(1)

Ir-Regolament (UE) 2015/2283 jipprevedi li huwa biss l-ikel il-ġdid awtorizzat u inkluż fil-lista tal-Unjoni tal-ikel ġdid li jista’ jitqiegħed fis-suq tal-Unjoni.

(2)

Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (2) stabbilixxa lista tal-Unjoni tal-ikel ġdid.

(3)

Fid-29 ta’ Awwissu 2016, il-kumpanija “JatroSolutions GmbH” (“l-applikant”) ressqet applikazzjoni lill-awtorità kompetenti tal-Ġermanja biex tqiegħed il-qlub tal-varjetà li tittiekel tal-Jatropha curcas L., fis-suq tal-Unjoni bħala ingredjent ġdid tal-ikel skont it-tifsira tal-Artikolu 1(2), il-punt (c) tar-Regolament (KE) Nru 258/97 tal-Parlament Ewropew u tal-Kunsill (3). L-applikant talab li l-qlub tal-varjetà li tittiekel tal-Jatropha curcas L., kemm sħaħ kif ukoll imfarrkin,jiġu ttrattati b’mod idrotermali, jintużaw fl-istat oriġinali tagħhom (jew ikkonfettati jew ippreservati fiz-zokkor) inkella bħala ġewż ipproċessat bħala snack, u bħala ingredjent tal-ikel fil-bars taċ-ċereali, fiċ-ċereali tal-kolazzjon, u fil-frott imnixxef.

(4)

Skont l-Artikolu 35(1) tar-Regolament (UE) 2015/2283, jenħtieġ li kwalunkwe talba li tiġi ppreżentata lil Stat Membru għat-tqegħid fis-suq ta’ ikel ġdid fl-Unjoni f’konformità mal-Artikolu 4 tar-Regolament (KE) Nru 258/97 dwar l-ikel il-ġdid u l-ingredjenti ġodda tal-ikel, u li dwarha ma tkunx ittieħdet deċiżjoni finali qabel l-1 ta’ Jannar 2018, tiġi trattata bħala applikazzjoni mressqa skont ir-Regolament (UE) 2015/2283.

(5)

Lil hinn mill-fatt li t-talba għat-tqegħid fis-suq tal-qlub tal-varjetà li tittiekel tal-Jatropha curcas L. bħala ikel ġdid fl-Unjoni tressqet lil Stat Membru f’konformità mal-Artikolu 4 tar-Regolament (KE) Nru 258/97, l-applikazzjoni tissodisfa wkoll ir-rekwiżiti stabbiliti fir-Regolament (UE) 2015/2283.

(6)

Fl-1 ta’ Marzu 2018, l-applikant għamel ukoll talba lill-Kummissjoni għall-protezzjoni tad-data proprjetarja dwar il-ġestjoni tal-kultivazzjoni tal-pjanta Jatropha curcas L. u l-użu tal-markaturi molekulari (4), id-data tal-kompożizzjoni li tinkludi l-informazzjoni nutrizzjonali (5) u d-data dwar l-allerġeni (6), l-informazzjoni dwar il-kontaminanti bijoloġiċi u tal-proċess (7), il-metodi analitiċi u l-validazzjoni tagħhom, għad-detezzjoni tal-esteri tal-forbol fil-qlub tal-Jatropha curcas L. (8), il-proċeduri għall-verifika tal-kontenut tal-esteri tal-forbol fil-qlub tal-Jatropha curcas L. (9), l-assaġġi tal-mutazzjoni invertita batterika bix-xaħam imneħħi mill-grixa, u biż-żejt taż-żerriegħa tal-varjetà tal-Jatropha curcas L. (10) li tittiekel u ta’ dik li ma tittikilx, u testijiet in vitro tal-mikronukleu taċ-ċelloli tal-mammiferi mal-grixa bix-xaħam imneħħi, u maż-żejt tal-qalba li tittiekel u li ma tittikilx tal-Jatropha curcas L. (11), imressqa b’appoġġ għall-applikazzjoni.

(7)

Fid-19 ta’ Ottubru 2018, il-Kummissjoni talbet lill-Awtorità Ewropea dwar is-Sigurtà fl-Ikel (“l-Awtorità”) biex twettaq valutazzjoni tal-qlub tal-varjetà li tittiekel tal-Jatropha curcas L. bħala ikel ġdid.

(8)

Fl-24 ta’ Novembru 2021, l-Awtorità adottat l-opinjoni xjentifika tagħha “Safety of hydrothermally treated kernels from edible Jatropha curcas L. (‘Chuta’)” (is-sikurezza tal-qlub ittrattati b’mod idrotermali mill-Jatropha curcas L. li tittiekel) bħala ikel ġdid skont ir-Regolament (UE) 2015/2283 (12) f’konformità mal-Artikolu 11 tar-Regolament (UE) 2015/2283.

(9)

Fl-opinjoni xjentifika tagħha, l-Awtorità kkonkludiet li l-qlub mill-varjetà li tittiekel tal-Jatropha curcas L. huma sikuri fil-kundizzjonijiet tal-użu proposti. Għalhekk, dik l-opinjoni xjentifika tagħti biżżejjed raġunijiet biex jiġi stabbilit li l-ikel il-ġdid il-qlub tal-varjetà li tittiekel tal-Jatropha curcas L., meta jintużaw fl-istat oriġinali (jew ikkonfettati jew ippreservati fiz-zokkor) inkella bħala ġewż ipproċessat bħala snack u bħala ingredjent tal-ikel fil-bars taċ-ċereali, fiċ-ċereali tal-kolazzjon, u fil-frott imnixxef, jissodisfaw il-kundizzjonijiet biex jitqiegħdu fis-suq f’konformità mal-Artikolu 12(1) tar-Regolament (UE) 2015/2283.

(10)

Fl-opinjoni xjentifika tagħha, l-Awtorità kkonkludiet ukoll li l-konsum ta’ dan l-ikel il-ġdid jista’ jwassal għas-sensitizzazzjoni primarja għall-qlub tal-varjetà li tittiekel tal-Jatropha curcas L. u dan jista’ jwassal għal reazzjonijiet allerġiċi, jew jista’ jikkawża reazzjonijiet allerġiċi għall-persuni li huma allerġiċi għall-ġewż. Waslet għal din il-konklużjoni abbażi tal-piż tal-evidenza disponibbli u meta qieset il-kontenut elevat ta’ proteina (32 %) tal-qlub tal-varjetà li tittiekel tal-Jatropha curcas L., kif ukoll mill-informazzjoni ppubblikata li turi l-preżenza ta’ għadd ta’ proteini allerġeniċi fil-qlub tal-varjetà li ma tittikilx tal-Jatropha curcas L. Madankollu, meta jitqies li fil-preżent ma hemm l-ebda evidenza epidemjoloġika dwar ir-reazzjonijiet allerġiċi għall-qlub mill-varjetà li tittiekel tal-Jatropha curcas L. fiż-żoni tal-Messiku fejn dawn jiġu kkunsmati spiss, u meta jitqiesu r-riżultati negattivi tar-reattività inkroċjata tal-proteini mill-qlub tal-varjetà li tittiekel tal-Jatropha curcas L. għall-proteini minn xi ġewż komuni f’assaġġi tal-immunoassorbiment enzimatiku in vitro (“ELISA”), u r-riżultati negattivi tat-testijiet tar-reazzjoni katina bil-polimerażi (“PCR”) imwettqa bil-qlub tal-varjetà li tittiekel tal-Jatropha curcas L. għall-allerġeni ta’ ġewż ieħor, il-Kummissjoni hija tal-fehma li jenħtieġ li ma jiġi inkluż l-ebda rekwiżit speċifiku għall-allerġeniċità fil-lista tal-Unjoni tal-ikel il-ġdid awtorizzat.

(11)

Fl-opinjoni xjentifika tagħha, l-Awtorità nnotat ukoll li l-konklużjoni tagħha dwar is-sikurezza tal-ikel il-ġdid kienet imsejsa fuq id-data xjentifika dwar il-ġestjoni tal-kultivazzjoni tal-pjanta Jatropha curcas L. u l-użu tal-markaturi molekulari, fuq id-data tal-kompożizzjoni li tinkludi l-informazzjoni nutrizzjonali u d-data dwar l-allerġeni, fuq l-informazzjoni dwar il-kontaminanti bijoloġiċi u tal-proċess, fuq il-metodi analitiċi, inkluż il-validazzjoni tagħhom għad-detezzjoni tal-esteri tal-forbol fl-qlub tal-Jatropha curcas L., il-proċeduri għall-verifika tal-kontenut tal-esteri tal-forbol tal-qlub tal-Jatropha curcas L., fuq l-assaġġi tal-mutazzjoni invertita batterika bil-grixa bix-xaħam imneħħi u biż-żejt taż-żerriegħa tal-Jatropha curcas L. li tittiekel u ta’ dik li ma tittikilx, u t-testijiet in vitro tal-mikronukleu taċ-ċelloli tal-mammiferi mal-grixa bix-xaħam imneħħi u biż-żejt taż-żerriegħa tal-Jatropha curcas L.li tittiekel u ta’ dik li ma tittikilx, li mingħajrhom ma kinitx tkun tista’ tivvaluta l-ikel il-ġdid u tilħaq il-konklużjoni tagħha.

(12)

Il-Kummissjoni talbet lill-applikant jiċċara aktar il-ġustifikazzjoni pprovduta fir-rigward tal-pretensjoni proprjetarja tiegħu fuq dawk l-istudji u t-testijiet u jiċċara t-talba tiegħu għad-dritt esklużiv ta’ referenza għalihom f’konformità mal-Artikolu 26(2)(b) tar-Regolament (UE) 2015/2283.

(13)

L-applikant iddikjara li meta tressqet l-applikazzjoni, kellu d-drittijiet proprjetarji u esklużivi li jikkonċernaw id-data xjentifika mill-ġestjoni tal-kultivazzjoni tal-pjanta Jatropha curcas L. u l-użu tal-markaturi molekulari, id-data tal-kompożizzjoni li tinkludi l-informazzjoni nutrizzjonali u d-data dwar l-allerġeni, l-informazzjoni dwar il-kontaminanti bijoloġiċi u tal-proċess, il-metodi analitiċi, inkluż il-validazzjoni tagħhom għad-detezzjoni tal-esteri tal-forbol fil-qlub tal-Jatropha curcas L., il-proċeduri tal-metodu tal-kampjunar għall-verifika tal-kontenut tal-esteri tal-forbol tal-qlub tal-Jatropha curcas L., l-assaġġi tal-mutazzjoni invertita batterika bil-grixa bix-xaħam imneħħi u biż-żejt taż-żerriegħa tal-Jatropha curcas L. li tittiekel u ta’ dik li ma tittikilx, u t-testijiet in vitro tal-mikronukleu taċ-ċelloli tal-mammiferi bil-grixa bix-xaħam imneħħi u biż-żejt taż-żerriegħa tal-Jatropha curcas L. li tittiekel u ta’ dik li ma tittikilx, u għalhekk il-partijiet terzi ma setgħux jaċċessaw, jużaw jew jirreferu għal dik id-data b’mod legali.

(14)

Il-Kummissjoni vvalutat l-informazzjoni kollha pprovduta mill-applikant u qieset li kien issostanzja biżżejjed it-twettiq tar-rekwiżiti stabbiliti fl-Artikolu 26(2) tar-Regolament (UE) 2015/2283. Għaldaqstant, id-data xjentifika dwar il-ġestjoni tal-kultivazzjoni tal-pjanta Jatropha curcas L. u l-użu tal-markaturi molekulari, id-data tal-kompożizzjoni li tinkludi l-informazzjoni nutrizzjonali u d-data dwar l-allerġeni, l-informazzjoni dwar il-kontaminanti bijoloġiċi u tal-proċess, il-metodi analitiċi u l-validazzjoni tagħhom għad-detezzjoni tal-esteri tal-forbol fil-qlub tal-Jatropha curcas L., il-proċeduri għall-verifika tal-kontenut tal-esteri tal-forbol tal-qlub tal-Jatropha curcas L., l-assaġġi tal-mutazzjoni invertita batterika bil-grixa bix-xaħam imneħħi u biż-żejt taż-żerriegħa tal-Jatropha curcas L., u t-testijiet in vitro tal-mikronukleu taċ-ċelloli tal-mammiferi bil-grixa bix-xaħam imneħħi u biż-żejt taż-żerriegħa tal-Jatropha curcas L. li tittiekel u ta’ dik li ma tittikilx, jenħtieġ li jkunu protetti f’konformità mal-Artikolu 27(1) tar-Regolament (UE) 2015/2283. Għaldaqstant, jenħtieġ li l-applikant biss ikun awtorizzat iqiegħed il-qlub tal-Jatropha curcas L. fis-suq tal-Unjoni matul il-perjodu ta’ ħames snin mid-dħul fis-seħħ ta’ dan ir-Regolament.

(15)

Madankollu, ir-restrizzjoni tal-awtorizzazzjoni tal-qlub tal-varjetà li tittiekel tal-Jatropha curcas L. u tar-referenza għad-data xjentifika li tinsab fil-fajl tal-applikant għall-użu uniku ta’ dan tal-aħħar, ma twaqqafx applikanti sussegwenti milli japplikaw għal awtorizzazzjoni biex iqiegħdu fis-suq l-istess ikel ġdid, dment li l-applikazzjoni tagħhom tkun abbażi ta’ informazzjoni li tkun inkisbet legalment biex tappoġġa tali awtorizzazzjoni.

(16)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,