(1)

Ir-Regolament (UE) 2018/1240 jistabbilixxi s-Sistema Ewropea ta’ Informazzjoni u ta’ Awtorizzazzjoni għall-Ivvjaġġar (European Travel Information and Authorisation System, “ETIAS”) għal ċittadini ta’ pajjiżi terzi li huma eżenti mir-rekwiżit li jkollhom viża fil-pussess tagħhom għall-finijiet tad-dħul u s-soġġorn fit-territorju tal-Istati Membri.

(2)

Skont l-Artikolu 47(1) tar-Regolament (UE) 2018/1240, l-awtoritajiet tal-fruntieri kompetenti biex iwettqu verifiki fil-fruntieri fil-punti ta’ qsim tal-fruntieri esterni f’konformità mar-Regolament (UE) 2016/399 tal-Parlament Ewropew u tal-Kunsill (2) għandhom l-obbligu li jikkonsultaw is-Sistema Ċentrali tal-ETIAS bl-użu tad-data li tinsab fil-parti tad-dokument tal-ivvjaġġar li tinqara minn magna. Jista’ jkun hemm ċirkostanzi minħabba ħsara teknika li sseħħ fi kwalunkwe parti tas-Sistema ta’ Informazzjoni tal-ETIAS jew minħabba ħsara fl-infrastruttura tal-fruntieri nazzjonali fi Stat Membru li fih awtorità tal-fruntiera jaf ma tkunx tista’ tipproċedi bil-konsultazzjoni msemmija fl-Artikolu 47(1) tar-Regolament (UE) 2018/1240.

(3)

L-iskop ta’ din id-Deċiżjoni huwa li tistabbilixxi miżuri ta’ kontinġenza mudell, inklużi proċeduri ta’ riżerva li għandhom jiġu segwiti mill-awtoritajiet tal-fruntieri fil-fruntieri esterni f’ċirkostanzi li fihom awtorità tal-fruntiera jaf ma tkunx tista’ tipproċedi b’tali konsultazzjoni tas-Sistema Ċentrali tal-ETIAS.

(4)

Il-miżuri ta’ kontinġenza mudell għandhom l-għan li jintużaw kemm bħala linji gwida kif ukoll bħala bażi, aġġustata kif meħtieġ, għall-iżvilupp u l-adozzjoni mill-Istati Membri tal-pjanijiet ta’ kontinġenza nazzjonali tagħhom għall-każijiet fejn awtorità tal-fruntiera ma tkunx tista’ tipproċedi bil-konsultazzjoni tas-Sistema Ċentrali tal-ETIAS meta twettaq verifiki fil-fruntieri fil-punti ta’ qsim tal-fruntieri esterni f’konformità mar-Regolament (UE) 2016/399.

(5)

Jenħtieġ li l-awtoritajiet tal-fruntieri jkollhom il-possibbiltà li jidderogaw temporanjament, f’każ ta’ ħsara teknika, mill-obbligu li jikkonsultaw is-Sistema Ċentrali tal-ETIAS, u li jivverifikaw l-istatus tal-awtorizzazzjonijiet għall-ivvjaġġar permezz tal-għodda ta’ verifika msemmija fl-Artikolu 31 tar-Regolament (UE) 2018/1240. Barra minn hekk, huwa meħtieġ li jiġi stabbilit il-kontenut tan-notifiki mill-awtoritajiet tal-fruntieri fil-każ ta’ impossibbiltà teknika li ssir il-konsultazzjoni tas-Sistema Ċentrali tal-ETIAS minħabba ħsara fl-infrastruttura tal-fruntieri nazzjonali fi Stat Membru.

(6)

Ġaladarba r-Regolament (UE) 2018/1240 jimxi fuq il-passi tal-acquis ta’ Schengen, id-Danimarka, f’konformità mal-Artikolu 4 tal-Protokoll Nru 22 dwar il-pożizzjoni tad-Danimarka, anness mat-Trattat dwar il-Funzjonament tal-Unjoni Ewropea, innotifikat l-implimentazzjoni tar-Regolament (UE) 2018/1240 fil-liġi nazzjonali tagħha. Għalhekk id-Danimarka hija marbuta b’din id-Deċiżjoni.

(7)

Din id-Deċiżjoni ma taqax fil-kamp ta’ applikazzjoni tal-miżuri previsti fid-Deċiżjoni tal-Kunsill 2002/192/KE (3). Tikkostitwixxi żvilupp tad-dispożizzjonijiet tal-acquis ta’ Schengen li l-Irlanda ma tiħux sehem fihom; għalhekk l-Irlanda mhijiex qiegħda tieħu sehem fl-adozzjoni ta’ din id-Deċiżjoni u mhijiex marbuta biha jew soġġetta għall-applikazzjoni tagħha.

(8)

Fir-rigward tal-Iżlanda u n-Norveġja, din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen fis-sens tal-Ftehim konkluż mill-Kunsill tal-Unjoni Ewropea u r-Repubblika tal-Iżlanda u r-Renju tan-Norveġja dwar l-assoċjazzjoni ta’ dawn iż-żewġ Stati mal-implimentazzjoni, l-applikazzjoni u l-iżvilupp tal-acquis ta’ Schengen (4), li jaqgħu fil-qasam imsemmi fl-Artikolu 1, il-punt A, tad-Deċiżjoni tal-Kunsill 1999/437/KE (5).

(9)

Fir-rigward tal-Iżvizzera, din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen, fis-sens tal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen (6) li jaqgħu fil-qasam imsemmi fl-Artikolu 1, il-punt A, tad-Deċiżjoni 1999/437/KE, moqri flimkien mal-Artikolu 3 tad-Deċiżjoni tal-Kunsill 2008/146/KE (7).

(10)

Fir-rigward tal-Liechtenstein, din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen fis-sens tal-Protokoll bejn l-Unjoni Ewropea, il-Komunità Ewropea, il-Konfederazzjoni Żvizzera u l-Prinċipat tal-Liechtenstein dwar l-adeżjoni tal-Prinċipat tal-Liechtenstein mal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen (8), li jaqgħu fil-qasam imsemmi fl-Artikolu 1, il-punt A, tad-Deċiżjoni 1999/437/KE, moqri flimkien mal-Artikolu 3 tad-Deċiżjoni tal-Kunsill 2011/350/UE (9).

(11)

Fir-rigward ta’ Ċipru, il-Bulgarija, ir-Rumanija u l-Kroazja, din id-Deċiżjoni tikkostitwixxi att li jimxi fuq il-passi tal-acquis ta’ Schengen, jew huwa altrimenti marbut miegħu, fis-sens tal-Artikolu 3(1) tal-Att ta’ Adeżjoni tal-2003, l-Artikolu 4(1) tal-Att ta’ Adeżjoni tal-2005 u l-Artikolu 4(1) tal-Att ta’ Adeżjoni tal-2011, rispettivament.

(12)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (10) u ta l-opinjoni tiegħu fit-18 ta’ Frar 2022.

(13)

Il-miżuri previsti f’din id-Deċiżjoni huma skont l-opinjoni tal-Kumitat għall-Fruntieri Intelliġenti (ETIAS),