(1)

Ir-Regolament tal-Kunsill (KEE) Nru 95/93 (3) ġie emendat kemm-il darba mill-bidu tal-kriżi tal-COVID-19 ’l hawn peress li r-rekwiżit stabbilit b’dak ir-Regolament li joperaw mill-inqas 80 % ta’ serje ta’ slots biex jinżamm id-dritt għall-istess serje ta’ slots fil-perjodu ta’ skedar ekwivalenti li kien imiss ma baqax sostenibbli għat-trasportaturi tal-ajru fid-dawl ta’ tnaqqisiet qawwijin fil-livelli tat-traffiku tal-ajru.

(2)

Iċ-ċifri ppubblikati mill-Eurocontrol, li hija l-maniġer tan-network għall-funzjonijiet tan-network tat-traffiku tal-ajru tal-Ajru Uniku Ewropew, juru li t-traffiku tal-ajru rkupra bil-kbir mill-bidu tal-perjodu ta’ skedar tas-sajf 2022, u li t-traffiku tal-ajru fil-bidu tal-perjodu ta’ skedar tax-xitwa 2022/2023 mistenni jkun madwar 90 % tal-livelli fl-2019 skont il-previżjoni bażi. Dawk iċ-ċifri jiġġustifikaw ritorn għar-rekwiżit tal-użu tas-slots ta’ 80 % bħala regola ġenerali għall-perjodu ta’ skedar tas-sajf 2023, flimkien ma’ tnaqqis speċifiku fl-użu tas-slots meta jkun hemm nuqqas ġustifikat ta’ użu ta’ slots.

(3)

Madankollu, minħabba l-kriżi tal-COVID-19, is-sitwazzjoni fis-settur tal-avjazzjoni għadha inċerta ħafna. Kif ġara fl-aħħar tal-2021, jaf ifeġġu varjanti ġodda tal-COVID-19 u jikkawżaw reazzjonijiet għal għarrieda kemm mill-awtoritajiet nazzjonali kif ukoll mill-konsumaturi li min-naħa tagħhom jistgħu jaffettwaw ħażin lit-traffiku tal-ajru. Barra minn hekk, ċerti swieq fuq distanzi twal għadhom qed jintlaqtu minn miżuri sanitarji li jxekklu serjament it-traffiku tal-ajru.

(4)

Il-gwerra ta’ aggressjoni tar-Russja kontra l-Ukrajna qed tħalli wkoll impatt fuq it-traffiku tal-ajru u fuq il-kapaċità tat-trasportaturi tal-ajru li joperaw is-slots tagħhom peress li t-trasportaturi tal-ajru tal-Unjoni mhumiex jitħallew jidħlu fl-ispazju tal-ajru tal-Belarussja, tar-Russja u tal-Ukrajna.

(5)

Ir-restrizzjonijiet fuq l-ivvjaġġar imposti mill-istat għal raġunijiet sanitarji u l-impossibbiltà li wieħed jidħol fl-ispazju tal-ajru ta’ dik li saret żona tal-gwerra huma lil hinn mill-kontroll tat-trasportaturi tal-ajru. Dawn iċ-ċirkostanzi jistgħu jwasslu għall-kanċellazzjoni volontarja jew obbligatorja tas-servizzi tal-ajru tagħhom jew għall-aġġustament tal-iskedi. B’mod partikolari, il-kanċellazzjonijiet volontarji jħarsu s-saħħa finanzjarja tat-trasportaturi tal-ajru u fl-istess ħin jevitaw l-impatt ambjentali negattiv ikkawżat mit-titjiriet operati biss biex iżommu s-slots tagħhom.

(6)

F’dawk iċ-ċirkostanzi, it-trasportaturi tal-ajru li jonqsu milli jużaw is-slots tagħhom skont ir-rata tal-użu tas-slots stabbilita fir-Regolament (KEE) Nru 95/93 jenħtieġ li ma jitilfux awtomatikament il-preċedenza fir-rigward tas-serje ta’ slots stipulata fl-Artikoli 8(2) u 10(2) ta’ dak ir-Regolament, li setgħu jgawdu minnhom f’ċirkostanzi oħra. Għal dan il-għan, jenħtieġ li dan ir-Regolament jistabbilixxi regoli speċifiċi.

(7)

Fl-istess ħin, hu importanti li jitfakkru l-objettivi tar-Regolament (KEE) Nru 95/93, li huma b’mod partikolari li jkun aċċertat l-użu effiċjenti tal-kapaċità tal-ajruporti u li jkun aċċertat aċċess ġust għat-trasportaturi tal-ajru kollha għal kapaċità limitata tal-ajruporti, biex b’hekk tiġi promossa l-kompetizzjoni. Jenħtieġ li l-aġġustament tar-rekwiżiti tal-użu normali tas-slots billi tonqos ir-rata tal-użu jew billi jiġu estiżi xi eċċezzjonijiet tan-nuqqas ġustifikat ta’ użu jkun limitat strettament għal sitwazzjonijiet meta s-solliev mill-użu tas-slots ikun neċessarju u jenħtieġ li ma joħloqx vantaġġi kompetittivi inġusti lil dawk it-trasportaturi tal-ajru li jkollhom slots storiċi.

(8)

B’mod partikolari, huwa neċessarju li jkun aċċertat li t-trasportaturi tal-ajru li huma disposti li jipprovdu s-servizzi, jitħallew jużaw kapaċità mhux użata u jkollhom il-possibbiltà li jżommu dawk is-slots fit-tul. Jenħtieġ li jinżammu l-inċentivi tat-trasportaturi tal-ajru ħalli tintuża l-kapaċità tal-ajruporti, li min-naħa tagħha hija ta’ benefiċċju għall-konsumaturi.

(9)

Għalhekk huwa neċessarju li jiġu stipulati, f’konformità ma’ dawk il-prinċipji u għal perjodu limitat, il-kundizzjonijiet li skonthom it-trasportaturi tal-ajru jibqgħu intitolati għas-serje tas-slots skont l-Artikolu 8(2) u l-Artikolu 10(2) tar-Regolament (KEE) Nru 95/93, u jiġu stabbiliti rekwiżiti għat-trasportaturi tal-ajru kkonċernati biex jirrilaxxaw il-kapaċità mhux użata. Il-perjodu jenħtieġ li jibda jiddekorri mit-30 ta’ Ottubru 2022 sat-28 ta’ Ottubru 2023 bi qbil mal-irkupru previst mill-Eurocontrol.

(10)

Waqt dan il-perjodu, id-definizzjoni tat-terminu “membru ġdid” jenħtieġ li tinżamm wiesgħa sabiex jiżdied l-għadd ta’ trasportaturi tal-ajru koperti, u b’hekk aktar trasportaturi tal-ajru jingħataw l-opportunità li jistabbilixxu u jespandu l-operazzjonijiet tagħhom.

(11)

Mit-30 ta’ Ottubru 2022 sat-28 ta’ Ottubru 2023, is-sistema tal-allokazzjoni tas-slots jenħtieġ li tibqa’ tirrikonoxxi l-isforzi tat-trasportaturi tal-ajru li jkunu operaw titjiriet bl-użu ta’ slots li huma parti minn serje li trasportatur tal-ajru ieħor huwa intitolat għaliha skont l-Artikolu 8(2) u l-Artikolu 10(2) tar-Regolament (KEE) Nru 95/93, iżda li jkunu ngħataw lill-koordinatur tas-slots għal riallokazzjoni temporanja. Għalhekk, it-trasportaturi tal-ajru li jkunu operaw mill-inqas ħames slots ta’ serje jenħtieġ li jingħataw prijorità għall-allokazzjoni ta’ dawk is-serje fil-perjodu ta’ skedar ekwivalenti li jmiss, soġġetta għad-disponibbiltà tal-kapaċità tal-ajruport.

(12)

Biex jiġu indirizzati l-effetti tal-gwerra ta’ aggressjoni tar-Russja kontra l-Ukrajna u biex jiġi appoġġat l-irkupru tal-konnettività bejn l-Unjoni u l-Ukrajna, huwa neċessarju li jiġi estiż il-perjodu li matulu l-operaturi jkunu jistgħu jiddependu fuq ir-raġuni stipulata fl-Artikolu 10(4), il-punt (a), tar-Regolament (KEE) Nru 95/93 biex jiġġustifikaw in-nuqqas ta’ użu tas-serje tas-slots fir-rotot bejn l-Unjoni u l-Ukrajna.

(13)

Mingħajr preġudizzju għall-obbligu tal-Istati Membri li jikkonformaw mal-liġi tal-Unjoni, b’mod partikolari mar-regoli stipulati fit-Trattati u fir-Regolament (KE) Nru 1008/2008 tal-Parlament Ewropew u tal-Kunsill (4), il-konsegwenzi negattivi fuq il-kapaċità tal-passiġġieri li jivvjaġġaw minħabba r-restrizzjonijiet possibbli adottati mill-awtoritajiet pubbliċi tal-Istati Membri jew ta’ pajjiżi terzi biex jindirizzaw sitwazzjonijiet epidemjoloġiċi, diżastri naturali jew taqlib politiku, bħal rewwixti, irvellijiet jew diżordni pubbliku severi, ma jistgħux jiġu attribwiti lit-trasportaturi tal-ajru u jenħtieġ li jiġu mitigati meta dawk il-miżuri jħallu impatt sinifikanti fuq il-vijabbiltà jew il-possibbiltà tal-ivvjaġġar jew fuq id-domanda għar-rotot ikkonċernati. Il-miżuri ta’ mitigazzjoni jenħtieġ li jaċċertaw li t-trasportaturi tal-ajru ma jiġux penalizzati għan-nuqqas tal-użu tas-slots meta dak in-nuqqas jiġri minħabba restrizzjonijiet bħal dawk.

(14)

Biex jonqos ir-riskju ta’ distorsjonijiet tal-kompetizzjoni u biex ikun aċċertat l-użu effiċjenti tal-kapaċità tal-ajruporti, jenħtieġ li s-solliev speċifiku mill-effetti tal-impożizzjoni ta’ dawk ir-restrizzjonijiet ikollu tul ta’ żmien u ambitu limitati, b’hekk ikun aċċertat li l-effett tal-miżuri ta’ mitigazzjoni jkun limitat għall-perjodu meta kienu ġustifikati. Slots koperti minn tali miżuri li jtaffu l-effett tar-restrizzjonijiet jenħtieġ li jitqiesu li ġew operati għall-finijiet tar-Regolament (KEE) Nru 95/93.

(15)

Huwa neċessarju li jiġi ċċarat li d-dispożizzjonijiet dwar in-nuqqas ġustifikat ta’ użu tal-eċċezzjonijiet tas-slots ma japplikawx għat-trasportaturi tal-ajru li huma l-oġġett ta’ miżuri restrittivi adottati skont l-Artikolu 29 tat-Trattat dwar l-Unjoni Ewropea (TUE) jew l-Artikolu 215 tat-Trattat dwar il-Funzjonament tal-Unjoni Ewropea (TFUE), jew għat-trasportaturi tal-ajru soġġetti għal projbizzjoni fuq l-operat fl-Unjoni li huma elenkati fl-Anness A jew B tar-Regolament tal-Kummissjoni (KE) Nru 474/2006 (5). Biex tkun aċċertata l-applikazzjoni effettiva ta’ dawk il-miżuri, l-impossibbiltà li jiġu invokati d-dispożizzjonijiet dwar in-nuqqas ġustifikat ta’ użu tas-slots jenħtieġ li tapplika wkoll għat-trasportaturi tal-ajru li diġà huma l-oġġett ta’ miżuri restrittivi bħal dawn fis-seħħ fid-data tad-dħul fis-seħħ ta’ dan ir-Regolament.

(16)

Il-kooperazzjoni bejn il-koordinaturi jenħtieġ li tissaħħaħ biex tkun aċċertata implimentazzjoni uniformi tar-Regolament (KEE) Nru 95/93 madwar l-Unjoni.

(17)

Jenħtieġ li l-koordinaturi jiskambjaw l-aħjar prattiki dwar l-implimentazzjoni tar-Regolament (KEE) Nru 95/93, inkluż permezz tal-Assoċjazzjoni tal-Koordinaturi tal-Ajruporti (EUACA). L-EUACA hija mħeġġa tkompli toħroġ gwida biex tiġi aċċertata implimentazzjoni armonizzata tar-regoli tal-Unjoni, b’mod partikolari fir-rigward tad-dispożizzjoni dwar il-mitigazzjoni tar-restrizzjonijiet. Barra minn hekk, jekk il-mitigazzjoni tiġix applikata jew le hija biċċa informazzjoni importanti għat-trasportaturi tal-ajru meta jkunu qed jippjanaw l-iskedi tagħhom. Għalhekk, huwa neċessarju li tiġi aċċertata komunikazzjoni trasparenti mill-koordinaturi.

(18)

Filwaqt li miżuri li jtaffu r-restrizzjonijiet jenħtieġ li jiġu interpretat b’mod strett peress li dawn jirrappreżentaw eċċezzjoni għar-rekwiżiti tal-użu normali tas-slots, f’ċerti każijiet jenħtieġ li jkun possibbli li tintalab azzjoni komuni mill-koordinaturi kollha biex ikunu aċċertati kundizzjonijiet ekwivalenti madwar l-Unjoni. Skont ċerti kundizzjonijiet u abbażi ta’ deċiżjoni unanima, il-koordinaturi jenħtieġ li jkunu jistgħu japplikaw dik id-dispożizzjoni għas-slots kollha miżmuma fl-ajruporti kkoordinati.

(19)

Ir-robustezza tal-previżjonijiet tat-traffiku għall-perjodu ta’ skedar tax-xitwa 2022/2023 hija affettwata b’mod negattiv mill-inċertezza dwar l-evoluzzjoni ta’ diversi kriżijiet, b’mod partikolari s-sitwazzjoni fl-Ukrajna u l-kriżi tal-COVID-19. Konsegwentement, it-trasportaturi tal-ajru jenħtieġ li jiġu rilaxxati, sa fejn ikun meħtieġ, mir-rekwiżiti li joperaw slots sabiex jinżamm id-dritt għall-istess slots fil-perjodu ta’ skedar ekwivalenti li jmiss. Dan jippermetti lit-trasportaturi tal-ajru jżidu l-forniment ta’ servizzi meta ċ-ċirkostanzi jippermettu, bil-ħsieb li jiġu applikati r-regoli normali għall-operat tas-slots mill-perjodu ta’ skedar tas-sajf 2023, soġġett għal dawk l-adattamenti magħmula mill-Kummissjoni f’ċirkostanzi speċifiċi biex tirreaġixxi għal ċerti sfidi għas-settur tat-trasport bl-ajru.

(20)

Biex jiġi indirizzat l-impatt li qed jevolvi tal-kriżi tal-COVID-19 jew ta’ sitwazzjonijiet epidemjoloġiċi oħra, kif ukoll l-impatt devastanti dirett tal-gwerra ta’ aggressjoni tar-Russa kontra l-Ukrajna fuq it-traffiku tal-ajru u biex tiġi appoġġata l-konnettività mill-Ukrajna u lejha, u biex ikun hemm rispons flessibbli, meta strettament neċessarju u ġustifikat, għall-isfidi li s-settur tat-trasport bl-ajru qed jiffaċċa bħala konsegwenza, is-setgħa li jiġu adottati atti f’konformità mal-Artikolu 290 TFUE jenħtieġ li tiġi delegata lill-Kummissjoni fir-rigward tal-emendar tal-valuri perċentwali tar-rata minima tal-użu f’ċerta firxa u għal kwalunkwe perjodu ta’ skedar fil-perjodu mit-30 ta’ Ottubru 2022 sat-28 ta’ Ottubru 2023 bi qbil mal-irkupru previst mill-Eurocontrol u fir-rigward tal-emendar tal-valuri perċentwali tar-rata minima tal-użu f’ċerta firxa għar-rotot bejn l-Unjoni u l-Ukrajna u għal kwalunkwe perjodu ta’ skedar mit-30 ta’ Ottubru 2022 sat-28 ta’ Ottubru 2023. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti, u li dawk il-konsultazzjonijiet jitwettqu f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (6). B’mod partikolari, biex tkun aċċertata parteċipazzjoni ugwali fit-tħejjija tal-atti delegati, il-Parlament Ewropew u l-Kunsill jirċievu d-dokumenti kollha fl-istess ħin mal-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi ta’ esperti tal-Kummissjoni li jittrattaw it-tħejjija tal-atti delegati.

(21)

L-ajruporti, il-fornituri tas-servizzi tal-ajruport u t-trasportaturi tal-ajru jeħtieġ li jiġu informati dwar il-kapaċità disponibbli għall-finijiet ta’ ppjanar adegwat. It-trasportaturi tal-ajru jenħtieġ li jibqgħu jagħmlu disponibbli lill-koordinatur kull slot li ma jkunx beħsiebhom jużaw, minn kmieni kemm jista’ jkun u sa tliet ġimgħat qabel id-data ppjanata tal-operat tas-slots, ħalli l-koordinatur ikun jista’ jirriallokahom lil trasportaturi tal-ajru oħrajn. Meta t-trasportaturi tal-ajru jonqsu ripetutament milli jikkonformaw ma’ dak ir-rekwiżit, jenħtieġ li ma jibbenefikawx minn rata mnaqqsa tal-operat tas-slots.

(22)

Meta koordinatur ikun sodisfatt li trasportatur tal-ajru jkun waqaf jopera f’ajruport, il-koordinatur jenħtieġ li jieħu minnufih is-slots mingħand it-trasportatur tal-ajru inkwistjoni u jqegħedhom fil-ġabra tas-slots għal riallokazzjoni lil trasportaturi oħra.

(23)

Il-projbizzjoni fuq it-trasportaturi tal-ajru milli jtiru fl-ispazju tal-ajru tal-Unjoni bl-applikazzjoni ta’ miżuri restrittivi adottati skont l-Artikolu 29 TUE jew l-Artikolu 215 TFUE jew ta’ projbizzjoni fuq l-operat skont ir-Regolament (KE) Nru 474/2006 tista’ tikkawża l-imblukkar mhux ġustifikat ta’ slots fl-ajruporti tal-Unjoni. Filwaqt li s-slots użati qabel minn trasportaturi tal-ajru bħal dawn jistgħu jiġu riallokati fuq bażi ad hoc tul il-perjodu ta’ skedar, dan ma jħeġġiġx biżżejjed l-użu effiċjenti tas-slots li jippermetti lil-linji tal-ajru jżidu l-kompetizzjoni u l-konnettività fit-tul għall-benefiċċju tal-konsumaturi. Għalhekk, is-slots jenħtieġ li jiġu rtirati minnufih mit-trasportaturi tal-ajru kkonċernati.

(24)

Minħabba li l-objettiv ta’ dan ir-Regolament, jiġifieri li jiġu stabbiliti regoli speċifiċi u s-solliev mir-regoli ġenerali dwar l-użu tas-slots għal perjodu ta’ żmien limitat, ħalli jittaffew l-effetti ta’ kriżi epidemjoloġika u tal-gwerra ta’ aggressjoni tar-Russja kontra l-Ukrajna fuq it-traffiku bl-ajru, ma jistax jinkiseb biżżejjed mill-Istati Membri iżda pjuttost, minħabba l-iskala u l-effetti tal-azzjoni proposta, jista’ jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak meħtieġ biex jintlaħaq dak l-objettiv.

(25)

Minħabba l-urġenza taċ-ċirkostanzi eċċezzjonali relatati mal-kriżi tal-COVID-19 u l-gwerra ta’ aggressjoni tar-Russja kontra l-Ukrajna, huwa meqjus xieraq li tiġi invokata l-eċċezzjoni għall-perjodu ta’ tmien ġimgħat prevista fl-Artikolu 4 tal-Protokoll Nru 1 dwar ir-rwol tal-Parlamenti nazzjonali fl-Unjoni, mehmuż mat-Trattat dwar l-Unjoni Ewropea, mat-Trattat dwar il-Funzjonament tal-Unjoni Ewropea u mat-Trattat li jistabbilixxi l-Komunità Ewropea tal-Enerġija Atomika.

(26)

Biex tkun aċċertata l-applikazzjoni malajr tal-miżuri previsti f’dan ir-Regolament, jenħtieġ li bħala kwistjoni ta’ urġenza, dan jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea,

(1)

L-Artikolu 2 huwa emendat kif ġej:

(2)

L-Artikolu 8 huwa emendat kif ġej:

(3)

L-Artikolu 10 huwa emendat kif ġej:

(4)

L-Artikolu 10a huwa emendat kif ġej:

(5)

fl-Artikolu 11, il-paragrafu 1 huwa sostitwit b’dan li ġej:

(6)

fl-Artikolu 12a, il-paragrafu 2 huwa sostitwit b’dan li ġej:

(7)

fl-Artikolu 14, il-paragrafu 6 huwa sostitwit b’dan li ġej: