(1)

Id-Direttiva 2014/40/UE tal-Parlament Ewropew u tal-Kunsill (2) tipprojbixxi l-introduzzjoni fis-suq ta’ ċerti prodotti tat-tabakk (is-sigaretti, it-tabakk tal-brim u l-prodotti tat-tabakk imsaħħna) b’benniet karatterizzanti.

(2)

Ir-Regolament ta’ Implimentazzjoni tal-Kummissjoni (UE) 2016/779 (3) stabbilixxa regoli uniformi dwar il-proċeduri biex jiġi ddeterminat jekk prodott tat-tabakk għandux benna karatterizzanti.

(3)

F’konformità mad-Deċiżjoni ta’ Implimentazzjoni (UE) 2016/786, il-bord konsultattiv indipendenti (“il-bord”) għandu jispeċifika u, skont il-każ, jaġġorna l-metodoloġija għall-valutazzjoni teknika tal-prodotti tat-tabakk riferuti lilu minn Stat Membru jew mill-Kummissjoni għal opinjoni dwar jekk għandhomx benna karatterizzanti (“il-prodotti għall-ittestjar”).

(4)

Permezz tad-Deċiżjoni tal-Kummissjoni 2021/C 89 I/01 (4), il-Kummissjoni approvat metodoloġija għall-valutazzjoni teknika tal-prodotti għall-ittestjar li jassistu fid-determinazzjoni tal-prodotti tat-tabakk b’benna karatterizzanti applikabbli għas-sigaretti u għat-tabakk tal-brim.

(5)

Wara l-adozzjoni tad-Direttiva Delegata tal-Kummissjoni 2022/2100 (5) li emendat l-Artikolu 7(12) tad-Direttiva 2014/40/UE sabiex tirtira l-eżenzjonijiet mill-projbizzjonijiet tal-introduzzjoni fis-suq tal-prodotti tat-tabakk b’benna karatterizzanti jew li fihom aromatizzanti f’wieħed mill-komponenti tagħhom bħal pereżempju l-filtri, il-karti, il-pakketti, il-kapsuli jew kwalunkwe karatteristika teknika li tippermetti l-modifika tar-riħa jew tat-togħma tal-prodotti tat-tabakk ikkonċernati jew l-intensità tad-duħħan tagħhom, għall-prodotti tat-tabakk imsaħħna, il-bord aġġorna l-metodoloġija msemmija fl-Anness tad-Deċiżjoni 2021/C 89 I/01, filwaqt li estenda l-kamp ta’ applikazzjoni tagħha għall-prodotti tat-tabakk imsaħħna.

(6)

Konsegwentement, fil-31 ta’ Awwissu 2023, il-bord adotta, wara proċedura bil-miktub, abbozz ta’ metodoloġija aġġornat għall-valutazzjoni teknika tal-prodotti għall-ittestjar sabiex jiġi ddeterminat jekk il-prodotti tat-tabakk għandhomx benna karatterizzanti, bit-titolu “Metodoloġija biex tappoġġa d-deċiżjoni dwar jekk prodott tat-tabakk għandux benna karatterizzanti. Applikazzjoni għas-sigaretti, għat-tabakk tal-brim u għall-prodotti tat-tabakk imsaħħna.”

(7)

F’konformità mal-Artikolu 9(2) tad-Deċiżjoni ta’ Implimentazzjoni (UE) 2016/786 l-abbozz ta’ metodoloġija għall-valutazzjoni teknika tal-prodotti għall-ittestjar sabiex jiġi ddeterminat jekk il-prodotti tat-tabakk għandhomx benna karatterizzanti għandu jiġi ppreżentat, flimkien ma’ kull aġġornament sussegwenti, lid-Direttur Ġenerali għall-approvazzjoni, u dan l-abbozz ta’ metodoloġija jkun applikabbli biss wara li jkun ġie approvat.

(8)

Ladarba l-metodoloġija aġġornata tiġi approvata, jenħtieġ li d-Deċiżjoni 2021/C 89 I/01 titħassar u tiġi sostitwita kif xieraq,