This document is an excerpt from the EUR-Lex website
Document 32022D1677
Council Decision (EU) 2022/1677 of 26 September 2022 on the position to be taken on behalf of the European Union within the Joint Committee established by the Agreement between the European Union and the Government of the People’s Republic of China on cooperation on, and protection of, geographical indications as regards the adoption of the rules of procedure of the Joint Committee
Deċiżjoni tal-Kunsill (UE) 2022/1677 tas-26 ta’ Settembru 2022 dwar il-pożizzjoni li għandha tittieħed f’isem l-Unjoni Ewropea fi ħdan il-Kumitat Konġunt stabbilit bil-Ftehim bejn l-Unjoni Ewropea u l-Gvern tar-Repubblika tal-Poplu taċ-Ċina dwar il-kooperazzjoni b’rabta ma’ indikazzjonijiet ġeografiċi u l-protezzjoni tagħhom, fir-rigward tal-adozzjoni tar-regoli ta’ proċedura tal-Kumitat Konġunt
Deċiżjoni tal-Kunsill (UE) 2022/1677 tas-26 ta’ Settembru 2022 dwar il-pożizzjoni li għandha tittieħed f’isem l-Unjoni Ewropea fi ħdan il-Kumitat Konġunt stabbilit bil-Ftehim bejn l-Unjoni Ewropea u l-Gvern tar-Repubblika tal-Poplu taċ-Ċina dwar il-kooperazzjoni b’rabta ma’ indikazzjonijiet ġeografiċi u l-protezzjoni tagħhom, fir-rigward tal-adozzjoni tar-regoli ta’ proċedura tal-Kumitat Konġunt
ST/11862/2022/INIT
ĠU L 252, 30.9.2022, p. 64–69
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
|
30.9.2022 |
MT |
Il-Ġurnal Uffiċjali tal-Unjoni Ewropea |
L 252/64 |
DEĊIŻJONI TAL-KUNSILL (UE) 2022/1677
tas-26 ta’ Settembru 2022
dwar il-pożizzjoni li għandha tittieħed f’isem l-Unjoni Ewropea fi ħdan il-Kumitat Konġunt stabbilit bil-Ftehim bejn l-Unjoni Ewropea u l-Gvern tar-Repubblika tal-Poplu taċ-Ċina dwar il-kooperazzjoni b’rabta ma’ indikazzjonijiet ġeografiċi u l-protezzjoni tagħhom, fir-rigward tal-adozzjoni tar-regoli ta’ proċedura tal-Kumitat Konġunt
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207(4), l-ewwel subparagrafu, flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
|
(1) |
Il-Ftehim bejn l-Unjoni Ewropea u l-Gvern tar-Repubblika tal-Poplu taċ-Ċina dwar il-kooperazzjoni b’rabta ma’ indikazzjonijiet ġeografiċi u l-protezzjoni tagħhom (1) (il-“Ftehim”) ġie konkluż permezz tad-Deċiżjoni tal-Kunsill (UE) 2020/1832 (2) u daħal fis-seħħ fl-1 ta’ Marzu 2021. |
|
(2) |
Skont l-Artikolu 10 tal-Ftehim, il-Kumitat Konġunt għandu jiddetermina r-regoli ta’ proċedura tiegħu stess. |
|
(3) |
Huwa xieraq li tiġi stabbilita l-pożizzjoni li għandha tittieħed f’isem l-Unjoni fi ħdan il-Kumitat Konġunt, fir-rigward tar-regoli ta’ proċedura tiegħu, peress li dawk ir-regoli se jkunu vinkolanti fuq l-Unjoni. |
|
(4) |
Sabiex tiġi żgurata l-implimentazzjoni effettiva tal-Ftehim, jenħtieġ li jiġu adottati r-regoli ta’ proċedura tal-Kumitat Konġunt. |
|
(5) |
Għalhekk il-pożizzjoni tal-Unjoni fil-Kumitat Konġunt jenħtieġ li tkun ibbażata fuq l-abbozz ta’ Deċiżjoni mehmuż, |
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f’isem l-Unjoni fil-Kumitat Konġunt stabbilit bil-Ftehim bejn l-Unjoni Ewropea u l-Gvern tar-Repubblika tal-Poplu taċ-Ċina dwar il-kooperazzjoni b’rabta ma’ indikazzjonijiet ġeografiċi u l-protezzjoni tagħhom fir-rigward tal-adozzjoni tar-regoli ta’ proċedura tiegħu għandha tkun ibbażata fuq l-abbozz ta’ Deċiżjoni tal-Kumitat Konġunt mehmuż ma’ din id-Deċiżjoni.
Artikolu 2
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell, is-26 ta’ Settembru 2022.
Għall-Kunsill
Il-President
Z. NEKULA
(1) ĠU L 408I, 4.12.2020 p. 3.
(2) Id-Deċiżjoni tal-Kunsill (UE) 2020/1832 tat-23 ta’ Novembru 2020 dwar il-konklużjoni tal-Ftehim bejn l-Unjoni Ewropea u l-Gvern tar-Repubblika tal-Poplu taċ-Ċina dwar il-kooperazzjoni b’rabta ma’ indikazzjonijiet ġeografiċi u l-protezzjoni tagħhom (ĠU L 408I, 4.12.2020, p. 1).
ABBOZZ
DEĊIŻJONI Nru… TAL-KUMITAT KONĠUNT
ta'…
dwar l-adozzjoni tar-regoli ta’ proċedura tiegħu
IL-KUMITAT KONĠUNT,
Wara li kkunsidra l-Ftehim bejn l-Unjoni Ewropea u u l-Gvern tar-Repubblika tal-Poplu taċ-Ċina dwar il-kooperazzjoni b’rabta ma’ indikazzjonijiet ġeografiċi u l-protezzjoni tagħhom (1), u b’mod partikolari l-Artikolu 10 tiegħu,
Billi:
|
(1) |
Il-Ftehim bejn l-Unjoni Ewropea u l-Gvern tar-Repubblika tal-Poplu taċ-Ċina dwar il-kooperazzjoni b’rabta ma’ indikazzjonijiet ġeografiċi u l-protezzjoni tagħhom (“il-Ftehim”) ġie konkluż mill-Unjoni permezz tad-Deċiżjoni tal-Kunsill (UE) 2020/1832 (2) u daħal fis-seħħ fl-1 ta’ Marzu 2021. |
|
(2) |
Skont l-Artikolu 10 tal-Ftehim, il-Kumitat Konġunt għandu jiddetermina r-regoli ta’ proċedura tiegħu stess. |
|
(3) |
Sabiex tiġi żgurata l-implimentazzjoni effettiva tal-Ftehim, jenħtieġ li jiġu adottati r-regoli ta’ proċedura tal-Kumitat Konġunt, |
ADOTTA DIN ID-DEĊIŻJONI:
Artikolu 1
Ir-regoli ta' proċedura tal-Kumitat Konġunt, kif stipulat fl-Anness għal din id-Deċiżjoni, huma b'dan adottati.
Artikolu 2
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi …, …
Għall-Kumitat Konġunt
Il-Kopresidenti
(1) ĠU L 408I, 4.12.2020 p. 3.
(2) Id-Deċiżjoni tal-Kunsill (UE) 2020/1832 tat-23 ta’ Novembru 2020 dwar il-konklużjoni tal-Ftehim bejn l-Unjoni Ewropea u l-Gvern tar-Repubblika tal-Poplu taċ-Ċina dwar il-kooperazzjoni b’rabta ma’ indikazzjonijiet ġeografiċi u l-protezzjoni tagħhom (ĠU L 408I, 4.12.2020 p. 1).
ANNESS
Regoli ta’ proċedura tal-Kumitat Konġunt
Artikolu 1
Kamp ta’ applikazzjoni u responsabbiltajiet
Il-Kumitat Konġunt stabbilit skont l-Artikolu 10 tal-Ftehim bejn l-Unjoni Ewropea u l-Gvern tar-Repubblika tal-Poplu taċ-Ċina dwar il-kooperazzjoni b’rabta ma' indikazzjonijiet ġeografiċi u l-protezzjoni tagħhom (“il-Ftehim”) għandu jwettaq dmirijietu kif previst fl-Artikolu 10 tal-Ftehim. B’mod partikolari, huwa għandu jkun responsabbli biex:
|
(a) |
jemenda l-Anness I tal-Ftehim fir-rigward tar-referenzi għal-liġi applikabbli fil-Partijiet u jemenda l-Annessi l-oħrajn għall-Ftehim; |
|
(b) |
jiskambja informazzjoni dwar l-iżviluppi leġiżlattivi u ta' politika fir-rigward tal-indikazzjonijiet ġeografiċi u dwar kwalunkwe kwistjoni oħra ta’ interess reċiproku fil-qasam tal-indikazzjonijiet ġeografiċi; |
|
(c) |
jiskambja informazzjoni dwar l-indikazzjonijiet ġeografiċi bil-għan li tiġi kkunsidrata l-protezzjoni tagħhom f’konformità mal-Ftehim. |
Artikolu 2
Kompożizzjoni u presidenza
1. Il-Kumitat Konġunt għandu jkun magħmul minn rappreżentanti tar-Repubblika tal-Poplu taċ-Ċina (“iċ-Ċina”), minn naħa waħda, u minn rappreżentanti tal-Unjoni Ewropea, min-naħa l-oħra.
2. Il-Kumitat Konġunt għandu jkun kopresedut minn rappreżentanti taċ-Ċina u tal-Unjoni Ewropea.
3. Kull kopresident jista' jiddelega l-funzjonijiet tal-kopresident, kollha jew kwalunkwe waħda minnhom, lil deputat nominat, f'liema każ ir-referenzi kollha minn hawn 'il quddiem għall-kopresident għandhom japplikaw bl-istess mod għad-deputat nominat.
4. Kull kopresident għandu jaħtar persuna ta’ kuntatt għall-kwistjonijiet kollha relatati mal-Kumitat Konġunt. Dawk il-persuni ta’ kuntatt għandhom ikunu responsabbli b'mod konġunt għad-dmirijiet segretarjali tal-Kumitat Konġunt.
Artikolu 3
Laqgħat
Skont l-Artikolu 10(2) tal-Ftehim, il-post tal-laqgħa tal-Kumitat Konġunt għandu jalterna bejn il-Partijiet. Il-Kumitat Konġunt għandu jiltaqa' f'ħin u post, u b'mod li jista' jinkludi wkoll l-użu ta' vidjokonferenzi, bi qbil b'mod reċiproku mill-Partijiet, iżda mhux aktar tard minn 90 jum wara t-talba minn kwalunkwe waħda mill-Partijiet.
Artikolu 4
Korrispondenza
1. Il-korrispondenza indirizzata lill-kopresidenti tal-Kumitat Konġunt għandha tintbagħat lill-punti ta’ kuntatt għaċ-ċirkolazzjoni lill-membri tal-Kumitat Konġunt.
2. Il-korrispondenza indirizzata lill-kopresidenti tal-Kumitat Konġunt tista' ssir permezz ta' kull mezz bil-miktub, inkluż permezz tal-posta elettronika.
Artikolu 5
Aġendi għal-laqgħat
1. Għandha titfassal aġenda proviżorja mill-persuni ta' kuntatt qabel kull laqgħa tal-Kumitat Konġunt. Din għandha tintbagħat, flimkien mad-dokumenti rilevanti, lill-membri tal-Kumitat Konġunt inklużi l-kopresidenti tal-Kumitat Konġunt sa mhux aktar tard minn 15-il jum qabel il-laqgħa. L-aġenda proviżorja tista' tinkludi kwalunkwe punt kopert mill-Artikoli 10 u 11 tal-Ftehim.
2. Kwalunkwe waħda mill-Partijiet tista', mill-inqas 21 jum qabel il-laqgħa, titlob li l-punti koperti mill-Artikoli 10 u 11 tal-Ftehim jiġu inklużi fl-aġenda proviżorja. Dawk il-punti għandhom jiġu inklużi fl-aġenda proviżorja.
3. Il-verżjoni finali tal-aġenda proviżorja għandha tiġi ċċirkolata lill-kopresidenti mill-inqas 5 ijiem qabel il-laqgħa.
4. L-aġenda għandha tiġi adottata mill-kopresidenti b'mod unanimu fil-bidu ta' kull laqgħa. Kwalunkwe punt ieħor minbarra dawk li jidhru fl-aġenda proviżorja jista' jitqiegħed fl-aġenda jekk iż-żewġ kopresidenti jaqblu dwar dan.
Artikolu 6
Deċiżjonijiet
1. Il-Kumitat Konġunt għandu jadotta deċiżjonijiet tiegħu b’kunsens kif previsti fl-Artikolu 10(2) tal-Ftehim.
2. Id-deċiżjonijiet tal-Kumitat Konġunt għandhom ikunu ffirmati mill-kopresidenti. Kull deċiżjoni għandha tipprevedi d-data tad-dħul fis-seħħ tagħha.
3. Id-deċiżjonijiet adottati mill-Kumitat Konġunt għandhom juru d-data tal-adozzjoni u deskrizzjoni tas-suġġett tagħhom.
Artikolu 7
Proċedura bil-miktub
1. Id-deċiżjoni tal-Kumitat Konġunt tista' tiġi adottata bi proċedura bil-miktub fejn iż-żewġ Partijiet jaqblu. Il-proċedura bil-miktub għandha tikkonsisti minn skambju ta' noti bejn il-kopresidenti tal-Kumitat Konġunt.
2. Il-kopresident tal-Parti li tipproponi l-użu tal-proċedura bil-miktub għandu jissottometti l-abbozz ta' deċiżjoni lill-kopresident tal-Parti l-oħra, li għandu jwieġeb billi jindika jekk jaċċettax jew le l-abbozz ta’ deċiżjoni. Il-kopresident tal-Parti l-oħra jista' wkoll jipproponi emendi jew jitlob aktar żmien għar-riflessjoni. Jekk ikun hemm qbil dwar l-abbozz ta' Deċiżjoni, dan għandu jiġi adottat skont l-Artikolu 6.
Artikolu 8
Minuti
1. L-abbozz tal-minuti ta' kull laqgħa għandu jitfassal mill-punt ta' kuntatt tal-Parti li tospita l-laqgħa tal-Kumitat Konġunt fi żmien 21 jum mil-laqgħa. L-abbozz tal-minuti għandu jiddikjara r-rakkomandazzjonijiet u d-deċiżjonijiet adottati u jinnota kwalunkwe konklużjoni oħra milħuqa.
2. Il-minuti għandhom jiġu approvati bil-miktub miż-żewġ Partijiet fi żmien 28 jum mil-laqgħa jew sa kwalunkwe data oħra li jiftiehmu dwarha l-Partijiet. Ladarba jiġu approvati, għandhom jiġu ffirmati żewġ kopji oriġinali mill-kopresidenti. Kopja oriġinali tal-minuti għandha tinżamm minn kull kopresident.
Artikolu 9
Spejjeż
1. Kull Parti għandha ġġarrab l-ispejjeż li toħroġ biex tieħu sehem fil-laqgħat tal-Kumitat Konġunt.
2. L-ispejjeż marbuta mal-organizzazzjoni tal-laqgħat u mar-riproduzzjoni tad-dokumenti għandha titħallas mill-Parti li tkun qiegħda torganizza l-laqgħa.
Artikolu 10
Pubbliċità u konfidenzjalità
1. Sakemm ma jiġix deċiż mod ieħor mill-kopresidenti, il-laqgħat tal-Kumitat Konġunt ma għandhomx ikunu pubbliċi.
2. Meta Parti jissotometti informazzjoni kkunsidrata bħala kunfidenzjali skont il-liġijiet u r-regolamenti tagħha lill-Kumitat Konġunt, il-Parti l-oħra għandha tittratta din l-informazzjoni bħala kunfidenzjali.
3. Mingħajr preġudizzju għall-paragrafu 2, kull Parti tista' tiddeċiedi dwar il-pubblikazzjoni tad-deċiżjonijiet u r-rakkomandazzjonijiet tal-Kumitat Konġunt fil-pubblikazzjoni uffiċjali rispettiva tagħha.