Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32022R0054

    Regolament Delegat tal-Kummissjoni (UE) 2022/54 tal-21 ta’ Ottubru 2021 li jemenda r-Regolament Delegat (UE) 2020/692 fir-rigward ta’ rekwiżiti addizzjonali għad-dħul fl-Unjoni ta’ ċerti ungulati li joriġinaw mill-Unjoni, li jinġarru lejn pajjiż terz jew territorju biex jipparteċipaw f’avvenimenti, f’eżibizzjonijiet, f’wirjiet u f’shows u mbagħad jinġarru lura lejn l-Unjoni (Test b’rilevanza għaż-ŻEE)

    C/2021/7461

    ĠU L 10, 17.1.2022, p. 1–3 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

    Legal status of the document In force

    ELI: http://data.europa.eu/eli/reg_del/2022/54/oj

    17.1.2022   

    MT

    Il-Ġurnal Uffiċjali tal-Unjoni Ewropea

    L 10/1

    REGOLAMENT DELEGAT TAL-KUMMISSJONI (UE) 2022/54

    tal-21 ta’ Ottubru 2021

    li jemenda r-Regolament Delegat (UE) 2020/692 fir-rigward ta’ rekwiżiti addizzjonali għad-dħul fl-Unjoni ta’ ċerti ungulati li joriġinaw mill-Unjoni, li jinġarru lejn pajjiż terz jew territorju biex jipparteċipaw f’avvenimenti, f’eżibizzjonijiet, f’wirjiet u f’shows u mbagħad jinġarru lura lejn l-Unjoni

    (Test b’rilevanza għaż-ŻEE)

    IL-KUMMISSJONI EWROPEA,

    Wara li kkunsidrat it-Trattat dwar il-Funzjonament tal-Unjoni Ewropea,

    Wara li kkunsidrat ir-Regolament (UE) 2016/429 tal-Parlament Ewropew u tal-Kunsill tad-9 ta’ Marzu 2016 dwar il-mard trażmissibbli tal-annimali u li jemenda u jħassar ċerti atti fil-qasam tas-saħħa tal-annimali (“Liġi dwar is-Saħħa tal-Annimali”) (1), u b’mod partikolari l-Artikolu 239(2) tiegħu,

    Billi:

    (1)

    Ir-Regolament Delegat tal-Kummissjoni (UE) 2020/692 (2) jistabbilixxi, inter alia, ir-rekwiżiti dwar is-saħħa tal-annimali għad-dħul fl-Unjoni ta’ konsenji ta’ ċerti annimali terrestri miżmuma. B’mod iktar partikolari, il-Parti VI ta’ dak ir-Regolament Delegat tistabbilixxi regoli speċjali għad-dħul fl-Unjoni ta’ ċerti komoditajiet li joriġinaw mill-Unjoni u li jirritornaw lejn l-Unjoni. Attwalment, l-Artikolu 177 tar-Regolament Delegat (UE) 2020/692 jinkludi biss regoli speċjali li għandhom jkunu konformi magħhom iż-żwiemel irreġistrati li joriġinaw mill-Unjoni u li jirritornaw lejha wara esportazzjoni temporanja lejn pajjiż terz jew lejn territorju jew żona tiegħu biex jipparteċipaw f’xi kompetizzjonijiet, f’xi tlielaq jew f’xi avvenimenti kulturali ekwestri.

    (2)

    Sabiex tiġi ffaċilitata l-parteċipazzjoni tagħhom f’avvenimenti, f’eżibizzjonijiet, f’wirjiet u f’shows (“avvenimenti”) li jsiru barra mill-Unjoni, jeħtieġ li tiġi prevista deroga minn ċerti rekwiżiti ġenerali tas-saħħa tal-annimali stabbiliti fl-Artikolu 11 tar-Regolament Delegat (UE) 2020/692 għal konsenji ta’ ungulati li joriġinaw mill-Unjoni, jinġarru lejn pajjiż terz jew territorju jew żona tiegħu biex jipparteċipaw f’avvenimenti u mbagħad jinġarru lura lejn l-Unjoni minnufih. Madankollu, biex jiġu minimizzati r-riskji għas-saħħa tal-annimali u filwaqt li titqies is-sitwazzjoni attwali tas-saħħa tal-annimali fir-rigward ta’ ċertu mard li jaffettwa l-annimali porċini u l-pollam, jenħtieġ li dik id-deroga tkun limitata għal ċerti speċijiet ta’ ungulati, jiġifieri għall-annimali bovini, ovini u kaprini (“deroga għall-ungulati”). Għalhekk, jenħtieġ li l-Artikolu 177 tar-Regolament Delegat (UE) 2020/692 jiġi emendat biex jinkludi d-deroga għall-ungulati.

    (3)

    Ir-regoli speċjali għad-deroga għall-ungulati jenħtieġ li jqisu r-riskji potenzjali għas-saħħa tal-annimali li jistgħu jirriżultaw minn dawk it-tipi ta’ moviment għall-avvenimenti, u jenħtieġ li jkunu proporzjonati mar-riskji għas-saħħa tal-annimali involuti. Għaldaqstant jenħtieġ li dawn ir-regoli speċjali jkunu rigorużi biżżejjed biex jiżguraw li l-annimali li jipparteċipaw fl-avvenimenti ma jiġux f’kuntatt ma’ annimali bi status tas-saħħa inferjuri li ma jikkonformawx mar-rekwiżiti kollha tas-saħħa tal-annimali stabbiliti fid-dritt tal-Unjoni.

    (4)

    Barra minn hekk, minħabba s-similarità tal-operazzjonijiet imwettqa fl-avvenimenti mal-operazzjonijiet imwettqa fiċ-ċentri ta’ ġbir f’daqqa, jixraq li jiġu stabbiliti rekwiżiti ekwivalenti għal dawk li huma applikabbli għaċ-ċentri ta’ ġbir f’daqqa fil-pajjiżi terzi jew fit-territorji, li huma stabbiliti fl-Artikolu 20(2)(b) tar-Regolament Delegat (UE) 2020/692, u li huma bbażati fuq ir-rekwiżiti applikabbli fl-Unjoni stabbiliti fir-Regolament Delegat tal-Kummissjoni (UE) 2019/2035 (3).

    (5)

    Minbarra dawk il-miżuri kollha ta’ mitigazzjoni tar-riskju, jeħtieġ ukoll li jiġi ristrett il-perjodu li matulu l-annimali jkunu esposti għar-riskji potenzjali għas-saħħa tal-annimali minħabba dawk it-tipi ta’ movimenti biex jipparteċipaw fl-avvenimenti, u ż-żmien li jdumu barra mit-territorju tal-Unjoni.

    (6)

    Għalhekk, jenħtieġ li l-Artikolu 177 tar-Regolament Delegat (UE) 2020/692 jiġi emendat skont dan,

    ADOTTAT DAN IR-REGOLAMENT:

    Artikolu 1

    L-Artikolu 177 tar-Regolament Delegat (UE) 2020/692 huwa emendat kif ġej:

    1.

    it-titolu huwa sostitwit b’dan li ġej:

    “Artikolu 177

    Rekwiżiti addizzjonali għad-dħul fl-Unjoni ta’ ċerti ungulati li joriġinaw mill-Unjoni, li jinġarru lejn pajjiż terz jew territorju jew żona tiegħu biex jipparteċipaw f’avvenimenti, f’eżibizzjonijiet, f’wirjiet u f’shows u li mbagħad jinġarru lura lejn l-Unjoni”

    2.

    jiżdied il-paragrafu li ġej:

    “3.   B’deroga mill-Artikolu 11, il-konsenji ta’ annimali bovini, ovini u kaprini li joriġinaw mill-Unjoni u li jiġu mċaqilqa għal perjodu ta’ mhux iktar minn 15-il jum lejn pajjiż terz jew territorju jew żona tiegħu biex jipparteċipaw f’avvenimenti, f’eżibizzjonijiet, f’wirjiet jew f’shows (“l-avveniment”), għandhom jitħallew jidħlu fl-Unjoni minn dak il-pajjiż terz jew territorju diment li jikkonformaw mal-kundizzjonijiet li ġejjin:

    (a)

    il-pajjiż terz jew it-territorju jew iż-żona tiegħu fejn iseħħ l-avveniment huma elenkati għad-dħul fl-Unjoni tal-ispeċi speċifika ta’ annimali;

    (b)

    l-istabbiliment fejn iseħħ l-avveniment:

    (i)

    jikkonforma mar-rekwiżiti applikabbli għall-istabbilimenti li jwettqu operazzjonijiet ta’ ġbir f’daqqa ta’ ungulati stabbiliti fl-Artikolu 20(2)(b);

    (ii)

    mal-wasla tal-konsenja fl-istabbiliment u għat-tul kollu tal-avveniment, iżomm biss annimali bovini, ovini jew kaprini li jikkonformaw mar-rekwiżiti rilevanti kollha stabbiliti fid-dritt tal-Unjoni għad-dħul fl-Unjoni ta’ tali annimali;

    (c)

    id-dispaċċ tal-konsenja ta’ annimali mill-Unjoni lejn l-istabbiliment imsemmi fil-punt (b) u minn dak l-istabbiliment lejn l-Unjoni jitwettaq f’mezzi tat-trasport li jikkonformaw mar-rekwiżiti ġenerali rigward il-mezzi tat-trasport tal-annimali terrestri stabbiliti fl-Artikolu 17 u mingħajr ma jinħattu f’xi pajjiż terz ieħor jew f’xi territorju jew żona tiegħu;

    (d)

    l-annimali tal-konsenja ma kellhom l-ebda kuntatt ma’ annimali oħra bi status tas-saħħa inferjuri mill-mument tat-tagħbija għad-dispaċċ mill-Unjoni lejn l-istabbiliment imsemmi fil-punt (b) u għat-tul kollu tal-avveniment sal-wasla tagħhom lura fl-Unjoni.”.

    Artikolu 2

    Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

    Dan ir-Regolament għandu jorbot fl-intier tiegħu u japplika direttament fl-Istati Membri kollha.

    Magħmul fi Brussell, il-21 ta’ Ottubru 2021.

    Għall-Kummissjoni

    Il-President

    Ursula VON DER LEYEN

    (1)  ĠU L 84, 31.3.2016, p. 1.

    (2)  Ir-Regolament Delegat tal-Kummissjoni (UE) 2020/692 tat-30 ta’ Jannar 2020 li jissupplimenta r-Regolament (UE) 2016/429 tal-Parlament Ewropew u tal-Kunsill fir-rigward tar-regoli għad-dħul fl-Unjoni, u l-moviment u l-immaniġġjar wara d-dħul ta’ konsenji ta’ ċerti annimali, prodotti ġerminali u prodotti li joriġinaw mill-annimali (ĠU L 174, 3.6.2020, p. 379).

    (3)  Ir-Regolament Delegat tal-Kummissjoni (UE) 2019/2035 tat-28 ta’ Ġunju 2019 li jissupplimenta r-Regolament (UE) 2016/429 tal-Parlament Ewropew u tal-Kunsill rigward ir-regoli għall-istabbilimenti li jżommu l-annimali terrestri u l-imfaqas, u t-traċċabbiltà ta’ ċerti annimali terrestri miżmuma u tal-bajd għat-tifqis (ĠU L 314, 5.12.2019, p. 115).

    Top