ kif definit fl-Artikolu 3(17) tad-Direttiva 2008/98/KE u li ġie ġġenerat bir-riċiklaġġ;

(3)

“flixkun tax-xorb” tfisser flixkun tax-xorb tal-plastik li jintuża darba biss b’kapaċità sa tliet litri, inkluż it-tapp, l-għatu, it-tikketta u l-kopertura tiegħu, jekk ikun hemm, minbarra:

(4)

“flixkun tal-PET” tfisser flixkun tax-xorb manifatturat minn polietilentereftalat bħala l-komponent ewlieni;

(5)

“operatur ekonomiku” tfisser xi wieħed mill-operaturi li ġejjin diment li jkun iqiegħed il-fliexken tax-xorb fis-suq: