(1)

Minħabba n-nuqqas tal-Istati Uniti li jġibu l-Att dwar il-Kumpens għall-Persistenza tad-Dumping u għaż-Żamma tas-Sussidji (“CDSOA”, Continued Dumping and Subsidy Offset Act) konformi mal-obbligi tagħhom skont il-ftehimiet tal-Organizzazzjoni Dinjija tal-Kummerċ (“WTO”, World Trade Organization), dazju doganali addizzjonali ad valorem ta’ 4,3 % ġie impost fuq importazzjonijiet ta’ ċerti prodotti li joriġinaw mill-Istati Uniti tal-Amerka skont ir-Regolament (UE) 2018/196. F’konformità mal-awtorizzazzjoni tad-WTO biex tiġi sospiża l-applikazzjoni tal-konċessjonijiet għall-Istati Uniti, il-Kummissjoni se taġġusta ta’ kull sena l-livell ta’ sospensjoni għal-livell ta’ tixjin jew ħsara kkawżat mis-CDSOA fuq l-Unjoni f’dak iż-żmien. Fl-2021, il-livell ta’ sospensjoni ġie aġġustat għal 0,1 % tad-dazju doganali addizzjonali ad valorem u r-Regolament (UE) 2018/196 ġie emendat skont dan (2).

(2)

L-iżborżi mis-CDSOA għall-aktar sena reċenti li għaliha teżisti data disponibbli jirrigwardaw id-distribuzzjoni ta’ dazji anti-dumping u kumpensatorji miġbura matul is-Sena Fiskali 2020 (l-1 ta’ Ottubru 2020 sat-30 ta’ Settembru 2021). Abbażi tad-data ppubblikata mis-Servizz tad-Dwana u tal-Protezzjoni tal-Fruntieri tal-Istati Uniti, il-livell ta’ annullament jew ta’ ħsara kkawżat lill-Unjoni huwa kkalkulat li jammonta għal USD 3 095,94.

(3)

Il-livell ta’ annullament jew ta’ ħsara u konsegwentement, ta’ sospensjoni, naqas. Madankollu, il-livell ta’ sospensjoni ma jistax jiġi aġġustat għal-livell ta’ annullament jew ta’ ħsara billi jiżdiedu jew jitneħħew prodotti mil-lista fl-Anness I tar-Regolament (UE) 2018/196. B’konsegwenza ta’ hekk, f’konformità mal-Artikolu 3(1)(e) ta’ dan ir-Regolament, jenħtieġ li l-Kummissjoni ma tibdilx il-lista ta’ prodotti fl-Anness I u temenda r-rata tad-dazju addizzjonali sabiex taġġusta l-livell ta’ sospensjoni għal-livell ta’ tixjin jew ħsara. Għalhekk jenħtieġ li l-erba’ prodotti elenkati fl-Anness I jinżammu fil-lista u jenħtieġ li r-rata tad-dazju tal-importazzjoni addizzjonali tiġi emendata u stabbilita għal 0,001 %.

(4)

L-effett ta’ dazju tal-importazzjoni addizzjonali ad valorem ta’ 0,001 % fuq l-importazzjonijiet mill-Istati Uniti tal-prodotti fl-Anness I jirrappreżenta, fuq tul ta’ sena, valur ta’ kummerċ li ma jaqbiżx USD 3 095,94.

(5)

Biex ikun żgurat li ma jkun hemm l-ebda dewmien fl-applikazzjoni tar-rata emendata tad-dazju tal-importazzjoni addizzjonali, jenħtieġ li dan ir-Regolament jidħol fis-seħħ fil-jum tal-pubblikazzjoni tiegħu.

(6)

Għalhekk jenħtieġ li r-Regolament (UE) 2018/196 jiġi emendat skont dan,