(1)

Wara l-aggressjoni mhux provokata u mhux ġustifikata tar-Russja kontra l-Ukrajna, l-Unjoni appoġġat lill-Ukrajna b’sensiela ta’ miżuri finanzjarji. L-appoġġ ingħata fuq bażi ad hoc għal perjodu ta’ żmien limitat u kien jeħtieġ proviżjonament sinifikanti mill-baġit tal-Unjoni u mill-garanziji tal-Istati Membri.

(2)

L-Ukrajna teħtieġ assistenza kontinwa biex issostni l-funzjonament tal-Istat. Flimkien ma’ sħab internazzjonali oħra, l-Unjoni hija mistennija tikkontribwixxi biex tkopri l-ħtiġijiet ta’ finanzajment urġenti tal-Ukrajna. Għal dak l-għan, l-Unjoni stabbiliet strument ġdid skont ir-Regolament (UE) 2022/2463 tal-Parlament Ewropew u tal-Kunsill (2). Skont dak l-istrument, parti sinifikanti mill-assistenza finanzjarja prevista tiġi pprovduta fil-forma ta’ self.

(3)

Fil-kuntest ta’ instabbiltà esterna akbar, huwa xieraq li tiġi prevista soluzzjoni ta’ finanzjament strutturata għas-snin 2023 u 2024 biex jiġi żgurat appoġġ finanzjarju kontinwu għall-Ukrajna.

(4)

Għaldaqstant huwa xieraq li l-Unjoni titħalla tipprovdi r-riżorsi baġitarji meħtieġa b’mod sostenibbli u sod. Dan jenħtieġ li jsir billi jiġi estiż il-mekkaniżmu eżistenti fil-forma ta’ garanzija tal-baġit tal-Unjoni biex ikopri l-assistenza finanzjarja li ssir disponibbli għall-Ukrajna fis-snin 2023 u 2024. Jenħtieġ li dak il-mekkaniżmu jippermetti mobilizzazzjoni sa 100 % tal-ammonti ta’ obbligazzjonijiet finanzjarji meħtieġa biex jiġu onorati l-obbligi ta’ ripagament tal-Unjoni taħt l-operazzjonijiet ta’ għoti u teħid b’self fil-każ li l-Unjoni ma tirċevix il-pagament dovut fil-ħin mill-Ukrajna.

(5)

Jenħtieġ li jkun possibbli li jiġu mobilizzati l-approprjazzjonijiet meħtieġa fil-baġit tal-Unjoni lil hinn mil-limiti massimi tal-qafas finanzjarju pluriennali għall-Istati Membri, kif ukoll għall-assistenza finanzjarja lill-Ukrajna disponibbli għas-snin 2023 u 2024. Jenħtieġ li dik il-possibbiltà tkun mingħajr preġudizzju għall-obbligu li jiġi rispettat il-limitu massimu tar-riżorsi proprji stabbilit fl-Artikolu 3(1) tad-Deċiżjoni tal-Kunsill (UE, Euratom) 2020/2053 (3).

(6)

Fil-prinċipju, u sakemm ma jinħolqux żviluppi eċċezzjonali oħra, dik il-garanzija tal-baġit tal-Unjoni jenħtieġ li tkopri għajnuna finanzjarja b’terminu qasir għal-Ukrajna għal ammont sa EUR 18 000 000 000 kif speċifikat fir-Regolament (UE) 2022/2463 u l-użu tal-assistenza makro-finanzjarja matul l-2024 jenħtieġ li jkun limitat għal żborżi fl-ewwel kwart ta’ dik is-sena kif speċifikat f’dak ir-Regolament.

(7)

Jenħtieġ li dan ir-Regolament japplika biss għall-programmi ta’ assistenza finanzjarja lill-Ukrajna disponibbli għas-snin 2023 u 2024.

(8)

Għaldaqstant, jenħtieġ li r-Regolament tal-Kunsill (UE, Euratom) 2020/2093 (4) jiġi emendat skont dan.

(9)

Fid-dawl tal-urġenza li tirriżulta miċ-ċirkustanzi eċċezzjonali kkawżati mill-gwerra ta’ aggressjoni mhux provokata u mhux ġustifikata tar-Russja kontra l-Ukrajna, huwa meqjus xieraq li tiġi invokata l-eċċezzjoni għall-perjodu ta’ tmien ġimgħat prevista fl-Artikolu 4 tal-Protokoll Nru 1 dwar ir-rwol tal-Parlamenti nazzjonali fl-Unjoni Ewropea, anness mat-Trattat dwar l-Unjoni Ewropea, mat-Trattat dwar il-Funzjonament tal-Unjoni Ewropea u mat-Trattat li jistabbilixxi l-Komunità Ewropea tal-Enerġija Atomika.

(10)

Fid-dawl tas-sitwazzjoni fl-Ukrajna, jenħtieġ li dan ir-Regolament jidħol fis-seħħ b’urġenza fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea,