(1)

L-aggressjoni militari mir-Russja kontra l-Ukrajna fl-24 ta’ Frar 2022 wasslet għal influss bil-massa ta’ persuni spostati mill-Ukrajna għall-Unjoni, li ħafna minnhom huma nisa u tfal. Diversi Stati Membri qed jiffaċċjaw sfidi bla preċedent sabiex lil dawn it-tfal spostati mill-Ukrajna jintegrawhom malajr fis-sistemi edukattivi tagħhom.

(2)

L-iskema ta’ għajnuna għall-provvista ta’ frott u ħxejjex u ta’ ħalib u prodotti tal-ħalib fi stabbilimenti edukattivi (“l-iskema għall-iskejjel”), stabbilita bir-Regolament (UE) Nru 1308/2013 hija mmirata għat-tfal li jattendu b’mod regolari n-nurseries, l-iskejjel preprimarji jew l-istabbilimenti edukattivi fil-livell primarju jew sekondarju fl-Istati Membri. Għalhekk, it-tfal spostati mill-Ukrajna u integrati fis-sistemi edukattivi tal-Istati Membri huma eliġibbli għall-parteċipazzjoni fl-iskema għall-iskejjel. Minħabba ż-żieda fl-għadd ta’ tfal eliġibbli, f’termini assoluti jew f’perċentwal tal-popolazzjoni, diversi Stati Membri li jinsabu fuq quddiem nett tal-azzjoni ta’ rispons għall-invażjoni tal-Ukrajna mir-Russja jistgħu jiltaqgħu ma’ diffikultajiet fl-implimentazzjoni tal-iskema għall-iskejjel kif ippjanat, jekk ma tiżdiedx l-allokazzjoni tagħhom ta’ għajnuna tal-Unjoni.

(3)

F’konformità mal-Artikolu 3, l-ewwel paragrafu, il-punt (a) tar-Regolament ta’ Implimentazzjoni tal-Kummissjoni (UE) 2017/39 (3), sal-31 ta’ Jannar 2022, l-Istati Membri ressqu t-talbiet tagħhom lill-Kummissjoni, għall-għajnuna tal-Unjoni għall-frott u l-ħxejjex għall-iskejjel u għall-ħalib fl-iskejjel b’rabta mas-sena skolastika 2022/2023, mill-1 ta’ Awwissu 2022 sat-31 ta’ Lulju 2023. Abbażi ta’ dawk it-talbiet, imressqa qabel l-invażjoni tal-Ukrajna mir-Russja, il-Kummissjoni ffissat l-allokazzjonijiet definittivi tal-għajnuna tal-Unjoni skont l-Istat Membru fid-Deċiżjoni ta’ Implimentazzjoni tal-Kummissjoni (UE) 2022/493 (4). L-informazzjoni disponibbli dwar il-livell ta’ użu tal-allokazzjonijiet definittivi tal-għajnuna tal-Unjoni fis-snin skolastiċi li għaddew, minn xi Stati Membri tindika r-riskju li xi Stati Membri jistgħu ma jkunux jistgħu jużaw kompletament l-allokazzjoni definittiva tagħhom.

(4)

Minħabba l-ħtiġijiet il-ġodda li nqalgħu, u bħala turija ta’ solidarjetà tal-Unjoni u tal-Istati Membri mal-Ukrajna, jixraq li jiġu stabbiliti regoli eċċezzjonali li jippermettu lill-Istati Membri biex, sal-15 ta’ Ġunju 2022, iressqu t-tieni talba għall-għajnuna tal-Unjoni għall-frott u l-ħxejjex għall-iskejjel u għall-ħalib fl-iskejjel għall-perjodu mill-1 ta’ Awwissu 2022 sal-31 ta’ Lulju 2023. Din il-possibbiltà jenħtieġ li tkun marbuta mal-ħtieġa li jiġu koperti t-tfal spostati mill-Ukrajna rreġistrati fl-istabbilimenti edukattivi tal-Istati Membri f’dak il-perjodu. Jenħtieġ li l-Istati Membri jkunu jistgħu jindikaw humiex lesti jużaw aktar mill-allokazzjoni definittiva tagħhom tal-għajnuna tal-Unjoni stabbilita fl-Anness I tad-Deċiżjoni ta’ Implimentazzjoni (UE) 2022/493, inkella l-ammont tal-allokazzjoni definittiva li ma jintalabx, f’każ li ma jkunux lesti jużaw l-ammont kollu ta’ dik l-allokazzjoni. Jenħtieġ li l-ewwel possibbiltà tkun limitata għall-Istati Membri li jkunu wrew assorbiment xieraq tal-allokazzjoni definittiva tagħhom tal-għajnuna tal-Unjoni, abbażi tal-eżekuzzjoni finanzjarja fis-sena skolastika 2018/2019, li kienet l-aħħar sena skolastika qabel il-pandemija tal-COVID-19. It-talbiet tagħhom jenħtieġ li jkunu bbażati biss fuq l-għadd ta’ tfal spostati mill-Ukrajna li jaqgħu fil-grupp fil-mira definit fl-istrateġija tal-Istati Membri skont l-Artikolu 2(1), il-punt (f), tar-Regolament ta’ Implimentazzjoni (UE) 2017/39, ġustifikati kif suppost abbażi tad-data disponibbli. Jenħtieġ li l-Istati Membri li ma jressqux it-tieni talba, jitqiesu li kkonfermaw l-allokazzjonijiet definittivi stabbiliti fl-Anness I tad-Deċiżjoni ta’ Implimentazzjoni (UE) 2022/493.

(5)

L-Artikolu 7(1) tar-Regolament ta’ Implimentazzjoni (UE) 2017/39 jistabbilixxi r-regoli għar-riallokazzjoni tal-għajnuna tal-Unjoni. Il-Kummissjoni għandha tiffissa l-ammont definittiv ta’ għajnuna billi talloka mill-ġdid l-allokazzjonijiet indikattivi mhux mitluba jew il-partijiet minnhom mhux mitluba. Jixraq li ssir deroga minn dawk ir-regoli biex il-Kummissjoni tkun tista’ tqis ukoll talbiet ġodda marbuta mal-invażjoni tal-Ukrajna mir-Russja sabiex tiffissa allokazzjoni definittiva riveduta tal-għajnuna tal-Unjoni għall-perjodu mill-1 ta’ Awwissu 2022 sal-31 ta’ Lulju 2023. F’konformità mal-Artikolu 5(5), it-tieni subparagrafu, tar-Regolament (UE) Nru 1370/2013, ir-riallokazzjoni ta’ kwalunkwe ammont mhux mitlub ta’ allokazzjonijiet definittivi tal-għajnuna tal-Unjoni għandha tkun ibbażata fuq l-għadd ta’ tfal fl-Istati Membri ta’ bejn sitta u għaxar snin.

(6)

Filwaqt li titqies it-tieni talba għall-għajnuna tal-Unjoni, hemm bżonn li l-iffissar tal-allokazzjonijiet definittivi tal-għajnuna tal-Unjoni għall-frott u l-ħxejjex għall-iskejjel u għall-ħalib fl-iskejjel għall-perjodu mill-1 ta’ Awwissu 2022 sal-31 ta’ Lulju 2023, isir malajr kemm jista’ jkun biex l-Istati Membri jkunu jistgħu jippjanaw u jwettqu l-attivitajiet preparatorji meħtieġa fi żmien xieraq għall-implimentazzjoni tal-iskema għall-iskejjel. Minħabba dan, jenħtieġ li dan ir-Regolament jidħol fis-seħħ l-għada tal-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(7)

Il-miżuri previsti f’dan ir-Regolament huma skont l-opinjoni tal-Kumitat għall-Organizzazzjoni Komuni tas-Swieq Agrikoli,

(a)

li lesti li jużaw aktar mill-allokazzjoni definittiva tal-għajnuna tal-Unjoni għall-frott u l-ħxejjex fl-iskejjel u/jew għall-ħalib fl-iskejjel stabbilita fl-Anness I tad-Deċiżjoni ta’ Implimentazzjoni (UE) 2022/493 u l-ammont addizzjonali mitlub, f’każ li tkun disponibbli allokazzjoni addizzjonali; inkella

(b)

l-ammont tal-allokazzjoni definittiva tal-għajnuna tal-Unjoni għall-frott u l-ħxejjex fl-iskejjel u/jew għall-ħalib fl-iskejjel stabbilit fl-Anness I tad-Deċiżjoni ta’ Implimentazzjoni (UE) 2022/493 li mhuwiex mitlub, f’każ li ma jkunux lesti jużaw l-ammont kollu ta’ dik l-allokazzjoni.