EUR-Lex Access to European Union law
This document is an excerpt from the EUR-Lex website
Document 32022R1450
Commission Delegated Regulation (EU) 2022/1450 of 27 June 2022 supplementing Regulation (EU) 2018/848 of the European Parliament and of the Council as regards the use of non organic protein feed for the production of organic livestock due to Russia’s invasion of Ukraine (Text with EEA relevance)
Regolament Delegat tal-Kummissjoni (UE) 2022/1450 tas-27 ta’ Ġunju 2022 li jissupplimenta r-Regolament (UE) 2018/848 tal-Parlament Ewropew u tal-Kunsill fir-rigward tal-użu tal-għalf tal-proteini mhux organiku għall-produzzjoni tal-bhejjem organiċi minħabba l-invażjoni tar-Russja fl-Ukrajna (Test b’rilevanza għaż-ŻEE)
Regolament Delegat tal-Kummissjoni (UE) 2022/1450 tas-27 ta’ Ġunju 2022 li jissupplimenta r-Regolament (UE) 2018/848 tal-Parlament Ewropew u tal-Kunsill fir-rigward tal-użu tal-għalf tal-proteini mhux organiku għall-produzzjoni tal-bhejjem organiċi minħabba l-invażjoni tar-Russja fl-Ukrajna (Test b’rilevanza għaż-ŻEE)
C/2022/4275
ĠU L 228, 2.9.2022, p. 8–9
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
|
2.9.2022 |
MT |
Il-Ġurnal Uffiċjali tal-Unjoni Ewropea |
L 228/8 |
REGOLAMENT DELEGAT TAL-KUMMISSJONI (UE) 2022/1450
tas-27 ta’ Ġunju 2022
li jissupplimenta r-Regolament (UE) 2018/848 tal-Parlament Ewropew u tal-Kunsill fir-rigward tal-użu tal-għalf tal-proteini mhux organiku għall-produzzjoni tal-bhejjem organiċi minħabba l-invażjoni tar-Russja fl-Ukrajna
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2018/848 tal-Parlament Ewropew u tal-Kunsill tat-30 ta’ Mejju 2018 dwar il-produzzjoni organika u t-tikkettar ta’ prodotti organiċi u li jħassar ir-Regolament tal-Kunsill (KE) Nru 834/2007 (1), u b’mod partikolari l-Artikolu 22(1)(b) u (c) tiegħu,
Billi:
|
(1) |
L-invażjoni tar-Russja fl-Ukrajna fl-24 ta’ Frar 2022 qed ikollha konsegwenzi serji fuq il-provvista tal-għalf tal-proteini organiku f’diversi Stati Membri peress li l-Ukrajna kienet waħda mill-fornituri ewlenin ta’ tali għalf għall-annimali porċini u t-tjur organiċi f’dawk l-Istati Membri. |
|
(2) |
In-nuqqas ta’ disponibbiltà tal-għalf tal-proteini organiku f’dawk l-Istati Membri jhedded il-kontinwità tal-produzzjoni organika ta’ annimali porċini organiċi u tjur ta’ età kbira li mhumiex koperti mid-derogi previsti fl-Anness II, tal-Parti II, tal-punti 1.9.3.1(c) u 1.9.4.2(c) tar-Regolament (UE) 2018/848 li jippermettu li l-annimali ta’ età żgħira jingħalfu sa 5 % għalf tal-proteini mhux organiku. |
|
(3) |
Għalhekk huwa xieraq li l-Istati Membri li rrikonoxxew din is-sitwazzjoni bħala ċirkostanza katastrofika f’konformità mal-Artikolu 1(1) tar-Regolament Delegat (UE) 2020/2146 (2) jitħallew jidderogaw temporanjament mill-Anness II tal-Parti II tal-punt 1.4.1(b) tar-Regolament (UE) 2018/848 li jirrikjedi li l-bhejjem organiċi jenħtieġ li jingħalfu b’għalf organiku jew fil-fażi ta’ konverżjoni, billi jiġu estiżi d-derogi stabbiliti fl-Anness II, tal-Parti II, tal-punti 1.9.3.1(c) u 1.9.4.2(c) tar-Regolament (UE) 2018/848 għal annimali porċini u tjur ta’ kategoriji ta’ età kbira. |
|
(4) |
Għall-fini tat-trasparenza u tal-kontrolli, huwa meħtieġ li t-tagħrif dwar id-derogi mogħtija jinqasam b’mod armonizzat bejn l-Istati Membri u l-Kummissjoni permezz ta’ sistema tal-kompjuter. |
|
(5) |
Jeħtieġ li jiġi żgurat li l-operaturi li ngħatawlhom tali derogi jikkonformaw mal-kundizzjonijiet ta’ dawk id-derogi. |
|
(6) |
Għall-fini ta’ kontrolli, l-operaturi jenħtieġ li jżommu prova dokumentata li tixhed li dawn ingħataw dawk id-derogi u li jikkonformaw mal-kundizzjonijiet relatati magħhom. |
|
(7) |
Dan ir-Regolament jenħtieġ li japplika retroattivament mill-24 ta’ Frar 2022, id-data tal-aggressjoni militari Russa kontra l-Ukrajna, |
ADOTTAT DAN IR-REGOLAMENT:
Artikolu 1
1. Fl-Istati Membri li rrikonoxxew in-nuqqas ta’ disponibbiltà tal-għalf tal-proteini organiku wara l-invażjoni tar-Russja fl-Ukrajna fl-24 ta’ Frar 2022 bħala ċirkostanza katastrofika f’konformità mal-Artikolu 1(1) tar-Regolament Delegat (UE) 2020/2146, l-awtoritajiet kompetenti jistgħu jestendu d-derogi stabbiliti fl-Anness II, il-Parti II, il-punti 1.9.3.1(c) u 1.9.4.2(c) tar-Regolament (UE) 2018/848 għall-annimali porċini u tjur ta’ kategoriji ta’ età ikbar minn dawk imsemmija f’dawk il-punti, dment li japplikaw dawk id-derogi:
|
(a) |
għal perjodu ta’ żmien limitat u mhux itwal milli meħtieġ, u fl-ebda każ għal aktar minn 12-il xahar; |
|
(b) |
għall-operaturi kollha affettwati li jipproduċu annimali porċini jew tjur organiċi. |
2. L-applikazzjoni tad-derogi msemmija fil-paragrafu 1 għandha tkun mingħajr preġudizzju għall-validità taċ-ċertifikati msemmija fl-Artikolu 35 tar-Regolament (UE) 2018/848 matul il-perjodu li fih japplikaw id-derogi, dment li l-operaturi kkonċernati jissodisfaw il-kundizzjonijiet li permezz tagħhom ikunu ngħataw dawk id-derogi.
Artikolu 2
1. L-Istati Membri għandhom jgħarrfu mingħajr dewmien lill-Kummissjoni u lill-Istati Membri l-oħra dwar id-derogi mogħtija mill-awtoritajiet kompetenti tagħhom skont l-Artikolu 1(1) permezz ta’ sistema tal-kompjuter li se tagħmel disponibbli l-Kummissjoni u li tiffavorixxi l-iskambju ta’ dokumenti elettroniċi u ta’ tagħrif.
2. Kwalunkwe operatur li għalih japplikaw id-derogi mogħtija għandu jżomm prova dokumentata ta’ dawk id-derogi kif ukoll dwar l-użu ta’ dawk id-derogi tul il-perjodu li japplikaw fih.
3. L-awtoritajiet kompetenti, jew fejn xieraq, l-awtoritajiet ta’ kontroll jew il-korpi ta’ kontroll tal-Istati Membri, għandhom jivverifikaw il-konformità tal-operaturi mal-kundizzjonijiet tad-derogi mogħtija.
Artikolu 3
Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan għandu japplika mill-24 ta’ Frar 2022.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, is-27 ta’ Ġunju 2022.
Għall-Kummissjoni
Il-President
Ursula VON DER LEYEN
(1) ĠU L 150, 14.6.2018, p. 1.
(2) Ir-Regolament Delegat tal-Kummissjoni (UE) 2020/2146 tal-24 ta’ Settembru 2020 li jissupplimenta r-Regolament (UE) 2018/848 tal-Parlament Ewropew u tal-Kunsill fir-rigward ta’ regoli ta’ produzzjoni eċċezzjonali fil-produzzjoni organika (ĠU L 428, 18.12.2020, p. 5).