(1)

Fil-Konklużjonijiet tiegħu dwar l-Istrateġija Mill-Għalqa sal-Platt tad-19 ta’ Ottubru 2020, il-Kunsill ħa nota tal-miri għat-tnaqqis tal-pestiċidi msemmija fl-Istrateġija u enfasizza l-ħtieġa għal sforz mill-Istati Membri u l-partijiet ikkonċernati kollha u għal kooperazzjoni, konsultazzjoni u kollaborazzjoni intensivi sabiex tintlaħaq dik il-mira.

(2)

Il-Kunsill laqa’ bi pjaċir ukoll l-objettiv tal-Kummissjoni li jitnaqqsu l-effetti negattivi tal-użu ta’ prodotti għall-protezzjoni tal-pjanti fuq l-ambjent, pereżempju bl-appoġġ għall-iżvilupp ta’ approċċi aktar komprensivi għall-protezzjoni tal-pjanti bbażati fuq il-prinċipji tal-ġestjoni integrata tal-pesti u enfasizza f’dan ir-rigward l-importanza li jiġu żgurati miżuri ta’ ġestjoni integrata tal-pesti li jkunu adegwati u xjentifikament validi u l-promozzjoni tal-użu ta’ prodotti u metodi alternattivi sostenibbli għall-protezzjoni tal-pjanti.

(3)

Barra minn hekk, fakkar fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (1) u appella lill-Kummissjoni biex tibbaża proposti leġiżlattivi fuq valutazzjonijiet tal-impatt bir-reqqa. Huwa qies li kien meħtieġ li jiġu żgurati l-konsistenza u l-koerenza bejn il-miżuri previsti mill-Istrateġija Mill-Għalqa sal-Platt u l-politiki u l-istrateġiji relatati tal-Unjoni. Il-Kunsill enfasizza wkoll li, fir-rigward tat-twettiq tal-objettivi u l-miżuri proposti fl-Istrateġija Mill-Għalqa sal-Platt, jeħtieġ li tingħata attenzjoni xierqa lid-dimensjoni ekonomika kif ukoll id-dimensjonijiet soċjali u ambjentali tas-sistemi tal-ikel sostenibbli, inkluż fir-rigward tal-kompetittività tas-settur tal-agrikoltura u s-setturi relatati tal-Unjoni.

(4)

Fit-22 ta’ Ġunju 2022, il-Kummissjoni ppreżentat lill-Parlament Ewropew u lill-Kunsill proposta għal Regolament dwar l-użu sostenibbli tal-prodotti għall-protezzjoni tal-pjanti u li jemenda r-Regolament (UE) 2021/2115 tal-Parlament Ewropew u tal-Kunsill (2). Il-proposta għandha l-għan li tipprovdi approċċ ambizzjuż biex jiġi indirizzat it-tħassib li qed jikber fis-soċjetà dwar l-użu u r-riskju tal-pestiċidi u l-impatt tagħhom fuq l-ambjent u s-saħħa tal-bniedem. Tinkludi dispożizzjonijiet ġodda dwar l-użu tal-pestiċidi, tekniki alternattivi mhux kimiċi għall-kontroll tal-pesti u ġestjoni integrata tal-pesti. Il-proposta tintroduċi miri legalment vinkolanti tal-Unjoni għal tnaqqis ta’ 50 % fl-użu u r-riskju tal-pestiċidi, filwaqt li tobbliga lill-Istati Membri jistabbilixxu miri nazzjonali ta’ tnaqqis biex tintlaħaq din il-mira ġenerali. Dawk il-miri nazzjonali ma jistgħux jiddevjaw mill-miri tal-Unjoni ta’ 50 % ħlief fil-parametri ta’ formula vinkolanti.

(5)

Il-Kunsill huwa mħasseb li l-valutazzjoni tal-impatt li takkumpanja l-proposta ma tqisx l-impatti possibbli fit-tul tar-Regolament propost fuq is-sigurtà tal-ikel fl-Unjoni. Il-fatt li l-valutazzjoni tal-impatt ġiet konkluża qabel il-gwerra fl-Ukrajna u l-kriżijiet tal-enerġija, tal-fertilizzanti u tal-prezzijiet tal-ikel, ikompli jivvalida dak it-tħassib. Għalhekk, il-Kunsill iqis li jeħtieġ titwettaq analiżi kwantitattiva addizzjonali ta’ għadd ta’ indikaturi sabiex jiġi ddeterminat jekk hux meħtieġ li l-valutazzjoni tal-effetti ekonomiċi u soċjali tal-proposta tiġi aġġustata. B’mod partikolari, il-Kunsill iqis li għandha titwettaq analiżi addizzjonali li tirrifletti l-produzzjoni agrikola tal-Unjoni, it-tnaqqis mistenni fir-rendimenti fl-Unjoni li jirriżulta mit-tnaqqis u r-restrizzjoni fl-użu tal-prodotti għall-protezzjoni tal-pjanti u d-dipendenza potenzjali fuq l-importazzjoni tal-ikel u tal-għalf. Il-Kunsill iqis ukoll li tkun meħtieġa analiżi aktar fil-fond tas-sitwazzjoni tal-intrapriżi żgħar u ta’ daqs medju u tal-profittabbiltà tul il-katina tal-provvista tagħhom.

(6)

Il-Kunsill jieħu nota tad-dokument informali tal-Kummissjoni dwar id-definizzjoni u l-kamp ta’ applikazzjoni dwar żoni sensittivi fil-proposta għal regolament dwar l-użu sostenibbli tal-prodotti għall-protezzjoni tal-pjanti (SUR) tal-15 ta’ Novembru 2022 u s-suġġeriment tiegħu li jitnaqqas id-daqs ta’ dawk iż-żoni biex tiġi żgurata l-fattibbiltà ta’ projbizzjoni jew projbizzjoni parzjali fuq l-użu ta’ prodotti kimiċi għall-protezzjoni tal-pjanti f’dawk iż-żoni, u b’mod partikolari s-suġġeriment li jiġu esklużi ż-żoni sensittivi għan-nitrati mid-definizzjoni ta’ żoni sensittivi. Madankollu, il-Kunsill hu tal-opinjoni li għad hemm bżonn ta’ aktar data u analiżi tal-impatt ta’ miżuri bħal dawn fiż-żoni li jistgħu jitqiesu sensittivi kif ukoll fiż-żoni forestali.

(7)

Fid-dawl ta’ dan kollu, filwaqt li jixtieq li jkompli l-eżami ta’ diversi aspetti tekniċi tal-proposta mingħajr dewmien żejjed, il-Kunsill iqis li huwa meħtieġ studju sabiex jikkomplementa l-valutazzjoni tal-impatt eżistenti tal-proposta, f’konformità mal-Ftehim Interistituzzjonali dwar it-Tfassil Aħjar tal-Liġijiet, speċjalment il-paragrafi 12, 13 u 16 tiegħu kif ukoll il-paragrafu 10 tiegħu dwar l-applikazzjoni tal-Artikolu 241 tat-Trattat dwar il-Funzjonament tal-Unjoni Ewropea,