Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32022R1174

Regolament ta’ Implimentazzjoni tal-Kummissjoni (UE) 2022/1174 tas-7 ta’ Lulju 2022 li jemenda r-Regolament ta’ Implimentazzjoni (UE) 2015/1998 fir-rigward ta’ ċerti miżuri dettaljati għall-implimentazzjoni tal-istandards bażiċi komuni dwar is-sigurtà tal-avjazzjoni (Test b’rilevanza għaż-ŻEE)

C/2022/4637

ĠU L 183, 8.7.2022, p. 35–42 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/reg_impl/2022/1174/oj

8.7.2022   

MT

Il-Ġurnal Uffiċjali tal-Unjoni Ewropea

L 183/35

REGOLAMENT TA’ IMPLIMENTAZZJONI TAL-KUMMISSJONI (UE) 2022/1174

tas-7 ta’ Lulju 2022

li jemenda r-Regolament ta’ Implimentazzjoni (UE) 2015/1998 fir-rigward ta’ ċerti miżuri dettaljati għall-implimentazzjoni tal-istandards bażiċi komuni dwar is-sigurtà tal-avjazzjoni

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 300/2008 tal-Parlament Ewropew u tal-Kunsill tal-11 ta’ Marzu 2008 dwar regoli komuni fil-qasam tas-sigurtà tal-avjazzjoni ċivili u li jħassar ir-Regolament (KE) Nru 2320/2002 (1), b’mod partikolari l-Artikolu 4(3) tiegħu,

Billi:

(1)

L-esperjenza miksuba bl-implimentazzjoni tar-Regolament ta’ Implimentazzjoni tal-Kummissjoni (UE) 2015/1998 (2) uriet il-ħtieġa għal emendi żgħar għall-modalitajiet ta’ implimentazzjoni ta’ ċerti standards bażiċi komuni.

(2)

Ċerti miżuri dettaljati tas-sigurtà tal-avjazzjoni jenħtieġ li jiġu kkjarifikati, armonizzati jew issimplifikati sabiex titjieb iċ-ċarezza legali, sabiex ikun hemm standardizzazzjoni tal-interpretazzjoni komuni tal-leġiżlazzjoni u sabiex tkompli tiġi żgurata l-aħjar implimentazzjoni tal-istandards bażiċi komuni għas-sigurtà tal-avjazzjoni. Barra minn hekk, ċerti emendi saru meħtieġa minħabba l-evoluzzjoni tas-sitwazzjoni ta’ theddid u ta’ riskju, u l-iżviluppi reċenti f’termini ta’ operazzjonijiet tal-ajruporti u tal-linji tal-ajru, it-teknoloġija u l-politika internazzjonali. Dawk l-emendi jirrigwardaw is-sigurtà tal-ajruporti, il-ġarr sikur u sigur tal-armi tan-nar abbord, it-taħriġ tal-persunal, is-sigurtà tal-merkanzija u tal-posta bl-ajru, il-fornituri magħrufa tal-provvisti tal-ajruporti, il-verifika tal-preċedenti personali, il-klieb għall-individwazzjoni tal-isplussivi, u l-istandards tal-individwazzjoni għat-tagħmir bokka għall-individwazzjoni tal-metall.

(3)

Għalhekk, jenħtieġ li r-Regolament ta’ Implimentazzjoni (UE) 2015/1998 jiġi emendat skont dan.

(4)

Peress li huwa meħtieġ żmien raġonevoli biex il-membri tal-ekwipaġġ tat-titjira u tal-kabina li jimplimentaw il-miżuri tas-sigurtà waqt it-titjiriet ikunu jistgħu jagħmlu t-taħriġ stabbilit fil-punt (38) tal-Anness ta’ dan ir-Regolament, l-applikazzjoni ta’ dan il-punt jenħtieġ li tiġi differita għall-1 ta’ Jannar 2023.

(5)

Il-miżuri previsti f’dan ir-Regolament huma skont l-opinjoni tal-Kumitat stabbilit bl-Artikolu 19 tar-Regolament (KE) Nru 300/2008,

ADOTTAT DAN IR-REGOLAMENT:

Artikolu 1

L-Anness tar-Regolament ta’ Implimentazzjoni (UE) 2015/1998 huwa emendat f’konformità mal-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-1 ta’ Lulju 2022. Madankollu, il-punti (32) u (38) tal-Anness għandhom japplikaw mill-1 ta’ Jannar 2023.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-7 ta’ Lulju 2022.

Għall-Kummissjoni

Il-President

Ursula VON DER LEYEN

(1)  ĠU L 97, 9.4.2008, p. 72.

(2)  Ir-Regolament ta’ Implimentazzjoni tal-Kummissjoni (UE) 2015/1998 tal-5 ta’ Novembru 2015 li jistipula miżuri dettaljati għall-implimentazzjoni tal-istandards bażiċi komuni dwar is-sigurtà tal-avjazzjoni (ĠU L 299, 14.11.2015, p. 1).

ANNESS

L-Anness tar-Regolament ta’ Implimentazzjoni (UE) 2015/1998 huwa emendat kif ġej:

(1)

fil-punt 1.1.2.2 jiżdied il-paragrafu li ġej:

“Persuni li jwettqu tfittxija ta’ sigurtà f’żoni differenti minn dawk użati għall-iżbark ta’ passiġġieri mhux skrinjati skont l-istandards bażiċi komuni, iridu jkunu mħarrġa f’konformità mal-punti 11.2.3.1, 11.2.3.2, 11.2.3.3, 11.2.3.4 jew 11.2.3.5.”;

(2)

il-punt 1.4.4.2 huwa sostitwit b’dan li ġej:

“1.4.4.2.

 Vetturi eżaminati li temporanjament jitilqu minn partijiet kritiċi jistgħu jiġu eżentati minn eżaminar mar-ritorn tagħhom diment li kienu taħt osservazzjoni kostanti minn persuni awtorizzati biżżejjed biex jiġi żgurat b’mod raġonevoli li l-ebda oġġett ipprojbit ma ġie introdott fil-vetturi.”;

(3)

jiżdied il-punt 1.4.4.3 li ġej:

“1.4.4.3.

 L-eżenzjonijiet u l-proċeduri ta’ eżaminar speċjali għandhom ikunu soġġetti wkoll għad-dispożizzjonijiet addizzjonali stabbiliti fid-Deċiżjoni ta’ Implimentazzjoni C(2015) 8005.”;

(4)

jiżdied il-punt 1.5.5 li ġej:

“1.5.5.

 Għandhom jiġu stabbiliti proċeduri sabiex il-bagalji u l-oġġetti suspettużi mhux identifikati jiġu ttrattati f’konformità ma’ valutazzjoni tar-riskju għas-sigurtà mwettqa jew approvata mill-awtoritajiet nazzjonali rilevanti.”;

(5)

fil-punt 3.1.1.3, tiżdied is-sentenza li ġejja:

“It-tfittxija ma tistax tibda qabel ma l-inġenju tal-ajru jkun laħaq il-pożizzjoni finali tiegħu ta’ parkeġġ.”;

(6)

il-punt 3.1.3 huwa sostitwit b’dan li ġej:

“3.1.3.   Tagħrif dwar it-tfittxija tas-sigurtà ta’ inġenju tal-ajru

It-tagħrif li ġej dwar it-tfittxija tas-sigurtà ta’ inġenju tal-ajru mwettqa ta’ titjira li tkun se titlaq għandu jiġi rreġistrat u għandu jinżamm xi mkien mhux fuq l-inġejnu tal-ajru għad-durata tat-titjira jew għal 24 siegħa, skont liema minnhom tkun l-itwal.

(a)

in-numru tat-titjira;

(b)

l-oriġini tat-titjira preċedenti;

(c)

id-data u l-ħin meta tkun tlestiet it-tfittxija tas-sigurtà tal-inġenju tal-ajru;

(d)

l-isem u l-firma tal-persuna responsabbli għat-twettiq tat-tfittxija tas-sigurtà tal-inġenju tal-ajru.

Ir-reġistrazzjoni tal-informazzjoni elenkata fl-ewwel paragrafu tista’ ssir b’format elettroniku.”;

(7)

fil-punt 5.4.2 jiżdied il-paragrafu li ġej:

“Trasportatur tal-ajru għandu jiżgura li l-ġarr tal-armi tan-nar fil-bagalji tal-istiva jkun permess biss wara li persuna awtorizzata u kkwalifikata kif xieraq tkun iddeterminat li dawn ma kinux ikkargati. Tali armi tan-nar għandhom jiġu stivati f’post li ma jkun aċċessibbli għall-ebda persuna matul it-titjira.”;

(8)

fil-punt 6.1.1 jitħassar il-punt (c);

(9)

jiżdied il-punt 6.1.3 li ġej:

“6.1.3.

 Aġent regolat li jirrifjuta kunsinna minħabba raġunijiet ta’ riskju għoli għandu jiżgura li l-kunsinna u d-dokumentazzjoni ta’ akkumpanjament jiġu mmarkati bħala merkanzija u posta b’riskju għoli qabel ma l-kunsinna tiġi rritornata lill-persuna li tirrappreżenta l-entità li twassalha. Tali kunsinna ma għandhiex titgħabba fuq inġenju tal-ajru sakemm ma tiġix ittrattata minn aġent regolat ieħor f’konformità mal-punt 6.7.”;

(10)

fil-punt 6.3.1.2(a), ir-raba’ paragrafu huwa sostitwit b’dan li ġej:

“Id-dikjarazzjoni ffirmata għandha tiddikjara b’mod ċar il-post tas-sit jew tas-siti li għalihom tirreferi u għandha tinżamm mill-awtorità xierqa kkonċernata;”;

(11)

il-punt 6.3.2.1 huwa sostitwit b’dan li ġej:

“6.3.2.1.

 Meta jaċċetta kwalunkwe kunsinna, aġent regolat għandu jistabbilixxi jekk l-entità li mingħandha jkun irċieva l-kunsinna hijiex aġent regolat jew speditur magħruf, jew l-ebda wieħed minnhom.”;

(12)

fil-punt 6.3.2.3, il-punt (a) huwa sostitwit b’dan li ġej:

“(a)

skrinjati f’konformità mal-punt 6.2 jew 6.7, kif xieraq; jew”;

(13)

il-punt 6.3.2.6 huwa emendat kif ġej:

(a)

il-punt (d) huwa sostitwit b’dan li ġej:

“(d)

l-istatus tas-sigurtà tal-kunsinna, li jiddikjara wieħed minn dawn li ġejjin:

—

“SPX”, li tfisser sigur għall-inġenji tal-ajru tal-passiġġieri, tal-merkanzija u tal-posta;

—

“SHR”, li tfisser sigur għall-inġenji tal-ajru tal-passiġġieri, tal-merkanzija u tal-posta f’konformità mar-rekwiżiti ta’ riskju għoli;”;

(b)

fil-punt (e), il-punt (ii) jitħassar;

(14)

fil-punt 6.3.2.9, l-ewwel paragrafu huwa sostitwit b’dan li ġej:

“Aġent regolat għandu jiżgura li l-persunal kollu jiġi reklutat f’konformità mar-rekwiżiti tal-Kapitolu 11 u mħarreġ kif xieraq f’konformità mal-ispeċifikazzjonijiet tal-impjieg rilevanti. Għall-finijiet ta’ taħriġ, il-persunal b’aċċess mingħajr superviżjoni għal merkanzija bl-ajru identifikabbli jew għal posta bl-ajru identifikabbli li għalihom ikunu ġew applikati l-kontrolli tas-sigurtà meħtieġa għandu jitqies bħala persunal li jimplimenta l-kontrolli tas-sigurtà. Il-persuni mħarrġa qabel f’konformità mal-punt 11.2.7 għandu jkollhom il-kompetenzi tagħhom aġġornati għal dawk imsemmija fil-punt 11.2.3.9 sa mhux iktar tard mill-1 ta’ Jannar 2023.”;

(15)

fil-punt 6.4.2.1, il-punt (b) tal-ewwel paragrafu huwa sostitwit b’dan li ġej:

“(b)

il-persunal kollu li jimplimenta l-kontrolli tas-sigurtà u l-persunal kollu b’aċċess mingħajr superviżjoni għal merkanzija bl-ajru identifikabbli jew għal posta bl-ajru identifikabbli li għalihom ikunu ġew applikati l-kontrolli tas-sigurtà meħtieġa jiġu reklutati f’konformità mar-rekwiżiti tal-Kapitolu 11 u jkunu rċevew taħriġ tas-sigurtà f’konformità mal-punt 11.2.3.9. Il-persuni mħarrġa qabel f’konformità mal-punt 11.2.7 għandu jkollhom il-kompetenzi tagħhom aġġornati għal dawk imsemmija fil-punt 11.2.3.9 sa mhux iktar tard mill-1 ta’ Jannar 2023; u”;

(16)

il-punt 6.5 huwa sostitwit b’dan li ġej:

“6.5.   TRASPORTATURI APPROVATI

L-ebda dispożizzjoni f’dan ir-Regolament.”;

(17)

il-punt 6.6.1.1 huwa sostitwit b’dan li ġej:

“6.6.1.1.

 Sabiex jiġi żgurat li l-kunsinni li jkunu sarulhom il-kontrolli tas-sigurtà meħtieġa jkunu protetti minn interferenza mhux awtorizzata matul it-trasport, għandhom japplikaw ir-rekwiżiti kollha li ġejjin:

(a)

il-kunsinni għandhom jiġu ppakkjati jew issiġġilati mill-aġent regolat jew mill-ispeditur magħruf sabiex jiġi żgurat li kwalunkwe tbagħbis ikun evidenti; fejn dan ma jkunx possibbli, għandhom jittieħdu miżuri ta’ protezzjoni alternattivi li jiżguraw l-integrità tal-kunsinna;

(b)

il-kompartiment tal-vettura għat-tagħbija tal-merkanzija li fih għandhom jiġu ttrasportati l-kunsinni għandu jissakkar jew jiġi ssiġillat jew il-vetturi li jkollhom il-purtieri fil-ġnub tagħhom għandhom jingħalqu b’mod sigur permezz ta’ ħbula tat-TIR sabiex jiġi żgurat li kwalunkwe tbagħbis ikun evidenti, jew iż-żona tat-tagħbija ta’ vetturi bi pjattaforma għall-ġarr għandha tinżamm taħt osservazzjoni;

(c)

id-dikjarazzjoni tat-trasportatur kif tinsab fid-Dokument Mehmuż 6-E għandha ssir bi qbil mat-trasportatur li jkun iddaħħal fil-ftehim dwar it-trasport mal-aġent regolat jew l-ispeditur magħruf, sakemm it-trasportatur innifsu ma jkunx approvat bħala aġent regolat.

Id-dikjarazzjoni ffirmata għandha tinżamm mill-aġent regolat jew mill-ispeditur magħruf li f’ismu jkun qiegħed isir it-trasport. Meta tintalab, kopja tad-dikjarazzjoni ffirmata għandha tkun disponibbli wkoll għall-aġent regolat jew għat-trasportatur tal-ajru li jirċievi l-kunsinna jew għall-awtorità xierqa kkonċernata.

Bħala alternattiva għall-punt (c) tal-ewwel paragrafu, it-trasportatur jista’ jipprovdi evidenza lill-aġent regolat jew lill-ispeditur magħruf li jkun qiegħed jipprovdi t-trasport għalih, li jkun ġie ċċertifikat jew approvat minn awtorità xierqa.

Din l-evidenza għandha tinkludi r-rekwiżiti li jinsabu fid-Dokument Mehmuż 6-E u l-kopji għandhom jinżammu mill-aġent regolat jew mill-ispeditur magħruf ikkonċernat. Meta tintalab, għandha tkun disponibbli wkoll kopja għall-aġent regolat jew għat-trasportatur tal-ajru li jirċievi l-kunsinna jew għal awtorità xierqa oħra.”;

(18)

il-punt 6.8.3.1 huwa emendat kif ġej:

(a)

fl-ewwel paragrafu, jitħassar il-punt (c);

(b)

jitħassar it-tieni paragrafu;

(19)

jiżdied il-punt 6.8.3.10 li ġej:

“6.8.3.10.

 Il-kontrolli tas-sigurtà għal merkanzija u posta li jaslu mingħand pajjiż terz għandhom ikunu soġġetti wkoll għad-dispożizzjonijiet addizzjonali stabbiliti fid-Deċiżjoni ta’ Implimentazzjoni tal-Kummissjoni C(2015) 8005.”;

(20)

fil-punt 6.8.5.4, jitħassar it-tieni paragrafu;

(21)

fid-Dokument Mehmuż 6-A, il-punt (a) fir-raba’ inċiż tat-tieni paragrafu huwa sostitwit b’dan li gej:

“(a)

bidliet ippjanati żgħar li jsiru fil-programm tas-sigurtà tagħha, bħalma huma isem il-kumpanija, l-indirizz tal-kumpanija, il-persuna responsabbli għas-sigurtà jew id-dettalji tal-kuntatt, il-bdil tal-persuna li teħtieġ l-aċċess għall-“Bażi tad-data tal-Unjoni dwar is-sigurtà tal-katina tal-provvista”, minnufih u mill-inqas fi żmien sebat ijiem tax-xogħol qabel il-bidla ppjanata; u”;

(22)

fid-Dokument Mehmuż 6-C, il-punt 3.4 tat-tabella tal-Parti 3 huwa sostitwit b’dan li gej:

“3.4.

 Il-persunal b’aċċess mingħajr superviżjoni għall-merkanzija bl-ajru/għall-posta bl-ajru identifikabbli li jimplimenta l-kontrolli tas-sigurtà jirċievi taħriġ dwar is-sigurtà f’konformità mal-punt 11.2.3.9 qabel ma jingħata l-aċċess mingħajr superviżjoni għall-merkanzija bl-ajru/posta bl-ajru identifikabbli?”;

(23)

id-Dokument Mehmuż 6-D jitħassar;

(24)

fid-Dokument Mehmuż 6-E, l-ewwel inċiż tat-tieni paragrafu huwa sostitwit b’dan li gej:

“—

Il-persunal kollu li jwettaq it-trasport tal-merkanzija u tal-posta jkun irċieva taħriġ ġenerali ta’ għarfien dwar is-sigurtà f’konformità mal-punt 11.2.7. Barra minn hekk, jekk tali persunal jingħata wkoll aċċess mingħajr superviżjoni għall-merkanzija u għall-posta li għalihom ikunu ġew applikati l-kontrolli tas-sigurtà meħtieġa, ikun irċieva taħriġ dwar is-sigurtà f’konformità mal-punt 11.2.3.9;”;

(25)

fil-punt 8.1.1.1, il-kliem introduttiv huwa sostitwit b’dan li ġej:

“Il-provvisti għal matul it-titjira għandhom jiġu skrinjati minn trasportatur tal-ajru, fornitur regolat jew operatur tal-ajruport, jew f’isimhom, qabel ma jittieħdu f’żona ta’ sigurtà ristretta, sakemm:”;

(26)

fil-punt 8.1.3.2(a), ir-raba’ paragrafu huwa sostitwit b’dan li ġej:

“Id-dikjarazzjoni ffirmata għandha tiddikjara b’mod ċar il-post tas-sit jew tas-siti li għalihom tirreferi u għandha tinżamm mill-awtorità xierqa kkonċernata;”;

(27)

fil-punt 8.1.4.2, il-punt (a) huwa sostitwit b’dan li ġej:

“(a)

id-“Dikjarazzjoni tal-impenji — fornitur magħruf tal-provvisti għal matul it-titjira” kif tinsab fid-Dokument Mehmuż 8-B. Din id-dikjarazzjoni għandha tiddikjara b’mod ċar il-post tas-sit jew tas-siti li tirreferi għalihom u għandha tiġi ffirmata mir-rappreżentant legali; u”;

(28)

fil-punt 8.1.5.1, il-punt (b) huwa sostitwit b’dan li ġej:

“(b)

jiżguraw li l-persuni b’aċċess għall-provvisti għal matul it-titjira jirċievu taħriġ ġenerali ta’ għarfien dwar is-sigurtà f’konformità mal-punt 11.2.7 qabel ma jingħataw aċċess għal dawn il-provvisti. Barra minn hekk, jiżguraw li l-persuni li jimplimentaw l-iskrinjar tal-provvisti għal matul it-titjira jirċievu taħriġ f’konformità mal-punt 11.2.3.3 u li l-persuni li jimplimentaw kontrolli oħra tas-sigurtà fir-rigward tal-provvisti għal matul it-titjira jirċievu taħriġ f’konformità mal-punt 11.2.3.10; u”;

(29)

fid-Dokument Mehmuż 8-B, il-punt (b) fl-ewwel inċiż tat-tieni paragrafu huwa sostitwit b’dan li gej:

“(b)

tiżgura li l-persuni b’aċċess għall-provvisti għal matul it-titjira jirċievu taħriġ ġenerali ta’ għarfien dwar is-sigurtà f’konformità mal-punt 11.2.7 qabel ma jingħataw aċċess għal dawk il-provvisti. Barra minn hekk, tiżgura li l-persuni li jimplimentaw il-kontrolli tas-sigurtà għajr l-iskrinjar fir-rigward tal-provvisti għal matul it-titjira jirċievu taħriġ f’konformità mal-punt 11.2.3.10; u”;

(30)

fil-punt 9.1.1.1, il-kliem introduttiv huwa sostitwit b’dan li ġej:

“Il-provvisti tal-ajruport għandhom jiġu skrinjati minn operatur tal-ajruport jew fornitur regolat, jew f’isimhom, qabel ma jittieħdu f’żona ta’ sigurtà ristretta, sakemm:”;

(31)

fil-punt 9.1.3.2, il-punt (a) huwa sostitwit b’dan li ġej:

“(a)

id-“Dikjarazzjoni tal-impenji — fornitur magħruf tal-provvisti tal-ajruport” kif tinsab fid-Dokument Mehmuż 9-A. Din id-dikjarazzjoni għandha tiddikjara b’mod ċar il-post tas-sit jew tas-siti li tirreferi għalihom u għandha tiġi ffirmata mir-rappreżentant legali; u”;

(32)

il-punt 9.1.3.3 huwa sostitwit b’dan li ġej:

“9.1.3.3

 Il-fornituri magħrufa kollha jridu jkunu ddeżinjati abbażi ta’ validazzjonijiet:

(a)

tar-rilevanza u tal-kompletezza tal-programm ta’ sigurtà fir-rigward tal-punt 9.1.4; u

(b)

tal-implimentazzjoni tal-programm ta’ sigurtà mingħajr nuqqasijiet.

Bħala prova legali tad-deżinjazzjoni, l-awtorità xierqa tista’ titlob lill-operaturi tal-ajruport biex idaħħlu d-dettalji meħtieġa tal-fornituri magħrufa li jaħtru fil-“Bażi tad-data tal-Unjoni dwar is-sigurtà tal-katina tal-provvista” sa mhux iktar tard mill-jum tax-xogħol li jkun imiss. Meta t-tagħrif jiddaħħal fil-bażi tad-data, l-operatur tal-ajruport għandu jagħti identifikatur alfanumeriku uniku skont il-format standard lil kull sit iddeżinjat.

L-aċċess fiż-żoni ta’ sigurtà ristretti tal-provvisti tal-ajruport jista’ jingħata biss wara li jkun ġie stabbilit l-istatus tal-fornitur. Dan għandu jsir permezz ta’ verifika fil-“Bażi tad-data tal-Unjoni dwar is-sigurtà tal-katina tal-provvista”, jekk applikabbli, jew bbl-użu ta’ mekkaniżmu alternattiv li jiżgura l-istess objettiv.

Jekk l-awtorità xierqa jew l-operatur tal-ajruport ma jibqgħux sodisfatti li l-fornitur magħruf jikkonforma mar-rekwiżiti tal-punt 9.1.4, l-operatur tal-ajruport għandu jirtira l-istatus ta’ fornitur magħruf mingħajr dewmien.”;

(33)

fil-punt 9.1.4.1, il-punt (b) huwa sostitwit b’dan li ġej:

“(b)

jiżgura li l-persuni b’aċċess għall-provvisti tal-ajruport jirċievu taħriġ ġenerali ta’ għarfien dwar is-sigurtà f’konformità mal-punt 11.2.7 qabel ma jingħataw aċċess għal dawk il-provvisti. Barra minn hekk, jiżguraw li l-persuni li jimplimentaw l-iskrinjar tal-provvisti tal-ajruport jirċievu taħriġ f’konformità mal-punt 11.2.3.3 u li l-persuni li jimplimentaw kontrolli oħra tas-sigurtà fir-rigward tal-provvisti tal-ajruport jirċievu taħriġ f’konformità mal-punt 11.2.3.10; u”;

(34)

fid-Dokument Mehmuż 9-A, il-punt (b) fl-ewwel inċiż tat-tieni paragrafu huwa sostitwit b’dan li gej:

“(b)

tiżgura li l-persuni b’aċċess għall-provvisti tal-ajruport jirċievu taħriġ ġenerali ta’ għarfien dwar is-sigurtà f’konformità mal-punt 11.2.7 qabel ma jingħataw aċċess għal dawn il-provvisti. Barra minn hekk, tiżgura li l-persuni li jimplimentaw il-kontrolli tas-sigurtà għajr l-iskrinjar fir-rigward tal-provvisti tal-ajruport jirċievu taħriġ f’konformità mal-punt 11.2.3.10; u”;

(35)

il-punt 11.1.1 huwa sostitwit b’dan li ġej:

“11.1.1.

 Il-persunal li ġej għandu jkun irnexxielu jgħaddi b’suċċess minn kontroll rigoruż tal-preċedenti personali:

(a)

il-persuni li jiġu rreklutati biex jimplimentaw, jew biex ikunu responsabbli għall-implimentazzjoni tal-iskrinjar, il-kontroll fuq l-aċċess jew kontrolli oħra tas-sigurtà f’żona ta’ sigurtà ristretta;

(b)

il-persuni b’responsabbiltà ġenerali fil-livell nazzjonali jew lokali li jiżguraw li programm tas-sigurtà u l-implimentazzjoni tiegħu jissodisfaw id-dispożizzjonijiet legali kollha (“maniġers tas-sigurtà”);

(c)

istrutturi, kif imsemmi fil-Kapitolu 11.5;

(d)

validaturi tas-sigurtà tal-avjazzjoni tal-UE, kif imsemmi fil-Kapitolu 11.6.

Il-punt (b) tal-ewwel paragrafu għandu japplika mill-1 ta’ Jannar 2023. Qabel dik id-data, tali persuni għandu jkun sarilhom kontroll rigoruż jew standard tal-preċedenti personali f’konformità mal-punt 1.2.3.1 jew kif determinat mill-awtorità xierqa f’konformità mar-regoli nazzjonali applikabbli.”;

(36)

fil-punt 11.1.5 jiżdied il-paragrafu li ġej:

“Kontroll rigoruż tal-preċedenti personali għandu jkun sar kompletament qabel ma l-persuna tagħmel it-taħriġ imsemmi fil-punti 11.2.3.1 sa 11.2.3.5.”;

(37)

fil-punt 11.2.3.9, il-kliem introduttiv huwa sostitwit b’dan li ġej:

“It-taħriġ ta’ persuni b’aċċess mingħajr superviżjoni għall-merkanzija bl-ajru u għall-posta bl-ajru identifikabbli li għalihom ikunu ġew applikati l-kontrolli tas-sigurtà meħtieġa u l-persuni li jimplimentaw il-kontrolli tas-sigurtà għall-merkanzija bl-ajru u għall-posta bl-ajru għajr l-iskrinjar għandu jirriżulta fil-kompetenzi kollha li ġejjin:”;

(38)

jiżdied il-punt 11.2.3.11 li ġej:

“11.2.3.11.

 It-taħriġ tal-membri tal-ekwipaġġ tat-titjira u tal-kabina li jimplimentaw il-miżuri ta’ sigurtà matul it-titjira għandu jirriżulta fil-kompetenzi kollha li ġejjin:

(a)

għarfien dwar atti preċedenti ta’ interferenza mhux skont il-liġi fl-avjazzjoni ċivili, atti terroristiċi u theddid attwali;

(b)

sensibilizzazzjoni fir-rigward tar-rekwiżiti legali u l-għarfien rilevanti dwar elementi li jikkontribwixxu għall-istabbiliment ta’ kultura tas-sigurtà soda u reżiljenti fil-post tax-xogħol u fil-qasam tal-avjazzjoni, inkluż, fost affarijiet oħra, it-theddida minn informazzjoni privileġġata u r-radikalizzazzjoni;

(c)

għarfien dwar l-objettivi u l-organizzazzjoni tas-sigurtà tal-avjazzjoni, inkluż l-obbligi u r-responsabbiltajiet tal-membri tal-ekwipaġġ tat-titjira u tal-kabina;

(d)

għarfien dwar kif l-inġenju tal-ajru għandu jkun protett u kif għandu jiġi evitat aċċess mhux awtorizzat;

(e)

għarfien dwar proċeduri għall-issiġillar tal-inġenju tal-ajru, jekk applikabbli għall-persuna li tkun se titħarreġ;

(f)

abbiltà li biha jiġu identifikati l-oġġetti pprojbiti;

(g)

għarfien dwar kif l-oġġetti pprojbiti jistgħu jinħbew;

(h)

abbiltà li biha jiġu implimentati t-tfittxijiet tas-sigurtà tal-inġenju tal-ajru skont standard suffiċjenti biex tiġi żgurata b’mod raġonevoli l-individwazzjoni ta’ oġġetti pprojbiti moħbija;

(i)

għarfien tal-konfigurazzjoni tat-tip jew tat-tipi ta’ inġenji tal-ajru li fuqhom jitwettqu d-doveri;

(j)

abbiltà li biha l-kabina tal-pilota tiġi protetta matul it-titjira;

(k)

għarfien tal-proċeduri rilevanti għall-ġarr ta’ passiġġieri potenzjalment problematiċi abbord inġenju tal-ajru, jekk applikabbli għall-persuna li tkun se titħarreġ;

(l)

għarfien dwar l-immaniġġar ta’ persuni awtorizzati li jġorru l-armi tan-nar abbord, jekk applikabbli għall-persuna li tkun se titħarreġ;

(m)

għarfien dwar il-proċeduri tar-rapportar;

(n)

abbiltà li biha wieħed ikollu rispons xieraq f’każ ta’ inċidenti u emerġenzi relatati mas-sigurtà abbord inġenju tal-ajru.”;

(39)

il-punt 12.0.3.2 huwa sostitwit b’dan li ġej:

“12.0.3.2.

 Il-marka ta’ “Timbru tal-UE” għandha titwaħħal mill-manifatturi fuq tagħmir tas-sigurtà approvat mill-Kummissjoni, u għandha tkun viżibbli fuq naħa waħda jew fuq l-iskrin.”;

(40)

il-punt 12.1.2.1 huwa sostitwit b’dan li ġej:

“12.1.2.1.

 Għandu jkun hemm erba’ standards għad-WTMD. Ir-rekwiżiti dettaljati dwar dawk l-istandards huma stabbiliti fid-Deċiżjoni ta’ Implimentazzjoni C(2015) 8005.”;

(41)

jiżdied il-punt 12.1.2.4 li ġej:

“12.1.2.4.

 Id-WTMD kollha installati mill-1 ta’ Lulju 2023 għandhom jissodisfaw l-istandard 1.1 jew l-istandard 2.1.”;

(42)

il-punt 12.2.4 jitħassar;

(43)

fil-punt 12.5.1.1, jitħassar is-seba’ paragrafu;

(44)

il-punt 12.6.3 jitħassar;

(45)

il-punt 12.7.3 jitħassar;

(46)

il-punt 12.9.1.7 huwa sostitwit b’dan li ġej:

“12.9.1.7

 Tim tal-EDD għandu jiġi approvat mill-awtorità xierqa jew f’isimha f’konformità mad-Dokumenti Mehmużin 12-E u 12-F tad-Deċiżjoni ta’ Implimentazzjoni C(2015) 8005. L-awtorità xierqa tista’ tippermetti l-iskjerament u l-użu ta’ timijiet tal-EDD imħarrġa u/jew approvati mill-awtorità xierqa ta’ Stat Membru ieħor, diment li tkun qablet formalment mal-awtorità tal-approvazzjoni dwar ir-rwoli u r-responsabbiltajiet rispettivi biex jiġi żgurat li r-rekwiżiti kollha fil-Kapitolu 12.9 ta’ dan l-Anness jiġu ssodisfati, f’konformità mad-Dokument Mehmuż 12-P ta’ dan l-Anness. Fin-nuqqas ta’ tali ftehim, ir-responsabbiltà sħiħa għall-issodisfar tar-rekwiżiti kollha fil-Kapitolu 12.9 ta’ dan l-Anness tibqa’ tal-awtorità xierqa tal-Istat Membru fejn jiġi skjerat u jintuża t-tim tal-EDD.”;

(47)

il-punt 12.9.3.2 huwa sostitwit b’dan li ġej:

“12.9.3.2

 Il-kontenut tal-korsijiet tat-taħriġ għandu jiġi speċifikat jew approvat mill-awtorità xierqa. It-taħriġ teoriku ta’ min jieħu ħsieb l-immaniġġar għandu jinkludi d-dispożizzjonijiet stabbiliti fil-Kapitolu 11.2 għall-iskrinjar taż-żona speċifika jew taż-żoni speċifiċi fejn it-tim tal-EDD ikun approvat.”;

(48)

jiżdied id-Dokument Mehmuż 12-P li ġej:

“ID-DOKUMENT MEHMUŻ 12-P

ITTRA TA’ QBIL BEJN L-AWTORITAJIET XIERQA LI JAPPOĠĠAW L-ISKJERAMENT TA’ TIMIJIET TAL-EDD

Din l-ittra ta’ qbil hija stabbilita bejn il-partijiet li ġejjin:

L-awtorità xierqa li tirċievi appoġġ għall-iskjerament ta’ timijiet tal-EDD:

…

L-awtorità jew l-awtoritajiet xierqa li jipprovdu appoġġ għall-iskjerament ta’ timijiet tal-EDD:

…

Għall-identifikazzjoni tar-rwoli (*1) li ġejjin biex jiġi żgurat li l-iskjerament tat-timijiet tal-EDD jissodisfa r-rekwiżiti tal-UE:

L-awtorità xierqa inkarigata biex tispeċifika jew tapprova l-kontenut tal-korsijiet tat-taħriġ:

…

L-awtorità xierqa inkarigata biex tapprova t-timijiet tal-EDD:

…

L-awtorità xierqa inkarigata mill-kontroll estern tal-kwalità:

…

Għall-perjodu ta’ validità li ġej:

Data:

Firem:

(*1)  Jekk ikun hemm bżonn, din l-ittra ta’ qbil tista’ tiġi ssupplimentata b’dettalji addizzjonali u tista’ tiġi emendata kif meħtieġ sabiex jiġu speċifikati r-rwoli tal-awtoritajiet xierqa, u biex jiġi ddeterminat il-kamp ta’ applikazzjoni tagħha.”."

(*1)  Jekk ikun hemm bżonn, din l-ittra ta’ qbil tista’ tiġi ssupplimentata b’dettalji addizzjonali u tista’ tiġi emendata kif meħtieġ sabiex jiġu speċifikati r-rwoli tal-awtoritajiet xierqa, u biex jiġi ddeterminat il-kamp ta’ applikazzjoni tagħha.”.”

Top